(vovworld)- ໃນຊຸມປີມໍ່ໆມານີ້, ໃນຂະນະທີ່ບັນດາຕະຫລາດຕ່າງໆໃນໂລກພວມມີທ່າອ່ຽງຊັກຊ້າລົງນັ້ນ ພາກພື້ນ ຕາເວັນອອກກາງ-ອາຟຼິກາເຫນືອ ພັດແມ່ນຕະຫລາດສົ່ງອອກທີ່ເຕັມໄປດ້ວຍຄວາມສາມາດບົ່ມຊ້ອນຂອງບັນດາວິສາຫະກິດຫວຽດນາມ. ເຖິງວ່າ ວົງເງິນການຄ້າເພີ່ມຂຶ້ນພໍສົມຄວນ ແຕ່ເບິ່ງລວມແລ້ວ ລະດັບເພີ່ມຂຶ້ນນີ້ຍັງບໍ່ທັນສົມກັບບັນດາຄວາມສາມາດບົ່ມຊ້ອນ ແລະ ທ່າແຮງທີ່ມີຢູ່ແລ້ວຂອງແຕ່ລະຝ່າຍເທື່ອ. ເຮັດແນວໃດເພື່ອເສີມຂະຫຍາຍບັນດາທ່າໄດ້ປຽບນີ້ເພື່ອພ້ອມກັນພັດທະນາ ນັ້ນແມ່ນເນື້ອໃນບົດຂຽນຂອງນັກຂ່າວ ແອງຮ່ວຽນທີ່ພາດຫົວຂໍ້ວ່າ: ສິນຄ້າຫວຽດນາມແຊກຊືມເຂົ້າຕະຫລາດຕາເວັນອອກກາງ-ອາຟຼິກາເຫນືອ.
ຕາເວັນອອກກາງ-ອາຟຼິກາເຫນືອ ແມ່ນຕະຫລາດໃຫຍ່ ດ້ວຍພົນລະເມືອງກວ່າ 520 ລ້ານຄົນ, ຫລາຍປະເທດມີຄວາມສາມາດບົ່ມຊ້ອນກ່ຽວກັບເສດຖະກິດ, ແຫລ່ງສະສົມເງິນຕາຕ່າງປະເທດແມ່ນອຸດົມສົມບູນ, ພິເສດຄວາມຕ້ອງການສິນຄ້າແມ່ນຫລາຍຮູບຫລາຍແບບ ແລະ ສອດຄ່ອງກັບໂຄງປະກອບການສົ່ງອອກສິນຄ້າຂອງຫວຽດນາມ.
ບັນດາຜູ້ແທນເຂົ້າຮ່ວມເວທີປາໄສເສດຖະກິດ
ລະຫວ່າງຫວຽດນາມກັບຄູ່ຮ່ວມມືຕາເວັນອອກກາງ-ອາຟຼິກາເຫນືອ
ພາບ:moit.gov.vn
|
ໃນໄລຍະມໍ່ໆມານີ້, ການພົວພັນດ້ານການເມືອງອັນດີງາມໄດ້ສ້າງທ່ວງທ່າໃຫ້ແກ່ການພົວພັນດ້ານເສດຖະກິດ ການຄ້າ, ການລົງທຶນ ລະຫວ່າງຫວຽດນາມ ກັບພາກພື້ນນີ້ ແມ່ນພັດທະນາຢ່າງແຂງແຮງ. ວົງເງິນການຄ້າລະຫວ່າງຫວຽດນາມ ກັບ ຕາເວັນອອກກາງ-ອາຟຼິກາເຫນືອ ໃນປີ 2012 ບັນລຸ 7,4 ຕື້ USD, ເພີ່ມຂຶ້ນເກືອບ 900% ເມື່ອທຽບໃສ່ 10 ປີກ່ອນນີ້, ໃນນັ້ນ ວົງເງິນການຄ້າກັບບັນດາຄູ່ຮ່ວມມືໄດ້ລື່ນກາຍລະດັບ 1 ຕື້ USD/ປີ. ເບິ່ງລວມແລ້ວ, ໂຄງປະກອບສິນຄ້າຂາອອກຂາເຂົ້າຂອງບັນດາຝ່າຍລ້ວນແຕ່ມີລັກສະນະເພີ່ມເຕີມໃຫ້ກັນ, ເຖິງຢ່າງໃດກໍຕາມ ຍ້ອນຫລາຍສາຍເຫດ ສະນັ້ນ ປະສິດທິຜົນຕົວຈິ່ງບໍ່ຄືດັ່ງຄວາມຫວັງ.
ທີ່ກອງປະຊຸມສຳມະນາຫວ່າງແລ້ວນີ້ ໂດຍກະຊວງອຸດສາຫະກຳ ແລະ ການຄ້າຫວຽດນາມຈັດຕັ້ງຂຶ້ນ, ມີຫລາຍຄຳເຫັນ ໄດ້ໄຈ້ແຍກວ່າ: ທີ່ຕັ້ງພູມສາດ, ການສະຫນອງ-ຄວາມຕ້ອງການບໍ່ທັນສົມຄູ່, ການໂຄສະນາບໍ່ທັນມີປະສິດທິຜົນ ນັ້ນແມ່ນສາຍເຫດຕົ້ນຕໍ. ຄຽງຄູ່ກັນນັ້ນ, ຍັງມີຂໍ້ຄົງຄ້າງຫລາຍຢ່າງຈາກວິສາຫະກິດເອງ ແລະ ລັດຖະບານ ຄື: ຂາດຂໍ້ມູນຂ່າວສານ, ບໍ່ກ້າຮ່ວມມືລົງທຶນ, ຍັງລັ່ງເລໃຈຕໍ່ຄວາມຫຍຸ້ງຍາກ, ສິ່ງທ້າທາຍ. ເຖິງວ່າ ແມ່ນປະເທດສົ່ງອອກເຂົ້າສານຢືນອັນດັບ 2 ໃນໂລກກໍຕາມ, ແຕ່ເຂົ້າສານ ຫວຽດນາມ ສົ່ງໄປຂາຍຢູ່ຕະຫລາດ ຕາເວັນອອກກາງ-ອາຟຼິກາເຫນືອຍັງຢູ່ໃນລະດັບຕຳ່. ທ່ານນາງ ຟ້າມທີຮ່າແອງ, ຜູ້ອຳນວຍການບໍລິສັດຫຸ້ນສ່ວນທັນຍາຫານ ບີ່ງມີງ ແບ່ງປັນວ່າ:
“ເມື່ອເຂົ້າຮ່ວມບັນດາຕະຫລາດນີ້, ວິສາຫະກິດຕ້ອງກຳນົດໄດ້ຈຸດໝາຍ, ຍຸດທະສາດຂອງຕົນ ແລະ ຕະຫລາດຂອງຕົນຄືແນວໃດ. ເມື່ອສຳພັດກັບລູກຄ້າ, ຕອ້ງຊອກຮູ້ເບິ່ງວ່າລູກຄ້າຕ້ອງການຫຍັງເພື່ອໃຫ້ເຮົາສາມາດຕອບສະຫນອງ.”
ໃນສະພາບການຊຸດໂຊມເສດຖະກິດໂລກໄດ້ສົ່ງຜົນກະທົບເຖິງຫລາຍປະເທດ, ບັນດາຕະຫລາດເດີມຄື ອາເມລິກາ, ເອີລົບ, ຍີ່ປຸ່ນ ຄວາມຕ້ອງການບໍລີໂພກອຸປະໂພກສິນຄ້ານັບມື້ນັບຫລຸດລົງ, ເລື່ອງຫັນທິດໄປສູ່ຕະຫລາດ ຕາເວັນອອກກາງ-ອາຟຼິກາເຫນືອ ແມ່ນທິດຕັ້ງຫນ້າໃນປະຈຸບັນຂອງບັນດາວິສາຫະກິດຫວຽດນາມ. ເພື່ອຊ່ວຍບັນດາວິສາຫະກິດມີຄວາມສະດວກກວ່າ, ບັນດາອົງການທີ່ມີຫນ້າທີ່ຮັບຜິດຊອບຂອງຫວຽດນາມ ຕັ້ງຫນ້າຈັດຕັ້ງບັນດາການເຄື່ອນໄຫວສົ່ງເສີມການຄ້າ, ສຳຫລວດຕະຫລາດ ແລ້ວ, ຍັງຫນູນຊ່ວຍວິສາຫະກິດສ້າງເຄືອຂ່າຍແຈກຢາຍຜະລິດຕະພັນ, ເປີດສາຂາຕົວແທນຈຳຫນ່າຍ ແລະ ສຳຄັນແມ່ນຕິດຕາມສະພາບການເມືອງ, ການຜັນແປໃຫມ່ຢູ່ຕະຫລາດດັ່ງກ່າວເປັນປະຈຳເພື່ອສະຫນອງຂໍ້ມູນຂ່າວສານໃຫ້ແກ່ບັນດາວິສາຫະກິດຫວຽດນາມ ເພື່ອຫລີກລ້ຽງຄວາມສ່ຽງ. ທ່ານ ຫວູຫາຍບັ່ງ, ຫົວຫນ້າກົມອາຊີ ຕາເວັນຕົກ-ອາຟຼິກາ, ສັດກັດກະຊວງການຕ່າງປະເທດຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າສະເຫນີລັດຖະບານ ເຜີຍແຜ່ບັນດາຂໍ້ກຳນົດດ້ານກົດໝາຍຢູ່ບັນດາປະເທດ ຕາເວັນອອກກາງ-ອາຟຼິກາເຫນືອ ເພື່ອໃຫ້ບັນດາວິສາຫະກິດກຳແຫນ້ນ, ຫລີກລ້ຽງຄວາມສ່ຽງ. ດ້ານອື່ນ, ກ່ຽວກັບກົນໄກນະໂຍບາຍພາຍໃນປະເທດ ພວກຂ້າພະເຈົ້າພວມສະເຫນີ ຕ້ອງມີກົນໄກການເງິນຢ່າງກວ້າງຂວາງ ແລະ ສະດວກສະບາຍກວ່າ, ສ້າງເງື່ອນໄຂໃຫ້ແກ່ບັນດາວິສາຫະກິດຂະຫນາດກາງ ແລະ ນ້ອຍ ມີຄວາມສາມາດບົ່ມຊ້ອນ, ກຳລັງຄວາມສາມາດເພື່ອສຳພັດກັບຕະຫລາດດັ່ງກ່າວ. ຕ້ອງຊອກຫາວິທີແກ້ໄຂເພື່ອໃຫ້ມີກຳລັງແຮງຢ່າງພຽງພໍເພື່ອແກ້ງແຍ້ງກັບຕະຫລາດດັ່ງກ່າວ.”
ລົບລ້າງຮົ້ວກີດຂວາງ, ແກ້ໄຂຄວາມຫຍຸ້ງຍາກ, ຊອກທິດທາງຊຸກຍູ້ການຮ່ວມມືລະຫວ່າງຫວຽດນາມ ແລະ ຕາເວັນອອກກາງ-ອາຟຼິກາເຫນືອ ຢ່າງມີປະສິດທິຜົນກວ່າ ນັ້ນກໍແມ່ນຈຸດປະສົງຂອງເວທີປາໄສຮ່ວມມືເສດຖະກິດລະຫວ່າງຫວຽດນາມກັບບັນດາຄູ່ຮ່ວມມື ຕາເວັນອອກກາງ-ອາຟຼິກາເຫນືອ ໂດຍກະຊວງການຕ່າງປະເທດຫວຽດນາມ ຈັດຕັ້ງໃນວັນທີ 4 ແລະ 5/11 ຢູ່ ຮ່າໂນ້ຍ. ຕາມທ່ານນາງຮອງລັດຖະມົນຕີການຕ່າງປະເທດຫວຽດນາມ ຫງວຽນທິເຟືອງງາ ແລ້ວ, ເປັນຄັ້ງທຳອິດ ເວທີປາໄສຂອບຂະຫນາດໃຫຍ່ໄດ້ຮັບການຈັດຕັ້ງຂຶ້ນ, ໂດຍເຕົ້າໂຮມຜູ້ແທນຫລາຍທ່ານທີ່ຕາງຫນ້າໃຫ້ລັດຖະບານ, ກະຊວງ, ຂະແຫນງການ, ວິສາຫະກິດ ແລະ ບັນດານັກວາງແຜນນະໂຍບາຍຂອງຫວຽດນາມ ແລະ ບັນດາຄູ່ຮ່ວມມື ຕາເວັນອອກກາງ-ອາຟຼິກາເຫນືອ ຫວັງວ່າແມ່ນກາລະໂອກາດດີເພື່ອໃຫ້ບັນດາວິສາຫະກິດ ຫວຽດນາມ ເຂົ້າຕະຫລາດ ຕາເວັນອອກກາງ-ອາຟຼິກາເຫນືອ ແລະ ກົງກັນຂ້າມ.
“ກອບກົດໝາຍຂອງພວກເຮົາຍັງບໍ່ທັນສົມບູນແບບເທື່ອ. ພວກເຮົາໄດ້ສ້າງກົນໄກຮ່ວມມື ແຕ່ບໍ່ແມ່ນສຳລັບຄູ່ຮ່ວມມືທັງໝົດ. ນັ້ນແມ່ນບັນດາບັນຫາວາງອອກ ແລະ ພວກຂ້າພະເຈົ້າປາດຖະຫນາຢາກຜ່ານເວທີປາໄສຈະຊອກຫາໄດ້ບັນດາມາດຕະການເພື່ອລົບລ້າງ, ແກ້ໄຂຂໍ້ຕິດຂັດ, ຮົ້ວກີດຂວາງ, ເຮັດແນວໃດສ້າງເງື່ອນໄຂເພື່ອໃຫ້ວິສາຫະກິດທັງສອງຝ່າຍສຳພັດກັບຕະຫລາດ, ຜັນຂະຫຍາຍບັນດາການເຄື່ອນໄຫວດຳເນີນທຸລະກິດຢ່າງສະດວກທີ່ສຸດ.”
ຄາດຄະເນວ່າ ປີ 2013, ວົງເງິນການຄ້າລະຫວ່າງ ຫວຽດນາມກັບ ພາກພື້ນຕາເວັນອອກກາງ-ອາຟຼິກາເຫນືອ ສືບຕໍ່ເພີ່ມຂຶ້ນ. ດ້ວຍການພົວພັນດ້ານການເມືອງອັນດີງາມພ້ອມກັບວິວັດການຮ່ວມມືຢ່າງເໝາະສົມລະຫວ່າງບັນດາກະຊວງ, ຂະແຫນງການສອງຝ່າຍ, ໄລຍະຈະມາເຖິງ ແນ່ນອນວ່າ ຈະມີການປ່ຽນແປງຢ່າງຕັ້ງຫນ້າໃນການຮ່ວມມືເສດຖະກິດການຄ້າ ແລະ ການລົງທຶນລະຫວ່າງຫວຽດນາມກັບເຂດທີ່ມີຄວາມສາມາດບົ່ມຊ້ອນນີ້.