(vovworld) - ຫວຽດນາມແມ່ນປະເທດທີ່ມີຝັ່ງທະເລຍາວຢຽດກວ່າ 3.200 ກິໂລແມດ, ນີ້ແມ່ນເງື່ອນໄຂສະດວກທີ່ສຸດສຳລັບການພັດທະນາເສດຖະກິດທະເລ. ແຕ່ຍ້ອນວ່າໃນຫລາຍປີຜ່ານມາ ເສດຖະກິດອີງໃສ່ຊັບພະຍາກອນໃນເຂດດິນຕໍ່ແຜ່ນເປັນຕົ້ນ. ສະນັ້ນ, ເລື່ອງວາງແຜນກຳນົດບັນດາທ່າກຳປັ່ນບໍ່ທັນໄດ້ຮັບຄວາມເອົາໃຈໃສ່ ແລະ ຂຸດຄົ້ນຖືກກັບຈຸດໝາຍເທື່ອ. ເພື່ອຕອບສະຫນອງຄວາມຕ້ອງການພັດທະນາເສດຖະກິດທະເລແບບຍືນຍົງ, ການວາງແຜນກຳນົດກໍ່ສ້າງລະບົບທ່າກຳປັ່ນທະເລແມ່ນມີຄວາມສຳຄັນຍິ່ງ.
ຄວາມຕ້ອງການຂົນສົ່ງສິນຄ້າຜ່ານທ່າກຳປັ່ນເພີ່ມຂຶ້ນ
ພາບປະກອບ: internet
|
ປະຈຸບັນ ຫວຽດນາມ ມີທ່າກຳປັ່ນໃຫຍ່ ນ້ອຍກວ່າ 24 ແຫ່ງ ແລະ 90% ຈຳນວນສິນຄ້ານຳເຂົ້າສົ່ງອອກຂອງ ຫວຽດນາມ ແມ່ນຂົນສົ່ງທາງທະເລ. ໃນແຕ່ລະປີ, ປະລິມານສິນຄ້າທີ່ຖືກຂົນສົ່ງຜ່ານທ່າກຳປັ່ນທະເລຕ່າງໆແມ່ນເພີ່ມຂຶ້ນສະເລ່ຍປະມານ 10%/ປີ ແລະ ມາຮອດປະຈຸບັນ ຄວາມຕ້ອງການຂົນສົ່ງສິນຄ້າຜ່ານທ່າກຳປັ່ນໄດ້ເພີ່ມຂຶ້ນຫລາຍເມື່ອທຽບໃສ່ລະດັບການລົງທຶນກໍ່ສ້າງທ່າກຳປັ່ນ. ບັນດາທ່າກຳປັ່ນຄື: ຫາຍຟ່ອງ, ດາຫນັງ ແລະ ນະຄອນ ໂຮ່ຈິມີນ ຊຶ່ງແມ່ນບັນດາທ່າກຳປັ່ນສຳຄັນ, ສວມບົດບາດຫລັກແຫລ່ງໃນລະບົບທ່າກຳປັ່ນທະເລ ຫວຽດນາມ ແຕ່ສະຖານທີ່ໃຫ້ການບໍລິການຂອງທ່າກຳປັ່ນເຫລົ່ານີ້ຍັງຂັບແຄບຢູ່, ລະບົບຄົມມະນາຄົມທາງລົດໄຟ, ທາງບົກທີ່ເຊື່ອມຕໍ່ທ່າກຳປັ່ນກັບຕາຫນ່າງຄົມມະນາຄົມແຫ່ງຊາດບໍ່ທັນໄດ້ຮັບການກໍ່ສ້າງຢ່າງຄົບຊຸດເທື່ອ. ສະນັ້ນ, ເລື່ອງຂຸດຄົ້ນບັນດາທ່າກຳປັ່ນທະເລບໍ່ທັນສົມກັບຄວາມສາມາດບົ່ມຊ້ອນຂອງການພັດທະນາ. ທ່ານ ໂດ໋ຊວນກວາງ, ປະທານ ສະຫະສະມາຄົມສາງຮັບສົ່ງສິນຄ້າ ຫວຽດນາມ (VIFFAS) ຖືວ່າ:
“ລັກສະນະຄົບຊຸດຂອງບັນດາທ່າກຳປັ່ນບໍ່ທັນສູງ, ມີຂອບຂະຫນາດນ້ອຍແລະ ບໍ່ເປັນລະບົບ, ການເຊື່ອມຕໍ່ຍັງຈຳກັດຢູ່. ຕົວຢ່າງຄື: ປະຈຸບັນ, ມີທ່າກຳປັ່ນຫລາຍແຫ່ງໄດ້ຮັບການກໍ່ສ້າງແລ້ວ ແຕ່ລະບົບ logistics (ບໍລິການສາງ, ສະຖານທີ່, ຮັບສົ່ງ ແລະ ຂົນສ່ົງສິນຄ້າ) ທີ່ເຊື່ອມຕໍ່ກັບລະບົບທ່າກຳປັ່ນບໍ່ທັນໄດ້ຮັບການປັບປຸງເທື່ອ, ສະນັ້ນ ບັນຫາຄົມມະນາຄົມຂົນສົ່ງ, ທີ່ເຊື່ອມຕໍ່ລະຫວ່າງທ່າກຳປັ່ນທະເລກັບບັນດາເຂດອຸດສາຫະກຳ, ເຂດຜະລິດສົ່ງອອກພວມແມ່ນບັນຫາຮີບດ່ວນທີ່ສຸດໃນໄລຍະປະຈຸບັນ.”
ເພື່ອຕອບສະຫນອງຄວາມຕ້ອງການພັດທະນາ, ລະບົບທ່າກຳປັ່ນທະເລ ຫວຽດນາມ ຈຳເປັນຕ້ອງພັດທະນາພື້ນຖານໂຄງລ່າງ, ນຳໃຊ້ຮູບແບບການຄຸ້ມຄອງທີ່ກ້າວຫນ້າ ແລະ ຍົກສູງກຳລັງຂຸດຄົ້ນທ່າກຳປັ່ນ. ພິເສດ ຄວນຍົກລະດັບການລົງທຶນກໍ່ສ້າງພື້ນຖານໂຄງລ່າງ ເພື່ອຕອບສະຫນອງຄວາມຕ້ອງການພັດທະນາຕົວຈິງ. ຕົວຢ່າງຄື: ທ່າກຳປັ່ນ ເຈີນໄມ ຂຶ້ນກັບແຂວງ ເທື່ອທຽນເຫ້ວ, ເຖິງວ່າຫາກໍ່ໄດ້ນຳເຂົ້າເຄື່ອນໄຫວເມື່ອປີ 2003 ກໍຕາມ, ແຕ່ມາຮອດປະຈຸບັນ ທ່າກຳປັ່ນນີ້ຮັບສົ່ງສິນຄ້າເກີນຄວາມສາມາດຮອງຮັບ. ສະເພາະທ່າກຳປັ່ນເລກ 1 ຕາມການອອກແບບແມ່ນຮັບສິນຄ້າປະມານ 1 ລ້ານໂຕນ ແຕ່ມາເຖິງປະຈຸບັນ ແມ່ນຮັບສິນຄ້າເຖິງປະມານ 1,4 ໂຕນ, ສະນັ້ນ ການນຳຂອງທ່າກຳປັ່ນພວມຍື່ນສະເຫນີຕໍ່ລັດຖະບານອະນຸຍາດລົງທຶນຕ່ືມອີກໃຫ້ທ່າກຳປັ່ນເລກ 2 ແລະ ເລກ 3 ເພື່ອຕອບສະຫນອງຄວາມຕ້ອງການຮັບສົ່ງສິນຄ້າ. ຄຽງຄູ່ກັນນັ້ນ ແຕ່ລະປີ, ທ່າກຳປັ່ນ ເຈີນໄມ ຍັງຕ້ອນຮັບນັກທ່ອງທ່ຽວມາຢ້ຽມຢາມແຂວງ ເທື່ອທຽນເຫ້ວ ດ້ວຍກຳປັ່ນ ກວ່າ 500.000 ເທື່ອຄົນ. ສິ່ງດັ່ງກ່າວສະແດງໃຫ້ເຫັນວ່າ ທ່າກຳປັ່ນເຈີນໄມ ຍັງມີຄວາມສາມາດບົ່ມຊ້ອນຫລາຍຢ່າງ ແລະ ຖ້າໄດ້ຮັບການລົງທຶນຈະປະກອບສ່ວນສຳຄັນເຂົ້າໃນການພັດທະນາເສດຖະກິດທະເລຂອງທ້ອງຖິ່ນ ແລະ ພາກພື້ນ. ທ່ານ ຫງວຽນຫືວທໍ້, ຜູ້ອຳນວຍການທ່າກຳປັ່ນ ເຈີນໄມ ແຂວງເທື່ອທຽນເຫ້ວ ໃຫ້ຮູ້ວ່າ:
“ແຂວງເທື່ອທຽນເຫ້ວ ມີຝັ່ງທະເລຍາວປະມານ 126 ກິໂລແມດ, ນັບແຕ່ເມື່ອມີເຂດເສດຖະກິດທະເລ ແລະ ທ່າກຳປັ່ນ ເຈີນໄມ, ເສດຖະກິດແຂວງເທື່ອທຽນເຫ້ວ ໄດ້ພັດທະນາດີພໍສົມຄວນ. ຕົວຢ່າງຄື ກ່ອນນີ້ ຂົນສົ່ງໄມ້ເຂົ້ານະຄອນ ດາຫນັງ ຕ້ອງຜ່ານທາງບົກດ້ວຍຄວາມຍາວປະມານ 100 ກິໂລແມດ ແລະ ຕ້ອງເສຍຄ່າຂົນສົ່ງສູງ ແຕ່ເມື່ອຂົນສົ່ງທາງທະເລ ຄ່າຂົນສ່ົງກໍ່ຫຼຸດລົງ. ສະນັ້ນ ຜູ້ຂາຍໄດ້ຮັບກຳໄລຫລາຍກວ່າ. ນອກນັ້ນ, ທ່າກຳປັ່ນເຈີນໄມ ຍັງໄດ້ປະກອບສ່ວນເຂົ້າໃນການປະຕິບັດນະໂຍບາຍຂອງລັດຖະບານກ່ຽວກັບການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ.”
ເພື່ອຕອບສະຫນອງຄວາມຕ້ອງການພັດທະນາເສດຖະກິດທະເລແບບຍືນຍົງ, ການວາງແຜນກຳນົດກໍ່ສ້າງລະບົບທ່າກຳປັ່ນທະເລແມ່ນມີຄວາມສຳຄັນ
ພາບປະກອບ: internet |
ໃນວິວັດການເຊື່ອມໂຍງເຂົ້າກັບເສດຖະກິດໂລກ ອາດຈະເຫັນໄດ້ວ່າ ບັນດາບໍລິສັດຂຸດຄົ້ນທ່າກຳປັ່ນຂອງ ຫວຽດນາມ ໄດ້ ແລະ ພວມມີການແກ້ງແຍ້ງໂດຍກົງກັບບັນດາບໍລິສັດຂຸດຄົ້ນທ່າກຳປັ່ນຊັ້ນນຳຂອງໂລກ. ມີກຸ່ມບໍລິສັດລົງທຶນທ່າກຳປັ່ນໃຫຍ່ຫລາຍແຫ່ງຢູ່ໃນໂລກ ໄດ້ມີຫນ້າຢູ່ ຫວຽດນາມ ແລະ ເຂົ້າຮ່ວມການບໍລິການ logistics ຂົນສົ່ງທາງທະເລ. ທ່ານ ໂດ໋ຊວນກວາງ, ປະທານສະຫະສະມາຄົມສາງຮັບສົ່ງສິນຄ້າ ຫວຽດນາມ ຖືວ່າ:
“ຮອດປີ 2014, ບັນດາບໍລິສັດຕ່າງປະເທດ ຈະໄດ້ຮັບອະນຸຍາດເປີດການບໍລິການຢູ່ຫວຽດນາມດ້ວຍທຶນຕ່າງປະເທດ 100%. ແຕ່ພວກຂ້າພະເຈົ້າບໍມີຄວາມວິຕົກກັງວົນພໍປານໃດ. ເພາະວ່າ ຊາວຫວຽດນາມ ແມ່ນຜູ້ເຂົ້າໃຈແຈ້ງກ່ຽວກັບຕະຫລາດຫວຽດນາມກວ່າ ແລະ ມີບາງການບໍລິການ, ຂະແຫນງອາຊີບ ພຽງແຕ່ບັນດາບໍລິສັດ ຫວຽດນາມ ຈຶ່ງມີທ່າໄດ້ປຽບ.”
ເພື່ອຕອບສະຫນອງຄວາມຕ້ອງການພັດທະນາແບບຍືນຍົງ, ລັດຖະບານ ຫວຽດນາມ ໄດ້ອະນຸມັດຍຸດທະສາດພັດທະນາລະບົບທ່າກຳປັ່ນ ຫວຽດນາມ ໄລຍະແຕ່ນີ້ຮອດປີ 2020 ກຳນົດທິດໄລຍະ 2030 ດ້ວຍຍອດລາຍຈ່າຍລົງທຶນ 440 ຕຶ້ດົ່ງ, ໃນນັ້ນ ຮອດປີ 2015 ລະບົບທ່າກຳປັ່ນທະເລແຫ່ງຊາດ ສາມາດຕອບສະຫນອງການຮັບສົ່ງສິນຄ້າໄດ້ປະມານ 500 - 600 ລ້ານໂຕນ/ປີ ແລະ ບັນລຸປະມານ 1 ຕື້ໂຕນ/ປີ ໃນປີ 2020, ສູ້ຊົນບັນລຸໃຫ້ໄດ້ແຕ່ 1,6 - 2 ຕື້ໂຕນໃນປີ 2030. ຈຸດໝາຍຂອງລັດຖະບານ ຫວຽດນາມ ແມ່ນພັດທະນາເສດຖະກິດການເດີນທະເລ ໃຫ້ກາຍເປັນຫນຶ່ງໃນ 5 ຂະແຫນງເສດຖະກິດຕົ້ນຕໍ ປະກອບສ່ວນນຳຫວຽດນາມ ກາຍເປັນປະເທດເຂັ້ມແຂງທາງດ້ານເສດຖະກິດທະເລ ແລະ ການບໍລິການທາງທະເລ.