ສະພາບເສດຖະກິດ, ສັງຄົມຫວຽດນາມ ໃນໄຕມາດທີ 1 ປີ 2017 ໄດ້ຊີ້ໃຫ້ເຫັນວ່າ, ເຖິງວ່າຍັງປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ລະດັບເຕີບໂຕດ້ານເສດຖະກິດຍັງມີສັນຍານອັນຕັ້ງໜ້າ. ເສດຖະກິດມະຫາພາກຮັບປະກັນສະຖຽນລະພາບ, ດັດຊະນີໃຊ້ສອຍ (CPI) ໃນ 3 ເດືອນເພີ່ມຂຶ້ນ 0,9% ຕ່ຳກວ່າເມື່ອທຽບໃສ່ໄລຍະດຽວກັນຂອງປີ 2016. ການສົ່ງອອກໄດ້ເພີ່ມຂຶ້ນຢ່າງແຮງ, ບັນລຸກວ່າ 43 ຕື້ USD, ເພີ່ມຂຶ້ນເກືອບ 13%. ບັນດາຂົງເຂດກະສິກຳ, ການບໍລິການມີລະດັບເຕີບໂຕສູງກວ່າໄລຍະດຽວກັນຂອງປີກາຍ, ໃນນັ້ນກະສິກຳເພີ່ມຂຶ້ນ 2%, ຈຳນວນນັກທ່ອງທ່ຽວມາຫວຽດນາມ ເພີ່ມຂຶ້ນຢ່າງແຮງ ດ້ວຍ 3,2 ລ້ານເທື່ອຄົນ. ແຕ່ເບິ່ງລວມແລ້ວ, ການເຕີບໂຕ GDP ໃນໄຕມາດທີ 1 ປີ 2017 ຍັງບັນລຸພຽງ 5,1% ຕ່ຳກວ່າເມື່ອທຽບໃສ່ປີ 2016. ສິ່ງດັ່ງກ່າວໄດ້ຊີ້ໃຫ້ເຫັນວ່າລະດັບເຕີບໂຕດ້ານເສດຖະກິດຂອງຫວຽດນາມ ພວມຊັກຊ້າລົງ, ຍາດທີ່ຈະບັນລຸໄດ້ຄາດໝາຍ 6,7% ເຊິ່ງສະພາແຫ່ງຊາດໄດ້ວາງອອກ. ແຕ່ຕາມທ່ານ ດ່າວກວາງທູ, ຮອງລັດຖະມົນຕີກະຊວງແຜນການ ແລະ ການລົງທຶນແລ້ວ, ຖ້າຫາກສັງເກດທາດແທ້ພື້ນຖານເສດຖະກິດຫວຽດນາມ ໃນໄຕມາດທີ 1 ປີ 2017 ນັ້ນ, ລະດັບເຕີບໂຕດັ່ງກ່າວແມ່ນມີສະຖຽນລະພາບ. ຍ້ອນຕົວເລກດັ່ງກ່າວຕົ້ນຕໍ່ແມ່ນການຂຸດຄົ້ນແຮ່ທາດ, ພິເສດແມ່ນການຂຸດຄົ້ນນ້ຳມັນອາຍແກັດຫຼຸດລົງ ແລະ ຕົວເລກດັ່ງກ່າວຫຼຸດລົງຕາມແຜນການ. ປີ 2016 ຫວຽດນາມ ຂຸດຄົ້ນນ້ຳມັນອາຍແກັດໄດ້ກວ່າ 15 ລ້ານໂຕນ. ແຕ່ໃນປີນີ້, ຕາມແຜນການຂຸດຄົ້ນໄດ້ພຽງ 12,28 ລ້ານໂຕນເທົ່ານັ້ນ, ສະເພາະໄຕມາດທີ 1 ປີ 2016 ຫຼຸດລົງ 600.000 ໂຕນ. ທ່ານ ທູ ຖືວ່າ, ຖ້າຫາກຮັກສາປະລິມານຂຸດຄົ້ນເທົ່າກັບລະດັບຂອງປີ 2016, ການເຕີບໂຕ GDP ໃນໄຕມາດທີ 1 ປີ 2017 ຕ້ອງແມ່ນ 5,95%, ສູງກວ່າເມື່ອທຽບໃສ່ໄລຍະດຽວກັນຂອງປີ 2016. ທ່ານຮອງລັດຖະມົນຕີ ບຸຸຍກວາງທູ ໃຫ້ຮູ້ວ່າ.
“ສັງເກດທາງດ້ານທາດແທ້ ນີ້ແມ່ນການຫຼຸດຜ່ອນຕາມກົດເກັນ. ກ່ຽວກັບມາດຕະການແກ້ໄຂຂອງລັດຖະບານໄດ້ຍົກອອກມາແມ່ນສ້າງເງື່ອນໄຂໃຫ້ພື້ນຖານເສດຖະກິດມະຫາພາກພັດທະນາເປັນປົກກະຕິ, ບັນດາການດຸ່ນດ່ຽງໃຫຍ່ຂອງພື້ນຖານເສດຖະກິດສືບຕໍ່ໄດ້ຮັບການຮັບປະກັນ, ພິເສດຄວາມດຸ່ນດ່ຽງດ້ານການເງິນ, ງົບປະມານ, ໄພເງິນເຟີ້ຍັງຢູ່ໃຕ້ການຄວບຄຸມຢູ່”.
ບັນດາຕົວເລກດັດຊະນີກ່ຽວກັບສະພາບການເສດຖະກິດສັງຄົມຂອງຫວຽດນາມ ໃນໄຕມາດທີ 1 ໄດ້ຊີ້ໃຫ້ເຫັນວ່າ; ລະດັບເຕີບໂຕຂອງຂົງເຂດອຸດສາຫະກຳເພີ່ມຂຶ້ນພຽງ 3,85%, ໃນຂະນະທີ່ຂົງເຂດອຸດສາຫະກຳ ແລະ ກໍ່ສ້າງກໍ່ເພີ່ມຂຶ້ນພຽງ 4,1% ແມ່ນຢູ່ໃນລະດັບຕ່ຳ. ສິ່ງດັ່ງກ່າວໄດ້ຮຽກຮ້ອງໃຫ້ບັນດາກະຊວງ, ຂະແໜງການ ແລະ ວິສາຫະກິດ ມານະພະຍາຍາມກວ່າອີກ ໃນການຜະລິດດຳເນີນທຸລະກິດໃນບັນດາໄຕມາດທີ່ຍັງເຫຼືອຂອງປີ ເພື່ອບັນລຸລະດັບເຕີບໂຕທີ່ໄດ້ວາງອອກ.
ທີ່ກອງປະຊຸມສະໄໝສາມັນປະຈຳເດືອນ 03/2017 ຂອງລັດຖະບານ, ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ: ທັດສະນະຊີ້ນຳຂອງລັດຖະບານ ຍັງເດີນຕາມແຜນການສູ້ຊົນບັນລຸລະດັບເຕີບໂຕ GDP ທັງປີແມ່ນ 6,7%. ເມື່ອເຕື້ອງເຖິງມາດຕະການແກ້ໄຂເພື່ອບັນລຸຄາດໝາຍເຕີບໂຕດັ່ງກ່າວ, ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານ ມາຍຕ໋ຽນຢຸງ ຊີ້ແຈ້ງວ່າ.
“ກ່ອນອື່ນໝົດ, ຮັບປະກັນເສດຖະກິດມະຫາພາກເປັນປົກກະຕິ ຕ້ອງສືບຕໍ່ຖືເປັນແຖວໜ້າ. ນັບທັງບັນຫາດັດຊະນີ CPI, ບັນຫາໜີ້ສາທາລະນະ, ອັດຕາແລກປ່ຽນເງິນຕາ, ດອກເບ້ຍທະນາຄານ ລ້ວນແຕ່ຕ້ອງເອົາໃຈໃສ່ຖືກກັບລະດັບ. ຄຽງຂ້າງນັ້ນ, ສືບຕໍ່ຍູ້ແຮງການພັດທະນາອຸດສາຫະກຳ, ອຸດສາຫະກຳສຳຮອງ, ຍູ້ແຮງການພັດທະນາກະສິກຳເຕັກໂນໂລຊີສູງ… ທັດສະນະຂອງລັດຖະບານແມ່ນຍັງປະຕິບັດລະດັບເຕີບໂຕ GDP 6,7% ຄືດັ່ງມະຕິຂອງສະພາແຫ່ງຊາດທີ່ໄດ້ວາງອອກ, ແຕ່ຕ້ອງແມ່ນການເຕີບໂຕແບບຍືນຍົງ, ເຕີບໂຕກ່ຽວກັບການຜະລິດ, ສ່ວນການຂຸດຄົ້ນແຮ່ທາດນັ້ນ ທັງເຮັດທັງຮັກສາຊັບສົມບັດຂອງຊາດ, ຫາກບໍ່ແມ່ນຕັ້ງບັນຫາຕ້ອງບັນລຸຄາດໝາຍເຕີບໂຕສູງໃນຂົງເຂດນີ້”.
ຕົວເລກທີ່ປະທັບໃຈຂອງພື້ນຖານເສດຖະກິດຫວຽດນາມ ໃນໄຕມາດທີ 1 ປີ 2017, ນັ້ນແມ່ນດຶງດູດແຫຼ່ງເງິນລົງທຶນຕ່າງປະເທດໃຫ້ບັນລຸລະດັບ 7,71 ຕື້ USD, ເພີ່ມຂຶ້ນເກືອບ 78% ເມື່ອທຽບໃສ່ໄລຍະດຽວກັນຂອງປີ 2016. ພ້ອມກັນນັ້ນ, ໄດ້ມີວິສາຫະກິດ 26.500 ແຫ່ງຈົດທະບຽນສ້າງຕັ້ງໃໝ່, ເພີ່ມຂຶ້ນນັບທັງທາງດ້ານຈຳນວນວິສາຫະກິດ ແລະ ຈຳນວນທຶນຈົດທະບຽນເມື່ອທຽບໃສ່ໄລຍະດຽວກັນຂອງປີ 2016. ສິ່ງດັ່ງກ່າວໄດ້ຊິ້ີ້ໃຫ້ເຫັນວ່າ, ສະພາບແວດລ້ອມແຫ່ງການດຳເນີນທຸລະກິດໄດ້ຮັບການປັບປຸງ, ພ້ອມກັນນັ້ນແມ່ນບັນດາຂົງເຂດຄື: ແຮງງານ, ວຽກເຮັດງານທຳ, ການໜູນຊ່ວຍຊີວິດສັງຄົມ ໄດ້ຮັບຄວາມເອົາໃຈໃສ່ ແລະ ບັນລຸຜົນງານດີ. ນີ້ແມ່ນສັນຍານຢ່າງຕັ້ງໜ້າ, ແມ່ນບັນດາປັດໃຈກະທົບເພື່ອການເຕີບໂຕເສດຖະກິດໃນໄຕມາດທີ 2, ໄຕມາດທີ 3 ແລະ ໄຕມາດທີ 4 ບັນລຸສູງກວ່າ, ອັນໄດ້ຕອບສະໜອງຄາດໝາຍເຕີບໂຕໂດຍສະພາແຫ່ງຊາດໄດ້ວາງອອກໃນປີ 2017 ນີ້.