(vovworld) - ຕາມກົມໃຫຍ່ສະຖິຕິ ຫວຽດນາມ ແລ້ວ, ນັບແຕ່ຕົ້ນປີ 2012 ມາຮອດປະຈຸບັນ, ດັດຊະນີສິນຄ້າຄ້າງສາງໃນບັນດາວິສາຫະກິດເພີ່ມຂຶ້ນສູງເມື່ອທຽບໃສ່ໄລຍະດຽວກັນຂອງປີ 2011. ປະລິມານສິນຄ້າຄ້າງສາງເປັນຈຳນວນຫລາຍພໍສົມຄວນໃນສະພາບທີ່ຕະຫລາດຈຳຫນ່າຍນັບມື້ນັບຖືກຮັດແຄບ ພວມເຮັດໃຫ້ວິສາຫະກິດຫລາຍແຫ່ງຕົກເຂົ້າສູ່ສະພາບຫຍຸ້ງຍາກ. ເພື່ອຊ່ວຍບັນດາວິສາຫະກິດຜ່ານຜ່າໄລຍະຫຍຸ້ງຍາກນີ້, ລັດຖະບານ ຫວຽດນາມ ໄດ້ ແລະ ພວມຊີ້ນຳໃຫ້ກະຊວງອຸດສາຫະກຳ ແລະ ການຄ້າ ຫວຽດນາມ ພ້ອມກັບບັນດາຂະແຫນງການ, ທ້ອງຖິ່ນຜັນຂະຫຍາຍຫລາຍມາດຕະການເພື່ອຊ່ວຍບັນດາວິສາຫະກິດຫລຸດຜ່ອນສິນຄ້າຄ້າງສາງດ້ວຍເລື່ອງຍູ້ແຮງການອຸປະໂພກສິນຄ້າ, ການສົ່ງອອກ, ຟື້ນຟູການຜະລິດ, ສູ້ຊົນຮັບປະກັນຄາດໝາຍແຜນການພັດທະນາເສດຖະກິດຂອງປະເທດຊາດໃນປີ 2012 ແລະ ຊຸມປີຕໍ່ໄປ.
ຫລຸດລາຄາສິນຄ້າກໍແມ່ນມາດຕະການແກ້ໄຂສະພາບສິນຄ້າຄ້າງສາງ
ພາບ: internet
|
ບັນດາຂໍ້ມູນໃນ 6 ເດືອນຕົ້ນປີສະແດງໃຫ້ເຫັນວ່າ ປະລິມານສິນຄ້າໃນບັນດາວິສາຫະກິດເວົ້າລວມໄດ້ເພີ່ມຂຶ້ນແຕ່ 20 - 25% ເມື່ອທຽບໃສ່ປີ 2011, ໃນນັ້ນສຸມໃສ່ບັນດາປະເພດສິນຄ້າຄື: ຊີມັງ, ເຫລັກກ້າ, ເຄື່ອງເອເລັກໂນຕິກ, ເຄື່ອງໃຊ້ສອຍ… ສິ່ງທ່ີເປັນຫນ້າສົນໃຈນັ້ນແມ່ນ ໃນຊຸມປີມໍ່ໆມານີ້, ລາຄາສິນຄ້າຫລາຍປະເພດບໍ່ເພີ່ມຂຶ້ນ, ຊ້ຳບໍ່ໜຳຍັງຫລຸດລົງ ອັນໄດ້ສະແດງໃຫ້ເຫັນວ່າ ລາຄາສິນຄ້າໄດ້ຮັບການຄວບຄຸມໂດຍພື້ນຖານ. ແຕ່ເຖິງຢ່າງໃດກໍຕາມ, ປະຈຸບັນ ກຳລັງຊື້ສິນຄ້າຍັງຫລຸດລົງ, ເຮັດໃຫ້ປະລິມານສິນຄ້າຄ້າງສາງເພີ່ມຂຶ້ນສູງ. ຕາມບັນດາຜູ້ຊ່ຽວຊານດ້ານເສດຖະກິດແລ້ວ, ກຳລັງຊື້ສິນຄ້າຫລຸດລົງ ຍ້ອນລາຄາສິນຄ້າ, ການບໍລິການເພີ່ມຂຶ້ນຢ່າງແຮງໃນໄລຍະກ່ອນນີ້ໄດ້ເຮັດໃຫ້ກຳລັງຊື້ຫລຸດລົງ. ສະພາບນີ້ແກ່ຍາວຈະສົ່ງຜົນສະທ້ອນເຖິງບັນດາຂະແຫນງຜະລິດສິນຄ້າ, ເພາະສະນັ້ນ ຜູ້ຊ່ຽວຊານເສດຖະກິດຫລາຍທ່ານຖືວ່າ: ຄວນຊຸກຍູ້ກຳລັງຊື້ສິນຄ້າ, ເຮັດຄືແນວນັ້ນຈຶ່ງຫລຸດຜ່ອນປະລິມານສິນຄ້າຄ້າງສາງຢູ່ບັນດາວິສາຫະກິດໄດ້. ດຣ Vu Dinh Anh ຜູ້ຊ່ຽວຊານເສດຖະກິດຖືວ່າ:
“ຕ້ອງສ້າງແຫລ່ງຄວາມຕ້ອງການທີ່ສາມາດຊຳລະຜ່ານບັນດາມາດຕະການປັບປຸງລາຍຮັບໃຫ້ແກ່ປະຊາຊົນ. ທີສອງ ຕ້ອງຊອກວິທີຫລຸດລາຄາສິນຄ້າ, ພິເສດ ແມ່ນປະເພດສິນຄ້າທີ່ຈຳເປັນ, ເຮັດແນວໃດໃຫ້ເໝາະສົມກັບລະດັບລາຍຮັບ, ຄວາມສາມາດຊຳລະຂອງປະຊາຊົນ ຊຶ່ງແມ່ນຜູ້ອຸປະໂພກຕົ້ນຕໍຂອງຕະຫລາດພາຍໃນປະເທດ.”
ຜູ້ຊ່ຽວຊານເສດຖະກິດຈຳນວນຫນຶ່ງຍັງຖືວ່າ: ພ້ອມກັບການຫນູນຊ່ວຍກຳລັງຊື້, ສ້າງເງື່ອນໄຂອຸປະໂພກສິນຄ້າ, ລັດ ຫວຽດນາມ ກໍຄວນຍູ້ແຮງບັນດານະໂຍບາຍກະຕຸກຊຸກຍູ້ການໃຊ້ສອຍ, ເປັນຕົ້ນແມ່ນນະໂຍບາຍກ່ຽວກັບການລົງທຶນຂອງລັດ. ນີ້ແມ່ນບັນດາມາດຕະການສຳຄັນເພື່ອກະຕຸກຊຸກຍູ້ຄວາມຕ້ອງການສິນຄ້າ, ເປັນຕົ້ນແມ່ນປະເພດສິນຄ້າຄ້າງສາງເປັນຈຳນວນຫລວງຫລາຍຄື: ເຫລັກກ້າ, ຊີມັງ… ທ່ານ Phan The Rue ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ຫວຽດນາມ, ປະຈຸບັນ ແມ່ນປະທານສະຫະສະມາຄົມຂາຍຍ່ອຍ ຫວຽດນາມ ຖືວ່າ:
“ເມື່ອຄວາມຕ້ອງການໄດ້ຮັບການກະຕຸ້ນ, ບັນດາກິດຈະກຳລົງທຶນຂອງລັດຈະສົ່ງຜົນສະທ້ອນເຖິງບັນຫາຕ່າງໆຄື: ສະຫນອງວັດສະດຸ, ຄວາມຕ້ອງການກ່ຽວກັບແຮງງານ, ບັນຫາອຸປະໂພກໃຫ້ແກ່ຄົນງານ.”
ຊີມັງ ກໍແມ່ນປະເພດສິນຄ້າຄ້າງສາງເປັນຈຳນວນຫລາຍ
ພາບ:baohaiquan.com
|
ເພື່ອຊ່ວຍບັນດາວິສາຫະກິດແກ້ໄຂຄວາມຫຍຸ້ງຍາກ, ຫວ່າງມໍ່ໆມານີ້ ກະຊວງອຸດສາຫະກຳ ແລະ ການຄ້າ ໄດ້ຍື່ນສະເຫນີຕໍ່ນາຍົກລັດຖະມົນຕີແຜນຮ່າງທີ່ເຕື້ອງເຖິງບັນດາມາດຕະການຕົ້ນຕໍ ຊ່ວຍວິສາຫະກິດຄົງຕົວ ແລະ ພັດທະນາ. ທ່ານ Vu Huy Hoang ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ:
“ມີ 2 ເນື້ອໃນສຳຄັນສິ່ງ, ທີຫນຶ່ງແມ່ນສຸມໃສ່ເຂົ້າໃນໝວດມາດຕະການແກ້ໄຂຢ່າງທັນການ, ກ່ອນອື່ນໝົດ ເພື່ອຫລຸດຜ່ອນສິນຄ້າຄ້າງສາງຂອງບັນດາວິສາຫະກິດ, ນັ້ນແມ່ນຍູ້ແຮງການອຸປະໂພກ, ປະກອບສ່ວນຍູ້ແຮງການຜະລິດ ແລະ ເນື້ອໃນທີ 2 ແມ່ນ: ໃນບັນດາເປົ້າໝາຍຂອງປະຊາຄົມວິສາຫະກິດ, ໝວດມາດຕະການສຸ່ມໃສ່ເຂົ້າໃນບັນດາວິສາຫະກິດຂະຫນາດກາງ ແລະ ນ້ອຍ. ຂ້າພະເຈົ້າຄິດວ່າ ນີ້ແມ່ນ 2 ເນື້ອໃນສຳຄັນໃນແຜນຮ່າງຊຶ່ງພວກຂ້າພະເຈົ້າພວມສ້າງເພື່ອຍື່ນສະເຫນີຕໍ່ລັດຖະບານ.”
ຄຽງຄູ່ກັບບັນດາມາດຕະການໃນຕໍ່ຫນ້າ, ເພື່ອປະຕິບັດບັນດາມາດຕະການຍາວນານ, ກະຊວງອຸດສາຫະກຳ ແລະ ການຄ້າ ກໍພວມຊອກຫາບັນດາມາດຕະການທີ່ມີລັກສະນະຍື່ນຍົງ. ທ່ານ Vu Huy Hoang ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ໄຈ້ແຍກວ່າ:
“ໃນບັນດາມາດຕະການຈຳຫນ່າຍມາດຕະການຈຳຫນ້ຍສິນຄ້າພາຍໃນປະເທດ ແລະ ມາດຕະການຊຸກຍູ້ການສົ່ງອອກ. ໝວດມາດຕະການຈຳຫນ່າຍພາຍໃນປະເທດກ່ຽວຂ້ອງເຖິງການພັດທະນາພາຍໃນປະເທດ, ກ່ຽວຂ້ອງເຖິງການປະຕິບັດບັນດາໂຄງການຂົນຂວາຍທີ່ທົ່ວປະເທດໄດ້ປຸກລະດົມຄື: ຊາວຫວຽດນາມ ບຸລິມະສິດຊົມໃຊ້ສິນຄ້າ ຫວຽດນາມ, ໃນນັ້ນ ພວກເຮົາເພີ່ມທະວີການຊົມໃຊ້ຜະລິດຕະພັນສິນຄ້າຊຶ່ງຫວຽດນາມ ຜະລິດແທນທີ່ສິນຄ້ານຳເຂົ້າຈາກຕ່າງປະເທດ. ເລື່ອງຊົມໃຊ້ສິນຄ້າພາຍໃນປະເທດ ກໍແມ່ນສ້າງເງື່ອນໄຂສະດວກໃຫ້ແກ່ບັນດາວິສາຫະກິດບືນຂຶ້ນ ບໍ່ພຽງແຕ່ມີຈຸດຢືນຢູ່ຕະຫລາດພາຍໃນເທົ່ານັ້ນ ຫາກສຳພັດກັບບັນດາຕະຫລາດສາກົນອີກດ້ວຍ.”
ທ່ານ Vu Huy Hoang ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ເນັ້ນຫນັກວ່າ: ມາດຕະການຊ່ວຍວິສາຫະກິດໄດ້ກູ້ຢືມທຶນດ້ວຍອັດຕາດອກເບ້ຍຕຳ່ຢ່າງວ່ອງໄວ ແລະ ອຸປະໂພກສິນຄ້າໃນວິວັດການຜະລິດ. ດ້ວຍບັນດາມາດຕະການຢ່າງຄົບຊຸດ ແລະ ພ້ອມກັບການປະສານສົມທົບຢ່າງທັນການ, ລັດຖະບານ ແລະ ກະຊວງອຸດສາຫະກຳ ການຄ້າ ປາດຖະຫນາວ່າ ຈະສ້າງກຳລັງຫນູນຊ່ວຍໃຫ້ບັນດາວິສາຫະກິດຜ່ານຜ່າຄວາມຫຍຸ້ງຍາກເທື່ອລະກ້າວ, ຮັບປະກັນໃຫ້ແກ່ພື້ນຖານເສດຖະກິດພັດທະນາຢ່າງຖືກທິດ ແລະ ຍືນຍົງ./.
To Tuan