(vovworld) ປີ 2013 ເປັນຂີດໝາຍບັນດາການກະທົບຕາມທິດຕັ້ງຫນ້າໃນການບໍລິຫານນະໂຍບາຍເງິນຕາສຳລັບພື້ນຖານເສດຖະກິດ. ເລື່ອງທະນາຄານແຫ່ງລັດຫວຽດນາມ ປະຕິບັດນະໂຍບາຍເງິນຕາ ດ້ວຍບັນດາມາດຕະການທີ່ຖືກຕ້ອງ ແລະ ທັນການ ໄດ້ປະກອບສ່ວນສຳຄັນເຂົ້າໃນການປະຕິບັດຈຸດໝາຍບໍລິຫານເສດຖະກິດຂອງລັດຖະບານ ນັ້ນແມ່ນຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້ ແລະ ນຳພື້ນຖານເສດຖະກິດຫລຸດພົ້ນອອກຈາກະພາບຊັກຊ້າ. ນີ້ແມ່ນເນື້ອໃນບົດຂຽນຂອງນັກຂ່າວໂຕຕວນ ທີ່ພາດຫົວເລື່ອງວ່າ:“ ປີ 2013 ແມ່ນປີສຳເລັດຜົນໃນການບໍລິຫານນະໂຍບາຍເງິນຕາ.
ພາບປະກອບ:tapchitaichinh.vn
|
ປີ 2013, ເສດຖະກິດຫວຽດນາມສ້າງຂີດໝາຍສຳຄັນເມື່ອສະພາບໄພເງິນເຟີ້ໄດ້ຮັບການຄວບຄຸມ, ເຖິງວ່າການຈະເລີນເຕີບໂຕຍັງຢູ່ໃນລະດັບຕຳ່ຢູ່ກໍຕາມ ແຕ່ໄດ້ປະກົດອອກບັນດາສັນຍານຟື້ນຕົວພື້ນຖານເສດຖະກິດ. ຕົວເລກຂອງກົມໃຫຍ່ສະຖິຕິໃຫ້ເຫັນວ່າ: ຍອດຜະລິດະຕະພັນພາຍໃນ GDP ເພີ່ມຂຶ້ນພຽງ 5,42%, ແຕ່ດັດຊະນີລາຄາໃຊ້ສອຍ CPI ຢູ່ໃນລະດັບ 6,04% ຊື່ງແມ່ນລະດັບຕຳ່ສຸດໃນ 10 ປີມານີ້. CPI ບໍ່ເພີ່ມຂຶ້ນປານໃດຍ້ອນໝາກຜົນການບໍລິຫານນະໂຍບາຍເສດຖະກິດມະຫາພາກ, ພິເສດແມ່ນນະໂຍບາຍເງິນຕາ. ປີ 2013, ທະນາຄານແຫ່ງລັດໄດ້ບໍລິຫານລະດັບສະຫນອງເງິນຕາເປັນຢ່າງດີ, ສະນັ້ນຄວບຄຸມໄພເງິນເຟີ້ໄດ້, ລາຄາທັນຍາຫານ, ອາຫານເພີ່ມຂຶ້ນພຽງເລັກນ້ອຍ. ດຣ ເຈີນຢູລີກ, ສະມາຊິກສະພານະໂຍບາຍເງິນຕາແຫ່ງຊາດໃຫ້ຂໍ້ສັງເກດວ່າ:
“ການປະກອບສ່ວນໃຫຍ່ສຸດຂອງນະໂຍບາຍເງິນຕານັ້ນແມ່ນຄວບຄຸມໄພເງິນເຟີ້. ຖ້າຫາກປີ 2011, ດັດຊະນີ CPI ເພີ່ມຂື້ນກວ່າ 18%, ປີ 2012 ລົງເຫລືອພຽງ 6,81%, ປີ 2013 ກໍເຊັ່ນດຽວກັນກັບປີ 2012. ຜົນສຳເລັດທີ 2 ແມ່ນ ອັດຕາແລກປ່ຽນເງິນຕາຕ່າງປະເທດກັບເງິນດົງຂອງຫວຽດນາມໄດ້ຮັບການຮັກສາເປັນປົກກະຕິ ແລະ ລະດັບສະສົມເງິນຕາຕ່າງປະເທດກໍເພີ່ມຂຶ້ນ. ທີສາມ ໝາກຜົນສຳຄັນນັ້ນແມ່ນທັງຄວບຄຸມໄພເງິນເຟີ້ທັງຫລຸດຜ່ອນອັດຕາດອກເບ້ຍ. ນີ້ແມ່ນວຽກງານຫຍຸ້ງຍາກທີ່ສຸດຊື່ງຫວຽດນາມປະຕິບັດໄດ້.”
ຜົນງານສຳຄັນຫນຶ່ງອີກ ຂອງຂະແຫນງທະນາຄານໃນປີຜ່ານມາເຊິ່ງໄດ້ສົ່ງຜົນກະທົບຢ່າງແຮງເຖິງການແກ້ໄຂຄວາມຫຍຸ້ງຍາກໃຫ້ແກ່ບັນດາວິສາຫະກິດ, ປະກອບສ່ວນເຂົ້າໃນວິວັດທະນາການຟື້ນຕົວພື້ນຖານເສດຖະກິດ, ນັ້ນແມ່ນ ນະໂຍບາຍຫລຸດຜ່ອນອັດຕາດອກເບ້ຍໃຫ້ກູ້ຢືມ. ຕາມການສະຖິຕິຂອງທະນາຄານແລ້ວ, ມາຮອດປະຈຸບັນ ອັດຕາດອກເບ້ຍໃຫ້ກູ້ຢືມສະເລ່ຍ 10%/ປີ ຫລຸດລົງ 50% ເມື່ອທຽບໃສ່ 2 ປີກ່ອນນີ້ ແມ່ນ 20-22%/ປີ. ຊຳ້ບໍ່ຫນຳ ມີບ້ວງເງິນສິນເຊື່ອບຸລິມະສິດຈຳນວນຫນຶ່ງ, ອັດຕາດອກເບ້ຍພຽງ 7-9%/ປີເທົ່ານັ້ນ. ຕາມບັນດາຜູ້ຊ່ຽວຊານເສດຖະກິດແລ້ວ, ລະດັບສະເລ່ຍໃຫ້ກູ້ຢືມປະຈຸບັນແມ່ນເທົ່າກັບລະດັບປີ 2005, ຊື່ງແມ່ນໄລຍະໄດ້ຮັບຖືວ່າ ເສດຖະກິດພັດທະນາເປັນປົກກະຕິ, ສະນັ້ນ ອັດຕາດອກເບ້ຍບໍ່ແມ່ນຄວາມຫຍຸ້ງຍາກອີກສຳລັບບັນດາວິສາຫະກິດ. ທ່ານ ຫວູດີງແອງ ຜູ້ຊ່ຽວຊານເສດຖະກິດຖືວ່າ: ຍາກທີ່ມີອັດຕາດອກເບ້ຍຕຳ່ຄືປະຈຸບັນ.
“ພວກເຮົາແກ້ໄຂບັນດາອັດຕາດອກເບ້ຍໃນໄລຍະຜ່ານມາເປັນຢ່າງດີ, ອັດຕາດອກເບ້ຍເງິນຝາກກໍຄືອັດຕາດອກເບ້ຍໃຫ້ກູ້ຢືມລ້ວນແຕ່ເໝາະສົມກັບເງື່ອນໄຂເສດຖະກິດມະຫາພາກກໍຄືຄວາມສາມາດສຳພັດກັບບັນດາເງື່ອນໄຂຈຸລະພາກຂອງບັນດາວິສາຫະກິດ. ບັນຫາວາງອອກປະຈຸບັນ ແມ່ນນຳໃຊ້ແຫລ່ງທຶນນັ້ນຄືແນວໃດໃຫ້ມີປະສິດທິຜົນ ໃນສະພາບທີ່ຄວາມຕ້ອງການໃຊ້ສອຍ, ຄວາມຕ້ອງການລົງທຶນຕຳ່ຄືປະຈຸບັນ.”
ອັດຕາດອກເບ້ຍຫລຸດລົງຢ່າງວ່ອງໄວ ໄດ້ສ້າງເງື່ອນໄຂໃຫ້ວິສາຫະກິດຫລາຍແຫ່ງຟື້ນຕົວການຜະລິດ, ດຳເນີນທຸລະກິດ. ທ່ານ ຫງວຽນດືກຕວຽນ, ປະທານສະພາບໍລິຫານບໍລິສັດການຄ້າ ເກົາໄຢ - ຮ່າໂນ້ຍ ໃຫ້ຮູ້ວ່າ:
“ສຳລັບວິສາຫະກິດຂາຍຍ່ອຍ, ມາຮອດປະຈຸບັນ ກຳລັງຊື້ຍັງຕຳ່ຢູ່. ແຕ່ດ້ວຍບັນດາບ້ວງເງິນກູ້ຢືມໄລຍະສັ້ນໄດ້ຊ່ວຍພວກຂ້າພະເຈົ້າຮັກສາການຜະລິດດຳເນີນທຸລະກິດພັດທະນາ ແລະ ແກ້ໄຂສະພາບສິນຄ້າຄ້າງສາງໃນຊຸມປີຜ່ານມາ.”
ປີ 2013, ທະນາຄານແຫ່ງລັດກໍໄດ້ດັດປັບຕະຫລາດຄຳ. ປີ 2013 ກໍເປັນຂີດໝາຍຜົນສຳເລັດໃນເບື້ອງຕົ້ນຂອງການສ້າງໂຄງປະກອບທະນາຄານຄືນໃຫມ່, ເປັນຕົ້ນແມ່ນປັບປຸງລະບົບທະນາຄານການຄ້າຄືນໃຫມ່. ຫວຽດນາມ ໄດ້ຫລຸດຜ່ອນ 5 ອົງການສິນເຊື່ອດ້ວຍການໂຮມເຂົ້າເປັນອົງການຫນຶ່ງດຽວ, ລົ້ມລະລາຍ ແລະ ຖອນຫນັງສືອະນຸຍາດດຳເນີນທຸລະກິດຂອງທະນາຄານຕ່າງປະເທດ 3 ສາຂາ. ຫວຽດນາມ ໄດ້ປະຕິບັດການຫັນ ທະນາຄານການຄ້າແຫ່ງລັດ 4 ແຫ່ງເປັນຫຸ້ນສ່ວນ. ພ້ອມກັບການສ້າງໂຄງປະກອບບັນດາອົງການສິນເຊື່ອຄືນໃຫມ່, ສະພາບເພີ່ມຫນີ້ເສຍກໍ່ໄດ້ຮັບການຄວບຄຸມ. ປີ 2013, ບໍລິສັດຄຸ້ມຄອງຊັບສິນຂອງບັນດາອົງການສິນເຊື່ອ ແກ້ໄຂຫນີ້ເສຍໄດ້ 30.000- 35.000 ຕື້ດົ່ງ.
ກ້າວເຂົ້າສູ່ປີ 2014, ຄາດຄະເນວ່າ ເສດຖະກິດໂລກມີຄວາມສະດວກກວ່າ ແລະ ເສດຖະກິດມະຫາພາກຄ່ອຍໆກັບຄືນສູ່ສະພາບເປັນປົກກະຕິ, ຫວຽດນາມ ມີເງື່ອນໄຂຫລາຍຢ່າງເພື່ອຍູ້ແຮງການສ້າງໂຄງປະກອບເສດຖະກິດຄືນໃຫມ່. ໃນສະພາບການນັ້ນ, ນະໂຍບາຍເງິນຕາຂອງຫວຽດນາມ ຍັງບຸລິມະສິດບັນດາມາດຕະການຄວບຄຸມໄພເງິນເຟີ້. ຕາມທິດນີ້, ທະນາຄານແຫ່ງລັດ ສືບຕໍ່ບໍລິຫານອັດຕາດອກເບ້ຍຢ່າງມີໄຫວພິບ ແລະ ຮັກສາອັດຕາແລກປ່ຽນເງິນຕາເປັນປົກກະຕິ ເພື່ອຫນູນຊ່ວຍໃຫ້ແກ່ພື້ນຖານເສດຖະກິດຢ່າງແຮງກວ່າ, ຮັກສາເສດຖະກິດມະຫາພາກເປັນປົກກະຕິ, ສ້າງພື້ນຖານໃຫ້ແກ່ການຈະເລີນເຕີບໂຕຢ່າງໝັ້ນຄົງ.