(vovworld)- ພາຍຫລັງກວ່າ 2 ປີ ດ້ວຍການເຈລະຈາຢ່າງເປັນທາງການ 8 ຄັ້ງ ແລະ ການເຈລະຈາຂັ້ນຫົວຫນ້າຄະນະ 8 ຄັ້ງ, ສັນຍາການຄ້າເສລີ ຫວຽດນາມ - ສເກົາຫລີ ຫາກໍໄດ້ຮັບການລົງນາມຢູ່ ຮ່າໂນ້ຍ. ດ້ວຍຄຳໝັ້ນສັນຍາເປີດປະຕູໃຫຍ່ຈາກ ຝ່າຍ ສເກົາຫລີ, ບັນດາວິສາຫະກິດຫວຽດນາມມີເງື່ອນໄຂຍາດແຍ່ງກາລະໂອກາດ, ຫັນບຸລິມະສິດເປັນໝາກຜົນເສດຖະກິດ.
ພິທີລົງນາມສັນຍາ FTA ຫວຽດນາມ-ສເກົາຫລີ
ພາບ:chinhphu.vn
|
ສັນຍາການຄ້າເສລີ ຫວຽດນາມ - ສເກົາຫລີ ແມ່ນສັນຍາການຄ້າເສລີສອງຝ່າຍຮອບດ້ານ ລະຫວ່າງຫວຽດນາມ ແລະ ສເກົາຫລີ, ນຳມາເຊິ່ງຜົນກະທົບຢ່າງຕັ້ງຫນ້າສຳລັບຫວຽດນາມໃນບັນດາຂົງເຂດເສດຖະກິດ, ການຄ້າ, ການລົງທຶນ, ສັງຄົມ. ລະອຽດ, ສເກົາຫລີ ຫັນ 95,4% ປະເພດພາສີສຳລັບສິນຄ້ານຳເຂົ້າຕະຫລາດ ສເກົາຫລີ ເປັນເສລີ, ພິເສດ ແມ່ນຜະລິດຕະພັນກະເສດ,ເຄື່ອງປ່າຂອງດົງ, ສິນໃນນ້ຳ, ຕ່ຳແຜ່ນຕັດຫຍິບ ແລະ ກົນຈັກ. ປັດໄຈນີ້ ໄດ້ສ້າງທ່າໄດ້ປຽບໃນການແກ້ງແຍ້ງໃຫ້ບັນດາປະເພດສິນຄ້າສົ່ງອອກຂອງຫວຽດນາມຄື: ກຸ້ງ, ຫົວຜັກທຽມ, ຫົວຂິງ ນ້ຳເຜິ້ງ.. ກົງກັນຂ້າມ, ຫວຽດນາມ ຫລຸດຜ່ອນ 82,9% ປະເພດພາສີສຳລັບສິນຄ້ານຳເຂົ້າຈາກ ສເກົາຫລີ ນັ້ນແມ່ນ ປະເພດສິນຄ້າອຸດສາຫະກຳຄື: ເຄື່ອງອາໄຫລ່ເອເລັກໂຕນິກ, ລົດໂອໂຕ, ເຄື່ອງໃຊ້ສອຍໃນຄອບຄົວ, ເຫລັກກ້າ ແລະ ສາຍກາບ… ສິ່ງດັ່ງກ່າວໄດ້ຊ່ວຍໃຫ້ພື້ນຖານເສດຖະກິດຫວຽດນາມ ທີ່ເຄີຍອີງໃສ່ການຜະລິດສົ່ງອອກ ຫລຸດຜ່ອນການຂຶ້ນກັບແຫລ່ງສະຫນອງຈາກປະເທດຈຳນວນຫນຶ່ງ. ທ່ານ ຫວູຮູຍຮ່ວາງ, ລັດຖະມົນຕີວ່າການກະຊວງອຸດສາຫະກຳ ການຄ້າ ຫວຽດນາມ ໃຫ້ຮູ້ວ່າ:
“ດ້ວຍເລື່ອງລົງນາມໃນສັນຍາ ການຄ້າເສລີ ຫວຽດນາມ - ສເກົາຫລີ, ຄວາມສາມາດສົ່ງອອກບັນດາປະເພດສິນຄ້າຂອງຫວຽດນາມໄປຍັງ ສເກົາຫລີ ອາດຈະແຂງແຮງກວ່າ, ພິເສດ ແມ່ນສິນໃນນ້ຳ, ຜະລິດຕະພັນກະເສດ, ອຸດສາຫະກຳປຸງແຕ່ງຈະບັນລຸລະດັບເຕີບໂຕວ່ອງໄວກວ່າໃນໄລຍະຈະມາເຖິງ ແລະ ກົງກັນຂ້າມ ບັນດາປະເພດສິນຄ້າ ປະຈຸບັນ ຫວຽດນາມ ມີຄວາມຕ້ອງການນຳເຂົ້າ, ເປັນຕົ້ນແມ່ນສິນຄ້າຮັບໃຊ້ຂະແຫນງອຸດສາຫະກຳເອເລັກໂຕນິກ, ອຸດສາຫະກຳປຸງແຕ່ງ, ສະຫນອງອຸປະກອນໃຫ້ແກ່ຂົງເຂດຕ່ຳແຜ່ນຕັດຫຍິບ, ເກີບຫນັງ, ບັນດາປະເພດສິນຄ້າຊື່ງ ສເກົາຫລີ ມີທ່າແຮງກໍເພີ່ມຂຶ້ນກ່ຽວກັບປະລິມານສິນຄ້າສົ່ງໄປຂາຍຢູ່ຫວຽດນາມ.”
ຕາມທ່ານ ຫວູຮູຍຮ່ວາງ, ລັດຖະມົນຕີວ່າການກະຊວງອຸດສາຫະກຳ ຫວຽດນາມແລ້ວ, ຄຽງຄູ່ກັບການລົງນາມໃນສັນຍາ FTA, ຫວຽດນາມ ແລະ ສເກົາຫລີ ໄດ້ແລກປ່ຽນບາງມາດຕະການສືບຕໍ່ຊຸກຍູ້ການພົວພັນຮ່ວມມືດ້ານການຄ້າ, ເສດຖະກິດ, ການລົງທຶນລະຫວ່າງສອງປະເທດ. ສເກົາຫລີ ມີຄຳໝັ້ນສັນຍາຊ່ວຍຫວຽດນາມ ພັດທະນາຂະແຫນງອຸດສາຫະກຳຫນູນຊ່ວຍ, ຊື່ງແມ່ນຂະແຫນງທີ່ຫວຽດນາມ ຍັງອ່ອນດ້ອຍ. ສເກົາຫລີ ກໍສ້າງເງື່ອນໄຂໃຫ້ບັນດາຜະລິດຕະພັນກະສິກຳ, ໃນນັ້ນ ມີສິນໃນນ້ຳ, ຜັກ, ໝາກໄມ້ຂອງຫວຽດນາມ ສົ່ງໄປຂາຍຢູ່ ສເກົາຫລີ ດ້ວຍປະລິມານນັບມື້ນັບເພີ່ມຂຶ້ນ ດ້ວຍອັດຕາພາສີບຸລິມະສິດ. ເບິ່ງລວມແລ້ວ, ບັນດາເປົ້າໝາຍຢູ່ຫວຽດນາມໄດ້ຊົມໃຊ້ຜົນປະໂຫຍດຈາກສັນຍານີ້ ກ່ອນອື່ນໝົດແມ່ນຂົງເຂດກະສິກຳ, ຊາວກະສິກອນ ແລະ ຊົນນະບົດ, ອຸດສາຫະກຳປຸງແຕ່ງ, ອຸດສາຫະກຳນຳໃຊ້ຄົນງານຫລາຍຄື: ຕ່ຳແຜ່ນຕັດຫຍິບ ແລະ ເກີບຫນັງ. ນັ້ນແມ່ນບັນດາຂົງເຂດ ເມື່ອປະຕິບັດສັນຍາ ແນ່ນອນວ່າຈະນຳມາເຊິ່ງປະສິດທິຜົນ ແລະ ຜົນປະໂຫຍດຫລາຍຢ່າງໃຫ້ແກ່ຄົນງານ.
ປະຈຸບັນ ສເກົາຫລີ ແມ່ນຫນຶ່ງໃນບັນດາຕະຫລາດສົ່ງອອກໃຫຍ່, ກວມກວ່າ 10% ຍອດວົງເງິນສົ່ງອອກເຄື່ອງຕ່ຳແຜ່ນຕັດຫຍິບຂອງຫວຽດນາມ. ເຄື່ອງຕ່ຳແຜ່ນຕັດຫຍິບແມ່ນປະເພດສິນຄ້າສົ່ງອອກມີມູນຄ່າໃຫຍ່ອັບດັບ 2 ຂອງຫວຽດນາມ ໄປຍັງ ສເກົາຫລີ ພຽງຖັດຈາກສິນໃນນ້ຳ. ກົງກັນຂ້າມ, ສເກົາຫລີ ແມ່ນປະເທດພວມສະຫນອງ ເກືອບ 20% ຈຳນວນຜ້າແພໃຫ້ຂະແຫນງຕ່ຳແຜ່ນຕັດຫຍິບ ຫວຽດນາມ, ພຽງຖັດຈາກຈີນ. ສະນັ້ນ ອາດຈະເວົ້າໄດ້ວ່າ ສັນຍາ FTA ຫວຽດນາມ - ສເກົາຫລີ ມີລັກສະນະເພີ່ມເຕີມສູງ ສຳລັບຂະແຫນງຕ່ຳແຜ່ນຕັດຫຍິບ ເມື່ອຫວຽດນາມນຳເຂົ້າວັດຖຸ ດິບຜ້າແພຈາກ ສເກົາຫລີ ແລະ ສົ່ງອອກຜະລິດຕະພັນໄປຍັງຕະຫລາດນີ້. ບັນຫາທີ່ວາງອອກປະຈຸບັນ ນັ້ນແມ່ນບັນດາວິສາຫະກິດ ຫວຽດນາມ ຄວນກຳກາລະໂອກາດຈາກສັນຍາດັ່ງກ່າວໂດຍໄວ. ຄວາມຈິງ ທ່າອ່ຽງຫັນບັນດາສັນຍາສົ່ງອອກເຄື່ອງຕ່ຳແຜ່ນຕັດຫຍິບໄປຍັງຕະຫລາດ ສເກົາຫລີ ໄດ້ດຳເນີນໄປ ນັບແຕ່ເມື່ອສັນຍາ FTA ອາຊຽນ - ສເກົາຫລີ ມີຜົນສັກສິດເມື່ອປີ 2009. ມີຫລາຍຂະແຫນງສິນຄ້າ, ວິສາຫະກິດສົ່ງອອກຂອງຫວຽດນາມ, ເປັນຕົ້ນແມ່ນຂະແຫນງກະສິກຳ, ສິນໃນນ້ຳ ແລະ ເຄື່ອງຕ່ຳແຜ່ນຕັດຫຍິບຫວຽດນາມ ກໍໄດ້ຮັບຜົນປະໂຫຍດຫລາຍຢ່າງຈາກສັນຍາດັ່ງກ່າວ. ສະນັ້ນ ເລື່ອງລົງນາມໃນສັນຍາ FTA ຫວຽດນາມ - ສເກົາຫລີ ຄັ້ງນີ້ ວິສາຫະກິດມີກາລະໂອກາດຫລາຍກວ່າສິ່ງທ້າທາຍ. ທ່ານ ເຈີນກວກແຄງ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ຫວຽດນາມ ຢືນຢັນວ່າ:
“ກ່ຽວກັບການກຳກາລະໂອກາດ, ຂ້າພະເຈົ້າຄິດວ່າ ວິສາຫະກິດຂອງພວກເຮົາກະກຽມດີພໍສົມຄວນ. ກ່ອນທີ່ມີສັນຍາການຄ້າອາຊຽນ - ສເກົາຫລີ, ການສົ່ງອອກຂອງຫວຽດນາມ ເພີ່ມຂຶ້ນປະມານ 16%/ປີ ແຕ່ພາຍຫລັງພວກເຮົາເຊັນສັນຍາການຄ້າ FTA ກັບ ສເກົາຫລີ ການສົ່ງອອກຂອງຫວຽດນາມ ເພີ່ມຂຶ້ນ 38%/ປີ. ອັດຕາສ່ວນການ ສົ່ງອອກ ແລະ ນຳເຂົ້າ ຈາກ ສເກົາຫລີຫລຸດລົງຍັງເຫລືອພຽງ 1/3. ເຖິງຢ່າງໃດກໍຕາມ ການນຳເຂົ້າເກີນດຸ່ນຍັງມີຢູ່ ແຕ່ດ້ວຍລະດັບເຕີບໂຕການສົ່ງອອກຢ່າງວ່ອງໄວ ພວກເຮົາຍັງມີພື້ນຖານເພື່ອຫວັງວ່າ ຫວຽດນາມ ຈະຫລຸດຜ່ອນການນຳເຂົ້າເກີນດຸ່ນ ແລະ ສ້າງຄວາມດຸ່ນດ່ຽງລະຫວ່າງການນຳເຂົ້າ ແລະ ສົ່ງອອກລະຫວ່າງຫວຽດນາມ ແລະ ສເກົາຫລີ.”
ການລົງນາມໃນສັນຍາ FTA ຫວຽດນາມ -ສເກົາຫລີ ແມ່ນບາດກ້າວເດີນລະອຽດເພື່ອປະຕິບັດຍຸດທະສາດເປັນເຈົ້າການໃນການເຊື່ອມໂຍງເຂົ້າກັບສາກົນ, ໃນນັ້ນ ການເຊື່ອມໂຍງເຂົ້າກັບເສດຖະກິດສາກົນແມ່ນຈຸດສຸມ, ຫນູນຊ່ວຍວິວັດການຫັນປ່ຽນໂຄງປະກອບວິສາຫະກິດຄືນໃຫມ່, ຍູ້ໄວວິວັດການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ. ສັນຍາດັ່ງກ່າວ ໄດ້ປະກອບສ່ວນຢ່າງຕັ້ງຫນ້າເຂົ້າໃນການພັດທະນາການພົວພັນຄູ່ຮ່ວມມືຍຸດທະສາດ ຫວຽດນາມ - ສເກົາຫລີ ຕາມທິດເປັນປົກກະຕິ, ຍາວນານ, ປະກອບສ່ວນຮັກສາ ແລະ ປັບປຸງສາຍພົວພັນສັນຕິພາບ, ສະຖຽນລະພາບໃນພາກພື້ນ.