(vovworld)- ການປະຕິບັດລະບຽບການພາສີເອເລັກໂຕນິກ ໄດ້ນຳມາເຊິ່ງຜົນປະໂຫຍດຢ່າງແທດຈິງໃຫ້ແກ່ວິສາຫະກິດ, ຕອບສະຫນອງບັນດາຄຳຮຽກຮ້ອງຕ້ອງການກ່ຽວກັບການປະຕິຮູບລະບຽບການບໍລິຫານຂອງລັດຖະບານ. ຕາມບົດລາຍງານຂອງກົມໃຫຍ່ພາສີ ຫວຽດນາມ ແລ້ວ, ພາຍຫລັງ 10 ເດືອນແຫ່ງການປະຕິບັດພາສີເອເລັກໂຕນິກ ແມ່ນຕອບສະຫນອງໄດ້ຈຸດໝາຍຫັນເປັນຂະແຫນງພາສີທີ່ທັນສະໄຫມ ກໍຄື ຊ່ວຍໃຫ້ວຽກງານຂາອອກຂາເຂົ້າສິນຄ້າຂອງບັນດາວິສາຫະກິດຢ່າງວ່ອງໄວ, ມີປະສິດທິຜົນ.
ປະຈຸບັນ, ລະບຽບການພາສີເອເລັກໂຕນິກ ໄດ້ຮັບການຜັນຂະຫຍາຍຢູ່ 34 ກົມພາສີທັງໝົດໃນທົ່ວປະເທດ. ຈຳນວນວິສາຫະກິດເຂົ້າຮ່ວມລະບຽບການພາສີເອເລັກໂຕນິກ ແມ່ນ ກວ່າ 45.000 ແຫ່ງ, ກວມອັດຕາກວ່າ 95% ຈຳນວນວິສາຫະກິດປະຕິບັດຂາອອກຂາເຂົ້າ. ໃນນັ້ນ, ມີ ວິສາຫະກິດ 6.300 ແຫ່ງມີເງິນລົງທຶນໂດຍກົງຂອງຕ່າງປະເທດ(FDI), ກວມ 14%. ເມື່ອຕີລາຄາກ່ຽວກັບບັນດາຜົນປະໂຫຍດຈາກພາສີເອເລັກໂຕນິກນຳມາໃຫ້, ທ່ານນາງ ຫວູຫາຍລີງ, ຮອງຜູ້ອຳນວຍການບໍລິສັດ ມີງທາຍ ຈຳກັດ ແບ່ງປັນວ່າ: ເມື່ອທຽບໃສ່ກ່ອນນີ້, ວິສາຫະກິດ ຕ້ອງລໍຖ້າໝາກຜົນແບ່ງສາຍເຮັດລະບຽບການພາສີ ເພື່ອຮູ້ຈັກວ່າ ບໍລິສັດຂອງຕົນຕ້ອງກວດກາສິນຄ້າຫລືບໍ່, ແຕ່ມາຮອດປະຈຸບັນ ວິສາຫະກິດໄດ້ຮັບຄຳຕອບໃນທັນທີ່ຜ່ານເຄືອຂ່າຍອິນເຕີແນັດ. ໄລຍະເຮັດລະບຽບການພາສີແມ່ນວ່ອງໄວ, ສ້າງເງື່ອນໄຂສະດວກໃຫ້ແກ່ວິສາຫະກິດ.
“ເຂົ້າຮ່ວມພາສີເອເລັກໂຕນິກ, ວິສາຫະກິດພວກຂ້າພະເຈົ້າບໍ່ຕ້ອງການມາເຮັດລະບຽບການໂດຍກົງຢູ່ສຳນັກງານພາສີ ຫາກສາມາດເຮັດລະບຽບການພາສີຢູ່ບໍລິສັດ. ຄຽງຄູ່ກັນນັ້ນ ກໍໄດ້ຍົກເວັ້ນການກວດກາເອກະສານ ແລະ ສິນຄ້າ. ພິເສດ ວິສາຫະກິດໃດເຂົ້າຮ່ວມພາສີເອເລັກໂຕນິກກໍລ້ວນແຕ່ເຫັນໄດ້ວ່າ: ວິສາຫະກິດຖືກຫລຸດຜ່ອນເວລາ ແລະ ລາຍຈາ່ຍເຮັດລະບຽບການພາສີ. ດ້ານອື່ນ, ວິສາຫະກິດສາມາດເປັນເຈົ້າການໃນວິວັດການແຈ້ງ ແລະ ເສຍທຳນຽມພາສີ.”
ພາສີເອເລັກໂຕນິກ
photo:internet
|
ທ່ານ ເຈີນກວກດີ້ງ, ຮອງຫົວຫນ້າພະແນກປະຕິຮູບພາສີໃຫ້ທັນສະໄຫມ ສັງກັດ ກົມໃຫຍ່ພາສີ ຫວຽດນາມ ໃຫ້ຮູ້ວ່າ: ລະບຽບການພາສີເອເລັກໂຕນິກ ໄດ້ຮັບການສ້າງຂຶ້ນໂດຍອີງໃສ່ພື້ນຖານເຕັກໂນໂລຊີຂໍ້ມູນຂ່າວສານ ແລະ ຂັ້ນຕອນວິຊາສະເພາະທີ່ງາຍດາຍ, ກົມກຽວ, ເປັນເອກະພາບ ແລະ ເໝາະສົມກັບມາດຖານ ແລະ ທຳນຽມສາກົນ.
“ກົມໃຫຍ່ພາສີຫວຽດນາມ ໄດ້ຊີ້ນຳບັນດາກົມພາສີ ຕ້ອງເປັນເຈົ້າການໃນການສ້າງແຜນການ ແລະ ປະຕິບັດການຫັນລະບຽບການພາສີຈາກເຮັດລະບຽບການທຳມະດາຫັນມາເຮັດທົດລອງຜ່ານລະບົບເອເລັກໂຕນິກສຳລັບສາຂາກົມທີ່ຂຶ້ນກັບກົມໃຫຍ່ ພາຍໃຕ້ການຊີ້ນຳ, ແນະນຳຂອງກົມໃຫຍ່ພາສີ. ບັນດາຄວາມຫຍຸ້ງຍາກ, ຂໍ້ຕິດຂັດໃນວິວັດການປະຕິບັດ ລະບຽບການພາສີເອເລັກໂຕນິກ ກໍໄດ້ຮັບການຮັບຮູ້, ສ່ອງແສງ ແລະ ແກ້ໄຂຢ່າງທັນການ.”
ບົນພື້ນຖານຍຸດທະສາດພັດທະນາພາສີຮອດປີ 2020, ແຜນການປະຕິຮູບ, ພັດທະນາ ແລະ ຫັນພາສີເປັນ ທັນສະໄຫມ ໄລຍະ 2011-2015 ພ້ອມກັບຄວາມມຸ່ງຫວັງສ້າງບາດກ້າວບຸກທະລຸໃນການປະຕິຮູບລະບຽບການບໍລິຫານ ນັບແຕ່ວັນທີ 1/4/2014, ກົມໃຫຍ່ພາສີ ຈະຜັນຂະຫຍາຍການນຳໃຊ້ລະບົບເຮັດລະບຽບການພາສີອັດຕະໂນມັດ ແລະ ກົນໄກປະຕູດຽວແຫ່ງຊາດ ເພື່ອນຳໃຊ້ໃຫ້ແກ່ຈຸດປະສົງເຮັດລະບຽບການພາສີຂາອອກຂາເຂົ້າ (VNACCS/VCIS-VietNam Automated Cargo Clearance System). ປະຈຸບັນລະບົບພາສີເອເລັກໂຕນິກ ພຽງສຸມໃສ່ຂອດພາຍໃນ ແລະ ພາຍຫລັງການປະຕິບັດລະບຽບການພາສີ ໃນຂະນະນັ້ນ ລະບົບ VNACCS ກໍ່ເປີດກວ້າງບັນດາບົດບາດຫນ້າທີ່, ລະບຽບການໃຫມ່ຄື: ລະບຽບການຈົດທະບຽນບັນຊີລາຍຊື່ສິນຄ້າຖືກຍົກເວັ້ນພາສີ, ລະບຽບການນຳໃຊ້ລວມນັບທັງສິນຄ້າຮັບໃຊ້ການດຳເນີນທຸລະກິດ ແລະ ບໍ່ດຳເນີນທຸລະກິດ, ລະບຽບການງາຍດາຍສຳລັບສິນຄ້າມີມູນຄ່າຕຳ່, ບົດບາດຫນ້າທີ່ການຄຸ້ມຄອງສິນຄ້ານຳເຂົ້າເພື່ອສົ່ງໄປຂາຍຢູ່ປະເທດທີ 3. ລະບົບ VNACCS ກໍອະນຸຍາດເຊື່ອມຕໍ່ບາງກະຊວງ, ຂະແຫນງການຕາມກົນໄກປະຕູດຽວ.
ຕາມທ່ານ ເຈີນກວກດີ້ງ, ຮອງຫົວຫນ້າພະແນກປະຕິຮູບການຫັນພາສີເປັນທັນສະໄຫມແລ້ວ, ກົມໃຫຍ່ພາສີ ຫວຽດນາມ, ລະບົບ VNACCS/VCIS ໄດ້ຮັບການສ້າງຂຶ້ນໂດຍມີການຊ່ວຍເຫລືອຂອງຍີ່ປຸ່ນ ແລະ ຈະສ້າງບາດລ້ຽວໃນວິວັດການຫັນພາສີເປັນທັນສະໄຫມ. ພ້ອມກັນນັ້ນ ປະກອບສ່ວນຍົກສູງປະສິດທິຜົນການຄຸ້ມຄອງລັດ, ປົກປ້ອງຄວາມປອດໄພດ້ານເສດຖະກິດ, ການຄ້າ, ຮັກສາສິ່ງແວດລ້ອມ ແລະ ຄວາມເປັນລະບຽບຮຽບຮ້ອຍທາງສັງຄົມ.
“ເມື່ອນຳໃຊ້ລະບົບ VNACCS/VCIS, ສຳລັບວິສາຫະກິດຈະເຮັດລະບຽບຢ່າງວ່ອງໄວ ແລະ ສະດວກ. ວິສາຫະກິດນຳໃຊ້ສຳເນົາເອກະສານບໍ່ຫລາຍ ຫາກຫັນມາລົງລາຍເຊັນເອເລັກໂຕນິກ. ລະບົບດັ່ງກ່າວກໍຈັດແບ່ງປະເພດສິນຄ້າແບບອັດຕະໂນມັດ. ພິເສດ ເມື່ອລະບົບເຊື່ອມຕໍ່ເຄືອຂ່າຍກັບບັນດາກະຊວງ, ຂະແຫນງການ, ວິສາຫະກິດພຽງແຕ່ແຈ້ງຂໍ້ມູນຂ່າວສານໃນເທື່ອຫນຶ່ງເທົ່ານັ້ນ.”
ໃນໄລຍະຈະມາເຖິງ, ເພື່ອຍົກສູງຄຸນນະພາບຂອງການປະຕິບັດລະບຽບການພາສີເອເລັກໂຕນິກ, ຂະແຫນງພາສີ ຫວຽດນາມ ຈະສຳເລັດພື້ນຖານໂຄງລ່າງ, ຊັບພະຍາກອນມະນຸດ ແລະ ສ້າງແຜນການ, ຜັນຂະຫຍາຍລະບຽບການພາສີຢ່າງຄົບຊຸດ. ນອກນັ້ນ ຈະຍູ້ແຮງການໂຄສະນາລະບຽບການພາສີເອເລັກໂຕນິກເຖິງປະຊາຄົມວິສາຫະກິດຕະຫລອດຮອດບັນດາອົງການຄຸ້ມຄອງລັດ. ຈາກນັ້ນ ຊ່ວຍວຽກງານຂາອອກຂາເຂົ້າສິນຄ້າຂອງວິສາຫະກິດພາຍໃນ ແລະ ຕ່າງປະເທດນັບມື້ນັບສະດວກ, ວ່ອງໄວ, ປະກອບສ່ວນເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດ.