(vovworld) - ໃນຫຼາຍປີຜ່ານມາ, ຫວຽດນາມ ແມ່ນໜຶ່ງໃນບັນດາປະເທດມີປະລິມານເຂົ້າສານສົ່ງອອກແຖວໜ້າໃນໂລກ. ແຕ່ເຖິງຢ່າງໃດກໍ່ຕາມ, ມູນຄ່າເຂົ້າສານສົ່ງອອກຍັງຕຳ່ຢູ່ ເຊິ່ງສາຍເຫດຕົ້ນຕໍແມ່ນເຂົ້າສານ ຫວຽດນາມ ຍັງບໍ່ທັນສ້າງເຄື່ອງໝາຍການຄ້າ ແລະ ຄຸນນະພາບກໍ່ບໍ່ທັນເປັນປົກກະຕິເທື່ອ. ນີ້ກໍ່ແມ່ນເນື້ອໃນຂອງກອງປະຊຸມຂອງກະຊວງອຸດສາຫະກຳ - ການຄ້າ ທີ່ໄດ້ຮັບການຈັດຕັ້ງຫວ່າງມໍ່ໆມານີ້ກ່ຽວກັບມາດຕະການເພື່ອແນໃສ່ເພີ່ມທະວີການສົ່ງອອກເຂົ້າສານປີ 2016. ບົດຂຽນ “ສ້າງເຄື່ອງໝາຍການຄ້າເຂົ້າສານ ຫວຽດນາມ ເພື່ອຍົກສູງມູນຄ່າການສົ່ງອອກ” ຂອງເລ້ຮັ່ງ, ນັກຂ່າວ VOV.
 |
ປີ 2015, ຫວຽດນາມ ສົ່ງອອກເຂົ້າສານບັນລຸເກືອບ 6,6 ລ້ານໂຕນ, ດ້ວຍມູນຄ່າກ່ວາ 2,8 ຕື້ USD, ເພີ່ມຂຶ້ນ 4% ກ່ຽວກັບດ້ານປະລິມານ, ແຕ່ພັດຫລຸດລົງ 4,5% ກ່ຽວກັບມຸນຄ່າສົ່ງອອກເມື່ອທຽບໃສ່ປີ 2014. ຕາມການຄາດຄະເນແລ້ວ, ການສົ່ງອອກເຂົ້າສານຂອງ ຫວຽດນາມ ໃນປີ 2016 ມີການຜັນແປໄປຍາກທີ່ຈະຄາດຄະເນລ່ວງໜ້າໄດ້ ຍ້ອນຜົນສະທ້ອນຂອງປະກົດການ El Nino ໄດ້ກໍ່ໃຫ້ເກີດສະພາບໄພແຫ້ງແລ້ງ, ນ້ຳເຄັມຊຶມເຂົ້ານັບມື້ນັບກ້ວາງຂວາງ, ເຮັດໃຫ້ເນື້ອທີ່ປູກເຂົ້າຫລຸດລົງ. ສະພາບຂາດນຳ້ຫົດກໍ່ແມ່ນສາຍເຫດພາໃຫ້ໂລກລະບາດເພີ່ມຂຶ້ນ. ສິ່ງດັ່ງກ່າວໄດ້ສົ່ງຜົນສະທ້ອນເຖິງຄຸນນະພາບເຂົ້າສານ ແລະ ຫລຸດຜ່ອນຄວາມສາມາດແກ່ງແຍ້ງຂອງເຂົ້າສານສົ່ງອອກຂອງຫວຽດນາມ ເມື່ອທຽບໃສ່ປະເທດຕ່າງໆໃນພາກພື້ນຄື: ໄທ, ອິນເດຍ, ປາກິດສະຖານ… ຍິ່ງກ່ວານັ້ນ, ການສົ່ງອອກເຂົ້າສານຂອງ ຫວຽດນາມ ຍັງສຸມໃສ່ຕົ້ນຕໍເຂົ້າບາງຕະຫຼາດໃຫຍ່ດັ່ງນັ້ນຈຶ່ງມີຄວາມສ່ຽງ. ພ້ອມເຫດນັ້ນ, ບັນດາວິສາຫະກິດ ຫວຽດນາມ ພວມເປັນເຈົ້າການຕັ້ງໜ້າເປີດກ້ວາງບັນດາຕະຫຼາດໃໝ່ຄື: ເອີລົບ, ອາເມລິກາ, ຍີ່ປຸ່ນ ແລະ ສ. ເກົາຫຼີ… ແຕ່ຄວາມຫຍຸ້ງຍາກນັ້ນແມ່ນບັນດາຕະຫຼາດນຳໃຊ້ເຂົ້າສານທີ່ມີຄຸນນະພາບສູງ, ໃນຂະນະທີ່ ຫວຽດນາມ ສົ່ງອອກເຂົ້າສານມີຄຸນນະພາບສູງພຽງປະມານ 27% ແລະ ເຂົ້າສານຂອງ ຫວຽດນາມ ຍັງບໍ່ທັນມີເຄື່ອງໝາຍການຄ້າ. ດັ່ງນັ້ນ, ເລື່ອງຍົກສູງຄຸນນະພາບເຂົ້າສານ, ຈາກແນວພັນເຂົ້າ, ການສ້າງເຄື່ອງໝາຍການຄ້າ, ການຍູ້ແຮງການສົ່ງເສີມການຄ້າ… ແມ່ນບັນດາປັດໄຈສຳຄັນທີ່ສຸດ ເພື່ອເພີ່ມມູນຄ່າເຂົ້າສານສົ່ງອອກຂອງ ຫວຽດນາມ. ທ່ານ ເຈີນຕ໋ວນແອງ, ລັດຖະມົນຕີຊ່ວຍວ່າການກະຊວງອຸດສາຫະກຳ - ການຄ້າ, ໃຫ້ຮູ້ວ່າ:
“ໃນບັນດາການເຄື່ອນໄຫວໜູນຊ່ວຍສົ່ງເສີມການຄ້າ, ບັນດາວິສາຫະກິດກໍ່ຕ້ອງການໄດ້ຮັບການກຳນົດທິດຂອງອົງການຂອງລັດກ່ຽວກັບຕະຫຼາດ, ພິເສດຂອງສະຫະສະມາຄົມສະບຽງອາຫານ ເພື່ອໜູນຊ່ວຍວິສາຫະກິດໃນການສົ່ງເສີມ ແລະ ພັດທະນາຕະຫຼາດດ້ວຍບັນດາຮູບແບບ, ຮູບການໃຫ້ເໝາະສົມ. ນີ້ກໍແມ່ນຄວາມຮຽກຮ້ອງຕ້ອງການທີ່ວາງອອກໃຫ້ແກ່ກະຊວງອຸດສາຫະກຳ - ການຄ້າໃນການປ່ຽນໃໝ່ວິທີການສົ່ງເສີມການຄ້າໃຫ້ແກ່ຜະລິດຕະພັນກະເສດ ແລະ ເຂົ້າສານ ໃຫ້ເໝາະສົມກັບ່ແຕ່ລະຕະຫຼາດ”
 |
ຮອດຈຸດເວລານີ້, ບັນດາວິສາຫະກິດສົ່ງອອກເຂົ້າສານຂອງ ຫວຽດນາມ ສາມາດເຊັນສັນຍາສົ່ງອອກເຂົ້າສານໄດ້ກ່ວາ 1 ລ້ານໂຕນ. ນີ້ກໍແມ່ນສັນຍານທີ່ຕັ້ງໜ້າໃນການສົ່ງອອກເຂົ້າສານໃນປີນີ້. ໃນຈຸດເວລານີ້, ບັນດາວິສາຫະກິດຍັງຄົງຕ້ອງຮັກສາຕະຫຼາດສົ່ງອອກເຂົ້າ ຈີນ ແລະ ບັນດາຕະຫຼາດຂັ້ນສູງອື່ນໆອີກ. ເພື່ອເປີດກ້ວາງການຍູ້ແຮງການສົ່ງອອກເຂົ້າ ອາເມລິກາ, ສ. ເກົາຫຼີ, ເອີລົບ… ບັນດາວິສາຫະກິດ ແລະ ຊາວກະສິກອນ ຫວຽດນາມ ພວມເປັນເຈົ້າການລົງທຶນຈາກແນວພັນປູກ, ຄຸນນະພາບເຂົ້າສານປອດສານພິດ, ສ້າງທົ່ງນາຂະໜາດໃຫຍ່, ສ້າງເຄື່ອງໝາຍການຄ້າ ແລະ ສົ່ງເສີມການລົງທຶນ. ທ່ານ ຮີ່ງເທ໋ນັງ, ປະທານສະຫະສະມາຄົມສະບຽງອາຫານພາກໃຕ້, ຜູ້ອຳນວຍການໃຫຍ່ບໍລິສັດສະບຽງອາຫານພາກໃຕ້, ໃຫ້ຮູ້ວ່າ:
“ກຳນົດທິດສ້າງລະບົບມູນຄ່າຕິດພັນກັບການຍົກສູງຄຸນນະພາບເຂົ້າສານ ແລະ ມຸ່ງໄປເຖິງການສ້າງເຄື່ອງໝາຍເຂົ້າສານ, ຄາດວ່າໃນໄຕມາດທີ 1 ຂອງປີ 2016 ຈະມີແຜນການລະອຽດ. ນີ້ແມ່ນບັນດາປັດໄຈເພື່ອນຳບັນດາວິສາຫະກິດຂອງສະຫະສະມາຄົມກ້າວຂຶ້ນແນໃສ່ນຳພາຕະຫຼາດເຂົ້າສານ ຫວຽດນາມ ໃນໄລຍະຈະມາເຖິງ.”
ດ້ານອື່ນ, ບັນດາວິສາຫະກິດສົ່ງອອກເຂົ້າສານກໍ່ປາດຖະໜາຢາກໃຫ້ບັນດາທີ່ປຶກສາດ້ານການຄ້າ ປະຈຳຕ່າງປະເທດໜູນຊ່ວຍດ້ານຂໍ້ມູນຂ່າວກ່ຽວກັບຕະຫຼາດ, ກະຊວງອຸດສາຫະກຳ - ການຄ້າເພີ່ມທະວີການໜູນຊ່ວຍຊາວກະສິກອນ ແລະ ວິສາຫະກິດໃນການຍົກສູງເຕັກໂນໂລຢີຜະລິດປຸງແຕ່ງ, ພິເສດແມ່ນການລົງທຶນກໍ່ສ້າງຫ້ອງທົດລອງບັນລຸມາດຕະຖານສາກົນຢູ່ເຂດທົ່ງພຽງແມ່ນຳ້ຂອງ. ທ່ານ ຫງວຽນຈູງກຽນ, ປະທານສະພາບໍລິຫານບໍລິສັດຫຸ້ນສ່ວນ Gentraco, ສະເໜີວ່າ:
“ສະເໜີໃຫ້ສະຫະສະມາຄົມສະບຽງອາຫານ ແລະ ບັນດາທີ່ປຶກສາການຄ້າ ສືບຕໍ່ໜູນຊ່ວຍວິສາຫະກິດດ້ານຂໍ້ມູນຂ່າວກ່ຽວກັບບັນດານະໂຍບາຍ, ການຄຸ້ມຄອງຄຸນນະພາບ, ຫຼັກອະນາໄມທັນຍາຫານ, ການກວດກາພືດ, ວິວັດທະນາການ TPP ສຳລັບເຂົ້າສານ, ນະໂຍບາຍພາສີ. ການໜູນຊ່ວຍວິສາຫະກິດກ່ຽວກັບການຂັດແຍ້ງດ້ານການຄ້າ, ບັນດາຮົ້ວກີດຂວາງດ້ານເຕັກນິກ”
ສະຫະສະມາຄົມສະບຽງອາຫານ ແລະ ບັນດາວິສາຫະກິດສົ່ງອອກເຂົ້າສານລ້ວນແຕ່ຖືວ່າ: ເພື່ອຍົກສູງມູນຄ່າຂອງເຂົ້າສານ, ສົ່ງອອກເຂົ້າສານເຂົ້າບັນດາຕະຫຼາດຕ້ອງການ, ຄຸນນະພາບຊາວກະສິກອນ, ວິສາຫະກິດ ແລະ ບັນດາກະຊວງ, ຂະແໜງການກ່ຽວຂ້ອງຕ້ອງຍູ້ໄວການສ້າງວິວັດທະນາການສ້າງເຄື່ອງໝາຍການຄ້າໃຫ້ເຂົ້າສານ ຫວຽດນາມ. ນີ້ກໍ່ແມ່ນມາດຕະການພື້ນຖານເພື່ອໃຫ້ເຂົ້າສານ ຫວຽດນາມ ພັດທະນາຕາມທິດໝັ້ນຄົງ ແລະ ມີປະສິດທິຜົນ.