(vovworld)-ໃນສະພາບການສົ່ງອອກຜະລິດຕະພັນກະເສດເວົ້າລວມປະສົບກັບຄວາມຫຍຸ້ງຍາກ, ການສົ່ງອອກສິນໃນນ້ຳໃນໄລຍະມໍ່ມານີ້ ມີສັນຍານຟື້ນຕົວ ແລະ ເຕີບໂຕຄືນໃຫມ່. ພິເສດ ສະພາບສົ່ງອອກສິນໃນນ້ຳບາງປະເພດສຳຄັນຄື: ກຸ້ງ, ປາຈາ ໄດ້ຮັບການປັບປຸງໃຫ້ດີຂຶ້ນ, ປະກອບສ່ວນສ້າງການຫັນປ່ຽນໃນຍອດວົງເງິນສົ່ງອອກສິນໃນນ້ຳຂອງຫວຽດນາມ.
ປີ 2013, ຕາມການຄາດຄະເນກ່ອນນີ້ແລ້ວ ປີ 2013 ແມ່ນປີທີ່ຫຍຸ້ງຍາກສຳລັບການສົ່ງອອກສິນໃນນ້ຳຂອງຫວຽດນາມ ໃນສະພາບສອງປະເພດສິນຄ້າສົ່ງອອກຕົ້ນຕໍຄື:ກຸ້ງ ແລະ ປາຈາຖືກຄວາມສ່ຽງຫລາຍຢ່າງຍ້ອນຜົນສະທ້ອນຈາກໄພທຳມະຊາດ ແລະ ຍາມໃດກໍປະເຊີນຫນ້າກັບເລື່ອງຖືກຈັດວາງອັດຕາພາສີຕ້ານການຂາຍບຸບລາຄາ ແລະ ຮົ້ວກີດຂວາງດ້ານເຕັກນິກຂອງຕະຫລາດສົ່ງອອກຢູ່ບາງປະເທດ. ເຖິງຢ່າງໃດກໍຕາມ, ຂະແຫນງສົ່ງອອກສິນໃນນ້ຳຜ່ານຜ່າຄວາມຫຍຸ້ງຍາກ ແລະ ຍັງສືບຕໍ່ບັນລຸລະດັບເຕີບໂຕສູງພໍສົມຄວນ. ໄລ່ແຕ່ຕົ້ນປີມາຮອດເດືອນ 10/2013, ວົງເງິນສົ່ງອອກສິນໃນນ້ຳ ເວົ້າລວມບັນລຸໄດ້ 5,5 ຕື້ໂດລາສະຫະລັດ, ເພີ່ມຂຶ້ນ 7,3% ເມື່ອທຽບໃສ່ໄລຍະດຽວກັນຂອງປີກາຍ. ໃນນັ້ນ ການສົ່ງອອກກຸ້ງໄປຍັງຕະຫລາດອາເມລິກາ, ອີຢູ, ຍີ່ປຸ່ນ ບັນລຸລະດັບຈະເລີນເຕີບໂຕສູງກວ່າໝູ່ ແມ່ນ 2,4 ຕື້ໂດລາສະຫະລັດ, ເພີ່ມຂຶ້ນ 30% ເມື່ອທຽບໃສ່ໄລຍະດຽວກັນຂອງປີກາຍ. ທ່ານ ເຈືອງດີງແຮ່ວ, ເລຂານຸການໃຫຍ່ ສະຫະສະມາຄົມປຸງແຕ່ງ ແລະ ສົ່ງອອກສິນໃນນ້ຳ ຫວຽດນາມ (VASEP)ໃຫ້ຮູ້ວ່າ:
“ໃນໄລຍະຈະມາເຖິງ, ການສົ່ງອອກສິນໃນນ້ຳໄປຍັງ ເອີລົບ ສືບຕໍ່ເພີ່ມຂຶ້ນ ຍ້ອນສິນຄ້າທີ່ບັນດາປະເທດອື່ນສົ່ງໄປຂາຍຢູ່ປະເທດເຫລົ່ານີ້ຫລຸດລົງ. ສຳລັບຕະຫລາດອາເມລິກາ, ບັນດາວິສາຫະກິດ ຈະສືບຕໍ່ຮັກສາ ແລະ ເພີ່ມທະວີການສົ່ງອອກຕາມລະບົບສະຫນອງ.”
ປຸງແຕ່ງກຸ້ງເພື່ອສົ່ງອອກ
ພາບ:internet
|
ປະຈຸບັນ, ອາເມລິກາ ຍັງຄົງແມ່ນຕະຫລາດນຳເຂົ້າສິນໃນນ້ຳຈາກຫວຽດນາມຫລາຍກວ່າໝູ່, ກວມກວ່າ 21% ຍອດວົງເງິນສິນຄ້າສົ່ງອອກ. ໃນເດືອນ 10/2013, ສະເພາະການສົ່ງອອກກຸ້ງໄປຍັງຕະຫລາດນີ້ບັນລຸກວ່າ 1 ຕື້ໂດລາສະຫະລັດ, ເພີ່ມຂຶ້ນເກືອບ 15% ເມື່ອທຽບໃສ່ໄລຍະດຽວກັນຂອງປີກາຍ. ວັນທີ 10/9 ຜ່ານມາ, ກະຊວງການຄ້າ ອາເມລິກາ ຮັບຮອງວ່າ ກຸ້ງຂອງຫວຽດນາມສົ່ງໄປຂາຍຢູ່ ອາເມລິກາ ບໍ່ຂາຍບຸບລາຄາ ແລະ ຕົກລົງຈັດວາງພາສີໃນລະດັບ 0% ໃຫ້ວິສາຫະກິດສົ່ງອອກກຸ້ງຫວຽດນາມ 33 ແຫ່ງ ແລະ ການສົ່ງອອກກຸ້ງໄປຍັງຕະຫລາດອາເມລິກາ ໃນໄລຍະຈະມາເຖິງຄາດວ່າຈະເພີ່ມຂຶ້ນ. ດ້ວຍບັນດາຄວາມຄືບຫນ້າທີ່ສະດວກຄືປະຈຸບັນ, ສະຫະສະມາຄົມປຸງແຕ່ງສົ່ງອອກສິນໃນນ້ຳ ຫວຽດນາມ ຄາດວ່າ ການສົ່ງອອກກຸ້ງປີນີ້ ຈະບັນລຸປະມານ 2,8 ຕື້ໂດລາສະຫະລັດ, ເພີ່ມຂຶ້ນ 27% ເມື່ອທຽບໃສ່ປີ 2012. ສ່ວນສຳລັບປາຈາ, ເຖິງວ່າການສົ່ງອອກປະເພດສິນຄ້ານີ້ຍັງຫລຸດລົງຍ້ອນຄວາມຕ້ອງການຂອງໂລກບໍ່ທັນຟື້ນຕົວກໍຕາມ, ແຕ່ໃນ 10 ເດືອນຜ່ານມາກໍບັນລຸວົງເງິນ 1,43 ຕື້ໂດລາສະຫະລັດ. ເພື່ອຟື້ນຕົວມູນຄ່າດ້ານເສດຖະກິດຈາກການສົ່ງອອກປາຈາ, ຄຽງຄູ່ກັບການເປັນເຈົ້າການໃນການຊອກຫາ, ພັດທະນາຕະຫລາດໃຫມ່, ຂະແຫນງສິນໃນນ້ຳຫວຽດນາມພວມປະຕິບັດການວາງແຜນສ້າງເຂດລ້ຽງປາຄືນໃຫມ່ ເພື່ອຕອບສະຫນອງຄວາມຕ້ອງການປຸງແຕ່ງ, ຫລິກລ້ຽງການອີງໃສ່ ແລະ ປະຕິບັດການພັດທະນາແບບຍືນຍົງ. ທ່ານ ບູ່ຍວັນຕາມ, ຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດຫວຽດນາມ ຢືນຢັນວ່າ: ການຂຸດຄົ້ນ ແລະ ປູກລ້ຽງສິນໃນນ້ຳແມ່ນຫນຶ່ງໃນຈຳນວນ 5 ຂະແຫນງປາຍແຫລມທີ່ສຸມໃສ່ພັດທະນາໃນແຜນຮ່າງສ້າງໂຄງປະກອບກະສິກຳຄືນໃຫມ່ຂອງກະຊວງກະສິກຳ ແລະ ພັດທະນາຊົນນະບົດຫວຽດນາມ.
“ກົມໃຫຍ່ສິນໃນນ້ຳ ຕ້ອງພອ້ມກັບກົມໃຫຍ່ຊົນລະປະທານ ສົມທົບກັບບັນດາທ້ອງຖິ່ນວາງແຜນບັນດາເຂດລ້ຽງປູກສິນໃນນ້ຳ, ພິເສດ ແມ່ນບັນດາເຂດລ້ຽງກຸ້ງ ແລະ ລ້ຽງປາຈາຄືຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ. ຈາກນັ້ນ ວາງອອກບັນດາມາດຕະການລົງທຶນໃຫ້ແກ່ຊົນລະປະທານເພື່ອລົງທຶນພັດທະນາເຂດລ້ຽງປູກສິນໃນນ້ຳຄືແນວໃດ, ເປັນຕົ້ນສຳລັບບັນດາເຂດລ້ຽງປູກເປັນຈຸດສຸມ.”
ສະຫະສະມາຄົມປຸງແຕ່ງ ແລະ ສົ່ງອອກສິນໃນນ້ຳຫວຽດນາມ VASEP ກໍໄດ້ຍື່ນສະເຫນີຕໍ່ລັດຖະບານບັນດາມາດຕະການເພື່ອສ້າງການຜະລິດ ແລະ ຈຳຫນ່າຍປາຈາຄືນໃຫມ່. VASEP ກໍ່ໄດ້ຜັນຂະຫຍາຍການຈັດຕັ້ງປະຕິບັດຮູບແບບອົງການຫນຶ່ງດຽວຮັບຜິດຊອບການສົ່ງອອກປາຈາໄປຍັງຕະຫລາດ ອີຢູ ນັບແຕ່ຕົ້ນປີ 2014. ອົງການນີ້ ຈະຮັບຜິດຊອບຂັ້ນຕອນທັງໝົດ ຈາກການບໍລິການຕົວແທນຂົນສົ່ງ, ຄັງສາງບັນຈຸສິນຄ້າເພື່ອເຮັດລະບຽບການພາສີ, ການປະມູນໃນສູນທຸລະກຳເອເລັກໂຕນິກ, ຈັດສົ່ງສິນຄ້າເຖິງລູກຄ້າ ແລະ ເຮັດບໍລິການຊຳລະ ສຳລັບປະເພດປາຈາ ແຊເຢັນ ຂອງບັນດາວິສາຫະກິດຫວຽດນາມທີ່ສົ່ງອອກໄປຍັງ 28 ປະເທດສະມາຊິກ ອີຢູ.
ຕາມກະຊວງອຸດສາຫະກຳ ແລະ ການຄ້າຫວຽດນາມແລ້ວ, ຖ້າທຸກວຽກງານແມ່ນສະດວກຄື: ເສດຖະກິດ ເອີລົບ ແລະ ອາເມລິກາ ຟື້ນຕົວດີ, ພ້ອມທັງແກ້ໄຂບັນດາກໍລະນີຟ້ອງຮ້ອງ ແລະ ຮົ້ວກີດຂວາງດ້ານເຕັກນິກ, ວົງເງິນສົ່ງອອກສິນໃນນ້ຳຂອງຫວຽດນາມ ໃນປີ 2013 ອາດຈະບັນລຸ 6,5 ຕື້ໂດລາສະຫະລັດ, ເພີ່ມຂຶ້ນ 4,3 % ເມື່ອທຽບໃສ່ປີ 2012.