(vovworld) - ມະຕິເລກທີ 13 ຂອງລັດຖະບານຫວຽດນາມໄດ້ປະກາດໃຊ້ແຕ່ເດືອນ 5 ປີ 2012 ດ້ວຍບັນດາມາດຕະການຫນູນຊ່ວຍວິສາຫະກິດ ແລະ ຕະຫລາດ ໄດ້ເປັນການຊ່ວຍປະຊາຄົມວິສາຫະກິດ ຫວຽດນາມ ຖືກກັບຈຸດເວລາ. ເຖິງວ່າ ບໍ່ມີລັກສະນະໂດຍກົງກໍຕາມ ແຕ່ການກະທົບຈາກບ້ວງເງິນຫນູນຊ່ວຍ 29.000 ຕື້ດົ່ງ ພ້ອມກັບບັນດາມາດຕະການຂອງລັດຖະບານພວມເສີມຂະຫຍາຍຢ່າງມີປະສິດທິຜົນ, ຊ່ວຍວິສາຫະກິດຫລາຍແຫ່ງຫລຸດພົ້ນອອກຈາກໄພລົ້ມລະລາຍ ພ້ອມທັງຫນູນຊ່ວຍວິສາຫະກິດຫລາຍແຫ່ງຜ່ານຜ່າຄວາມຫຍຸ້ງຍາກເທື່ອລະກ້າວ.
ບ້ວງເງິນຫນູນຊ່ວຍ ວິສາຫະກິດ ພ້ອມກັບບັນດາມາດຕະການຂອງລັດຖະບານພວມເສີມຂະຫຍາຍຢ່າງມີປະສິດທິຜົນ,
ພາບປະກອບ: internet
|
ຕາມການໄຈ້ແຍກ 3 ບັນຫາຫຍຸ້ງຍາກທີ່ສຸດຊຶ່ງບັນດາວິສາຫະກິດຫວຽດນາມ ປະສົບໃນໄລຍະຜ່ານມາ ນັ້ນແມ່ນສົ້ນອອກຜະລິດຕະພັນ, ລາຍຈ່າຍສົ້ນເຂົ້າເພີ່ມຂຶ້ນ ແລະ ຄວາມຫຍຸ້ງຍາກໃນການກູ້ຢືມທຶນ. ຕໍ່ຫນ້າຄວາມຫຍຸ້ງຍາກນີ້, ລັດຖະບານໄດ້ວາງອອກບັນດາມາດຕະການສັງລວມ ເພື່ອເພີ່ມພະລັງໃຫ້ແກ່ວິສາຫະກິດ. ສຳລັບສົ້ນອອກ, ລັດຖະບານໄດ້ສຸມໃສ່ເຂົ້າໃນມາດຕະການເພີ່ມຄວາມຕ້ອງການ, ຊ່ວຍໃຫ້ບັນດາວິສາຫະກິດຂາຍສິນຄ້າໄດ້, ຫລຸດຜ່ອນສະພາບສິນຄ້າຄ້າງສາງ, ເປັນຕົ້ນແມ່ນປະເພດສິນຄ້າຄ້າງສ້າງເປັນຈຳນວນຫລາຍຄື: ຊີມັງ, ເຫລັກກ້າ. ເພື່ອແກ້ໄຂບັນຫານີ້, ລັດຖະບານໄດ້ເອົາໃຈໃສ່ເຖິງມາດຕະການລາຍຈ່າຍຂອງລັດ, ຍູ້ແຮງບັນດາກິດຈະກຳນຳໃຊ້ເງິນລົງທຶນຂອງລັດ, ພ້ອມກັນນັ້ນ ປະຕິບັດການປ່ອຍເງິນຢ່າງວ່ອງໄວທີ່ສຸດ, ນັບທັງທຶນມັດຈຳຕາມການກຳນົດເພື່ອເຮັດແນວໃດສ້າງວຽກເຮັດງານທຳ, ສ້າງຕະຫລາດຈຳຫນ່າຍສິນຄ້າໃຫ້ແກ່ບັນດາວິສາຫະກິດ. ລັດຖະບານກໍໄດ້ເພີ່ມເຕີມເງິນຈຳນວນ 2000 ຕື້ດົ່ງ ຊຶ່ງແມ່ນທຶນກູ້ຢືມບຸລິມະສິດລົງທຶນພັດທະນາ. ກ່ຽວກັບສົ້ນເຂົ້າ, ກະຊວງການເງິນປະຕິບັດບັນດາມາດຕະການຕໍ່ກຳນົດເວລາເສຍອາກອນມູນຄ່າເພີ່ມ, ພາສີນຳໃຊ້ທີ່ດິນ, ຫລຸດຜ່ອນອາກອນລາຍຮັບວິສາຫະກິດ. ສຳລັບຈຳນວນສິນຄ້າຄ້າງສາງ, ທ່ານ Vuong Dinh Hue ລັດຖະມົນຕີກະຊວງການເງິນ ຫວຽດນາມ ຖືວ່າ:
“ນີ້ແມ່ນມາດຕະການສັງລວມນັບທັງງົບປະມານ ແລະ ເງິນຕາ, ການຫນູນຊ່ວຍສົ້ນອອກ, ສົ້ນເຂົ້າ ແລະ ບັນຫາ ການຊຳລະ, ສະນັ້ນ ບໍ່ວ່າວິສາຫະກິດໃດພວມເຄື່ອນໄຫວລ້ວນແຕ່ໄດ້ຊົມໃຊ້ຜົນປະໂຫຍດຈາກການຫນູນຊ່ວຍດັ່ງກ່າວ. ເຖິງຢ່າງໃດກໍຕາມ, ນີ້ແມ່ນບ້ວງເງິນຫນູນຊ່ວຍ ຫາກບໍ່ແມ່ນບ້ວງເງິນກູ້ຊ່ວຍຫລືກະຕຸ້ນຄວາມຕ້ອງການ. ສິ່ງສຳຄັນທີ່ສຸດນັ້ນແມ່ນໃນໄລຍະຫຍຸ້ງຍາກປະຈຸບັນ ກ່ອນອື່ນໝົດວິສາຫະກິດຕ້ອງຜ່ານຜ່າຄວາມຫຍຸ້ງຍາກ, ລັດພຽງແຕ່ສວມບົດບາດຫນູນຊ່ວຍເທົ່ານັ້ນ. ນີ້ກໍແມ່ນກາລະໂອກາດທີ່ດີເພື່ອໃຫ້ບັນດາວິສາຫະກິດສ້າງໂຄງປະກອບຄືນໃຫມ່ດ້ວຍຕົນເອງ ແລະ ຈາກການຫນູນຊ່ວຍຂອງລັດຖະບານ, ວິສາຫະກິດໃດຜ່ານຜ່າໄລຍະຫຍຸ້ງຍາກປະຈຸບັນ ຈະສືບຕໍ່ດຳເນີນທຸລະກິດ ແລະ ພັດທະນາໄດ້.”
ມາຮອດປະຈຸບັນ, ມາດຕະການຫນູນຊ່ວຍວິສາຫະກິດ ແລະ ຕະຫລາດ ໄດ້ຮັບການຕີລາຄາຢ່າງຕັ້ງຫນ້າຈາກບັນດາຜູ້ຊ່ຽວຊານເສດຖະກິດຢູ່ພາຍໃນ ແລະ ຕ່າງປະເທດ ແລະ ຖືວ່າ: ຄືສິ່ງກະຕຸກຊຸກຍູ້ເພື່ອໃຫ້ບັນດາວິສາຫະກິດແກ້ໄຂສະພາບຫຍຸ້ງຍາກ. ມີວິສາຫະກິດຫລາຍແຫ່ງຖືວ່າ: ພ້ອມກັບມາດຕະການຫລຸດຜ່ອນອັດຕາດອກເບ້ຍ, ຕໍ່ກຳນົດເວລາເສຍອາກອນ, ລັດຖະບານ ຍັງວາງອອກຫລາຍມາດຕະການອື່ນເພ່ືອຊ່ວຍວິສາຫະກິດແກ້ໄຂຄວາມຫຍຸ້ງຍາກ ແລະ ຖ້າຫາກສັງເກດໃນແງ່ມູມກວ້າງກວ່າ, ລັດຖະບານໄດ້ຊ່ວຍວິສາຫະກິດຫລຸດຜ່ອນຄວາມກົດດັນກ່ຽວກັບດ້ານທຶນຮອນ ແລະ ຍົກສູງດັດຊະນີແກ້ງແຍ້ງ. ທ່ານ Trinh Ngoc Hien ຜູ້ອຳນວຍການບໍລິສັດ Tu Thanh ຮ່າໂນ້ຍ ຖືວ່າ:
“ວິສາຫະກິດໃດໄດ້ຮັບການຫນູນຊ່ວຍທີ່ດີ ຈະເຮັດໃຫ້ວິສາຫະກິດນັ້ນມີລາຍຮັບ, ມີເງິນເພື່ອເບິກຈ່າຍເງິນເດືອນໃຫ້ແກ່ພະນັກງານ, ກຳມະກອນ, ນອກນັ້ນຍັງມີເງິນສະສົມເພື່ອລົງທຶນເປີດກວ້າງການຜະລິດດຳເນີນທຸລະກິດ.”
ສິ່ງພິເສດຫນຶ່ງອີກ ນັ້ນແມ່ນບ້ວງເງິນຫນູນຊ່ວຍພ້ອມກັບບັນດາມາດຕະການຫນູນຊ່ວຍຂອງລັດຖະບານໄດ້ ແລະ ພວມສ້າງປະສິດທິຜົນຢ່າງຕັ້ງຫນ້າໃນປະຊາຄົມວິສາຫະກິດ.
ວິສາຫະກິດຕຳແຜ່ນຕັດຫຍິບ
ພາບ: internet
|
ຕາມການໄຈ້ແຍກຂອງບັນດາຜູ້ຊ່ຽວຊານເສດຖະກິດແລ້ວ, ດ້ວຍຈຳນວນວິສາຫະກິດກວ່າ 400.000 ແຫ່ງທີ່ພວມເຄື່ອນໄຫວໃນປະຈຸບັນ, ເລື່ອງວິສາຫະກິດທີ່ໄດ້ຮັບການຫນູນຊ່ວຍໂດຍກົງຈາກບ້ວງເງິນດັ່ງກ່າວແມ່ນຫນ້ອຍທີ່ສຸດ. ເຖິງຢ່າງໃດກໍຕາມ, ໃນສະພາບການປະຈຸບັນ ດ້ວຍການຫນູນຊ່ວຍຂອງລັດຖະບານ, ຈະມີວິສາຫະກິດຫລາຍແຫ່ງຜ່ານຜ່າຄວາມຫຍຸ້ງຍາກເພື່ອພັດທະນາການຜະລິດ ແຕ່ກໍຍັງມີວິສາຫະກິດບາງແຫ່ງຖືກລົ້ມລະລາຍ ຍ້ອນວ່າ ຫວຽດນາມ ພວມມຸ່ງໄປເຖິງພື້ນຖານເສດຖະກິດການຕະຫລາດ. ທ່ານ Nguyen Quan Thai ຮອງປະທານສະຫະສະມາຄົມວິທະຍາສາດເສດຖະກິດ ຫວຽດນາມ ຖືວ່າ:
“ບໍ່ແມ່ນລັດຖະບານນຳເອົາຈຳນວນເງິນດັ່ງກ່າວໃຫ້ແກ່ວິສາຫະກິດໃຊ້ຈ່າຍ ຫາກຈຳນວນເງິນນີ້ສ່ວນຫນຶ່ງແມ່ນຫນູນຊ່ວຍວິສາຫະກິດຜ່ານຜ່າຄວາມຫຍຸ້ງຍາກ, ສ້າງໂຄງປະກອບວິສາຫະກິດຄືນໃຫມ່ ເຮັດແນວໃດເພື່ອໃຫ້ວິສາຫະກິດດຳເນີນທຸລະກິດຢ່າງມີປະສິດທິຜົນ.”
ຕາມຕົວເລກສະຖິຕິທີ່ຫາກໍ່ໄດ້ຮັບການປະກາດແລ້ວ, GDP ໃນ 6 ເດືອນຕົ້ນປີ 2012 ບັນລຸ 4,38%, ໃນຂະນະນັ້ນ ໄພເງິນເຟີ້ພຽງໃນລະດັບ 3% ຊຶ່ງແມ່ນລະດັບຕຳ່ສຸດໃນ 3 ປີ ຜ່ານມາ. ຕົວເລກນັ້ນໄດ້ພິສູດໃຫ້ເຫັນວ່າ, ບ້ວງເງິນຫນູນຊ່ວຍ ວິສາຫະກິດ ແມ່ນເສີມຂະຫຍາຍປະສິດທິຜົນຢ່າງຕັ້ງຫນ້າໃນເບື້ອງຕົ້ນ ແລະ ພ້ອມກັນນັ້ນ ພື້ນຖານເສດຖະກິດ ຫວຽດນາມ ພວມຜ່ານຜ່າຈຸດເວລາຫຍຸ້ງຍາກທີ່ສຸດ ແລະ ເລີ່ມຕົ້ນທ່າອ່ຽງພັດທະນາ.