(vovworld) - ປີ 2012 ຜ່ານມາ ແມ່ນປີທີ່ວິສາຫະກິດ ຫວຽດນາມ ປະສົບກັບຄວາມຫຍຸ້ງຍາກຫລາຍຢ່າງ. ຄວາມຫຍຸ້ງຍາກຈາກພື້ນຖານເສດຖະກິດພາຍໃນປະເທດ ພ້ອມກັບການຜັນແປຍາກທີ່ຈະຄາດຄະເນລ່ວງໜ້າໄດ້ຂອງເສດຖະກິດໂລກ ໄດ້ສົ່ງຜົນສະທ້ອນໂດຍກົງເຖິງສະພາບການຜະລິດດຳເນີນທຸລະກິດ ແລະ ການຈະເລີນເຕີບໂຕຂອງວິສາຫະກິດ. ເຖິງຢ່າງໃດກໍຕາມ, ພ້ອມກັບການຫນູນຊ່ວຍຂອງລັດຖະບານ, ມີວິສາຫະກິດຫລາຍແຫ່ງໄດ້ມານະພະຍາມຍາມບື່ນຕົວຂຶ້ນ, ຟື້ນຕົວເທື່ອລະກ້າວ ແລະ ພັດທະນາການຜະລິດ.
ພາບປະກອບ:ອິນເຕີແນັດ
ຕໍ່ຫນ້າຄວາມຫຍຸ້ງຍາກລວມຂອງພື້ນຖານເສດຖະກິດ, ລັດຖະບານ ໄດ້ສຸມໃສ່ຊີ້ນຳວາງອອກຫລາຍມາດຕະການ ເພື່ອຫນູນຊ່ວຍໃຫ້ແກ່ປະຊາຄົມວິສາຫະກິດ. ພ້ອມກັບບັນດາມາດຕະການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ລັດຖະບານ ໄດ້ສືບຕໍ່ເສີມຂະຫຍາຍການຫລຸດຜ່ອນອັດຕາດອກເບ້ຍສິນເຊ່ືອຢ່າງມີປະສິດທິຜົນ, ປັບປຸງຄວາມສາມາດຊຳລະຂອງລະບົບທະນາຄານ, ຮັກສາອັດຕາແລກປ່ຽນເງິນຕາຕ່າງປະເທດເປັນປົກກະຕິ... ຍ້ອນເຫດນັ້ນ, ການເຄື່ອນໄຫວຜະລິດດຳເນີນທຸລະກິດຂອງຂະແຫນງການຈຳນວນຫນຶ່ງໄດ້ຮັບການປັບປຸງສ່ວນໃດສ່ວນຫນຶ່ງ. ເຖິງຢ່າງໃດກໍຕາມ, ເບີ່ງລວມແລ້ວ, ມີວິສາຫະກິດຫລາຍແຫ່ງຍັງຄົງປະເຊີນຫນ້າກັບສິ່ງທ້າທາຍເມື່ອອັດຕາດອກເບ້ຍສິນເຊື່ອຍັງຢູ່ໃນລະດັບສູງ, ເປັນຕົ້ນແມ່ນບັນດາວິສາຫະກິດຂະຫນາດກາງ ແລະ ນ້ອຍ ປະສົບກັບຄວາມຫຍຸ້ງຍາກໃນການກູ້ຢືມທຶນ, ຜະລິດຕະພັນຈຳຫນ່າຍຍາກ, ອັດຕາສ່ວນສິນຄ້າຄ້າງສາງຍັງຢູ່ໃນລະດັບສູງ. ສິ່ງດັ່ງກ່າວໄດ້ເຮັດໃຫ້ວິສາຫະກິດຫລາຍແຫ່ງຕ້ອງລົ້ມລະລາຍ, ຢຸດຕິການເຄື່ອນໄຫວ. ຕາມຕົວເລກສະຖິຕິໃນປີ 2012 ແລ້ວ, ໃນຍອດຈຳນວນວິສາຫະກິດກວ່າ 670.000 ແຫ່ງທີ່ໄດ້ຮັບການສ້າງຕັ້ງໃນທົ່ວປະເທດ ມີເກືອບ 202.000 ແຫ່ງຖືກລົ້ມລະລາຍ, ຢຸດຕິການເຄື່ອນໄຫວ ແມ່ນເທົ່າກັບ 50% ຍອດຈຳນວນວິສາຫະກິດອອກຈາກຕະຫລາດໃນຮອບ 20 ປີຜ່ານມາ. ຄວາມຫຍຸ້ງຍາກໃຫຍ່ສຸດຂອງບັນດາວິສາຫະກິດໃນປະຈຸບັນ ແມ່ນແຫລ່ງທຶນເພື່ອທຳການຜະລິດ, ດຳເນີນທຸລະກິດ. ເພື່ອແກ້ໄຂບັນຫານີ້, ຄຽງຄູ່ກັບການສ້າງເງື່ອນໄຂໃຫ້ບັນດາວິສາຫະກິດຂະຫນາດກາງ ແລະ ນ້ອຍກູ້ຢືມທຶນຄັ້ງໃຫມ່, ລັດ ພວມສຸມໃສ່ແກ້ໄຂຫນີ້ສິນເກີນກຳນົດເວລາ. ດຣ ຫງວຽນຫືວກາດ, ກຳມະການສະຫະສະມາຄົມວິສາຫະກິດຂະຫນາດກາງ ແລະ ນ້ອຍ ຫວຽດນາມ ຖືວ່າ:
“ຕ້ອງໃຫ້ບຸລິມະສິດແກ່ບັນດາວິສາຫະກິດຍັງທຳການຜະລິດ, ພວມຕິດຫນີ້ ຖ້າຫາກໄດ້ຮັບການຫນູນຊ່ວຍເຂົາເຈົ້າຈະພັດທະນາໄດ້, ສະນັ້ນຕ້ອງບຸລິມະສິດໃຫ້ແກ່ເປົ້າໝາຍນັ້ນ ແລະ ປະຈຸບັນ ຈຳນວນວິສາຫະກິດຂຶ້ນກັບເປົ້າໝາຍດັ່ງກ່າວແມ່ນຫລາຍທີ່ສຸດ ກວມເຖິງ 2/3 ຈຳນວນວິສາຫະກິດຂະຫນາດກາງ ແລະ ນ້ອຍ. ຖ້າແກ້ໄຂໄດ້ບັນຫານີ້ ຈະປະກອບສ່ວນຊຸກຍູ້ລະດັບເຕີບໂຕຂອງພື້ນຖານເສດຖະກິດໄດ້. ເຖິງຢ່າງໃດກໍຕາມ, ຕ້ອງມີການເລືອກເຟັ້ນ, ຕາມກົດເກນຕະຫລາດແລ້ວ, ຕ້ອງເລືອກເຟັ້ນເປົ້າໝາຍເພື່ອຊຸກຍູ້ພື້ນຖານເສດຖະກິດໃຫ້ພັດທະນາ.”
ປະຈຸບັນ, ລັດຖະບານ ພວມຊີ້ນຳໃຫ້ບັນດາກະຊວງ, ຂະແຫນງການ ແລະ ທ້ອງຖິ່ນ ກວດກາຄືນບັນດາວິສາຫະກິດທີ່ມີຄວາມສາມາດຄວນໄດ້ຮັບການຫນູນຊ່ວຍເພື່ອຟື້ນຕົວ, ຮັກສາການຜະລິດເປັນປົກກະຕິ. ດ້ານອື່ນ, ລັດຖະບານກໍຮຽກຮ້ອງປະຊາຄົມວິສາຫະກິດເປັນເຈົ້າການ, ສົມທົບກັນຜ່ານຜ່າຄວາມຫຍຸ້ງຍາກ. ຄວາມຈິງ, ໃນໄລຍະຜ່ານມາ, ມີວິສາຫະກິດຫລາຍແຫ່ງສາມາດໄຈ້ແຍກດ້ານມະຫາພາກ ແລະ ຄາດຄະເນຄວາມຕ້ອງການຂອງຂະແຫນງຕົນໄດ້, ສະນັ້ນ ເຂົາເຈົ້າໄດ້ເປັນເຈົ້າການຮັບມືດ້ວຍການດັດປັບຕ່າງໆທີ່ເໝາະສົມເພື່ອກູ້ເອົາຕົນເອງ. ບໍລິສັດພັດທະນາເຮືອນຢູ່ ຖູດືກ (Thu Duc House) ແມ່ນຕົວຢ່າງ. ຍ້ອນມີຍຸດທະສາດພັດທະນາການດຳເນີນທຸລະກິດຕາມທິດໝັ້ນຄົງ ແລະ ມີຄວາມສາມາດຄາດຄະເນຕະຫລາດໄດ້, ສະນັ້ນ ບໍລິສັດໄດ້ຫັນມາກໍ່ສ້າງເຮືອນປະເພດປານກາງ. ຍ້ອນມີການຫັນປ່ຽນຂອບຂະຫນາດນີ້, ໃນສະພາບຄວາມຫຍຸ້ງຍາກ ມີຫລາຍໂຄງການກໍ່ສ້າງເຮືອນຢູ່ຂອງບໍລິສັດຍັງຄົງຂາຍໄດ້ກວ່າ 60%. ທ່ານເລຈີຮຽວ, ຜູ້ອຳນວຍການໃຫຍ່ບໍລິສັດເຮືອນຢູ່ ຖູດືກ ແບ່ງປັນວ່າ:
“ໂດຍແມ່ນນັກທຸລະກິດ, ຕ້ອງມີຄຸນນະທາດ, ມີນ້ຳໃນ, ມີປັນຍາ ແລະ ກ້າເຮັດກ້າທຳ. ເພື່ອເອົາໃຈໃສ່ເບິ່ງແຍງໃຫ້ທຸກຄົນ, ໃຫ້ສັງຄົມ, ເລືອກເຟັ້ນເສັ້ນທາງທີ່ຖືກຕ້ອງ, ເລືອກເຟັ້ນຍຸດທະສາດດຳເນີນທຸລະກິດທີ່ດີ ແລະ ປະເຊີນຫນ້າກັບສິ່ງກີດຂວາງ, ທ້າທາຍທຸກຢ່າງເພື່ອພັດທະນາ ແລະ ເຊື່ອມໂຍງກັບສາກົນ.”
ກຳມະກອນປຸງແຕ່ງສິນໃນນ້ຳເພື່ອສົ່ງອອກ
ພາບປະກອບ:ອິນເຕີແນດ
ໃນສະພາບເສດຖະກິດປະສົບກັບຄວາມຫຍຸ້ງຍາກ, ມີວິສາຫະກິດຫລາຍແຫ່ງໄດ້ປະສານສົມທົບກັນເພື່ອສາມາດນຳໃຊ້ພື້ນຖານໂຄງລ່າງຂອງກັນ ແນໃສ່ສືບຕໍ່ການເຄື່ອນໄຫວ, ຫລຸດຜ່ອນລາຍຈາຍ, ຮ່ວມສຳພັນນຳກັນເພື່ອພ້ອມກັນພັດທະນາຢ່າງແຂງແຮງກວ່າ. ເພື່ອເປັນເຈົ້າການໃນການຜະລິດດຳເນີນທຸລະກິດ, ມີວິສາຫະກິດຫລາຍແຫ່ງໄດ້ສ້າງຍຸດທະສາດພັດທະນາຍາວນານ ຕາມທິດຍືນຍົງຄື: ສ້າງເຂດວັດຖຸດິບສິນຄ້າເປັນລວມສຸມ, ຕິດພັນກັບການປຸງແຕ່ງ, ທິດທາງການຕະຫລາດເພື່ອຫລີກລ້ຽງຄວາມສ່ຽງ. ລັດຖະບານໄດ້ສ້າງບັນດາມາດຕະການຢ່າງລະອຽດ ເພື່ອປ່ຽນໃຫມ່ຮູບແບບເຕີບໂຕ ແລະ ສ້າງໂຄງປະກອບພື້ນຖານເສດຖະກິດຄືນໃຫມ່. ໃນວິວັດດັ່ງກ່າວ, ຫ້ອງການການຄ້າ ແລະ ອຸດສາຫະກຳ ຫວຽດນາມ ດ້ວຍບົດບາດເປັນຂົວເຊື່ອມຕໍ່ລະຫວ່າງປະຊາຄົມວິສາຫະກິດ ກັບບັນດາກະຊວງ, ຂະແຫນງການຈາກສູນກາງຕະຫລອດຮອດທ້ອງຖິ່ນ ຄວນມີບັນດາຄຳສະເຫນີຢ່າງທັນການເພື່ອຮັບປະກັນສ້າງນະໂຍບາຍຢ່າງເໝາະສົມ ແລະ ໃກ້ຊິດຕິດແທດກັບພຶດຕິກຳຕົວຈິງແຫ່ງການເຄື່ອນໄຫວຂອງບັນດາວິສາຫະກິດ. ທ່ານ ຫວູຕຽນໂລກ, ປະທານຫ້ອງການການຄ້າ ແລະ ອຸດສາຫະກຳ ຫວຽດນາມ (VCCI) ຖືວ່າ:
“ສຳລັບ VCCI, ຕ້ອງສືບຕໍ່ຍົກອອກທັດສະນະຂອງຕົນ, ສະເຫນີຕໍ່ພັກ ແລະ ລັດ ແກ້ໄຂຄວາມຫຍຸ້ງຍາກ, ຕິດຂັດຢ່າງທັນການ ພ້ອມທັງປະກອບຄຳເຫັນກ່ຽວກັບມາດຕະການຕ່າງໆໃຫ້ແກ່ລັດຖະບານ. ນອກນັ້ນ ຜັນຂະຫຍາຍບັນດາມາດຕະການຢ່າງຄົບຊຸດ, ລະອຽດ ເພື່ອຫນູນຊ່ວຍບັນດາວິສາຫະກິດ.”
ກ້າວເຂົ້າສູ່ປີ 2013, ລັດຖະບານພວມສຸມໃສ່ແກ້ໄຂຄວາມຫຍຸ້ງຍາກຂອງພື້ນຖານເສດຖະກິດຄື: ເພີ່ມກຳລັງຊື້ຂອງຕະຫລາດ, ສືບຕໍ່ປະຕິບັດການຕໍ່ກຳນົດເວລາເສຍອາກອນ, ຫລຸດຜ່ອນອາກອນລາຍຮັບໃຫ້ແກ່ວິສາຫະກິດ, ແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບ, ແກ້ໄຂຫນີ້ເສຍ ແລະ ສິນຄ້າຄ້າງສາງ. ບັນດາຜູ້ຊ່ຽວຊານໄດ້ໃຫ້ຂໍ້ສັງເກດວ່າ ດ້ວຍແຜນນະໂຍບາຍອັນຖືກຕ້ອງ, ຄວາມຕັດສິນໃຈສູງຂອງລັດຖະບານ ພ້ອມກັບຄວາມເປັນເຈົ້າການຂອງບັນດາວິສາຫະກິດ, ພື້ນຖານເສດຖະກິດ ຫວຽດນາມ ຈະຟື້ນຕົວເທື່ອລະກ້າວ.