ພັດທະນາແບບຍືນຍົງ ແລະ ສ້າງເຄື່ອງໝາຍກາການຄ້າເຟຫວຽດນາມ

ToTuan -

ວັນຈັນ ທີ 16 ມີນາ ຄ.ສ. 2015 | 16:40:22

(vovworld)-ປະຈຸບັນ, ຫວຽດນາມ ແມ່ນປະເທດສົ່ງອອກກາເຟ ຢືນອັນດັບທີສອງໃນໂລກ ແລະ ແມ່ນປະເທດນຳຫນ້າກ່ຽວກັບການສົ່ງອອກ ກາເຟ robusta. ເຖິງຢ່າງໃດກໍຕາມ, ການສົ່ງອອກກາເຟຂອງຫວຽດນາມ ສ່ວນຫລາຍແມ່ນວັດຖຸດິບ, ສະນັ້ນ ມູນຄ່າການສົ່ງອອກບໍ່ທັນສູງ ແລະ ຫລາຍປະເທດໃນໂລກບໍ່ທັນຮູ້ຈັກເຖິງເຄື່ອງໝາຍການຄ້າກາເຟຫວຽດນາມ. ນີ້ກໍແມ່ນບັນຫາຊື່ງລັດຖະບານ ແລະ ຂະແຫນງກາເຟ ຫວຽດນາມ ພວມເອົາໃຈໃສ່ ເພື່ອສ້າງເຄື່ອງໝາຍການຄ້າກາເຟ, ຜ່ານນັ້ນ ຍົກສູງມູນຄ່າເພີ່ມໃນການສົ່ງອອກກາເຟ.

ປີ 2014 ການສົ່ງອອກກາເຟຂອງຫວຽດນາມ
ບັນລຸວົງເງິນ 3,4 ຕື້ USD
ພາບ:http://congdongcaphe.vn

ປະຈຸບັນ ຫວຽດນາມ ມີເນື້ອທີ່ດິນປູກກາເຟກວ່າ 640.000 ເຮັກຕາ, ສ່ວນຫລາຍແມ່ນຢູ່ເຂດໄຕງວຽນ. ກາເຟ ຂອງຫວຽດນາມ ໄດ້ສົ່ງອອກເຖິງ 60 ປະເທດ ແລະ ເຂດແຄ້ວນໃນໂລກ. ປີ 2014 ການສົ່ງອອກກາເຟຂອງຫວຽດນາມ ບັນລຸວົງເງິນ 3,4 ຕື້ USD. ເຖິງຢ່າງໃດກໍຕາມ, ໃນວິວັດການຜະລິດ ແລະ ສົ່ງອອກກາເຟ ຫວຽດນາມ ຍັງຂາດຕົກບົກຜ່ອງ. ຂອບຂະຫນາດການພັດທະນາບໍ່ທັນເປັນປົກກະຕິ, ຍັງມີຫລາຍບັນຫາບໍ່ປະຕິບັດຕາມແຜນການ, ການນຳໃຊ້ວິທະຍາສາດເຕັກໂນໂລຊີ, ຮັບປະກັນຄຸນນະພາບກໍຄືການຕິດຕາມຂັ້ນຕອນປູກ ແລະ ປຸງແຕ່ງບໍ່ທັນແຫນ້ນແຟ້ນ. ປະຈຸບັນ ບັນດາວິສາຫະກິດມີເງິນລົງທຶນຂອງຕ່າງປະເທດ ພວມເກັບຊື້ປະມານ 60% ຍອດປະລິມານກາເຟ ຫວຽດນາມ, ສິ່ງດັ່ງກ່າວສະແດງໃຫ້ເຫັນວ່າ ບັນດາວິສາຫະກິດ FDI ພວມມີທ່າໄດ້ປຽບໃນການເກັບຊື້ກາເຟສົ່ງອອກຢູ່ຫວຽດນາມ. ເພາະສະນັ້ນ ເພື່ອເປັນເຈົ້າການໃນການພັດທະນາກາເຟແບບຍືນຍົງ, ຮຽກຮ້ອງຕ້ອງມີນະໂຍບາຍຫນູນຊ່ວຍ, ສ້າງເງື່ອນໄຂສະດວກໃຫ້ແກ່ບັນດາວິສາຫະກິດພາຍໃນປະເທດພັດທະນາຢ່າງແຮງ, ບືນຂຶ້ນຢືດຄອງຕະຫລາດແກ້ງແຍ້ງ. ຢາກເຮັດໄດ້ຄືແນວນັ້ນ, ພ້ອມກັບການເພີ່ມທະວີການຄຸ້ມຄອງຄຸນນະພາບ, ຫວຽດນາມ ພວມຍູ້ແຮງການລົງທຶນດ້ານເຕັກໂນໂລຊີປຸງແຕ່ງ ແລະ ເປັນຕົ້ນແມ່ນເອົາໃຈໃສ່ເຖິງການກໍ່ສ້າງ ແລະ ພັດທະນາເຄື່ອງໝາຍກາເຟ. ທ່ານ ຫງວຽນແທງຕວຽນ, ພະນັກງານຄົ້ນຄ້ວາພັດທະນາກາເຟແບບຍືນຍົງຢູ່ແຂວງ ດັກລັກ ໃຫ້ຮູ້ວ່າ:

“ຫວຽດນາມ ພວມຢືນອັນດັບຫນຶ່ງກ່ຽວກັບການຜະລິດກາເຟ robusta ນັບທັງດ້ານປະລິມານການຜະລິດກໍຄືການສົ່ງອອກ, ແຕ່ລາຄາກາເຟຍັງຕ່ຳຢູ່. ສາຍເຫດ ຍ້ອນຫວຽດນາມ ສົ່ງອອກກາເຟຫລາຍ, ແຕ່ບໍ່ທັນເອົາໃຈໃສ່ເຖິງເລື່ອງອອກຫນັງສື ຢັ້ງຢືນຕົ້ນກຳເນີດພູມສາດ, ຄຸນນະພາບໃຫ້ແກ່ຜູ້ປູກກາເຟກໍຄືບັນດາຮາກຖານປູກ, ປຸງແຕ່ງກາເຟ. ສະນັ້ນ ຜູ້ດື່ມກາເຟກໍຄືຜູ້ຈຳຫນ່າຍກາເຟໃນໂລກບໍ່ທັນຮູ້ຈັກເຖິງກາເຟຂອງຫວຽດນາມ, ຫລືບໍ່ຮູ້ວ່າຫວຽດນາມ ຜະລິດກາເຟຫລືບໍ່. ຍ້ອນເຫດນັ້ນ ພວກເຮົາຕ້ອງໂຄສະນາກ່ຽວກັບເຄືີ່ອງໝາຍກາເຟ, ເຮັດຄືແນວນັ້ນ ຈຶ່ງຫລິກລ້ຽງຄວາມສ່ຽງ ແລະ ເພີ່ມມູນຄ່າໃຫ້ແກ່ກາເຟສົ່ງອອກ.”

ບັນຫາໃຫຍ່ຊຶ່ງຂະແຫນງ ປູກກາເຟ ຫວຽດນາມ ພວມເອົາໃຈໃສ່ ນັ້ນແມ່ນເລື່ອງປູກກາເຟຄືນໃຫມ່ໃນເນື້ອທີ່ 150.000 ເຮັກຕາ, ຖ້າບໍ່ດັ່ງນັ້ນ ປະລິມານກາເຟຂອງຫວຽດນາມ ອາດຈະຖືກຊຸດໂຊມໃນໄລຍະຈະມາເຖິງ. ຄຽງຄູ່ກັນນັ້ນ, ລັດພວມຍູ້ແຮງນະໂຍບາຍຊ່ວຍຊາວກະສິກອນເຮັດກະເສດສຸມແບບຍືນຍົງ, ສົ່ງເສີມການນຳໃຊ້ບັນດາຄວາມກ້າວຫນ້າວິທະຍາສາດເຕັກນິກເຂົ້າໃນການຜະລິດ ແລະ ຍູ້ແຮງການຫນູນຊ່ວຍວິສາຫະກິດພັດທະນາການປຸງແຕ່ງ, ສົ່ງອອກບັນດາຜະລິດຕະພັນດ້ວຍເຄື່ອງໝາຍການຄ້າຫວຽດນາມ. ເພື່ອໃຫ້ກາເຟ ມີເຄື່ອງໝາຍການຄ້າ ຮຽກຮ້ອງຜູ້ຜະລິດກາເຟຫວຽດນາມ ຕ້ອງຕອບສະຫນອງບັນດາເງື່ອນໄຂເຂັ້ມງວດກ່ຽວກັບເຕັກນິກ, ສິ່ງແວດລ້ອມ, ໝາຍຄວາມວ່າ ຕ້ອງມີຫນັງສືຢັ້ງຢືນຕົ້ນກຳເນີດຂອງກາເຟ, ຄວາມປອດໄພສຸຂະອະນາດ້ານອາຫານ. ໃນຊຸມປີຜ່ານມາ, ຫວຽດນາມ ພວມປະຕິບັດຕາມທິດນີ້, ໃນນັ້ນ ພະຍາຍາມສ້າງຫນັງສືຢັ້ງຢືນຈາກການຜະລິດ, ປູກ, ປຸງແຕ່ງ ຕະຫລອດຮອດການຈຳຫນ່າຍຜະລິດຕະພັນກາເຟຕາມລະບົບມູນຄ່າ, ຕອບສະຫນອງບັນດາມາດຖານສາກົນຄື: UZT, Rainfores...

ໃນໄລຍະຜ່ານມາ, ໃນທ່າອ່ຽງເຊື່ອມໂຍງເຂົ້າກັບເສດຖະກິດສາກົນ, ວິສາຫະກິດຕ່າງປະເທດຈຳນວນຫນຶ່ງ ໄດ້ລົງທຶນສ້າງລະບົບຮ້ານຂາຍກາເຟທີ່ມີຂອບຂະຫນາດໃຫຍ່ ຢູ່ຫວຽດນາມ ຄື: Highland Coffee, Gloria Jean Cafe, Coffe Bean&Tea… ແລະຫວ່າງແລ້ວນີ້ ບັນດາເຄື່ອງໝາຍການຄ້າກາເຟ ມີຊື່ສຽງຄື: Leaf Starbucks ຂອງອາເມລິກາ ກໍມີຫນ້າຢູ່ຫວຽດນາມ. ສິ່ງດັ່ງກ່າວສ້າງກຳລັງດັນແກ່ການແກ້ງແຍ້ງຢ່າງແຮງສຳລັບບັນດາວິສາຫະກິດປຸງແຕ່ງກາເຟພາຍໃນປະເທດ.

ພັດທະນາແບບຍືນຍົງ ແລະ ສ້າງເຄື່ອງໝາຍກາການຄ້າເຟຫວຽດນາມ - ảnh 2

ຊາວຊົນເຜົ່າຢູ່ໄຕງວຽນ ເກັບກູ້ກາເຟ
ພາບ:http://congdongcaphe.vn

ສະນັ້ນ ເພື່ອໃຫ້ຂະແຫນງກາເຟປຸງແຕ່ງພັດທະນາແບບຍືນຍົງ, ຫນຶ່ງໃນບັນດາຈຸດໝາຍຍຸດທະສາດຕົ້ນຕໍ ນັ້ນແມ່ນຕ້ອງສ້າງ ແລະ ຮັກສາຕະຫລາດພາຍໃນ, ເປັນພື້ນຖານເພື່ອເຂົ້າຮ່ວມຕະຫລາດໂລກ ແລະ ກ້າວໄປເຖິງການສ້າງເຄື່ອງໝາຍແຫ່ງຊາດໃຫ້ແກ່ກາເຟ ຫວຽດນາມ. ທ່ານ ດັ້ງເລຫງວຽນຫວູ, ປະທານ ທັງເປັນຜູ້ອຳນວຍການໃຫຍ່ບໍລິສັດ ກາເຟ ຈູງງວຽນ, ຊື່ງແມ່ນວິສາຫະກິດສ້າງເຄື່ອງໝາຍກາເຟ ຈູງງວຽນ ສຳເລັດຜົນ ໄດ້ຖືວ່າ:

“ຢາກສ້າງເຄື່ອງໝາຍການຄ້າແຫ່ງຊາດ, ບໍ່ພຽງແຕ່ແມ່ນວຽກງານຂອງບັນດາວິສາຫະກິດເທົ່ານັ້ນ ຫາກຂອງທັງປະເທດອີກດ້ວຍ, ໃນນັ້ນເລີ່ມຈາກວິໄສທັດຂອງການນຳ, ບັນດານັກຄົ້ນຄ້ວານະໂຍບາຍ, ນັກທຸລະກິດ ແລະ ຫລັງຈາກນັ້ນ ແມ່ນວົງຄະນາຍາດ. ເພື່ອສ້າງເຄື່ອງໝາຍການຄ້າແຫ່ງຊາດ ຕ້ອງຮູ້ຈັກໄດ້ວ່າ ໂລກສັງເກດ ແລະ ຕີລາຄາບັນດາຄຸນຄ່າກາເຟຫວຽດນາມ ຄືແນວໃດ, ຈາກນັ້ນ ພວກເຮົາຈຶ່ງສ້າງເຄື່ອງໝາຍການຄ້າກາເຟ ຫວຽດນາມ.”

ເພື່ອສ້າງເຄື່ອງໝາຍກາເຟຫວຽດນາມ ສຳເລັດຜົນ ຄວນມີບັນດາມາດຕະການຍາວນານ, ສະຖຽນລະພາບ ແລະ ຊຳນານງານ. ເຖິງຢ່າງໃດກໍຕາມ, ກ່ອນອື່ນໝົດ ບັນດາວິສາຫະກິດ ຕ້ອງຜະລິດກາເຟມີຄຸນນະພາບສູງກວ່າເມື່ອທຽບໃສ່ບັນດາຄູ່ແຂ່ງ ແກ້ງແຍ້ງ,ຄວນກຳນົດນະໂຍບາຍໃຫ້ເໝາະສົມກັບຄວາມຕ້ອງການຂອງຜູ້ໃຊ້ສອຍ. ຫວ່າງແລ້ວນີ້ ລັດຖະບານຫວຽດນາມ ໄດ້ມີດຳລັດເລກທີ 210 ກ່ຽວກັບການສົ່ງເສີມການລົງທຶນໃນຂົງເຂດກະສິກຳ, ພິເສດສຸມໃສ່ຂອດປຸງແຕ່ງກາເຟ. ຕາມນັ້ນແລ້ວ, ລັດຖະບານ ຈະສ້າງເງື່ອນໄຂດີທີ່ສຸດ ເພື່ອໃຫ້ບັນດາວິສາຫະກິດປຸງແຕ່ງ ຍົກສູງມູນຄ່າກາເຟ ແລະ ຍົກສູງລະດັບຜົນສະທ້ອນຂອງເຄື່ອງໝາຍກາເຟຫວຽດນາມ, ພ້ອມທັງສືບຕໍ່ມີບັນດານະໂຍບາຍຊຸກຍູ້ການຜະລິດແບບຍືນຍົງ.

ToTuan