(vovworld)- ນາຍົກລັດຖະມົນຕີ ຫວຽດນາມ ຫາກໍອະນຸມັດແຜນຮ່າງສັງລວມກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່ຕິດພັນກັບການຫັນປ່ຽນຮູບແບບຈະເລີນເຕີບໂຕຕາມທິດຍົກສູງຄຸນນະພາບ, ປະສິດທິຜົນ ແລະ ກຳລັງຄວາມສາມາດແກ້ງແຍ້ງໄລຍະ 2013 - 2020, ໃນນັ້ນສຸມໃສ່ສ້າງໂຄງປະກອບການລົງທຶນຂອງ ລັດ, ບັນດາອົງການສິນເຊື່ອ, ກຸ່ມບໍລິສັດ, ບໍລິສັດໃຫຍ່ແຫ່ງລັດຄືນໃຫມ່. ທ່ານນາຍົກລັດຖະມົນຕີໄດ້ເນັ້ນຫນັກວ່າ: ປີ 2013 ແມ່ນປີແຫ່ງການສ້າງໂຄງປະກອບຄືນໃຫມ່.
ປີ 2013 ໄດ້ຮັບການຮັບຮູ້ຈາກສະພາແຫ່ງຊາດ, ລັດຖະບານວ່າ ແມ່ນປີທີ່ພື້ນຖານເສດຖະກິດ ຫວຽດນາມ ສືບຕໍ່ປະສົບກັບຄວາມຫຍຸ້ງຍາກ ຄື: ຫນີ້ເສຍຍັງໃນລະດັບສູງຢູ່, ສິນຄ້າຍັງຄ້າງສາງຫຼາຍ ແລະ ຕະຫລາດອະສັງຫາລິມະຊັບຖືກຢຸດສະງັກ. ເຖິງຢ່າງໃດກໍຕາມ, ນີ້ກໍເປັນປີທີ່ມີກາລະໂອກາດເພື່ອຍູ້ແຮງບັນດາມາດຕະການສ້າງໂຄງປະກອບພື້ນຖານເສດຖະກິດຄືນໃຫມ່, ເປັນຕົ້ນແມ່ນສ້າງໂຄງປະກອບວິສາຫະກິດຄືນໃຫມ່ ເພື່ອຍົກສູງປະສິດທິຜົນການເຄື່ອນໄຫວຂອງພື້ນຖານເສດຖະກິດ, ຍົກສູງກຳລັງຄວາມສາມາດແກ້ງແຍ້ງຂອງບັນດາວິສາຫະກິດຫວຽດນາມ ໃນເງື່ອນໄຂເຊື່ອມໂຍງເຂົ້າກັບເສດຖະກິດສາກົນ. ໃນສະພາບການຄືແນວນັ້ນ, ແຜນຮ່າງສັງລວມກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່ຕິດພັນກັບການຫັນປ່ຽນຮູບແບບຈະເລີນເຕີບໂຕຕາມທິດຍົກສູງຄຸນນະພາບ, ປະສິດທິຜົນ ແລະ ກຳລັງຄວາມສາມາດແກ້ງແຍ້ງໄລຍະ 2013 - 2020 ຂອງນາຍົກລັດຖະມົນຕີ ແມ່ນເພື່ອຈຸດໝາຍຮັກສາສະພາບແວດລ້ອມດ້ານເສດຖະກິດມະຫາພາກໃຫ້ມີຄວາມສະດວກ, ເປັນປົກກະຕິ, ໃນນັ້ນ ປະຕິບັດນະໂຍບາຍເງິນຕາຢ່າງລະມັດລະວັງ, ມີປະສິດທິຜົນ, ນຳໃຊ້ບັນດາເຄື່ອງມືຂອງນະໂຍບາຍເງິນຕາຢ່າງມີໄຫວພິບ ແລະ ປະສິດທິຜົນ, ຕິດພັນ ກັບນະໂຍບາຍງົບປະມານຢ່າງແຫນ້ນແຟ້ນ, ຄົບຊຸດ ເພື່ອຮັບປະກັນການປະຕິບັດຈຸດໝາຍຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ ແລະ ຮັບປະກັນລະດັບຈະເລີນເຕີບໂຕຢ່າງເໝາະສົມ, ສອດຄອ່ງກັບ 3 ຈຸດໝາຍຕົ້ນຕໍ, ນັ້ນແມ່ນສ້າງໂຄງປະກອບການລົງທຶນຂອງລັດຄືນໃຫມ່, ສ້າງໂຄງປະກອບລະບົບການເງິນ, ທະນາຄານ ແລະ ວິສາຫະກິດຄືນໃຫມ່. ກ່ຽວກັບການສ້າງໂຄງປະກອບການລົງທຶນຄືນໃຫມ່, ຈຸດສຸມແມ່ນການລົງທຶນຂອງລັດ, ລັດຖະບານຈະລະດົມບັນດາແຫລ່ງກຳລັງໃຫ້ແກ່ການລົງທຶນພັດທະນາຢ່າງເໝາະສົມ, ຮັບປະກັນຍອດເງິນລົງທຶນສັງຄົມປະມານ 30- 35% GDP. ເພື່ອປະຕິບັດຈຸດໝາຍດັ່ງກ່າວໃຫ້ໄດ້, ລັດຖະບານ ໄດ້ສ້າງແຜນການລະອຽດ ດ້ວຍການສົມທົບກັບບັນດາກະຊວງ, ຂະແຫນງການ ສຸມໃສ່ລົງທຶນເຂົ້າບັນດາກິດຈະກຳຈຸດສຸມ. ດຣ ຫງວຽນມີນຟອງ, ຜູ້ຊ່ຽວຊານດ້ານເສດຖະກິດໃຫ້ຂໍ້ສັງເກດວ່າ:
“ປີ 2013, ຫວຽດນາມ ຈະຈຳກັດບັນດາການເຄື່ອນໄຫວລົງມືກໍ່ສ້າງ ໂຄງການໃຫມ່, ສຸມໃສ່ກິດຈະກຳທີ່ເປັນຈຸດສຸມ, ບັນດາຂົງເຂດທີ່ມີຄວາມສາມາດກໍ່ສ້າງສຳເລັດໃນປີ ແລະ ໃນສະເພາະໜ້າເພື່ອສ້າງປະສິດທິຜົນ, ກຳນົດທິດລົງທຶນບັນດາໂຄງການທີ່ພວມກໍ່ສ້າງ ແລະ ຈະກໍ່ສ້າງສຳເລັດ, ຈຳກັດບັນດາໂຄງການທີ່ຫາກໍ່ລົງມືກໍ່ສ້າງ.”
ພາບປະກອບ:internet
|
ເພື່ອຍົກສູງຄຸນນະພາບ ແລະ ປະສິດທິຜົນການລົງທຶນຂອງລັດ ຈະດຳເນີນການກວດກາ ແລະ ປັບປຸງລະບົບທີ່ກ່ຽວຂ້ອງເຖິງການຄຸ້ມຄອງກໍຄືກຳນົດທິດລົງທຶນຂອງລັດ. ໃນນັ້ນ ບັນດາໂຄງການລົງທຶນກໍ່ສ້າງພື້ນຖານໂຄງລ່າງຕ້ອງມີການແບ່ງຂັ້ນ ແລະ ພວມຢູ່ໃນວິວັດການຈັດຕັ້ງການປະມູນເພື່ອໃຫ້ການຜັນຂະຫຍາຍຢ່າງມີປະສິດທິຜົນ. ຄຽງຄູ່ກັນນັ້ນ ຕ້ອງເພີ່ມທະວີກົນໄກຕິດຕາມກວດກາ, ຈາກນັ້ນ ຊ່ວຍຍົກສູງປະສິດທິຜົນການລົງທຶນຂອງລັດ.
ກ່ຽວກັບການສ້າງໂຄງປະກອບລະບົບການເງິນ, ທະນາຄານຄືນໃຫມ່, ຊຶ່ງຈຸດສຸມແມ່ນບັນດາອົງການສິນເຊື່ອ, ໄລຍະ 2013- 2015 ຈະສຸມໃສ່ບັນດາມາດຕະການເຮັດໃຫ້ສະພາບການເງິນຂອງບັນດາອົງການສິນເຊື່ອມີຄວາມໂປ່ງໃສ, ກ່ອນອື່ນໝົດແມ່ນສຸມໃສ່ແກ້ໄຂຫນີ້ເສຍຂອງທັງລະບົບອົງການສິນເຊື່ອ ແລະ ແຕ່ລະອົງການສິນເຊື່ອ, ສຸມໃສ່ພັດທະນາບັນດາການເຄື່ອນໄຫວດຳເນີນທຸລະກິດຕົ້ນຕໍ, ຮັບປະກັນຄວາມສາມາດຊຳລະ, ເບີກຈ່າຍ ແລະ ພັດທະນາເປັນປົກກະຕິ, ໝັ້ນຄົງ, ສຸມໃສ່ແກ້ໄຂສະພາບກຳມະສິດເຊິ່ງກັນ ແລະ ກັນ ແລະ ເພີ່ມລັກສະນະໂປ່ງໃສໃນການເຄື່ອນໄຫວຂອງບັນດາອົງການສິນເຊື່ອ.
ກ່ຽວກັບການສ້າງໂຄງປະກອບວິສາຫະກິດ, ຈຸດສຸມແມ່ນບັນດາກຸ່ມບໍລິສັດ, ບໍລິສັດໃຫຍ່ແຫ່ງລັດ, ລັດຖະບານ ປະຕິບັດການແບ່ງປະເພດ, ສັບຊ້ອນລັດວິສາຫະກິດຄືນໃຫມ່, ສຸມໃສ່ບັນດາຂົງເຂດຕົ້ນຕໍ ຊື່ງລວມມີ: ອຸດສາຫະກຳປ້ອງກັນຊາດ, ຂະແຫນງອຸດສາຫະກຳພື້ນຖານ, ອຸດສາຫະກຳສູງ, ຍູ້ແຮງການຫັນລັດວິສາຫະກິດເປັນຫຸ້ນສ່ວນ, ຫັນກຳມະສິດບັນດາລັດວິສາຫະກິດເປັນຫລາຍຮູບຫລາຍແບບ. ດຣ ຫງວຽນເຖີມເຢືອງ, ຜູ້ຊ່ຽວຊານດ້ານເສດຖະກິດໄດ້ໃຫ້ຂໍ້ສັງເກດວ່າ:
“ປີ 2013 ແມ່ນສຸມໃສ່ແກ້ໄຂສະພາບຫນີ້ເສຍ, ສິນຄ້າຄ້າງສາງ, ກະແສເງິນ ເພື່ອສ້າງຄວາມໄວ້ເນື້ອເຊື່ອໃຈໃຫ້ແກ່ຕະຫລາດ. ສະນັ້ນ ປີ 2013 ຕ້ອງແກ້ໄຂບັນດາບັນຫາເຄັ່ງຮ້ອນນັ້ນ ແລະ ຕ້ອງມີມາດຕະການແກ່ການພັດທະນາຢ່າງຍາວນານ.”
ເລື່ອງນາຍົກລັດຖະມົນຕີ ຜັນຂະຫຍາຍການຫັນບັນດາມາດຕະການສຸມໃສ່ ສ້າງໂຄງປະກອບພື້ນຖານເສດຖະກິດຄືນໃຫມ່ເປັນລະອຽດໃນປີ 2013 ແມ່ນບາດກ້າວບຸກທະລຸ, ປະກອບສ່ວນເຮັດໃຫ້ຕະຫລາດໂປ່ງໃສ, ສ້າງຄວາມໄວ້ເນື້ອເຊື່ອໃຈໃຫ້ແກ່ບັນດາວິສາຫະກິດ ມຸ່ງໄປເຖິງຈຸດໝາຍພັດທະນາຢ່າງຍາວນານ ແລະ ຫັນປ່ຽນຮູບແບບຈະເລີນເຕີບໂຕ. ແຜນຮ່າງໄດ້ຮັບການປະຕິບັດຈາກລັດຖະບານ ແມ່ນບາດກ້າວເໝາະສົມກັບສະພາບການຂອງພື້ນຖານເສດຖະກິດໃນປະຈຸບັນ, ໃນນັ້ນ ຮັບຮູ້ ຫລຸດຜ່ອນລະດັບການເຕີບໂຕເພື່ອບັນລຸຈຸດໝາຍຮັກສາເສດຖະກິດມະຫາພາກໄລຍະຍາວເປັນປົກກະຕິ, ສ້າງທ່າພັດທະນາເສດຖະກິດແບບຍືນຍົງ.