(vovworld)- ຕົ້ນປີ 2013, ແຂວງ ທາຍງວຽນ ຢູ່ທາງທິດເຫນືອຂອງນະຄອນຫລວງ ຮ່າໂນ້ຍ ໄດ້ຮັບຂ່າວດີ ເມື່ອກຸ່ມບໍລິສັດ Samsung ຕັດສິນລົງທຶນກໍ່ສ້າງໂຮງງານຜະລິດອຸປະກອນໂທລະສັບມືຖື ລວມມູນຄ່າ 2 ຕື້ USD ຢູ່ໃນແຂວງ ແລະ ຫວ່າງແລ້ວນີ້ ກຸ່ມບໍລິສັດແຖວໜ້າຂອງ ສເກົາຫລີ ຢືນຢັນວ່າ ຈະເພີ່ມເງິນລົງທຶນກໍ່ສ້າງໂຮງງານແຫ່ງທີ 2 ຢູ່ແຂວງ ທາຍງວຽນ ດ້ວຍຈຳນວນທຶນ 1,2 ຕື້ USD. ດ້ວຍໂຄງການດັ່ງກ່າວ Samsung ໄດ້ນຳແຂວງ ທາຍງວຽນ ຢືນອັນດັບຫນຶ່ງກ່ຽວກັບການດຶງດູດເງິນລົງທຶນໂດຍກົງຂອງຕ່າງປະເທດ(FDI) ເຂົ້າຫວຽດນາມ.
ຕົວເລກສະຖິຕິຂອງກົມລົງທຶນຕ່າງປະເທດ (FIA) ໃຫ້ເຫັນວ່າ: ໄລ່ມາຮອດເດືອນ 6/2013, ທຶນ FDI ເຂົ້າ ທາຍງວຽນ ກວມເຖິງ 20,6% ຍອດຈຳນວນເງິນລົງທຶນຂອງທັງປະເທດ. ສິ່ງເປັນຫນ້າສົນໃຈ ນັ້ນແມ່ນເມື່ອບັນດາໂຄງການເຕັກໂນໂລຊີສູງເຄື່ອນໄຫວເປັນປົກກະຕິ, ຄາດວ່າ ຈະບັນລຸວົງເງິນສົ່ງອອກປະມານ 20 ຕື້ USD/ປີ, ແກ້ໄຂວຽກເຮັດງານທຳໃຫ້ຄົນງານນັບໝື່ນຄົນ. ພະແນກແຜນການ ແລະ ການລົງທຶນແຂວງ ທາຍງວຽນ ກໍໃຫ້ຮູ້ວ່າ: ໄລ່ມາຮອດປະຈຸບັນ ມີຕື່ມອີກ 6 ໂຄງການສຳຮອງຂອງບໍລິສັດ Samsung ໄດ້ຮັບຫນັງສືອະນຸຍາດໃຫ້ລົງທຶນ ດ້ວຍຍອດຈຳນວນທຶນຈົດທະບຽນຄາດວ່າ 100 ລ້ານ USD. ບັນດາໂຄງການສຳຮອງດັ່ງກ່າວໄດ້ນຳມາເຊິ່ງຜົນປະໂຫຍດຫລາຍຢ່າງໃຫ້ແກ່ທ້ອງຖິ່ນ. ເປັນຫນ້າສົນໃຈນັ້ນແມ່ນ ບັນດາໂຄງການນີ້ ໄດ້ ແລະ ພວມເປີດແງ່ຫວັງນຳ ທາຍງວຽນ ກາຍເປັນທ້ອງຖິ່ນດຶງດູດຫລາຍໂຄງການເຕັກໂນໂລຊີສູງ, ສ້າງທ່າເຕີບໂຕໃຫ້ແກ່ການສົ່ງອອກ, ສ້າງປະຖົມປັດໄຈເພື່ອໃຫ້ ທາຍງວຽນ ກາຍເປັນຕົວເມືອງອຸດສາຫະກຳທັນສະໄຫມ, ເປັນສູນພັດທະນາເຕັກໂນໂລຊີສູງຢູ່ພາກເຫນືອຫວຽດນາມ. ໝາກຜົນດັ່ງກ່າວກໍສ່ອງແສງໃຫ້ເຫັນບັນດາຄວາມມານະພະຍາຍາມຢ່າງບໍ່ຢຸດຢັ້ງຂອງແຂວງ ທາຍງວຽນ ໃນການຜັນຂະຫຍາຍບັນດາມາດຕະການດຶງດູດເງິນລົງທຶນຕ່າງປະເທດຢ່າງຄົບຊຸດ, ເປັນຕົ້ນແມ່ນດຶງດູດບັນດາໂຄງການເຕັກໂນໂລຊີສູງ, ມີຂອບຂະຫນາດໃຫຍ່ເຂົ້າບັນດາເຂດອຸດສາຫະກຳ. ທ່ານ ຟານແມ້ງເກືອງ, ຫົວຫນ້າຄະນະຄຸ້ມຄອງເຂດອຸດສາຫະກຳ ທາຍງວຽນ ໃຫ້ຮູ້ວ່າ:
“ຄະນະຄຸ້ມຄອງເຂດອຸດສາຫະກຳ ທາຍງວຽນ ສຸມໃສ່ຫນູນຊ່ວຍບັນດານັກລົງທຶນສຳພັດກັບລະບົບກົນໄກນະໂຍບາຍດຶງດູດເງິນລົງທຶນເຂົ້າບັນດາເຂດອຸດສາຫະກຳ, ເປີດເຜີຍແຜນຜັງນຳໃຊ້ທີ່ດິນຢູ່ບັນດາເຂດອຸດສາຫະກຳ, ປ່ຽນໃຫມ່ວຽກງານຂົນຂວາຍ, ສົ່ງເສີມການລົງທຶນຕາມທິດເລືອກເຟັ້ນບັນດາໂຄງການມີຂອບຂະຫນາດລົງທຶນໃຫຍ່, ທັນສະໄຫມ, ບໍ່ກໍ່ມົນລະພິດເຖິງສິ່ງແວດລ້ອມ.”
ໃນຊຸມປີມໍ່ໆມານີ້, ບັນດານັກລົງທຶນເຂົ້າມາ ທາຍງວຽນ ບໍ່ເສົ້າໃຈຕໍ່ບັນດາລະບຽບການບໍລິຫານ. ກົນໄກປະຕູດຽວເຊື່ອມຕໍ່ ບັນດາອົງການບໍລິຫານຂອງແຂວງ ທາຍງວຽນ ໄດ້ຮັບການຜັນຂະຫຍາຍແຕ່ປີ 2008 ໄດ້ປະກອບສ່ວນຫລຸດຜ່ອນເວລາເຮັດລະບຽບການບໍລິຫານໃຫ້ແກ່ນັກລົງທຶນ. ທ່ານນາງ ຟານທິຍູງ, ພະນັກງານບໍລິຫານ ເມືອງ ໂຝອຽນ ຊື່ງແມ່ນແຫ່ງທີ່ມີບັນດາໂຄງການລົງທຶນຂອງກຸ່ມບໍລິສັດ Samsung ຢູ່ເຂດອຸດສາຫະກຳ ອຽນບີ່ງ ໃຫ້ຮູ້ວ່າ:
ກຸ່ມບໍລິສັດ Samsung ຢູ່ທາຍງວຽນ
ພາບ:internet
|
“ໂດຍຜັນຂະຫຍາຍຕາມຂໍ້ຕົກລົງຫລ້າສຸດຂອງຄະນະກຳມະການປະຊາຊົນແຂວງ ກ່ຽວກັບການຫຼຸດຜ່ອນບັນດາລະບຽບການບໍລິຫານໃຫ້ກະທັດລັດກວ່າ, ບັນດາອົງການເຮັດລະບຽບການບໍລິຫານຂອງແຂວງບໍ່ເພີ່ມລະບຽບການຕື່ມອີກ ແລະ ຕິດຕາມຂັ້ນຕອນເຮັດວຽກຂອງພະນັກງານໃນການຕ້ອນຮັບ, ແນະນຳ, ອະທິບາຍໃຫ້ແກ່ນັກລົງທຶນ, ເລ່ັງລັດການມອບຄືນຜົນຂອງການຈົດທະບຽນລົງທຶນ. ສິ່ງດັ່ງກ່າວໄດ້ນຳມາເຊິ່ງປະສິດທິຜົນຢ່າງແທດຈິງ. ບັນດານັກລົງທຶນພຶງພໍໃຈທີ່ສຸດຕໍ່ວິທີປະຕິບັດຂອງພວກຂ້າພະເຈົ້າ.”
ພ້ອມກັບການຍູ້ແຮງການປະຕິຮູບບໍລິຫານ, ວຽກງານບຸກເບີກຫນ້າພຽງກໍໄດ້ຮັບການຜັນຂະຫຍາຍຢ່າງຕັ້ງຫນ້າ ດ້ວຍການເຂົ້າຮ່ວມຂອງທັງລະບົບການເມືອງ, ສ້າງຄວາມເຫັນດີເຫັນພ້ອມລະຫວ່າງປະຊາຊົນທ້ອງຖິ່ນ ກັບອຳນາດການປົກຄອງ ແລະ ບັນດາອົງການກ່ຽວຂ້ອງ ເພື່ອມອບສົ່ງຫນ້າພຽງຢ່າງທັນການ, ສ້າງຄວາມໄວ້ເນື້ອເຊື່ອໃຈໃຫ້ແກ່ນັກລົງທຶນ. ທ່ານ ຫງວຽນດືກຮ່ວາ, ຜູ້ຕາງຫນ້ານັກລົງທຶນກໍ່ສ້າງພື້ນຖານໂຄງລ່າງເຂດອຸດສາຫະກຳ ອຽນບີ່ງ ໃຫ້ຮູ້ວ່າ:
“ເມື່ອດຳເນີນການລົງທຶນເຂົ້າເຂດອຸດສາຫະກຳ ພວກຂ້າພະເຈົ້າເຫັນວ່າ ບັນດາລະບຽບການສະຫນອງ ແລະ ມອບທີ່ດິນກໍຄືວຽກງານຊົດເຊີຍການບຸກເບີກຫນ້າພຽງແມ່ນວ່ອງໄວ, ພິເສດ ວຽກງານຮັກສາຄວາມເປັນລະບຽບຮຽບຮ້ອຍເພື່ອຮັບປະກັນການເຄື່ອນໄຫວຂອງວິສາຫະກິດ. ການນຳແຂວງ ໄດ້ຈັດການພົບປະແລກປ່ຽນວຽກງານເປັນປະຈຳເພື່ອແກ້ໄຂຄວາມຫຍຸ້ງຍາກ, ຊ່ວຍວິສາຫະກິດ, ບັນດານັກລົງທຶນມີຄວາມອຸ່ນອ່ຽນໃຈໃນການຜັນຂະຫຍາຍໂຄງການ.”
ຖັດຈາກບໍລິສັດ Samsung, ໃນໄລຍະມໍ່ໆມານີ້ ມີວິສາຫະກິດຕ່າງປະເທດຫລາຍແຫ່ງກໍໄດ້ມາຊອກຮູ້ກາລະໂອກາດລົງທຶນຢູ່ ທາຍງວຽນ. ໃນນັ້ນມີບໍລິສັດລົງທຶນຫລາຍແຫ່ງມາຈາກ ຍີ່ປຸ່ນ, ສເກົາຫລີ, ຮົ່ງກົງປະເທດຈີນ, ສິງກະໂປ… ຄາດວ່າໃນປີ 2013, ທາຍງວຽນ ຈະດຶງດູດທຶນ FDI ປະມານ 4 ຕື້ USD. ດ້ວຍບັນດາໝາກຜົນບັນລຸໄດ້ໃນວຽກງານດຶງດູດການລົງທຶນຂອງແຂວງ ໃນ 7 ເດືອນຕົ້ນປີ 2013, ແຂວງ ທາຍງວຽນ ພວມສືບຕໍ່ສ້າງເງື່ອນໄຂສະດວກທີ່ສຸດໃຫ້ແກ່ວຽກງານດຶງດູດການລົງທຶນ, ຊ່ວຍໃຫ້ບັນດານັກລົງທຶນ, ພິເສດແມ່ນບັນດາກຸ່ມບໍລິສັດນາໆຊາດສືບຕໍ່ເປີດກວ້າງການລົງທຶນ, ສ້າງທ່ວງທ່າໃຫ້ແກ່ການເຕີບໂຕເສດຖະກິດສັງຄົມ. ແຂວງ ທາຍງວຽນ ຈະສືບຕໍ່ເພີ່ມທະວີການປະຕິບັດໂຄສະນາພາບພົດຂອງທ້ອງຖິ່ນ ທາຍງວຽນ ທີ່ເຕັມໄປດ້ວຍຄວາມສາມາດບົ່ມຊ້ອນ ແລະ ພວມພັດທະນາ ນັບມື້ນັບຂະຫຍັນຂັນເຄື່ອນກວ່າ, ສູ້ຊົນກາຍເປັນເຂດເສດຖະກິດຈຸດສຸມທາງທິດເຫນືອນະຄອນຫລວງ ຮ່າໂນ້ຍ, ສູນເສດຖະກິດເຂດຫວຽດບັກ(ທິດເຫນືອຫວຽດນາມ).