ການສົ່ງອອກສິນຄ້າຂອງຫວຽດນາມໃນປີ 2011 ບັນລຸໄດ້ບັນດາໝາກຜົນດີພໍສົມຄວນ, ລື່ນກາຍບັນດາຄາດໝາຍ ແລະ ການຄາດຄະເນໃນເບື້ອງຕົ້ນ. ຕາມຕົວເລກລ້າສຸດແລ້ວ, ມາຮອດຈຸດເວລານີ້ ວົງເງິນສົ່ງອອກສິນຄ້າຂອງຫວຽດນາມໃນປີ 2011 ບັນລຸກວ່າ 96 ຕຶ້ USD, ເພີ່ມຂຶ້ນກວ່າ 33% ເມື່ອທຽບໃສ່ປີ 2010. ມີປະເພດສິນຄ້າຄື: ຜະລິດຕະພັນກະເສດ, ເຄື່ອງເຟນີເຈີ, ສິລະປະຫັດຖະກຳຂອງຫວຽດນາມ ໄດ້ຮັບການຕີລາຄາສູງຢູ່ຕະຫລາດໂລກ. ເຖິງຢ່າງໃດກໍຕາມ, ຕາມການຄາດຄະເນແລ້ວ, ການເຕີບໂຕການສົ່ງອອກຂອງຫວຽດນາມໃນປີ 2012 ຍາກຈະມີຄວາມເປັນປົກກະຕິໄດ້ ຍ້ອນຕະຫລາດສົ່ງອອກບໍ່ເປັນປົກກະຕິ. ປະຈຸບັນ, ນອກຈາກບັນດາມາດຕະການຂອງວິສາຫະກິດ ແລະ ລັດຖະບານ ເພື່ອຍົກສູງຄວາມສາມາດແກ້ງແຍ້ງຂອງສິນຄ້າຫວຽດນາມ ໃນການສົ່ງອອກ, ເລື່ອງຊອກຫາບັນດາຕະຫລາດໃຫມ່ກໍຄືຂຸດຄົ້ນຄວາມສາມາດບ່ົມຊ້ອນຂອງບັນດາຕະຫລາດປະຈຸບັນ ພວມແມ່ນບັນຫາທີ່ໄດ້ວາງອອກໃຫ້ແກ່ການສົ່ງອອກຂອງຫວຽດນາມໃນປີ 2012.
ຕາມຄາດໝາຍວາງອອກຂອງຂະແຫນງອຸດສາຫະກຳ ການຄ້າຫວຽດນາມແລ້ວ, ປີ 2012 ການສົ່ງອອກເພີ່ມຂຶ້ນ 13% ເມື່ອທຽບໃສ່ປີ 2011 ແລະ ບັນລຸວົງເງິນປະມານ 108,5 ຕຶ້ USD. ເຖິງຢ່າງໃດກໍຕາມ, ເພື່ອບັນລຸໄດ້ບັນດາຄາດໝາຍນີ້ ບັນດາວິສາຫະກິດສົ່ງອອກ ຕ້ອງມານະພະຍາຍາມ, ຍ້ອນສະພາບເສດຖະກິດໂລກ, ພາຍໃນປະເທດ, ປີ 2012 ໄດ້ຄາດຄະເນວ່າ ຈະສືບຕໍ່ປະສົບກັບສິ່ງທ້າທາຍຫລາຍຢ່າງ. ບັນດາການຜັນແປ່ຂອງລາຄາສິນຄ້າໂລກໃນປີ 2012 ກໍຍາກທີ່ຈະຄາດຄະເນໄດ້ ຍ້ອນການກະທົບຈາກວິກິດການ ແລະ ທ່າອ່ຽງອາລັກຂາພວມເຮັດໃຫ້ຕະຫລາດຫລາຍແຫ່ງມີທ່າອ່ຽງຮັດແຄບເຂົ້າ. ດ້ານອື່ນ, ກຳລັງຊື້ຂອງບັນດາຕະຫລາດໃຫຍ່ໃນໂລກຄື: ເອີລົບ, ອາເມລິກາ, ຍີ່ປຸ່ນ ກໍຫລຸດລົງ.ສະນັ້ນ ເພື່ອຍູ້ແຮງການສົ່ງອອກ, ບັນດາກະຊວງ, ຂະແຫນງການຄວນເອົາໃຈໃສ່ເຖິງບັນຫາຕະຫລາດເພື່ອຜ່ານຜ່າຄວາມຫຍຸ້ງຍາກ. ແລະ ເພື່ອໃຫ້ມີຄວາມດຸນດຽງລະຫວ່າງ ການສົ່ງອອກ ແລະ ນຳເຂົ້າໃນປີ 2012, ສິ່ງທີ່ຄວນເອົາໃຈໃສ່ນັ້ນແມ່ນ ສຸມໃສ່ການຫັນປ່ຽນໂຄງປະກອບຕະຫລາດສົ່ງອອກ.
ຕາມກະຊວງອຸດສາຫະກຳ ແລະ ການຄ້າແລ້ວ, ການພົວພັນຄ້າຂາຍຢູ່ເຂດຊາຍແດນປະຈຸບັນ ແມ່ນຊ່ອງທາງທີ່ສຳຄັນສຳລັບບັນດາວິສາຫະກິດຂະຫນາດກາງ ແລະ ນ້ອຍ ໃນການສ່ົງອອກສິນຄ້າ,ເປັນຕົ້ນແມ່ນສິນຄ້າຜະລິດພາຍໃນປະເທດມີຄຸນນະພາບທຳມະດາ. ປະຈຸບັນ ບັນດາຕະຫລາດຄື: ລາວ, ກຳປູເຈຍ,ຈີນ ພວມປະກອບສ່ວນຫລາຍພໍສົມຄວນເຂົ້າໃນວົງເງິນສົ່ງອອກຂອງຫວຽດນາມ. ເຖິງຢ່າງໃດກໍຕາມ, ໃນໄລຍະຜ່ານມາ ມີວິສາຫະກິດຫວຽດນາມ ຫລາຍແຫ່ງ ບໍ່ທັນສ້າງໄດ້ນະໂຍບາຍພິເສດ ແລະ ບໍ່ທັນທຸມເທໝົດຄວາມສາມາດບົ່ມຊ້ອນເພື່ອສົ່ງອອກເຂົ້າຕະຫລາດນີ້. ນອກຈາກບັນດາຕະຫລາດໃຫຍ່, ຕະຫລາດເດີມຂອງການສົ່ງອອກຫວຽດນາມຄື: ອີຢູ, ອາເມລິກາ, ຍີ່ປຸ່ນ .. ຍັງມີຕະຫລາດທີ່ມີຄວາມສາມາດບົ່ມຊ້ອນຫລາຍແຫ່ງຄື: ອາຟຼິກາ, ອາຊີຕາເວັນຕົກ, ອາຊີໃຕ້, ຕາເວັນອອກກາງ ເຊິ່ງຫວຽດນາມ ສາມາດຂຸດຄົ້ນໄດ້. ພິເສດ ແມ່ນຕາເວັນອອກກາງ, ຊຶ່ງແມ່ນພາກພື້ນໄດ້ຮັບການຕີລາຄາວ່າ ແມ່ນຕະຫລາດເຕັມໄປດ້ວຍຄວາມສາມາດບົ່ມຊ້ອນ ແຕ່ ກໍ່ແມ່ນຕະຫລາດມີຄວາມຕ້ອງການສູງ. ຫວ່າງແລ້ວນີ້, ບັນດາວິສາຫະກິດຂອງຫວຽດນາມ ຫາກໍເຊັນສັນຍາການສົ່ງອອກເຂົ້າສານ ແລະ ບັນດາປະເພດຜະລິດຕະພັນກະເສດ, ສິນໃນນ້ຳ ກັບບັນດາບໍລິສັດຂອງ ອາຮັບ ເອມີເລັດ ທີ່ງານຕະຫລາດນັດເຂົ້າສານໂລກ ຈັດຂຶ້ນຢູ່ ດູບາຍ ສຳເລັດຜົນ. ຕາມທ່ານ ເລືອງເລເຟືອງ, ຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດຫວຽດນາມແລ້ວ, ນີ້ແມ່ນກາລະໂອກາດທີ່ດີເພື່ອໃຫ້ຜະລິດຕະພັນກະເສດຂອງຫວຽດນາມ ແຊກຊືມເຂົ້າຕະຫລາດທີ່ມີຄວາມສາມາດບ່ົມຊ້ອນ ແລະ ສາມາດຍົກສູງມູນຄ່າການສົ່ງອອກເຂົ້າຕະຫລາດຕາເວັນອອກກາງ.
“ຜ່ານການໄປເຮັດວຽກຢູ່ຕາເວັນອອກກາງຫວ່າງແລ້ວນີ້, ບັນດາວິສາຫະກິດ ກຳແຫນ້ນຄວາມນິຍົມຂອງລູກຄ້າໃນຕະຫລາດນີ້ໂດຍພື້ນຖານແລ້ວ, ສະນັ້ນ ພວກເຮົາຄວນຈັດຕັ້ງເຂດລ້ຽງປູກວັດຖຸດິບ, ຮັບປະກັນວັດຖຸດິບຢ່າງພຽງພໍເພື່ອສະຫນອງໃຫ້ແກ່ຕະຫລາດນີ້. ທີສອງ ນີ້ແມ່ນຕະຫລາດມີປະຊາຊົນຖືສາສະຫນາອິດສະລາມເປັນສ່ວນຫລາຍ ສະນັ້ນ ປະເພດສິນຄ້າສິນໃນນ້ຳ, ພິເສດແມ່ນສິນໃນນ້ຳມີຄຸນນະພາບສູງຮັບໃຊ້ໃຫ້ແກ່ຜູ້ຮັ່ງມີຢູ່ ດູບາຍເວົ້າສະເພາະ ແລະ ຢູ່ ຕາເວັນອອກກາງເວົ້າລວມ ແລະ ບາງປະເພດສິນຄ້າມີຄຸນນະພາບປານກາງ ເພື່ອຮັບໃຊ້ໃຫ້ແກ່ຄົນງານເຂົ້າເມືອງ. ທີສາມ ຄຸນນະພາບ ແມ່ນບັນຫາສຳຄັນທີ່ສຸດ, ຂ້າພະເຈົ້າສະເຫນີໃຫ້ບັນດາວິສາຫະກິດລ້ຽງປູກບັນດາຜະລິດຕະພັນກະເສດ, ສິນໃນນ້ຳ ບໍ່ຄວນນຳໃຊ້ທາດເຄມີ ສົ່ງຜົນຮ້າຍເຖິງຜູ້ບໍລິໂພກ, ເວລານັ້ນພວກເຮົາຈຶ່ງຮັກສາຕະຫລາດໄດ້ຢ່າງຍາວນານ. ຂ້າພະເຈົ້າສະເຫນີໃຫ້ບັນດາອຳນາດການປົກຄອງ, ອົງການທີ່ມີສິດອຳນາດພ້ອມກັບວິສາຫະກິດຕ້ອງຕິດຕາມກວດກາ, ຈັດຕັ້ງການປະຕິບັດເປັນຢ່າງດີ. ພວກເຮົາຈຶ່ງຄອງຕະຫລາດຕາເວັນອອກກາງໄດ້ຍາວນານ.“
ນອກຈາກຕະຫລາດໃຫມ່ທີ່ຄວນເອົາໃຈໃສ່ຂຸດຄົ້ນນັ້ນ, ຕາມກະຊວງອຸດສາຫະກຳ ແລະ ການຄ້າຫວຽດນາມແລ້ວ, ບັນດາວິສາຫະກິດສົ່ງອອກຂອງຫວຽດນາມ ຕ້ອງເອົາໃຈໃສ່ເຖິງບັນດາຕະຫລາດເດີມຄື: ອາເມລິກາ, ເອີລົບ, ຍີ່ປຸ່ນ. ຍ້ອນວ່າ ບັນດາຕະຫລາດນີ້ ພວມມີຄວາມນິຍົມຄຸນນະພາບຂອງສິນຄ້າຫວຽດນາມກໍຄືວົງເງິນສົ່ງອອກຈາກບັນດາຕະຫລາດນີ້ບັນລຸລະດັບສູງ ແລະ ເປັນປົກກະຕິ.
ຢູ່ຕະຫລາດເອີລົບ, ຕາມການຕີລາຄາໃນປີ 2012, ການສົ່ງອອກຂອງຫວຽດນາມ ຈະປະສົບກັບຄວາມຫຍຸ້ງຍາກ ຍ້ອນວິກິດການຫນິ້ສິນຂອງລັດ ແລະ ເລືອ່ງຫລາຍປະເທດພວມນຳໃຊ້ອາລັກຂາການຄ້າ,ຮົ້ວກີດຂວາງດ້ານເຕັກນິກ. .. ແຕ່ກາລະໂອກາດໃຫ້ແກ່ການສົ່ງອອກຂອງຫວຽດນາມແມ່ນຍັງໃຫຍ່ຫລວງຢູ່. ຕາມທ່ານ ຟ້າມແຊງເຈົາ, ເອກອັກຄະລັດຖະທູດຫວຽດນາມປະຈຳແບນຊິກແລ້ວ, ຕະຫລາດເອີລົບ, ແມ່ນຄູ່ຮ່ວມມຶືການຄ້າໃຫຍ່ທີ 3 ຂອງຫວຽດນາມປະຈຸບັນ, ຄວາມຫຍຸ້ງຍາກຂອງບັນດາວິສາຫະກິດເມື່ອເຂົ້າຕະຫລາດເອີລົບ ນັ້ນແມ່ນ ທັງຮັບປະກັນຄຸນນະພາບ, ຕອບສະຫນອງມາດຕະຖານຂອງບໍລິສັດນຳເຂົ້າ, ຂອງຜູ້ບໍລິໂພກ ແລະ ບາງມາດຕະຖານພິເສດອື່ນ. ບັນດາປະເທດຢູ່ເອີລົບ ມີຄວາມສົນໃຈເຖິງຜະລິດຕະພັນໂດຍໃຊ້ທາດເຄມີຫລືບໍ່, ສິດຜົນປະໂຫຍດຂອງຄົນງານໄດ້ຮັບປະກັນຫລືບໍ່. ທ່ານ ຟ້າມແຊງເຈົາເວົ້າວ່າ:
“ປະຈຸບັນ ການແກ້ງແຍ້ງດ້ານການຄ້າພວມນັບມື້ນັບເພີ່ມຂຶ້ນ, ໃນສະພາບ ວິກິດການເສດຖະກິດມີໄພເກີດຂຶ້ນຄືນໃຫມ່, ທ່າອ່ຽງອາລັກຂາດ້ານການຄ້ານັບມື້ນັບເພີ່ມຂຶ້ນ, ບັນດາວິສາຫະກິດຕ້ອງຄິດໄລ່ເຖິງຄວາມສາມາດຈະມີກໍລະນີຟ້ອງຮ້ອງໂດຍບໍ່ມີເຫດຜົນ, ຫລາຍກໍລະນີມີລັກສະນະດ້ານການເມືອງສູງ, ສະນັ້ນ ພວກເຮົາຕ້ອງກະກຽມທຸກວິທິການກ່ຽວກັບດ້ານເຕັກນິກ, ກ່ຽວກັບດ້ານກົດໝາຍນັບທັງດ້ານການເມືອອີກ ເພື່ອຮັບປະກັນໃຫ້ແກ່ການສົ່ງອອກຂອງພວກເຮົາປະສົບຜົນສຳເລັດ ຖ້າບໍ່ດັ່ງນັ້ນ ໃນຊຸມປີຈະມາເຖິງຈະປະສົບກັບສິ່ງທ້າທາຍຫລາຍຢ່າງ.“
ຫວ່າງແລ້ວນີ້, ທີ່ກອງປະຊຸມທີ່ປຶກສາການຄ້າຫວຽດນາມ ປີ 2011 ຊື່ງຈັດຂຶ້ນຢູ່ ຮ່າໂນ້ຍ, ທ່ານ ຫວູຮູຍຮ່ວາງ ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ: ບັນດາທີ່ປຶກສາການຄ້າຫວຽດນາມ ຢູ່ ຕ່າງປະເດທ ຈະຫນູນຊ່ວຍຢ່າງຕັ້ງຫນ້າໃຫ້ແກ່ວິສາຫະກິດ ກ່ຽວກັບວຽກງານການຕະຫລາດຕ່າງປະເທດ, ວຽກງານສົ່ງເສີມການຄ້າ, ໂຄສະນາເຄື່ອງໝາຍການຄ້າ, ແກ້ໄຂບັນຫາຕ່າງໆໃນການສືບສວນຕ້ານການຂາຍບຸບລາຄາ, ຕ້ານການອຸດຫນູນ ແລະ ຮົ້ວກີດຂວາງດ້ານການຄ້າອື່ນ ຢູ່ ບັນດາຕະຫລາດສົ່ງອອກສິນຄ້າຂອງຫວຽດນາມ./
ຫວີງຟອງ