ຫວ່າງແລ້ວນີ້, ກຸ່ມບໍລິສັດ Central Group ຂອງໄທ ໄດ້ຊື້ຄືນລະບົບຮ້ານສັບພະສິນຄ້າ Big C ຢູ່ຫວຽດນາມ. ດ້ວຍເຫດການນີ້, ມາຮອດປະຈຸບັນກຸ່ມບໍລິສັດຂາຍຍ່ອຍຂອງໄທ ໄດ້ກວມເກືອບ 70% ຕະຫຼາດຂາຍຍ່ອຍຂອງຫວຽດນາມ ໂດຍຜ່ານຮູບການຮ່ວມດຳເນີນທຸລະກິດ, ຮ່ວມສຳພັນ. ບັນດາວິສາຫະກິດຂາຍຍ່ອຍອື່ນຂອງສ.ເກົາຫຼີ ແລະ ຍີ່ປຸ່ນ ກໍໄດ້ຊື້ຫຸ້ນສ່ວນຂອງບາງວິສາຫະກິດຂາຍຍ່ອຍແຖວໜ້າຂອງຫວຽດນາມ ແຕ່ 20% - 40% ຄື: ຮ້ານສັບພະສິນຄ້າ ຫງວຽນກິມ, ເຈີນແອງ, Fivimart ຫຼື Citimart. ການເຂົ້າຮ່ວມ ແລະ ແຊກຊຶມຢ່າງແຮງຂອງບັນດາກຸ່ມບໍລິສັດ, ວິສາຫະກິດຂາຍຍ່ອຍຕ່າງປະເທດ ຜ່ານການຊື້ຂາຍ, ເຂົ້າຮ່ວມບັນດາລະບົບຂາຍຍ່ອຍໃຫຍ່ ຢູ່ຫວຽດນາມ ພວມສ້າງກຳລັງດັນອັນໃຫຍ່ຫຼວງສຳລັບບັນດາວິສາຫະກິດຂາຍຍ່ອຍພາຍໃນປະເທດ ເມື່ອຕ້ອງປະເຊີນໜ້າໂດຍກົງ ແລະ ແກ່ງແຍ້ງຢ່າງຂ້ຽວຂາດກັບບັນດາຄູ່ແຂ່ງໃນຕະຫຼາດຂອງຕົນ . ພົ້ນເດັ່ນຄື: Sai Gon Co.op ເຊິ່ງແມ່ນວິສາຫະກິດຂາຍຍ່ອຍໃຫຍ່ຂອງຫວຽດນາມ ຢາກຊື້ລະບົບຮ້ານສັບພະສິນຄ້າ Big C, ພັດປະສົບກັບສິ່ງກີດຂວາງໃຫຍ່ເມື່ອເຮັດລະບຽບການ ຂໍໜັງສືອະນຸຍາດລົງທຶນອອກຕ່າງປະເທດ, ກໍຄືລະບຽບການລະດົມແຫຼ່ງການເງິນ ເພື່ອພັດທະນາວິສາຫະກິດ. ທ່ານ ຢ້ຽບຢູງ, ປະທານສະພາບໍລິຫານງານ Sai Gon Co.op ສະເໜີວ່າ.
“ພວກຂ້າພະເຈົ້າສະເໜີໃຫ້ລັດຖະບານ ຕ້ອງສ້າງຍຸດທະສາດແຫ່ງຊາດກ່ຽວກັບການພັດທະນາຂະແໜງຂາຍຍ່ອຍຂອງຫວຽດນາມ ວິໄສທັດຮອດປີ 2030 ໂດຍໄວ. ສ້າງວິສາຫະກິດຂາຍຍ່ອຍແຖວໜ້າຂອງຫວຽດນາມ 20 ແຫ່ງທີ່ມີຄວາມສາມາດແກ່ງແຍ້ງກັບບັນດາກຸ່ມບໍລິສັດຕ່າງປະເທດ. ລັດຖະບານແກ້ໄຂບັນດາຄວາມຫຍຸ້ງຍາກໃຫ້ວິສາຫະກິດໃນການຊື້ຂາຍ ຫຼື ຮ່ວມດຳເນີນທຸລະກິດ”.
ເຖິງຢ່າງໃດກໍ່ຕາມ, ເລື່ອງນຳສິນຄ້າຕ່າງປະເທດນຳເຂົ້າຫວຽດນາມ ນັບມື້ນັບຫຼາຍນັ້ນ, ທັງແມ່ນການທ້າທາຍ ແຕ່ກໍແມ່ນກາລະໂອກາດເພື່ອໃຫ້ວິສາຫະກິດຫວນຄືນ, ປ່ຽນແປງ ເພື່ອມີກຳລັງຢ່າງພຽງພໍສາມາດແກ່ງແຍ້ງກັບບັນດາວິສາຫະກິດຕ່າງປະເທດ. ທ່ານ ເຕີນຮ່ວາງເຮົ້າ, ຫົວໜ້າ Marketing, ລະບົບແຈກຢາຍເຄື່ອງໄຟຟ້າ ທຽນຮ່ວາ, ໃຫ້ຮູ້ວ່າ.
“ພວກຂ້າພະເຈົ້າສືບຕໍ່ລົງທຶນລະບົບຢັ້ງຢືນເຄື່ອງໝາຍການຄ້າຄືນໃໝ່. ພ້ອມກັນນັ້ນ, ພວກຂ້າພະເຈົ້າກໍ່ສືບຕໍ່ລົງທຶນກໍ່ສ້າງຮ້ານສັບພະສິນຄ້າເຄື່ອງຈັກໄຟຟ້າທັນສະໄໝທີ່ສຸດຢູ່ຫວຽດນາມ ເພື່ອເພີ່ມລັກສະນະແກ່ງແຍ້ງ ແລະ ດຶງດູດການລົງທຶນ”.
ບໍ່ພຽງແຕ່ບັນດານັກຂາຍຍ່ອຍຕ້ອງປ່ຽນໃໝ່, ຍົກສູງຄຸນນະພາບການບໍລະການເທົ່ານັ້ນ, ຫາກນັບທັງບັນດານັກຜະລິດກໍ່ໄດ້ຮັບການຍົກສູງຄຸນນະພາບຜະລິດຕະພັນ, ມີລາຄາແກ່ງແຍ້ງອີກ ເພື່ອໃຫ້ສິນຄ້າຂອງຕົນຖືກນຳເຂົ້າລະບົບຂາຍຍ່ອຍສິນຄ້າຢູ່ພາຍໃນ ແລະ ຕ່າງປະເທດ. ທ່ານນາງ ເລທິແທງເຕີມ, ຮອງຜູ້ອຳນວຍການໃຫຍ່ບໍລິສັດຫຸ້ນສ່ວນ Sai Gon Food ໃຫ້ຮູ້ວ່າ.
“ພວກຂ້າພະເຈົ້າຈະສືບຕໍ່ລົງທຶນປ່ຽນໃໝ່ບັນດາຜະລິດຕະພັນ. ບໍ່ມີໃຜເຂົ້າໃຈຄວາມຕ້ອງການຂອງຊາວຫວຽດນາມ ຄືຊາວຫວຽດນາມ ໄດ້, ພວກຂ້າພະເຈົ້າຈະນຳໃຊ້ບັນດາທ່າແຮງນັ້ນເພື່ອຜະລິດບັນດາຜະລິດຕະພັນທີ່ມີລາຄາເໝາະສົມ ເພື່ອສາມາດຄົງຕົວໃນຕະຫຼາດໄດ້”.
ຕໍ່ໜ້າທ່າອ່ຽງເຊື່ອມໂຍງ, ດ້ວຍການເຂົ້າຮ່ວມຕະຫຼາດຂອງບັນດາວິສາຫະກິດຂາຍຍ່ອຍແຖວໜ້າຂອງໂລກ, ໄດ້ຮຽກຮ້ອງໃຫ້ບັນດາວິສາຫະກິດຫວຽດນາມ ຕ້ອງມີການປ່ຽນໃໝ່, ວາງອອກບັນດາຍຸດທະສາດພັດທະນາການດຳເນີນທຸລະກິດໃຫ້ເໝາະສົບກັບສະພາບການໃໝ່. ທ່ານນາງ ດິງທິມິ້ລວານ, ປະທານສະຫະສະມາຄົມຂາຍຍ່ອຍຫວຽດນາມ ຖືວ່າ.
“ການເປີດປະຕູຕະຫຼາດຍິ່ງເຮັດໃຫ້ບັນດາວິສາຫະກິດຕ້ອງພິຈາລະນາຄືນກ່ຽວກັບແຜນການຜະລິດ, ດຳເນີນທຸລະກິດຂອງຕົນ. ວິສາຫະກິດຕ້ອງຜະລິດສິນຄ້າທີ່ຕະຫຼາດມີຄວາມຕ້ອງການ, ຫາກບໍ່ແມ່ນຂາຍສິ່ງໃດທີ່ພວກເຮົາພວມມີຢູ່ແລ້ວ”.
ເມື່ອເຊື່ອມໂຍງເຂົ້າກັບສາກົນ, ມີສິນຄ້າໃຊ້ສອຍນັບ 10.000 ປະເພດຈະໄດ້ຍົກເວັ້ນພາສີ, ຫຼຸດຜ່ອນພາສີ ເມື່ອນຳເຂົ້າຕະຫຼາດຫວຽດນາມ ແລະ ບັນດາປະເທດໃນພາກພື້ນ. ເວລານັ້ນ, ສິນຄ້າຂອງຕ່າງປະເທດຈະແກ່ງແຍ້ງຢ່າງຂ້ຽວຂາດກັບສິນຄ້າຫວຽດນາມ. ປ່ຽນໃໝ່ຕົນເອງ, ຍູ້ແຮງການຮ່ວມທຸລະກິດ, ຮ່ວມສຳພັນ, ຍົກສູງຄຸນນະພາບຂອງສິນຄ້າ ແລະ ການບໍລິການຈະແມ່ນທິດທາງທີ່ຖືກຕ້ອງ ຊ່ວຍໃຫ້ບັນດາວິສາຫະກິດຂາຍຍ່ອຍຂອງຫວຽດນາມ ມີກຳລັງແກ່ງແຍ້ງຢ່າງພຽງພໍໃນຕະຫຼາດຂອງຕົນ.