(vovworld) - ໃນໄລຍະຜ່ານມາ, ຂະແໜງທະນາຄານໄດ້ເປັນເຈົ້າການ, ມີໄຫວພິບໃນການບໍລິຫານນະໂຍບາຍເງິນຕາ ແລະ ຜົນງານພົ້ນເດັ່ນທີ່ສຸດແມ່ນຫລຸດຜ່ອນອັດຕາດອກເບ້ຍ, ເພີ່ມສິນເຊື່ອຢ່າງເໝາະສົມ. ອັດຕາແລກປ່ຽນເງິນຕາເປັນປົກກະຕິ, ການສະສົມເງິນຕາຕ່າງປະເທດເພີ່ມຂຶ້ນສູງ, ລະດັບເຕີບໂຕບ້ວງສິນເຊື່ອບັນລຸຜົນງານດີພໍສົມຄວນ, ໄດ້ປະກອບສ່ວນເຮັດໃຫ້ການຜະລິດດຳເນີນທຸລະກິດພັດທະນາເປັນປົກກະຕິ. ປີ 2016, ຂະແໜງທະນາຄານຈະສືບຕໍ່ມີບັນດາມາດຕະການບໍລິຫານອັດຕາແລກປ່ຽນເງິນຕາໃຫ້ເໝາະສົມ ແລະ ເປັນເຈົ້າການກັບຕະຫຼາດກ່ວາອີກ, ພິເສດ, ແມ່ນບັນດາການປ່ຽນແປງໃຫຍ່ໃນຕະຫຼາດໂລກ. ບົດຂຽນ “ບໍລິຫານອັດຕາແລກປ່ຽນເງິນຕາຢ່າງມີໄຫວພິບ - ຈຸດໃໝ່ໃນການບໍລິຫານເສດຖະກິດປີ2016” ຂອງວັນຮ໋ຽວ, ນັກຂ່າວ VOV.
ປີ 2015, ທະນາຄານແຫ່ງລັດໄດ້ບໍລິຫານປະລິມານເງິນຕາສະໜອງຢ່າງເໝາະສົມຕາມຄາດໝາຍໜູນຊ່ວຍການຮັບປະກັນອັດຕາແລກປ່ຽນເງິນຕາ ແລະ ຕະຫຼາດເງິນຕາຕ່າງປະເທດ, ຄວບຄຸມໄພເງິນເຟີ້ແຕ່ຍັງຄົງຮັບປະກັນບັນດາຄາດໝາຍຫລຸດຜ່ອນອັດຕາດອກເບ້ຍຢ່າງກົມກຽວ, ເພີ່ມບ້ວງສິນເຊື່ອໃຫ້ເໝາະສົມ ແລະ ແກ້ໄຂໜິີ້ເສຍ. ຍອດເຄື່ອງມືຊຳລະໃນປີ 2015 ເພີ່ມຂຶ້ນກ່ວາ 13,5% ເມື່ອທຽບໃສ່ປີ 2014.
ເຖິງວ່າ, ອັດຕາດອກເບ້ຍຖືກຫລຸດລົງແຕ່ວ່າການລະດົມທຶນຍັງເພີ່ມຂຶ້ນສູງ, ສ້າງເງື່ອນໄຂໃຫ້ແກ່ບັນດາອົງການສິນເຊື່ອໄດ້ຕອບສະໜອງບ້ວງສິນເຊື່ອໃຫ້ແກ່ພື້ນຖານເສດຖະກິດ. ບັນດາອົງການສິນເຊື່ອກໍພ້ອມທີ່ຈະຕອບສະໜອງທຶນໃຫ້ແກ່ພື້ນຖານເສດຖະກິດ. ຕະຫຼາດເງິນຕາເປັນປົກກະຕິ, ລຸລ່ວງຍ້ອນໄດ້ປະຕິບັດບັນດາມາດຕະການສະໜອງເງິນຢ່າງຄົບຊຸດ, ສົມທົບກັບເຄື່ອງມືໜູນຊ່ວຍການຊຳລະໃຫ້ ບັນດາອົງການໜີ້ເສຍ, ເພີ່ມທະວີການແກ້ໄຂໜິ້ສິນ, ສ້າງໂຄງປະກອບຊັບສົມບັດຄືນໃໝ່, ເອົາໃຈໃສ່ເປັນພິເສດໃນການຄຸ້ມຄອງຄວາມສ່ຽງສຳລັບການຊຳລະ, ຮັບປະກັນຄວາມປອດໄພໃຫ້ລະບົບ. ນອກຈາກນັ້ນ, ອັດຕາແລກປ່ຽນເງິນຕາ ແລະ ຕະຫຼາດເງິນຕາຕ່າງປະເທດສືບຕໍ່ໄດ້ຮັບປະກັນເປັນປົກກະຕິ, ຄວາມເຊື່ອໝັ້ນຕໍ່ເງິນຕາ ຫວຽດນາມ ໄດ້ຮັບການປັບປຸງ, ສະພາບການໃຊ້ເງິນໂດລາສະຫະລັດ ໃນພື້ນຖານເສດຖະກິດສືບຕໍ່ຫລຸດລົງ, ຄວາມຕ້ອງການເງິນຕາຕ່າງປະເທດຂອງບັນດາອົງການ, ສ່ວນບຸກຄົນລ້ວນແຕ່ໄດ້ຮັບການຕອບສະໜອງຢ່າງຄົບຖ້ວນ, ທັນການ ແລະ ຖືກຕ້ອງຕາມກົດໝາຍ. ໝາກຜົນຕັ້ງໜ້າຂອງຕະຫຼາດເງິນຕາຕ່າງປະເທດໃນປີຜ່ານມາໄດ້ສະທ້ອນໃຫ້ເຫັນຄວາມເປັນເຈົ້າການໃນບັນດາມາດຕາການບໍລິຫານນະໂຍບາຍເງິນຕາ, ມີໄຫວພິບໃນການດັດປັບອັດຕາແລກປ່ຽນສະເລ່ຍລະຫວ່າງທະນາຄານຂຶ້ນ 3% ແລະ ຫລຸດຜ່ອນອັດຕາແລກປ່ຽນແຕ່ +1% ຂຶ້ນ +3% ເພື່ອຮັບມືຢ່າງທັນການ ກັບບັນດາຜົນກະທົບທີ່ບໍ່ມີຜົນປະໂຫຍດຈາກຕະຫຼາດການເງິນສາກົນ.
ພາບປະກອບ
|
ກົນໄກການບໍລິຫານອັດຕາແລກປ່ຽນເງິນຕານີ້ໄດ້ຮັບການຕີລາຄາຢ່າງຕັ້ງໜ້າຈາກບັນດາວິສາຫະກິດພາຍໃນປະເທດ. ທ່ານ ບູ່ຍງອກບ໋າວ, ປະທານສະພາບໍລິຫານກຸ່ມບໍລິສັດນຳ້ມັນແອັດຊັງ ຖືວ່າ: ເລື່ອງຮັກສາອັດຕາແລກປ່ຽນ ແລະ ຕະຫຼາດເງິນຕາຕ່າງປະເທດເປັນປົກກະຕິ, ປະກອບສ່ວນເພີ່ມຄວາມເຊື່ອໝັ້ນຕໍ່ສະກຸນເງິນ ຫວຽດນາມ, ໜູນຊ່ວຍວິວັດແຫ່ງການເຊື່ອມໂຍງຂອງວິສາຫະກິດ ຫວຽດນາມ, ພິເສດແມ່ນໃນສະພາບການ ຈີນ ດັດປັບຫລຸດລາຄາເງິນຢວນ, ລາຄານຳ້ມັນມີການເໜັງຕີງຕາມທິດຫລຸດລົງ:
“ຖ້າຫາກຄ່າໃຊ້ຈ່າຍດ້ານການເງິນໃນປີ 2011, ນັບທັງການເໜັງຕີງກ່ຽວກັບອັດຕາແລກປ່ຽນໃນກຸ່ມບໍລິສັດແມ່ນປະມານກ່ວາ 2000 ຕື້ດົ່ງ, ມາຮອດປີ 2015 ນີ້, ຄ່າໃຊ້ຈ່າຍດ້ານການເງິນກໍຄືອັດຕາແລກປ່ຽນໃນປີ 2015 ບັນລຸພຽງ 500 ຕື້ດົ່ງເທ່ົານັ້ນ, ໝາຍຄວາມວ່າຫນ້ອຍກ່ວາ ແລະ ມີສະຖຽນລະພາບກ່ວາ. ສິ່ງດັ່ງກ່າວໄດ້ສ້າງຄວາມສະດວກອັນໃຫຍ່ຫຼວງທີ່ສຸດໃຫ້ແກ່ວິສາຫະກິດ.”
ປີ 2016, ສະພາບເສດຖະກິດໂລກບັນລຸລະດັບເຕີບໂຕດີພໍສົມຄວນແຕ່ບໍ່ສະໝຳ່ສະເໝີ, ບັນດາລັດຖະນະໂຍບາຍບໍລິຫານຂອງບັນດາປະເທດມະຫາອຳນາດຈະ ສົ່ງຜົນສະທ້ອນເຖິງພື້ນຖານເສດຖະກິດທົ່ວໂລກ, ຫວຽດນາມ ໄດ້ກຳນົດຄາດໝາຍ ແລະ ບັນດາມາດຕະການຈຸດສຸມກ່ຽວກັບການບໍລິຫານນະໂຍບາຍເງິນຕາປີ 2016. ຕາມນັ້ນແລ້ວ, ຂະແໜງທະນາຄານສືບຕໍ່ສຸມໃສ່ເຂົ້າໃນບັນດາມາດຕະການຈຸດສຸມນັ້ນແມ່ນບໍລິຫານນະໂຍບາຍເງິນຕາ, ຄວບຄຸມໄພເງິນເຟີ້ໃຫ້ຢູ່ໃນລະດັບຕຳ່ກ່ວາ 5%, ຮັບປະກັນເສດຖະກິດມະຫາພາກເປັນປົກກະຕິ, ປະກອບສ່ວນເຂົ້າໃນການເຕີບໂຕເສດຖະກິດຢູ່ໃນລະດັບທີ່ເໝາະສົມປະມານ 6,7%. ໃນນັ້ນ, ເລື່ອງເປັນເຈົ້າການ, ມີໄຫວພິບໃນນະໂຍບາຍດັດປັບອັດຕາແລກປ່ຽນຈະສືບຕໍ່ໄດ້ຮັບຖືເປັນສຳຄັນໜັກເພື່ອແນໃສ່ຮັບປະກັນຈຸດໝາຍເປີດກ້ວາງລະດັບເຕີບໂຕໄປຄຽງຄູ່ກັບປະສິດທິຜົນ, ມີຄວາມປອດໄພ ແລະ ເໝາະສົມກັບຄວາມຕ້ອງການຂອງພື້ນຖານເສດຖະກິດ. ທ່ານນາງຮອງຜູ້ວ່າການທະນາຄານແຫ່ງລັດ ຫວຽດນາມ ຫງວຽນທິຮ່ົງ, ຢັ້ງຢືນວ່າ:
“ການບໍລິຫານອັດຕາດອກເບ້ຍ, ອັດຕາແລກປ່ຽນເງິນຕາໃຫ້ເໝາະສົມກັບການສ້າງຄວາມດຸ່ນດຽງມະຫາພາກ ກໍຄືການຜັນປ່ຽນໃນຕະຫຼາດການເງິນສາກົນ ຍາມໃດກໍຮັບປະກັນທິດນຳຍົກສູງທີ່ຕັ້ງຂອງສະກຸນເງິນ ຫວຽດນາມ. ສຳລັບການບໍລິຫານບ້ວງສິນເຊື່ອແມ່ນຕ້ອງຊາບຊຶມທິດນຳເປີດກ້ວາງສິນເຊື່ອໄປຄຽງຄູ່ກັບຄວາມປອດໄພ ແລະ ມີປະສິດທິຜົນ. ໄລຍະຈະມາເຖິງ, ທະນາຄານແຫ່ງລັດກໍຈະມຸ່ງໄປເຖິງວິທີການບໍລິຫານອັດຕາແລກປ່ຽນເງິນຕາຢ່າງມີໄຫວພິບກ່ວາ, ຮັບປະກັນສະຖຽນລະພາບຂອງຕະຫຼາດເງິນຕາຕ່າງປະເທດ ປະກອບສ່ວນເຂົ້າໃນການຮັບປະກັນເສດຖະກິດມະຫາພາກຂອງປະເທດຊາດໃຫ້ໝັ້ນຄົງ.”
ພ້ອມກັນນັ້ນ, ທະນາຄານແຫ່ງລັດສືບຕໍ່ປະຕິບັດບັນດາມາດຕະການຕາມວິວັດການສ້າງໂຄງປະກອບບັນດາອົງການສິນເຊື່ອຄືນໃໝ່ ແລະ ແກ້ໄຂໜີ້ເສຍຕາມບັນດາແຜນຮ່າງເຊິ່ງລັດຖະບານໄດ້ຮັບຮອງເອົາ, ເພີ່ມທະວີວຽກງານກວດກາ, ຕິດຕາມກວດກາທະນາຄານ, ສືບຕໍ່ຜັນຂະຫຍາຍບັນດາມາດຕະການແກ້ໄຂໜີ້ເສຍຢ່າງຄົບຊຸດ ແລະ ຄວບຄຸມ, ຍົກສູງຄຸນນະພາບສິນເຊື່ອ.
ປີ 2016, ທະນາຄານແຫ່ງລັດປະຕິບັດການນຳໃຊ້ບັນດາລະບົບມາດຖານຄວາມປອດໄພຕາມມາດຕະຖານສາກົນເພື່ອແນໃສ່ຍົກສູງຄວາມປອດໄພຂອງລະບົບເງິນຕາ ຫວຽດນາມ. ກົນໄກບໍລິຫານອັດຕາແລກປ່ຽນເງິນຕາແມ່ນຕາມກົດເກນຂອງຕະຫຼາດ. ນະໂຍບາຍເງິນຕາຕາມທິດມີໄຫວພິບກ່ວາ ເພື່ອແນໃສ່ຮັບປະກັນມູນຄ່າເງິນໃຫ້ເປັນປົກກະຕິ, ປະກອບສ່ວນຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ສ້າງເງື່ຶອນໄຂຍົກສູງປະສິດທິຜົນການປຸກລະດົມ ແລະ ຈັດແບ່ງແຫຼ່ງທຶນໃນພື້ນຖານເສດຖະກິດ, ຈາກນັ້ນຊຸກຍູ້ລະດັບເຕີບໂຕເສດຖະກິດໃຫ້ເໝາະສົມກັບບັນດາຄາດໝາຍມະຫາພາກທີ່ວາງອອກໃນໄລຍະແຕ່ 2016 – 2020 ຢ່າງໝັ້ນຄົງ.