(vovworld) - ໃນ 2, 3 ປີມໍ່ໆມານີ້, ຍ້ອນຍູ້ແຮງການນຳໃຊ້ວິທະຍາສາດເຕັກໂນໂລຢີໃນທຸກໆດ້ານຂອງຊີວິດປະຈຳວັນ, ຫວຽດນາມ ໄດ້ມີບັນດາຜົນງານທີ່ແນ່ນອນ ແລະ ໄດ້ຮັບການຮັບຮູ້ຈາກພາກພື້ນ ແລະ ສາກົນວ່າ: ແມ່ນໜຶ່ງໃນ 10 ປະເທດຜະລິດຊອບແວ ແລະ ໄດ້ຮັບການຮັບຮູ້ຈາກອົງການສຶກສາວິທະຍາສາດ ແລະ ວັດທະນະທຳຂອງ ສປຊ (UNESCO) ວ່າແມ່ນໜຶ່ງໃນ 4 ປະເທດໃນໂລກຜະລິດວັກຊີນ Rota ກັນພະຍາດຖອກທ້ອງ. ເຖິງຢ່າງໃດກໍຕາມ, ໃນສະພາບຄວາມແກ່ງແຍ້ງສູງຄືປະຈຸບັນ, ເພື່ອໃຫ້ພື້ນຖານເສດຖະກິດອາດຈະບືນຕົວຂຶ້ນ, ຫວຽດນາມ ຕ້ອງລົງທຶນຢ່າງແຮງກ່ວາອີກເຂົ້າໃນຂົງເຂດວິທະຍາສາດເຕັກໂນໂລຢີ. ບົດຂຽນ “ສ້າງກຳລັງໜູນເພື່ອໃຫ້ວິສາຫະກິດລົງທຶນເຂົ້າວິທະຍາສາດເຕັກໂນໂລຢີ” ຂອງ ເວີນແອງ, ນັກຂ່າວ VOV.
ຫວຽດນາມ ມີທ່າແຮງຂອງຜູ້ໄປຕາມຫຼັງເພື່ອຮັບເອົາບັນດາຜົນງານດ້ານວິທະຍາສາດເຕັກໂນໂລຢີຍອດຍິ່ງຂອງໂລກ. ດັ່ງນັ້ນ, ຖ້າຫາກນຳໃຊ້ບັນດາທ່າແຮງນີ້ໄດ້ຈະນຳມາເຊິ່ງການເຕີບໂຕທີ່ດີໃຫ້ແກ່ພື້ນຖານເສດຖະກິດ. ພ້ອມກັນນັ້ນ, ຫວຽດນາມ ພວມແມ່ນປະເທດນຳໜ້າໃນເລື່ອງຫັນເປັນໂລກາພິວັດ ແລະ ເຕັກໂນໂລຢີຂໍ້ມູນຂ່າວສານແຮງພໍສົມຄວນ. ພ້ອມກັບການເຊື່ອມໂຍງເລິກເຊິ່ງກັບໂລກ, ກຳແໜ້ນບັນດາເຕັກໂນໂລຢີຂໍ້ມູນຂ່າວສານພໍສົມຄວນ, ຫວຽດນາມ ມີໂອກາດ 3 ດ້ານນັ້ນແມ່ນ: “ການຮຳ່ຮຽນໄວ”. “ຮຽນເພື່ອບຸກທະລຸ” ແລະ “ບຸກທະລຸເຂົ້າບັນດາຂົງເຂດແຖວໜ້າ”. ແຕ່ເຖິງຢ່າງໃດກໍຕາມ, ຢູ່ ຫວຽດນາມ ການລົງທຶນໃຫ້ບັນດາການເຄື່ອນໄຫວວິທະຍາສາດເຕັກໂນໂລຢີບໍ່ທັນຫຼາຍ. ປີ 2014, ການລົງທຶນເຂົ້າຂົງເຂດນີ້ກວມພຽງ 2% ງົບປະມານຂອງລັດ, ເທົ່າກັບຈຳນວນເງິນ 13.600 ຕື້ດົ່ງ (ປະມານ 70 ລ້ານ USD). ຍິ່ງໄປກ່ວານັ້ນ, ຫວຽດນາມ ພັດທະນາວິທະຍາສາດເຕັກໂນໂລຢີເປັນຕົ້ນແມ່ນອີງໃສ່ທຶນງົບປະມານ, ໃນຂະນະນັ້ນ, ບັນດາປະເທດເກືອບທັງໝົດມືພື້ນຖານວິທະຍາສາດເຕັກໂນໂລຢີທັນສະໄໝພັດທະນາໂດຍອີງໃສ່ການລົງທຶນຂອງວິສາຫະກິດ. ນັກຊ່ຽວຊານດ້ານເສດຖະກິດ ເລດັງແຢງ, ຕີລາຄາວ່າ:
“ປະຈຸບັນ, ການຄົ້ນຄ້ວາ ແລະ ນຳໃຊ້ວິທະຍາສາດເຕັກໂນໂລຢີຂອງ ຫວຽດນາມ ແມ່ນບໍ່ຫຼາຍປານໃດ, ສະແດງໃຫ້ເຫັນປັດໄຈວິທະຍາສາດເຕັກໂນໂລຢີ ແລະ ປັດໄຈສະມັດຕະພາບແຮງງານບັນລຸພຽງປະມານ 26%, ໃນຂະນະນັ້ນ ສ. ເກົາຫຼີ ແລະ ບາງປະເທດສະມາຊິກ ອາຊຽນ ພັດແມ່ນ 50%. ສິ່ງດັ່ງກ່າວ, ມີຄວາມໝາຍວ່າພວກເຮົາໄດ້ອີງໃສ່ຫຼາຍເຂົ້າໃນແຮງງານມີລາຄາຖືກ ແລະ ທຶນໜູນຊ່ວຍເພ່ືອເຕີບໂຕ. ສິ່ງດັ່ງກ່າວແມ່ນບໍ່ຍືນຍົງ ແລະ ບໍ່ຍົກສູງປະສິດທິຜົນດ້ານເສດຖະກິດໄດ້. ຫວຽດນາມ ຄວນມີບັນດາການປ່ຽນໃໝ່ຢ່າງແຮງກ່ວາອີກ. ສິ່ງສຳຄັນແມ່ນສ້າງກຳລັງໜູນເພື່ອໃຫ້ວິສາຫະກິດລົງທຶນເຂົ້າວິທະຍາສາດເຕັກໂນໂລຢີ.”
ພາບປະກອບ
|
ຮອງສາດສະດາຈານ, ດຣ ຫວູມິນເຄືອງ ສະເໜີວ່າ: ຫວຽດນາມ ຄວນມີບັນດານະໂຍບາຍບຸລິມະສິດລະອຽດກ່ຽວກັບການລົງທຶນດ້ານວິທະຍາສາດເຕັກໂນໂລຢີເພື່ອໃຫ້ວິສາຫະກິດໄດ້ຮັບຜົນປະໂຫຍດໂດຍກົງ. ເຮັດໄດ້ຄືແນວນັ້ນວິສາຫະກິດຈຶ່ງມີກຳລັງໜູນເພື່ອລົງທຶນໃຫ້ແກ່ວິທະຍາສາດເຕັກໂນໂລຢີ:
“ລັດຄວນໜູນຊ່ວຍໃຫ້ບັນດາວິສາຫະກິດສຳຜັດກັບຂ້ໍມູນຂ່າວກ່ຽວກັບເຕັກໂນໂລຢີ. ຍ້ອນວ່າ, ບັນດາວິສາຫະກິດຂະໜາດນ້ອຍມີສິ່ງຈຳກັດນັ້ນແມ່ນບໍ່ເຂົ້າໃຈໝົດບັນດາຂໍ້ມູນກ່ຽວກັບວິທະຍາສາດເຕັກໂນໂລຢີ. ຕົວຢ່າງຄື: ຢູ່ສິງກາໂປລົງທຶນໃຫ້ຂົງເຂດວິທະຍາສາດເຕັກໂນໂລຢີ ລັດຈະຍົກເວັ້ນພາສີ 30% ຖ້າຫາກເຂົາເຈົ້າມີກຳໄລ ແລະ ໜູນຊ່ວຍໃຫ້ເຂົາເຈົ້າໃນຍອດຈຳນວນເງິນລົງທຶນ. ໝາຍຄວາມວ່າຕ້ອງມີກົນໄກສົ່ງເສີມການລົງທຶນວິທະຍາສາດເຕັກໂນໂລຢີ. ຫວຽດນາມ ຄວນຮຳ່ຮຽນເອົາບົດຮຽນຂອງ ສ. ເກົາຫຼີ, ສິງກາໂປ. ເຂົາເຈົ້າມີບັນດາສະຖາບັນຊອກຮູ້ສະເພາະບັນດາເຕັກໂນໂລຢີກ້າວໜ້າໃນໂລກ ຫຼັງຈາກນັ້ນຈະມອບສົ່ງໃຫ້ບັນດາວິສາຫະກິດ. ຄ່າໃຊ້ຈ່າຍໃຫ້ບັນດາສະຖານບັນດັ່ງກ່າວໂດຍລັດໜູນຊ່ວຍອີງຕາມຜົນປະໂຫຍດທີ່ນຳມາໃຫ້ວິສາຫະກິດ. ນີ້ແມ່ນການຮ່ວມມືລະຫວ່າງພາກ ລັດ - ເອກະຊົນ.”
ທ່ານລັດຖະມົນຕີຊ່ວຍວ່າການກະຊວງວິທະຍາສາດ - ເຕັກໂນໂລຢີ ເຈີ່ນວັນຕູ່ງ, ໃຫ້ຮູ້ວ່າ: ບັນດານະໂຍບາຍບຸລິມະສິດໃຫ້ແກ່ວິສາຫະກິດເມື່ອລົງທຶນດ້ານວິທະຍາສາດເຕັກໂນໂລຢີ ເຖິງວ່າໄດ້ຮັບບຸລິມະສິດຄື: ຫລຸດຜ່ອນພາສີເມື່ອນຳເຂົ້າວັດຖຸອຸປະກອນ, ຖ່າຍທອດເຕັກໂນໂລຢີ, ບຸລິມະສິດພາສີເຊົ່າທີ່ດິນກໍຕາມ… ແຕ່ເລື່ອງນຳໃຊ້ຢູ່ບັນດາທ້ອງຖິ່ນ ແລະ ຂະແໜງພາສີພັດບໍ່ທັນເປັນເອກະພາບເທື່ອ. ໄລຍະຈະມາເຖິງ, ກະຊວງວິທະຍາສາດ ແລະ ເຕັກໂນໂລຢີ ຈະເພີ່ມທະວີການສົມທົບກັບບັນດາກະຊວງ, ຂະແໜງການກ່ຽວຂ້ອງເພື່ອແນະນຳ, ສ້າງເງື່ອນໄຂສະດວກທີ່ສຸດໃຫ້ວິສາຫະກິດລົງທຶນເຂົ້າວິທະຍາສາດເຕັກໂນໂລຢີ:
“ປະຈຸບັນ, ພວກເຮົາມີນະໂຍບາຍແລ້ວ, ແຕ່ການຈັດຕັ້ງບໍ່ທັນຄົບຊຸດເທື່ອ, ຄວນມີການສົມທົບກັນໃຫ້ດີກ່ວາອີກ. ໄລຍະຈະມາເຖິງ, ກະຊວງວິທະຍາສາດ ແລະ ເຕັກໂນໂລຢີ ຈະສົມທົບກັບກະຊວງການເງິນໃຫ້ດີກ່ວາອີກເພ່ືອໃຫ້ອົງການຕ່າງໆຄື: ກົມພັດທະນາຕະຫຼາດ ແລະ ວິທະຍາສາດເຕັກໂນໂລຢີສົມທົບກັບກົມໃຫຍ່ພາສີໃຫ້ດີກ່ວາອີກ ເພື່ອເຮັດແນວໃດສາມາດແນະນຳໃຫ້ບັນດາກົມພາສີຢູ່ຂັ້ນແຂວງ, ນະຄອນປະຕິບັດ ແລະ ໝູນໃຊ້ໃຫ້ບັນດາວິສາຫະກິດພັດທະນາວິທະຍາສາດເຕັກໂນໂລຢີ.”
ໃນວິວັດແຫ່ງການພັດທະນາ, ໄລຍະຈະມາເຖິງ, ຫວຽດນາມ ສືບຕໍ່ປ່ຽນໃໝ່ນະໂຍບາຍພັດທະນາວິທະຍາສາດເຕັກໂນໂລຢີ, ເອົາໃຈໃສ່ຍົກສູງຄຸນນະພາບຜະລິດຕະພັນ. ເຮັດໄດ້ຄືແນວນັ້ນວິສາຫະກິດ ຫວຽດນາມ ຈຶ່ງມີກາລະໂອກາດຄອງຕະຫຼາດ ແລະ ຫຼີກລ້ຽງໄພຖອຍຫຼັງໃນຕະຫຼາດພາຍໃນປະເທດ.