(vovworld)- ໃນຊຸມປີມໍ່ໆມານີ້, ຍາມໃດຫວຽດນາມກໍຢືນອັນດັບ 1 ຂອງໂລກກ່ຽວກັບການຜະລິດ ແລະ ສົ່ງອອກໝາກພິກໄທ. ເຖິງຢ່າງໃດກໍຕາມ, ລາຄາ ໝາກພິກໄທສົ່ງອອກຂອງຫວຽດນາມ ຕຳ່ກວ່າເມື່ອທຽບໃສ່ປະເທດຈຳນວນຫນຶ່ງ, ຍ້ອນຂອດຈັດສັນທີ່ດິນປູກຝັງ ແລະ ປຸງແຕ່ງໝາກພິກໄທ ບໍ່ທັນຄົບຊຸດ. ຄຽງຄູ່ກັນນັ້ນ ການສ້າງເຄື່ອງໝາຍໝາກພິກໄທ ບໍ່ທັນໄດ້ຮັບຄວາມເອົາໃຈໃສ່ຫລາຍປານໃດ. ຕໍ່ຫນ້າສະພາບການດັ່ງກ່າວ, ຫວຽດນາມ ພວມຍູ້ແຮງການສ້າງເຄື່ອງໝາຍການຄ້າໃຫ້ໝາກພິກໄທເພື່ອຈຸດໝາຍສົ່ງອອກໝາກພິກໄທແບບຍືນຍົງ.
ສວນປູກໝາກພິກໄທຢູ່ຫວຽດນາມ
ພາບ:internet
|
ຄວາມຈິງແລ້ວ, ຄຸນນະພາບ ໝາກພິກໄທຂອງຫວຽດນາມໃນຊຸມປີມໍ່ໆມານີ້ນັບມື້ນັບໄດ້ຮັບການປົວແປງ. ໃນຮອບເວລາ 5 ປີມານີ້, ສະເລ່ຍແຕ່ລະປີ, ຫວຽດນາມ ສົ່ງອອກ ໝາກພິກໄທ ບັນລຸແຕ່ 800 ລ້ານເຖິງ 1 ຕື້ USD. ຕະຫລາດສົ່ງອອກ ໝາກພິກໄທ ຫວຽດນາມ ໄດ້ຮັບການເປີດກວ້າງຢ່າງລຽນຕິດ. ໃນ 10 ປີມານີ້, ໝາກພິກໄທ ຫວຽດນາມ ຖືກສົ່ງໄປຂາຍຢູ່ 80 ປະເທດ ແລະ ເຂດແຄ້ວນໃນໂລກ. ປີ 2012, ໝາກພິກໄທ ແມ່ນຫນຶ່ງໃນບັນດາຜະລິດຕະພັນກະເສດຫວຽດນາມທີ່ບັນລຸວົງເງິນສົ່ງອອກສູງ, ບັນລຸ 810 ລ້ານ USD. ແຕ່ຕົ້ນປີ 2013 ມາຮອດປະຈຸບັນ ຫວຽດນາມ ສົ່ງອອກໝາກພິກໄທໄດ້ກວ່າ 38.000 ໂຕນ ດ້ວຍຍອດວົງເງິນສົ່ງອອກບັນລຸກວ່າ 254 ລ້ານ USD(ເພີ່ມຂຶ້ນ 20% ເມື່ອທຽບໃສ່ໄລຍະດຽວກັນຂອງປີກາຍ). ປະຈຸບັນ ໝາກພິກໄທ ສົ່ງອອກຂອງຫວຽດນາມ ພວມມີກາລະໂອກາດ, ຍ້ອນກວມອັດຕາສ່ວນສົ່ງອອກໃຫຍ່, ສະນັ້ນ ອາດຈະຕັດສິນຊີ້ຂາດລາຄາໝາກພິກໄທໃນຕະຫລາດໂລກໄດ້. ທ່ານ ໂດຮ່ານາມ, ປະທານສະມາຄົມໝາກພິກໄທ ຫວຽດນາມ ໃຫ້ຮູ້ວ່າ:
“ອາດຈະເວົ້າໄດ້ວ່າ ການສົ່ງອອກ ໝາກພິກໄທຫວຽດນາມ ໄດ້ມີບາດກ້າວພັດທະນາຢ່າງວ່ອງໄວ, ຈາກປະເທດບໍ່ມີຊື່ໃນແຜນທີ່ສົ່ງອອກຂອງໂລກ, ປະຈຸບັນຫວຽດນາມກວມອັດຕາສ່ວນສົ່ງອອກໝາກພິກໄທເກືອບ 50% ແລະ ມີຈຸດຢືນສຳຄັນໃນຕະຫລາດທົ່ວໂລກ. ທຸກປະເທດສົ່ງອອກໝາກພິກໄທ ລ້ວນແຕ່ອີງໃສ່ຫວຽດນາມເພື່ອຂາຍຕາມລາຄາຂອງຫວຽດນາມ.”
ເຖິງວ່າບັນລຸໄດ້ປະລິມານການສົ່ງອອກຫລາຍສົມຄວນກໍຕາມ, ແຕ່ວິວັດການສົ່ງອອກ ໝາກພິກໄທຂອງຫວຽດນາມໃນໄລຍະຜ່ານມາສະແດງໃຫ້ເຫັນວ່າບໍ່ເປັນປົກກະຕິ. ຫນຶ່ງໃນບັນດາຂໍ້ຄົງຄ້າງຕົ້ນຕໍ ນັ້ນແມ່ນ ການຮ່ວມສຳພັນລະຫວ່າງຜູ້ຜະລິດ, ລະບົບເກັບຊື້ຂອງຕົວແທນຈຳຫນ່າຍ ແລະ ບັນດາວິສາຫະກິດປຸງແຕ່ງ ໝາກພິກໄທບໍ່ທັນໄດ້ຮັບຄວາມເອົາໃຈໃສ່. ຄວາມກ້າວຫນ້າດ້ານເຕັກນິກກ່ຽວກັບແນວພັນປູກ, ຜົນລະປູກ, ເກັບກ່ຽວ, ປຸງແຕ່ງ ໝາກພິກໄທບໍ່ທັນໄດ້ໝູນໃຊ້ຢ່າງຄົບຊຸດ ສະນັ້ນ ໄດ້ສົ່ງຜົນສະທ້ອນເຖິງການພັດທະນາແບບຍືນຍົງຂອງອາຊີບປູກໝາກພິກໄທເພື່ອສົ່ງອອກ. ຄຽງຄູ່ກັນນັ້ນ ລະບົບຈຳຫນ່າຍ ໝາກພິກໄທຢູ່ບັນດາສວນປູກ ໝາກພິກໄທ ສ່ວນຫລາຍແມ່ນອີງໃສ່ພໍ່ຄ້າຊາວຂາຍ, ເຮັດໃຫ້ລາຄາບໍ່ເປັນປົກກະຕິ. ສະນັ້ນເພື່ອໃຫ້ ໝາກພິກໄທພັດທະນາແບບຍືນຍົງ, ຄວນແກ້ໄຂບັນຫາເຕັກນິກກໍຄືຕະຫລາດຈຳຫນ່າຍຜະລິດຕະພັນໂດຍໄວ. ທ່ານ ຫງວຽນບາທີ້ງ, ເຈົ້າຂອງຮາກຖານປູກໝາກພິກໄທ ຢູ່ເມືອງ ຈືເຊ ແຂວງ ດັກລັກ ໃຫ້ຮູ້ວ່າ:
“ຖ້າຫາກວິສາຫະກິດ, ບັນດາພໍ່ຄ້າຊາວຂາຍເກັບຊື້ ໝາກພິກໄທບໍ່ສະໝຳ່ສະເຫມີ, ບໍ່ຮັບປະກັນມາດຕະຖານເພື່ອສົ່ງອອກ ຈະເຮັດໃຫ້ລາຄາໝາກພິກໄທຫລຸດລົງ ພ້ອມທັງຊື່ສຽງເຄື່ອງໝາຍໝາກພິກໄທຫວຽດນາມ ຖືກຜົນສະທ້ອນ. ສະນັ້ນ ພວກຂ້າພະເຈົ້າປາດຖະຫນາວ່າ ຊາວກະສິກອນຜະລິດໄດ້ເທົ່າໃດວິສາຫະກິດມາເກັບຊື້ ຕ້ອງມີການຫຸ້ມຫໍ່ແລະມີຫນັງສືຢັ້ງຢືນໃຫ້ແກ່ບັນດາຄອບຄົວບັນລຸມາດຕະຖານ, ເວລານັ້ນ ໝາກພິກໄທຂອງພວກຂ້າພະເຈົ້າຈື່ງມີຄຸນຄາາສູງກວ່າ.”
ສະເລ່ຍແຕ່ລະປີ, ຫວຽດນາມ ສົ່ງອອກ ໝາກພິກໄທ ບັນລຸແຕ່
800 ລ້ານເຖິງ 1 ຕື້ USD
ພາບ:internet
|
ເພື່ອແກ້ໄຂບັນຫານີ້, ສະຫະສະມາຄົມ ໝາກພິກໄທ ເມືອງຈືເຊ ໄດ້ສ້າງຕັ້ງສູນເຊື່ອມຕໍ່ລະຫວ່າງຊາວກະສິກອນຜະລິດໝາກພິກໄທເພື່ອຂາຍໂດຍກົງໃຫ້ແກ່ວິສາຫະກິດປຸງແຕ່ງ ຫາກບໍ່ຕ້ອງຜ່ານພໍ່ຄ້າຊາວຂາຍ, ຕົວແທນຈຳຫນ່າຍ, ຈາກນັ້ນຈຶ່ງຄວບຄຸມລາຄາ ແລະ ຕົ້ນກຳເນີດໄດ້. ຕາມສະຫະສະມາຄົມໝາກພິກໄທ ຫວຽດນາມ ແລ້ວ, ນີ້ແມ່ນວິທີດີຕ້ອງທະວີຄູນ. ມາຮອດປະຈຸບັນ, ສະຫະສະມາຄົມ ໝາກພິກໄທ ຫວຽດນາມ ໄດ້ເລືອກເຟັ້ນ 2 ຜະລິດຕະພັນ ໝາກພິກໄທ ນັ້ນແມ່ນ ໝາກພິກໄທ ຟູກວກ ແລະ ຈືເຊ ເພື່ອໂຄສະນາເຄື່ອງໝາຍການຄ້າ. ລັດຖະບານກໍໄດ້ອະນຸມັດອຸດຫນູນລາຍຈ່າຍຈຳນວນຫນຶ່ງໃຫ້ແກ່ການເຄື່ອນໄຫວສົ່ງເສີມການຄ້າ. ສະຫະສະມາຄົມໄດ້ຈັດຕັ້ງໃຫ້ບັນດາສະມາຊິກລົງສຳຫລວດ, ສຳພັດໂດຍກົງກັບບັນດາຕະຫລາດນຳເຂົ້າໃຫຍ່ຢູ່ ດູບາຍ ແລະ ສະຫະພາບເອີລົບ (EU). ທ່ານ ໂດຮ່ານາມ, ປະທານສະຫະສະມາຄົມ ໝາກພິກໄທ ຫວຽດນາມ ຖືວ່າ: ຢາກຮັກສາຕະຫລາດແບບຍືນຍົງ, ຫວຽດນາມ ຕ້ອງສ້າງຍຸດທະສາດພັດທະນາຢ່າງຄົບຊຸດ, ຈາກບັນດາອົງການກ່ຽວຂ້ອງ, ຄອບຄົວຊາວກະສິກອນປູກ ໝາກພິກໄທຕະຫລອດຮອດບັນດາບໍລິສັດປຸງແຕ່ງ, ສົ່ງອອກ.
“ເພື່ອຜັນຂະຫຍາຍມາດຕະການຊື່ງພວກເຮົາໄດ້ວາງອອກ ກ່ອນອື່ນໝົດພວກເຮົາຕ້ອງຈັດຕັ້ງການໂຄສະນາ, ທຳອິດແມ່ນສ້າງຫນ່ວຍຈຳຫນ່າຍໝາກພິກໄທ ຢູ່ບັນດາທ້ອງຖິ່ນ, ໂຄສະນາຫນັງສືແນະນຳຂອງບັນດານັກວິທະຍາສາດ, ອົງການກວດກາຄຸນນະພາບ ເຮັດແນວໃດເພື່ອໃຫ້ຊາວກະສິກອນເຫັນໄດ້ວ່າ ສ້າງສວນ ໝາກພິກໄທແບບຍືນຍົງຈຶ່ງມີຕະຫລາດສ່ົງອອກແບບຍືນຍົງໄດ້.”
ເພື່ອສ້າງເຄື່ອງໝາຍສົ່ງອອກ ໝາກພິກໄທ ແບບຍືນຍົງ, ຂະແຫນງ ໝາກພິກໄທ ພວມເອົາໃຈໃສ່ປັບປຸງ ແລະ ສ້າງບັນດາເຂດຜະລິດໝາກພິກໄທ, ມີຫນັງສືຢັ້ງຢືນຕົ້ນກຳເນີດ ແລະ ຕ້ອງໝັ້ນໝາຍຮັບປະກັນມາດຕະຖານຄວາມປອດໄພ ທີ່ໄດ້ກຳນົດຂອງອົງການສາກົນ. ດ້ວຍບັນດາມາດຕະການທັງມີລັກສະນະແທດຈິງ, ຍາວນານ, ຂະແຫນງ ໝາກພິກໄທ ຫວຽດນາມ ພວມວາງອອກຈຸດໝາຍພັດທະນາແບບຍືນຍົງ, ໃນນັ້ນ ການສ້າງເຄື່ອງໝາຍການຄ້າເພື່ອໃຫ້ຂະແຫນງໝາກພິກໄທ ຫວຽດນາມ ບໍ່ພຽງແຕ່ຮັກສາປະເທດນຳຫນ້າໃນການສົ່ງອອກໝາກພິກໄທເທົ່ານັ້ນ ຫາກສິ່ງສຳຄັນແມ່ນນຳມາເຊິ່ງປະສິດທິຜົນດ້ານເສດຖະກິດ, ປະກອບສ່ວນຍົກສູງຊີວິດການເປັນຢູ່ໃຫ້ແກ່ປະຊາຊົນອີກດ້ວຍ.