(vovworld)-ພາຍຫລັງເຈລະຈາມາເປັນເວລາ 2 ປີ, ວັນທີ 29/5 ຜ່ານມາ, ຫວຽດນາມ ໄດ້ລົງນາມໃນສັນຍາການຄ້າເສລີກັບ ພັນທະມິດເສດຖະກິດ ອາຊີ - ເອີລົບ ຢ່າງເປັນທາງການ. ເລື່ອງລົງນາມໃນສັນຍາການຄ້າເສລີດັ່ງກ່າວໄດ້ນຳມາເຊິ່ງກາລະໂອກາດໃຫຍ່ໃຫ້ບັນດາວິສາຫະກິດສົ່ງອອກບັນດາປະເພດສິນຄ້າມີທ່າແຮງຂອງຫວຽດນາມຄື: ຜະລິດຕະພັນກະເສດ, ສິນໃນນ້ຳ, ເຄື່ອງຕ່ຳແຜ່ນຕັດຫຍິບ, ເກີບຫນັງ, ເຄື່ອງເຟີນີເຈີ ແລະ ຜະລິດຕະພັນປຸງແຕ່ງຈຳນວນຫນຶ່ງ.
ທ່ານນາຍົກລັດຖະມົນຕີ ຫງວຽນເຕີນຢູງ ແລະ ນາຍົກລັດຖະມົນຕີ 5 ປະເທດສະມາຊິກ ພັນທະມິດເສດຖະກິດ ອາຊີ - ເອີລົບ
ທີ່ພິທີລົງນາມສັນຍາ FTA
ພາບ:chinhphu.vn
|
ພັນທະມິດເສດຖະກິດ ອາຊີ - ເອີລົບ, ໃນນັ້ນ ລວມມີບັນດາປະເທດຄື: ລັດເຊຍ, ອາກເມນີອາ, ເບລາຣຸດ, ກາຊັກສະຖານ ແມ່ນອົງການເສດຖະກິດທີ່ຫາກໍ່ໄດ້ຮັບການສ້າງຕັ້ງ ແຕ່ມີບົດບາດສຳຄັນສຳລັບການພັດທະນາມຸ່ງໄປເຖິງເຂດເສດຖະກິດເປັນເອກະພາບ. ທ່ານ Khorixtenco, ປະທານຄະນະປະຈຳຄະນະກຳມະການ ເສດຖະກິດ ອາຊີ - ເອີລົບ ຢືນຢັນວ່າ: ນີ້ແມ່ນສັນຍາໃຫມ່, ທັນສະໄຫມ ແລະ ຮອບດ້ານ ດ້ວຍບັນດາຄວາມໄຫວພິບທີ່ຈຳເປັນ, ມີຄຳໝັ້ນສັນຍາຢູ່ໃນລະດັບສູງ, ຮັບປະກັນຄວາມສົມດູນຜົນປະໂຫຍດ ແລະ ຄິດໄລ່ເຖິງເງື່ອນໄຂລະອຽດຂອງແຕ່ລະຝ່າຍ. ສັນຍາສະບັບນີ້ ຈະຊ່ວຍໃຫ້ບັນດາວິສາຫະກິດ ຫວຽດນາມ ມີກາລະໂອກາດສຳພັດກັບຕະຫລາດຈຳຫນ່າຍທີ່ກວ້າງໃຫຍ່, ໄດ້ຊົມໃຊ້ຫລາຍເງື່ອນໄຂບຸລິມະສິດ, ຫັນດ້ານພາສີເປັນງ່າຍດາຍ, ຊ່ວຍຍູ້ແຮງການສົ່ງອອກສິນຄ້າ, ບໍລິການ ແລະ ການລົງທຶນຂອງຫວຽດນາມ. ຫວຽດນາມ ແລະ ບັນດາປະເທດສະມາຊິກ ພັນທະມິດເສດຖະກິດ ອາຊີ - ເອີລົບ ຈະສະຫງວນໃຫ້ກັນໃນການເປີດປະຕູຕະຫລາດສິນຄ້າດ້ວຍປະມານ 90% ວົງເງິນການຄ້າສອງຝ່າຍ.
ສຳລັບຫວຽດນາມ, ເລື່ອງລົງນາມໃນສັນຍາການຄ້ານີ້ ສືບຕໍ່ຢືນຢັນບົດບາດເປັນເຈົ້າການ, ຕັ້ງຫນ້າຂອງຫວຽດນາມ ໃນການພົວພັນຮ່ວມມືຮອບດ້ານກັບບັນດາປະເທດສະມາຊິກ ພັນທະມິດເສດຖະກິດ ອາຊີ - ເອີລົບ. ກ່ຽວກັບດ້ານເສດຖະກິດ, ຈຸດໝາຍຕົ້ນຕໍຂອງຫວຽດນາມ ໃນການລົງນາມສັນຍາດັ່ງກ່າວແມ່ນແນໃສ່ບັນລຸຜົນປະໂຫຍດພື້ນຖານດ້ານເສດຖະກິດ ຜ່ານການຍົກສູງກຳລັງແກ້ງແຍ້ງຂອງການຜະລິດພາຍໃນປະເທດ, ສ້າງກາລະໂອກາດໃຫ້ແກ່ການຊຸກຍູ້ດ້ານການຄ້າ, ການບໍລິການ, ການລົງທຶນ, ຫັນບັນດາຕະຫລາດນຳເຂົ້າສົ່ງອອກເປັນຫລາຍຮູບຫລາຍແບບ, ຫລີກລ້ຽງການຂຶ້ນກັບຕະຫລາດຫນຶ່ງ. ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນວ່າ:
“ສັນຍາສະບັບນີ້ແມ່ນສະແດງໃຫ້ເຫັນວິໄສທັດຍຸດທະສາດຂອງ ພັນທະມິດເສດຖະກິດ ອາຊີ - ເອີລົບ ກ່ຽວກັບການພັດທະນາການຮ່ວມມືກັບພາກພື້ນ ອາຊີ ປາຊີຟີກ ທີ່ຂະຫຍັນຂັນເຄື່ອນ, ແມ່ນກຳລັງຫນູນຂອງການເຕີບໂຕດ້ານເສດຖະກິດທົ່ວໂລກ. ດ້ວຍອົງປະກອບເສດຖະກິດ, ສິນຄ້າເພີ່ມເຕີມໃຫ້ກັນ ລະຫວ່າງຫວຽດນາມ ແລະ ບັນດາປະເທດສະມາຊິກ ພັນທະມິດເສດຖະກິດ ອາຊີ - ເອີລົບ, ສັນຍາການຄ້າເສລີ ຈະປະກອບສ່ວນສຳຄັນໃຫ້ແກ່ການພັດທະນາເສດຖະກິດຂອງແຕ່ລະປະເທດ, ເພີ່ມທະວີການແລກປ່ຽນດ້ານການຄ້າ, ບໍລິການ, ການລົງທຶນສອງຝ່າຍ ແລະ ເປີດກວ້າງການພົວພັນຮ່ວມມືໃນພາກພື້ນ. ໂດຍແມ່ນສະມາຊິກຂະຫຍັນຂັນເຄື່ອນຂອງອາຊຽນ, ຫວຽດນາມ ຈະມານະພະຍາຍາມເພື່ອໃຫ້ ພັນທະມິດເສດຖະກິດ ອາຊີ - ເອີລົບ ເປີດກວ້າງການພົວພັນກັບປະຊາຄົມອາຊຽນ ຊື່ງແມ່ນຕະຫລາດເປັນເອກະພາບ ແລະ ພັດທະນາທີ່ຂະຫຍັນຂັນເຄື່ອນ ດ້ວຍພົນລະເມືອງກວ່າ 600 ລ້ານຄົນ, GDP ບັນລຸປະມານ 2.500 ຕື້ USD.”
ຈຸດທີ່ແຕກຕ່າງກັນ ແລະ ພິເສດທີ່ສຸດຂອງສັນຍາການຄ້າເສລີລະຫວ່າງ ຫວຽດນາມ ກັບ ພັນທະມິດເສດຖະກິດ ອາຊີ - ເອີລົບ ນັ້ນແມ່ນ ສິນຄ້າ ສົ່ງອອກ ນຳເຂົ້າລະຫວ່າງສອງຝ່າຍ ສ່ວນຫລາຍແມ່ນເພີ່ມເຕີມໃຫ້ກັນ. ມີເນື້ອໃນຫນຶ່ງທີ່ສຳຄັນຂອງສັນຍາ ນັ້ນແມ່ນ ບັນດາປະເທດ ສະມາຊິກ ຈະນຳໃຊ້ລະດັບພາສີ 0% ໃຫ້ປະເພດສິນຄ້າສິນໃນນ້ຳທັງໝົດຂອງຫວຽດນາມ ພາຍຫລັງສັນຍາດັ່ງກ່າວມີຜົນສັກສິດ. ນີ້ແມ່ນການພິສູດໃຫ້ເຫັນຄວາມມານະພະຍາຍາມເປີດກວ້າງຕະຫລາດສົ່ງອອກ ຊື່ງລັດຖະບານຫວຽດນາມ ພວມຜັນຂະຫຍາຍ. ທ່ານ ຫວູຮູຍຮ່ວາງ, ລັດຖະມົນຕີວ່າການກະຊວງອຸດສາຫະກຳ ແລະ ການຄ້າຫວຽດນາມ ໃຫ້ຮູ້ວ່າ:
“ຕາມຄຳໝັ້ນສັນຍາ ນັບແຕ່ປີທຳອິດເມື່ອສັນຍາດັ່ງກ່າວມີຜົນສັກສິດ, ຈະມີສິນຄ້າ ຫລາຍປະເພດ ຂອງຫວຽດນາມ ທີ່ມີທ່າແຮງ ພິເສດ ແມ່ນສິນໃນນ້ຳ ແລະ ຜະລິດຕະພັນກະເສດ ຈະໄດ້ຊົມໃຊ້ອັດຕາພາສີ 0%. ເຄື່ອງຕ່ຳແຜ່ນຕັດຫຍິບ, ເກີບຫນັງ, ເຄື່ອງເຟີນີເຈີ ແລະ ຜະລິດຕະພັນປຸງແຕ່ງອື່ນຈຳນວນຫນຶ່ງກໍໄດ້ຊົມໃຊ້ບຸລິມະສິດຈາກ ພັນທະມິດເສດຖະກິດ ອາຊີ - ເອີລົບ ສ້າງຄວາມສະດວກໃຫ້ແກ່ຫວຽດນາມ ໃນວິວັດການປະຕິບັດສັນຍາ. ກົງກັນຂ້າມ, ຫວຽດນາມ ກໍເປີດປະຕູສຳລັບສິນຄ້າບາງປະເພດຊື່ງພັນທະມິດເສດຖະກິດ ອາຊີ - ເອີລົບ ມີທ່າແຮງ ແລະ ຫວຽດນາມ ພວມຕ້ອງການທີ່ສຸດ, ໃນນັ້ນ ພິເສດ ແມ່ນກົນຈັກ, ອຸປະກອນ, ຜະລິດຕະພັນນ້ຳນົມຈຳນວນຫນຶ່ງ.”
ຕາມການຕີລາຄາຂອງບັນດາຜູ້ຊ່ຽວຊານເສດຖະກິດແລ້ວ, ເບິ່ງລວມແລ້ວບັນດາປະເພດສິນຄ້າຊື່ງຫວຽດນາມ ເປີດປະຕູໃຫ້ ພັນທະມິດເສດຖະກິດ ອາຊີ - ເອີລົບ ສ່ວນຫລາຍບໍ່ແກ້ງແຍ້ງກັບສິນຄ້າພາຍໃນປະເທດ, ກົງກັນຂ້າມ ຍັງປະກອບສ່ວນຫັນຕະຫລາດຈຳຫນ່າຍເປັນຫລາຍຮູບຫລາຍແບບ. ຕາມການຄິດໄລ່ພາຍຫລັງສັນຍາມີຜົນສັກສິດ ສະເລ່ຍ ປີຫນຶ່ງ ການສົ່ງອອກຂອງຫວຽດນາມ ຈະເພີ່ມຂຶ້ນປະມານ 18-20%, ສູງກວ່າລະດັບເພີ່ມການສົ່ງອອກສິນຄ້າຂອງບັນດາປະເທດ ພັນທະມິດເສດຖະກິດ ອາຊີ - ເອີລົບ ເຂົ້າຫວຽດນາມ. ຄາດວ່າ ຮອດປີ 2020, ຍອດວົງເງິນການຄ້າສອງສົ້ນຈະບັນລຸຢ່າງຫນ້ອຍສຸດ 10 ຕື້ USD. ບໍ່ພຽງແຕ່ບັນລຸຜົນປະໂຫຍດພື້ນຖານກ່ຽວກັບເສດຖະກິດ ຜ່ານການລົງນາມບັນດາສັນຍາການຄ້າເສລີ ຈະປະກອບສ່ວນຍົກສູງກຳລັງແກ້ງແຍ້ງຂອງການຜະລິດພາຍໃນປະເທດ, ສ້າງກາລະໂອກາດຊຸກຍູ້ດ້ານການຄ້າ, ການລົງທຶນ, ຫັນບັນດາຕະຫລາດສົ່ງອອກນຳເຂົ້າເປັນຫລາຍຮູບຫລາຍແບບ. ນີ້ກໍແມ່ນທັດສະນະຊື່ງລັດຖະບານຫວຽດນາມ ພວມຕັ້ງຫນ້າຫັນວິວັດການຍູ້ແຮງການເຊື່ອມໂຍງເຂົ້າກັບເສດຖະກິດສາກົນໃຫ້ປະກົດຜົນເປັນຈິງ.