(vovworld)- ພາຍຫລັງສັນຍາການຄ້າເສລີ FTA ລະຫວ່າງ ຫວຽດນາມ ແລະ ບັນດາປະເທດສະມາຊິກພັນທະມິດເສດຖະກິດ ອາຊີ - ເອີລົບ ໄດ້ຮັບການລົງນາມ, ມີວິສາຫະກິດຫລາຍແຫ່ງຢູ່ ນະຄອນໂຮ່ຈິມີນ ໄດ້ຜັນຂະຫຍາຍແຜນການລົງທຶນເຂົ້າຕະຫລາດສະຫະພັນລັດເຊຍ. ຊື່ງແມ່ນຕະຫລາດເຕັມໄປດ້ວຍຄວາມສາມາດບົ່ມຊ້ອນ ແລະ ຄວາມສະດວກຫລາຍຢ່າງຈາກສັນຍາ FTA, ກະແສການລົງທຶນຂອງບັນດາວິສາຫະກິດນະຄອນໂຮ່ຈິມີນເຂົ້າສະຫະພັນລັດເຊຍໄດ້ເປັນການໝັ້ນໝາຍແງ່ຫວັງຫລາຍຢ່າງ.
ເດືອນ 9 ຈະມາເຖິງ, ຢູ່ ນະຄອນຫລວງ ມົດສະກູ ສະຫະພັນ ລັດເຊຍ ຈະເລີ່ມລົງມືກໍ່ສ້າງເຂດອຸດສາຫະກຳເບົາ ເພື່ອດຶງດູດບັນດາວິສາຫະກິດ ຫວຽດນາມ ເຂົ້າມາລົງທຶນ, ພິເສດແມ່ນ ວິສາຫະກິດນະຄອນໂຮ່ຈິມີນ. 6 ຂົງເຂດ ອຸດສາຫະກຳຊື່ງລັດເຊຍ ພວມຢາກ ວິສາຫະກິດຫວຽດນາມເຂົ້າມາ ລົງທຶນແມ່ນ: ຕ່ຳແຜ່ນຕັດຫຍິບ, ປຸງແຕ່ງໄມ້, ສິນໃນນ້ຳ, ໂທລະຄົມມະນາຄົມ, ເຄື່ອງອາໄລ່ເອເລັກໂຕນິກ, ກໍ່ສ້າງ. ເພາະສະນັ້ນ ແຜນການລົງທຶນເຂົ້າຕະຫລາດລັດເຊຍ ພວມໄດ້ຮັບການຊຸກຍູ້ຈາກບັນດາວິສາຫະກິດນະຄອນໂຮ່ຈິມີນ. ທ່ານ ເຢືອງງອກມີງ, ປະທານສະພາບໍລິຫານບໍລິສັດຫຸ້ນສ່ວນຮຸ່ງເວືອງ, ຊື່ງແມ່ນຫົວຫນ່ວຍມີໄລຍະກວ່າ 10 ປີດຳເນີນທຸລະກິດຢູ່ຕະຫລາດລັດເຊຍ ໃຫ້ຮູ້ວ່າ: ຕະຫລາດລັດເຊຍ ມີກຳລັງຈຳຫນ່າຍໃຫຍ່, ສະນັ້ນ ສິນຄ້າຫວຽດນາມ ຫລາຍປະເພດ ອາດຈະມີແງ່ຫວັງເຂົ້າຕະຫລາດນີ້. ເມື່ອໄດ້ຮັບຂໍ້ມູນຂ່າວກ່ຽວກັບເຂດອຸດສາຫະກຳເບົາຈະໄດ້ຮັບການກໍ່ສ້າງຢູ່ ມົດສະກູ, ບໍລິສັດຫຸ້ນສ່ວນຮຸ່ງເວືອງ ແມ່ນຫນຶ່ງໃນບັນດາວິສາຫະກິດທຳອິດຈົດທະບຽນ.ຈຸດໝາຍຂອງບໍລິສັດ ແມ່ນພັດທະນາ logistics ຮັບໃຊ້ບັນດາວິສາຫະກິດ ຫວຽດນາມ ເມື່ອສົ່ງສິນຄ້າໄປຍັງຕະຫລາດລັດເຊຍ ພ້ອມທັງເຊື່ອມຕໍ່ບັນດາລະບົບຮ້ານສັບພະສິນຄ້າຢູ່ ລັດເຊຍ. ຜ່ານນັ້ນ ຊ່ວຍບັນດາວິສາຫະກິດ ຫວຽດນາມ ນຳສິນຄ້າເຂົ້າຕະຫລາດລັດເຊຍຢ່າງສະດວກ. ບໍລິສັດຫຸ້ນສ່ວນຮຸ່ງເວືອງ ຈະຮ່ວມສຳພັນກັບວິສາຫະກິດ ຢູ່ ລັດເຊຍ ໃນການປຸງແຕ່ງສິນໃນນ້ຳເພື່ອຂົນສົ່ງຈາກລັດເຊຍ ເຂົ້າຫວຽດນາມເພື່ອສົ່ງໄປຂາຍຢູ່ປະເທດທີ 3. ທ່ານ ເຢືອງງອກມີງ ໃຫ້ຮູ້ວ່າ:
“ຜ່ານກຸ່ມອຸດສາຫະກຳນີ້ ບໍລິສັດຫຸ້ນສ່ວນຮຸ່ງເວືອງ ຈະມີລະບົບສາງ ບັນຈຸສິນຄ້າໃຫ້ແກ່ບັນດາວິສາຫະກິດ ຫວຽດນາມ ສົ່ງໄປຂາຍຢູ່ລັດເຊຍ. ບໍລິສັດຫຸ້ນສ່ວນຮຸ່ງເວືອງ ປາດຖະຫນາ ໃນປີ 2016 ຈະມີລະບົບສາງທຳຄວາມເຢັນສາມາດບັນຈຸສິນຄ້າປະມານ 15.000 ໂຕນ ແລະ ສາງບັນຈຸສິນຄ້າປະເພດ ອື່ນດ້ວຍເນື້ອທີ 50.000 ຕາແມັດ.”
ທ່ານ ຟ້າມຟູເກື່ອງ, ຮອງຜູ້ອຳນວຍການໃຫຍ່ບໍລິສັດໃຫຍ່ຕ່ຳແຜ່ນຕັດຫຍິບ ຫວຽດນາມ, ປະທານສະພາບໍລິຫານ, ຜູ້ອຳນວຍການໃຫຍ່ບໍລິສັດໃຫຍ່ຕ່ຳແຜ່ນຕັດຫຍິບ ຍ່າແບ່ ໃຫ້ຮູ້ວ່າ: ປະຈຸບັນ ມີຄົນງານຫວຽດນາມ ເຮັດວຽກຢູ່ ລັດເຊຍ ເປັນຕົ້ນແມ່ນຢູ່ ມົດສະກູ ແມ່ນປະມານ 40.000 ຄົນ, ສະນັ້ນ ເມື່ອເຂດອຸດສາຫະກຳເບົາໄດ້ຮັບການກໍ່ສ້າງ, ຂະແຫນງຕ່ຳແຜ່ນຕັດຫຍິບ ຫວຽດນາມ ຈະປະກອບສ່ວນສ້າງວຽກເຮັດງານທຳເປັນປົກກະຕິໃຫ້ແກ່ຄົນງານຫວຽດນາມ ຢູ່ ລັດເຊຍ. ທ່ານຟ້າມຟູເກືອງ ເນັ້ນຫນັກວ່າ:
“ວິສາຫະກິດຕ່ຳແຜ່ນຕັດຫຍິບ ຫວຽດນາມ ໝັ້ນໝາຍຈະລົງທຶນ ໃນ 2 ຂົງເຂດນັ້ນແມ່ນ ການຄ້າ ແລະ ສາງບັນຈຸສິນຄ້າ. ພວກຂ້າພະເຈົ້າຈະແກ້ໄຂວຽກເຮັດງານທຳໃຫ້ແກ່ຄົນງານ 10.000 ຄົນຢູ່ເຂດອຸດສາຫະກຳ. ຈຸດໝາຍແມ່ນສົ່ງສິນຄ້າ ຫວຽດນາມ ໄປຍັງລັດເຊຍ. ທີສອງ ຈະກໍ່ສ້າງກ່ມເຮືອນຢູ່, ໂຮງງານ, ນອກນັ້ນຍັງສ້າງ ໂຮງຮຽນອະນຸບານ ເພື່ອໃຫ້ກຳມະກອນຫວຽດນາມ ດຳລົງຊີວິດໃນເງື່ອນໄຂດີສຸດ.”
ນອກຈາກສິນໃນນ້ຳ, ເຄື່ອງຕ່ຳແຜ່ນຕັດຫຍິບ, ສະບຽງອາຫານກໍ່ມີແງ່ຫວັງຢູ່ ຕະຫລາດລັດເຊຍ, ເຄື່ອງເຟີນີເຈີ, ເຄື່ອງສິລະປະຫັດຖະກຳ ໂດຍຫວຽດນາມ ຜະລິດ ພວມໄດ້ຮັບຄວາມນິຍົມຈາກຕະຫລາດລັດເຊຍ. ຍິ່ງກວ່ານັ້ນ ລັດເຊຍ ແມ່ນປະເທດມີແຫລ່ງໄມ້ເປັນວັດຖຸດິບ ອຸດົມສົມບູນ ສະນັ້ນໄດ້ດຶງດູດຄວາມສົນໃຈລົງທຶນຂອງບັນດາວິສາຫະກິດໄມ້ ນະຄອນໂຮ່ຈິມີນ. ທ່ານ ຫວໍເຈື່ອງແທ່ງ, ປະທານສະພາບໍລິຫານບໍລິສັດປຸງແຕ່ງໄມ້ ເຈື່ອງແທ່ງ ໃຫ້ຮູ້ວ່າ:
“ປະຈຸບັນ ພວກຂ້າພະເຈົ້າພວມຮ່ວມມືດຳເນີນທຸລະກິດຢູ່ ຕະຫລາດລັດເຊຍ. ທີ່ຕະຫລາດລັດເຊຍ ພວກຂ້າພະເຈົ້າພວມນຳເຂົ້າໄມ້ຫລາຍປະເພດຈາກລັດເຊຍ. ຖ້າຫາກມີວິສາຫະກິດຢູ່ ລັດເຊຍ ພວກຂ້າພະເຈົ້າຈະສົ່ງກຳມະກອນໄປຍັງລັດເຊຍ ພ້ອມກັບກົນໄກຂອງເຂດອຸດສາຫະກຳນັ້ນ ການດຳເນີນທຸລະກິດກໍຈະປະສົບຜົນສຳເລັດ. ຂ້າພະເຈົ້າຢາກລົງທຶນເຂົ້າໂຄງການນີ້.”
ເຄື່ອງອາໄລ່ເອເລັກໂຕນິກແມ່ນຫນຶ່ງໃນບັນດາຂົງເຂດຊື່ງ
ລັດເຊຍຢາກຫວຽດນາມ ມາລົງທຶນ
ພາບ: vov
|
ຄວາມສະດວກເມື່ອວິສາຫະກິດລົງທຶນເຂົ້າລັດເຊຍ ແມ່ນຮູບການຊຳລະດ້ວຍສະກຸນເງິນຂອງສອງປະເທດ, ມີແຫລ່ງຄົນງານຫວຽດນາມ ຢູ່ ລັດເຊຍ ແລະ ເຂດອຸດສາຫະກຳດັ່ງກ່າວແມ່ນຫ່າງຈາກໃຈກາງນະຄອນ ມົດສະກູ ປະມານ 40-50 ກິໂລແມັດ ພ້ອມກັນນັ້ນຍັງມີບັນດາລະບອບບຸລິມະສິດອື່ນເມື່ອລົງທຶນເຂົ້າເຂດນີ້ອີກ. ປະຈຸບັນ ມີ ວິສາຫະກິດ ນະຄອນໂຮ່ຈິມີນ 21 ແຫ່ງ ໄດ້ ແລະ ພວມສົ່ງເສີມລົງທຶນເຂົ້າລັດເຊຍ, ພິເສດແມ່ນເຂົ້າເຂດອຸດສາຫະກຳເບົາຢູ່ ມົດສະກູ. ທ່ານນາງ ຫງວຽນທີຮົ່ງ, ຮອງປະທານຄະນະກຳມະການປະຊາຊົນນະຄອນໂຮ່ຈິມີນ ໃຫ້ຮູ້ວ່າ:
“ນະຄອນໂຮ່ຈິມີນ ໄດ້ມອບໃຫ້ພະແນກອຸດສາຫະກຳການຄ້າ ກວດກາຄືນບັນດາວິສາຫະກິດ ໄດ້ ແລະ ພວມລົງທຶນເຂົ້າຕະຫລາດລັດເຊຍ ແລະ ວິສາຫະກິດ ຢາກລົງທຶນເຂົ້າລັດເຊຍ. ປະຈຸບັນ ນະຄອນໂຮ່ຈິມີນ ໄດ້ມີບັນຊີລາຍຊື່ບັນດາວິສາຫະກິດ. ຈາກນັ້ນ ນະຄອນຈະຜັນຂະຫຍາຍການເຄື່ອນໄຫວລົງທຶນເຂົ້າລັດເຊຍ.”
ເລື່ອງສ້າງຕັ້ງເຂດອຸດສາຫະກຳເບົາຢູ່ລັດເຊຍ ກໍແມ່ນບາດກ້າວທຳອິດຂອງວິສາຫະກິດ ຫວຽດນາມ ມຸ້ງໄປເຖິງຕະຫລາດລັດເຊຍ ແລະ ເອີລົບ, ເປີດແງ່ຫວັງໃຫມ່ຫລາຍຢ່າງໃຫ້ແກ່ພັດທະນາການລົງທຶນ, ການຄ້າ ລະຫວ່າງສອງປະເທດ. ເພາະສະນັ້ນ ອຳນາດການປົກຄອງ ແລະ ບັນດາຫົວຫນ່ວຍສົ່ງເສີມການລົງທຶນດ້ານການຄ້າ ພ້ອມກັບບັນດາວິສາຫະກິດນະຄອນໂຮ່ຈິມີນ ພວມຄົ້ນຄ້ວາ, ປຶກສາຫາລືຢ່າງລະອຽດເພື່ອສົ່ງເສີມການລົງທຶນເຂົ້າລັດເຊຍຢ່າງວ່ອງໄວ ແລະ ສະດວກທີ່ສຸດ.