(vovworld)- ໃນຊຸມປີມໍ່ໆມານີ້, ຫວຽດນາມ ພົ້ນເດັ່ນຂຶ້ນຄືດັ່ງຕະຫລາດທີ່ມີຄວາມສາມາດບົ່ມຊ້ອນໃນຂົງເຂດໂອນສິດການຄ້າ. ການພັດທະນາເສດຖະກິດຢ່າງວ່ອງໄວ, ລາຍຮັບພວມເພີ່ມຂຶ້ນສູງ, ມີພົນລະເມືອງເປັນຈຳນວນຫລວງຫລາຍ ແລະ ການໃຊ້ສອຍພາຍໃນປະເທດນັບມື້ນັບເພີ່ມຂຶ້ນ, ນັ້ນແມ່ນບັນດາສາຍເຫດນຳຫວຽດນາມ ກາຍເປັນສະມາຊິກອົງການການຄ້າໂລກ (WTO), ຍູ້ແຮງການເຊື່ອມໂຍງເຂົ້າກັບເສດຖະກິດໂລກ, ບັນດາວິສາຫະກິດຫວຽດນາມ ມີຫລາຍເງື່ອນໄຂເພື່ອເຂົ້າຮ່ວມການລົງທຶນໂອນສິດການຄ້າ.
ຮ້ານອາຫານ Mc Donald’s ຢູ່ນະຄອນໂຮ່ຈິມີນ
ພາບ:motthegioi.vn
|
ໃນໄລຍະກວ່າທົດສະວັດຜ່ານມາ, ຢູ່ຕະຫລາດຂາຍຍ່ອຍຫວຽດນາມ ໄດ້ປະກົດມີບັນດາເຄື່ອງໝາຍການຄ້າກ່ຽວກັບເຄື່ອງນຸ່ງ, ເຄື່ອງສຳອາງ, ເຄື່ອງໃຊ້ສອຍໃນຄອບຄົວ…ທີ່ມີຊື່ສຽງໃນໂລກ. ພິເສດໃນຊຸມປີມໍ່ໆມານີ້, ມີຂະແຫນງອາຫານການກິນ, ເຄື່ອງດື່ມ, ອາຫານດ່ວນຕິດພັນກັບບັນດາເຄື່ອງໝາຍການຄ້າທີ່ມີຊື່ສຽງໃນໂລກໄດ້ໂອນສິດການຄ້າເຂົ້າຫວຽດນາມນັບມື້ນັບຫລາຍ. ທ່ານນາງ ຮ່ວາງທິຕວຽດ ຮວາ, ຮອງຫົວຫນ້າກົມແຜນການ ສັງກັດກະຊວງອຸດສາຫະກຳ ແລະ ການຄ້າຫວຽດນາມ ໃຫ້ຮູ້ວ່າ:
“ມາຮອດປະຈຸບັນ, ການໂອນສິດການຄ້າຢູ່ຫວຽດນາມ ມີບາດກ້າວພັດທະນາ. ປະຈຸບັນ ບັນດາວິສາຫະກິດຕ່າງປະເທດ ໄດ້ຈົດທະບຽນໂອນສິດການຄ້າເຂົ້າຫວຽດນາມ ກວ່າ 8000 ກາໝາຍສິນຄ້າ, ໃນນັ້ນ ສຸມໃສ່ເຂົ້າໃນບາງຂົງເຂດຄື: ຂາຍຍ່ອຍ, ໃຫ້ເຊົ່າອຸປະກອນກົນຈັກ, ການສຶກສາບຳລຸງສ້າງ ແລະ ບັນດາປະເທດມີກາໝາຍສິນຄ້າດັ່ງກ່າວສ່ວນຫລາຍແມ່ນມາຈາກບັນດາປະເທດຄື: ອາເມລິກາ, ອັງກິດ, ອົດສະຕາລີ ແລະ ບັນດາປະເທດ ອີຢູ.”
ບັນດາກຸ່ມບໍລິສັດຕ່າງປະເທດ, ສ່ວນຫລາຍແມ່ນຂຶ້ນກັບຂົງເຂດອາຫານ ພວມລົງທຶນເຂົ້າຫວຽດນາມ ເປັນຈຳນວນຫລວງຫລາຍ ແລະ ເປີດກວ້າງການດຳເນີນທຸລະກິດຜ່ານການໂອນສິດການຄ້າ, ພົ້ນເດັ່ນຄື: ບັນດາກຸ່ມບໍລິສັດຜະລິດອາຫານໄວ Lotteria ຂອງ ສເກົາຫລີ, Mc Donald’s, KFC, Pizza Hut ຂອງອາເມລິກາ. ຄຽງຄູ່ກັນນັ້ນ, ບັນດາຮ້ານຊັບພະສິນຄ້າໃຫຍ່ຂອງບໍລິສັດຈຳຫນ່າຍຕ່າງປະເທດກໍໄດ້ຮັບການສ້າງຕັ້ງຂຶ້ນຢູ່ຫວຽດນາມຄື: Metro Cash & Carry ກຸ່ມບໍລິສັດຂອງເຢຍລະມັນ, ກຸ່ມບໍລິສັດ Parkson ຂອງມາເລເຊຍ… ແລະ ຫວ່າງແລ້ວນີ້ ມີວິສາຫະກິດໄທຫລາຍແຫ່ງ ກໍໄດ້ລົງທຶນເຂົ້າຕະຫລາດຫວຽດນາມ ຜ່ານການໂອນສິດການຄ້າ. ພ້ອມກັບວິວັດການດັ່ງກ່າວ, ບັນດາວິສາຫະກິດຫວຽດນາມ ໄດ້ສຳພັດກັບຮູບການດຳເນີນທຸລະກິດນີ້ເຂົ້າໃນການສ້າງເຄື່ອງໝາຍການຄ້າ ແລະ ໃນເບື້ອງຕົ້ນໄດ້ໂອນສິດການຄ້າອອກຕ່າງປະເທດ. ໃນຈຳນວນເຫລົ່ານັ້ນ ມີເຄື່ອງໝາຍການຄ້າຄື: ເຝີ 24, ກາເຟຈູງງວຽນ ຫລື Wrap & Roll …. ໄດ້ພັດທະນາຜ່ານຮູບການໂອນສິດການຄ້າ ບໍ່ພຽງແຕ່ເປີດກວ້າງເຄືອຂ່າຍພາຍໃນປະເທດເທົ່ານັ້ນ ຫາກໄດ້ມີຫນ້າຢູ່ປະເທດຈຳນວນ ຫນຶ່ງໃນໂລກອີກດ້ວຍ. ບັນດາຜົນສຳເລັດໃນເບື້ອງຕົ້ນຂອງວິສາຫະກິດຫວຽດນາມ ໄດ້ ແລະ ພວມສົ່ງເສີມວິສາຫະກິດຫວຽດນາມຫລາຍແຫ່ງ, ເປັນຕົ້ນແມ່ນບັນດາວິສາຫະກິດຂະຫນາດກາງ ແລະ ນ້ອຍໄປຕາມທ່າອ່ຽງພັດທະນານີ້. ຕາມທ່ານ ຟ້າມຢີເກືອງ, ຜູ້ອຳນວຍການບໍລິສັດຜະລິດ ແລະ ບໍລິການ ແຊນຫວຽດ ແລ້ວ: ໃນສະພາບ ເສດຖະກິດພວມປະສົບກັບຄວາມຫຍຸ້ງຍາກ, ການດຳເນີນທຸລະກິດເຄື່ອງໝາຍການຄ້າໄດ້ຮັບຖືວ່າແມ່ນວິທີປອດໄພ ແລະ ມີປະສິດທິຜົນ.
“ຕາມຂ້າພະເຈົ້າແລ້ວ ດຳເນີນທຸລະກິດຕາມຮູບແບບນີ້ແມ່ນປອດໄພກວ່າເມື່ອທຽບໃສ່ເລື່ອງສ້າງເຄື່ອງໝາຍການຄ້າເອງໃຫ້ແກ່ຕົນ. ເພາະວ່າຄວາມຈິງແລ້ວພວກເຮົາຍັງບໍ່ທັນມີບົດຮຽນຫຼາຍ, ບົດຮຽນຂອງພວກເຮົາໃນຂົງເຂດນີ້ແມ່ນບໍ່ທຽບທັນກັບບັນດາເຄື່ອງໝາຍການຄ້າໃຫຍ່ຢູ່ໂລກທີ່ເຮັດໄດ້ດີແລ້ວ. ຢູ່ຫວຽດນາມພວກເຮົາຢາກສ້າງເຄື່ອງໝາຍການຄ້າໄດ້ດີແມ່ນຍາກຫຼາຍ, ພວກເຮົາຕ້ອງຮຳ່ຮຽນ, ຖອດຖອນບົດຮຽນໃຫ້ຫຼາຍຕື່ມອີກ”
ພາບ: internet
ການໂອນສິດການຄ້າມີຈຸດເດັ່ນຄື: ລະບົບດຳເນີນທຸລະກິດ ແລະ ກາໝາຍສິນຄ້າໄດ້ມີຢູ່ແລ້ວ ແລະ ມີຊື່ສຽງໃນໂລກ. ພ້ອມກັນນັ້ນ ວິທີການດຳເນີນທຸລະກິດ ໄດ້ຜັນຂະຫຍາຍຢູ່ໃນໂລກ ດ້ວຍການເຄື່ອນໄຫວວິຊາການ, ເປັນລະບົບໃນການດຳເນີນທຸລະກິດ, ສະນັ້ນ ບັນດາວິສາຫະກິດຮັບໂອນສິດການຄ້າເມື່ອເລີ່ມດຳເນີນທຸລະກິດ, ເວລາເຂົ້າຮ່ວມຕະຫລາດຈະສັ້ນກວ່າ ເມື່ອທຽບໃສ່ກັບການສ້າງເຄື່ອງໝາຍດ້ວຍຕົນເອງ. ເຖິງຢ່າງໃດກໍຕາມ, ເພື່ອໃຫ້ການພົວພັນດ້ານການຄ້າຢູ່ພາຍໃນ ແລະ ຕ່າງປະເທດສະດວກກວ່າ, ເປັນຕົ້ນເພື່ອໃຫ້ການເຄື່ອນໄຫວໂອນສິດການຄ້າພັດທະນາຢ່າງແຂງແຮງໃນໄລຍະຈະມາເຖິງ, ນອກຈາກການຫນູນຊ່ວຍດ້ານນິຕິກຳ, ສິນເຊື່ອຂອງລັດແລ້ວ. ກ່ອນອື່ນໝົດ, ວິສາຫະກິດຫວຽດນາມ ຄວນລົງທຶນເຂົ້າຂົງເຂດນີ້ຫລາຍກວ່າ, ພ້ອມທັງຜະລິດສິນຄ້າມີຄຸນນະພາບສູງເພື່ອຮັບໃຊ້ຕະຫລາດພາຍໃນ.