(vovworld) - ລັດຖະບານ ຫວຽດນາມ ໄດ້ວາງຄາດໝາຍຮອດປີ 2020 ມູນຄ່າບັນດາຜະລິດຕະພັນເຕັກໂນໂລຊີສູງ ແລະ ຜະລິດຕະພັນໝູນໃຊ້ເຕັກໂນໂລຊີສູງກວມອັດຕາ 40% ມູນຄ່າຜະລິດຕະພັນອຸດສາຫະກຳຂອງທັງປະເທດ, ປະກອບ ສ່ວນນຳ ຫວຽດນາມ ກາຍເປັນປະເທດອຸດສາຫະກຳຕາມທິດທັນສະໄຫມ. ເພື່ອປະຕິບັດຄາດໝາຍນັ້ນໃຫ້ໄດ້, ບັນດາເຂດເຕັກໂນໂລຊີສູງຢູ່ ຫວຽດນາມ ພວມກາຍເປັນເຂດຈຸດສຸມໃນການຫັນປ່ຽນຮູບແບບການເຕີບໂຕເສດຖະກິດຕາມທິດມີປະສິດທິຜົນ, ແລະ ໝັ້ນຄົງ.
ເຂດອຸດສາຫະກຳ Tan Tao ຢູ່ ນະຄອນ Ho Chi Minh
ພາບ: Internet
|
ປະຈຸບັນ, ເຂດເຕັກໂນໂລຊີສູງນະຄອນ ໂຮ່ຈິມິນ ແມ່ນຫນຶ່ງໃນຈຳນວນ 3 ເຂດເຕັກໂນໂລຊີສູງໄດ້ຮັບການສ້າງຕັ້ງຂຶ້ນໄວກວ່າໝູ່ ແລະ ລະດັບເຕີບໂຕພັດທະນາຢ່າງວ່ອງໄວທີ່ສຸດຢູ່ ຫວຽດນາມ. ພາຍຫລັງ 10 ປີແຫ່ງການພັດທະນາ, ເຂດເຕັກໂນໂລຊີສູງຢູ່ນະຄອນ ໂຮ່ຈິມິນ ໄດ້ຮັບການຕີລາຄາວ່າແມ່ນສະຖານທີ່ໄວ້ເນື້ອເຊື່ອໃຈກ່ຽວກັບການລົງທຶນທາງດ້ານເຕັກໂນໂລຊີສູງຂອງທັງປະເທດ, ດຶງດູດກຸ່ມບໍລິສັດເຕັກໂນໂລຊີສູງຊັ້ນນຳຂອງໂລກຫລາຍແຫ່ງຄື: Intel ຜະລິດ, ຕິດຕັ້ງ chipset ແລະ Jabil ຜະລິດຊິ້ນສ່ວນເອເລັກໂຕນິກຂອງ ອາເມລິກາ; Nidec ຂອງ ຍີ່ປຸ່ນ; Datalogic ຜະລິດເຄື່ອງອ່ານລະຫັດຂອງອີຕາລີ; ໄລ່ມາຮອດປະຈຸບັນ, ເຂດເຕັກໂນໂລຊີສູງນະຄອນ ໂຮ່ຈິມິນ ໄດ້ດຶງດູດ 66 ໂຄງການລົງທຶນດ້ວຍຍອດຈຳນວນທຶນບັນລຸ 2,2 ຕື້ USD. ຢູ່ເຂດເຕັກໂນໂລຊີສູງແຫ່ງນີ້ມີ 29 ໂຄງການນຳເຂົ້າເຄື່ອນໄຫວ, ບັນລຸມູນຄ່າການສົ່ງອອກກວ່າ 35 ຕື້ USD. ການເຄື່ອນໄຫວຂອງເຂດເຕັກໂນໂລຊີສູງໄດ້ແກ້ໄຂວຽກເຮັດງານທຳໃຫ້ແກ່ຄົນງານໃນບໍລິເວນນະຄອນ ເກືອບ 17.000 ຄົນ. ໃນອະນາຄົດ, ເຂດເຕັກໂນໂລຊີສູງ ນະຄອນໂຮ່ຈິມິນ ໄດ້ຮັບການກຳນົດແມ່ນສູນຜະລິດອຸດສາຫະກຳເຕັກໂນໂລຊີສູງ, ປະກອບສ່ວນຢ່າງຕັ້ງຫນ້າເຂົ້າໃນວິວັດການຫັນປ່ຽນເສດຖະກິດຂອງນະຄອນ. ທ່ານ Le Thanh Hai ເລຂາຄະນະພັກນະຄອນໂຮ່ຈິມິນ ຖືວ່າ:
“ມີ 2 ບັນຫາຊຶ່ງການນຳນະຄອນສຸມໃສ່ປະຕິບັດ, ນັ້ນແມ່ນການເພີ່ມທະວີການລົງທຶນເຂົ້າຂົງເຂດຄົ້ນຄ້ວາພັດທະນາໄລຍະທີ 2 ຂອງເຂດເຕັກໂນໂລຊີສູງ. ທີສອງແມ່ນ ນະຄອນມີກົນໄກ, ນະໂຍບາຍເພື່ອດຶງດູດບັນດານັກວິທະຍາສາດພາຍໃນປະເທດ ແລະ ຊາວຫວຽດນາມ ອາໄສຢູ່ຕ່າງປະເທດ, ບັນດານັກວິທະຍາສາດຕ່າງປະເທດ ເພື່ອລົງທຶນພັດທະນາກໍຄືຄົ້ນຄ້ວາໃນຂົງເຂດວິທະຍາສາດເຕັກໂນໂລຊີຂອງນະຄອນ.”
ໂດຍໄດ້ຮັບການອະນຸມັດຜ່ານນັບແຕ່ປີ 1985, ໃນເກືອບ 15 ປີຜ່ານມາ, ເຂດເຕັກໂນໂລຊີສູງ Hoa Lac ທາງທິດຕາເວັນຕົກນະຄອນຫລວງຮ່າໂນ້ຍ ໄດ້ ແລະ ພວມກາຍເປັນພື້ນຖານໃຫ້ແກ່ການເຄື່ອນໄຫວວິທະຍາສາດ ເຕັກໂນໂລຊີ ຫວຽດນາມ. ປະຈຸບັນ ພື້ນຖານໂຄງລ່າງໃນເຂດເຕັກໂນໂລຊີສູງ Hoa Lac ພວມໄດ້ຮັບການກໍ່ສ້າງໃຫ້ສົມບູນແບບເທື່ອລະກ້າວ ດ້ວຍການຫນູນຊ່ວຍຈາກແຫລ່ງທຶນ ODA ຂອງລັດຖະບານຍີ່ປຸ່ນ, ແບ່ງເປັນ 2 ໄລຍະ. ຕາມແຜນການແລ້ວ, ພື້ນຖານໂຄງລ່າງດ້ານເຕັກນິກຂອງທັງ ເຂດເຕັກໂນໂລຊີສູງ Hoa Lac ຈະໄດ້ຮັບການກໍ່ສ້າງສຳເລັດໃນປີ 2015 ແລະ ຈະກາຍເປັນ ເຂດເຕັກໂນໂລຊີສູງທັນສະໄຫມທີ່ສຸດຢູ່ ຫວຽດນາມ ກໍຄືໃນພາກພື້ນ. ມາຮອດປະຈຸບັນ, ເຂດເຕັກໂນໂລຊີສູງ Hoa Lac ໄດ້ດຶງດູດ 61 ໂຄງການລົງທຶນດ້ວຍຍອດຈຳນວນທຶນກວ່າ 1,5 ຕື້ USD. ປະຈຸບັນ ເຂດເຕັກໂນໂລຊີສູງ ມີ 18 ໂຄງການໄດ້ນຳເຂົ້າເຄື່ອນໄຫວ, ເປັນຕົ້ນແມ່ນບັນດາໂຄງການສູນເຕັກນິກໂອໂຕ Hoa Lac Nissan Techno ຫວຽດນາມ ຂອງບໍລິສັດ Nissan Techno ຫວຽດນາມ, ໂຮງງານຜະລິດຊິ້ນສ່ວນເອເລັກໂຕນິກ ຂອງ ບໍລິສັດເອເລັກໂຕນິກ Noble ຫວຽດນາມ ຈຳກັດ, ໂຮງງານຜະລິດເຄື່ອງອຸປະກອນການແພດ ດີຈີຕອນ ຂອງບໍລິສັດຮ່ວມທຸລະກິດການແພດ ຫວຽດນາມ ສ ເກົາຫລີ. ນອກນັ້ນ ມີຫລາຍໂຄງການລົງທຶນອື່ນພວມຢູ່ໃນວິວັດການກໍ່ສ້າງ ແລະ ສຳເລັດ ຄື: ໂຄງການມະຫາວິທະຍາໄລ FPT ຂອງບໍລິສັດຫຸ້ນສ່ວນ FPT, ສູນໄປສະນີໂທລະຄົມ Hoa Lac ຂອງກຸ່ມບໍລິສັດໄປສະນີໂທລະຄົມມະນາຄົມ ຫວຽດນາມ, ໂຮງງານຜະລິດຢາຂອງບໍລິສັດ Medlac Pharmar. ວັນທີ 19/9/2012 ຜ່ານມາ, ໂຄງການກໍ່ສ້າງສູນອາວະກາດ ຫວຽດນາມ ໄດ້ຮັບການລົງມືກໍ່ສ້າງຢູ່ ເຂດເຕັກໂນໂລຊີສູງ Hoa Lac ຈາກແຫລ່ງທຶນ ODA ໄລຍະ 1 ປະມານ 600 ລ້ານ USD. ເມື່ອສູນດັ່ງກ່າວໄດ້ຮັບການກໍ່ສ້າງສຳເລັດໃນປີ 2020, ຫວຽດນາມ ຈະມີສູນອາວະກາດທັນສະໄຫມອັນດັບໜຶ່ງຢູ່ ອາຊີຕາເວັນອອກສຽງໃຕ້. ໃນການກຳນົດທິດພັດທະນາ, ຈຸດໝາຍຂອງລັດຖະບານ ຫວຽດນາມ ແມ່ນກໍ່ສ້າງ ເຂດເຕັກໂນໂລຊີສູງ Hoa Lac ໃຫ້ກາຍເປັນນະຄອນ ວິທະຍາສາດທັນສະໄຫມ, ແມ່ນສະຖານທີ່ບຳລຸງສ້າງບັນດາພະນັກງານເຕັກໂນໂລຊີດີເດັ່ນ, ຊື່ງແມ່ນສະຖານທີ່ຊາວ ຫວຽດນາມ ປະດິດສ້າງ ແລະ ເປັນເຈົ້າຜະລິດຕະພັນເຕັກໂນໂລຊີທີ່ດີເດັ່ນຫລາຍຢ່າງ. ເພາະສະນັ້ນ, ເຂດເຕັກໂນໂລຊີສູງ Hoa Lac ພວມໄດ້ຮັບການກໍ່ສ້າງຕາມຮູບແບບນະຄອນວິທະຍາສາດ ດ້ວຍບັນດາເຂດອຸດສາຫະກຳເຕັກໂນໂລຊີສູງ, ເຂດຊອບແວ, ບັນດາສູນບຳລຸງສ້າງແຫລ່ງຊັບພະຍາກອນມະນຸດເຕັກໂນໂລຊີສູງ. ດຣ Truong Gia Binh ປະທານສະພາບໍລິຫານ, ຜູ້ອຳນວຍການໃຫຍ່ກຸ່ມບໍລິສັດ FPT ໃຫ້ຮູ້ວ່າ:
“ສວນຊອບແວຂອງພວກຂ້າພະເຈົ້າມີເນື້ອທີ່ 6,4 ເຮັກຕາ ແລະ ພວກຂ້າພະເຈົ້າຈະກໍ່ສ້າງ ສູນພັດທະນາຊອບແວແຫ່ງຫນຶ່ງໃຫຍ່ກວ່າໝູ່ຂອງຫວຽດນາມ ຢູ່ທີ່ນີ້. ໃນນັ້ນ ມີ 225,5 ເຮັກຕາແມ່ນ ເຂດອຸດສາຫະກຳເຕັກໂນໂລຊີສູງເລກ 1 ແລະ ຄາດວ່າຈະລົງທຶນ 36 ລ້ານໂດລາສະຫະລັດ. ພວກຂ້າພະເຈົ້າຫວັງວ່າ ເຂດເຕັກໂນໂລຊີສູງ Hoa Lac ຈະກາຍເປັນສູນວິທະຍາສາດ ແລະ ຍາດໄດ້ລາງວັນ Nobel .”
ພ້ອມກັບການເພີ່ມທະວີການລົງທຶນກໍ່ສ້າງພື້ນຖານໂຄງລ່າງດ້ານເຕັກນິກໃຫ້ແກ່ບັນດາ ເຂດເຕັກໂນໂລຊີສູງ, ລັດຖະບານ ຫວຽດນາມ ກໍໄດ້ປຶກສາຫາລືຫລາຍນະໂຍບາຍບຸລິມະສິດເພື່ອດຶງດູດບັນດານັກລົງທຶນໃນຂົງເຂດຜະລິດບັນດາຜະລິດຕະພັນເຕັກໂນໂລຊີສູງ. ຈຸດໝາຍສູງສູດຂອງລັດຖະບານ ແມ່ນກໍ່ສ້າງບັນດາເຂດເຕັກໂນໂລຊີສູງໃຫ້ກາຍເປັນແກ່ນສານໃນວິວັດການຫັນປ່ຽນຮູບແບບການເຕີບໂຕເສດຖະກິດຢູ່ບັນດາເຂດນຳໜ້າທາງດ້ານເສດຖະກິດຂອງທັງປະເທດ, ປະກອບສ່ວນຢ່າງຕັ້ງຫນ້າເຂົ້າໃນວິວັດທະນາການພັດທະນາເສດຖະກິດລວມຂອງທັງປະເທດຕາມທິດທັນສະໄຫມ, ປະສິດທິຜົນ ແລະ ຍືນຍົງ.