ມະຕິເລກທີ 35 ຂອງລັດຖະບານໄດ້ກຳນົດຄາດໝາຍຮອດປີ 2020, ວິສາຫະກິດຫວຽດນາມ ມີກຳລັງແກ່ງແຍ້ງ, ພັດທະນາແບບຍືນຍົງ ແລະ ໃນທົ່ວປະເທດມີວິສາຫະກິດເຄື່ອນໄຫວຢ່າງໜ້ອຍສຸດແມ່ນ 1 ລ້ານແຫ່ງ, ໃນນັ້ນມີບັນດາວິສາທີ່ມີຂອບຂະໜາດໃຫຍ່, ມີແຫຼ່ງກຳລັງເຂັ້ມແຂງ. ເພື່ອບັນລຸໄດ້ຄາດໝາຍນີ້, ມະຕິກໍຍົກອອກບາງໜ້າທີ່ ແລະ ມາດຕະການແກ້ໄຂ, ໃນນັ້ນມາດຕະການແກ້ໄຂທຳອິດແມ່ນການປະຕິຮູບລະບຽບບໍລິຫານ, ສ້າງຄວາມສະດວກໃຫ້ວິສາຫະກິດ; ສ້າງສະພາບແວດລ້ອມ ສະດວກເພື່ອໜູນຊ່ວຍວິສາຫະກິດປະກອບອາຊີບ, ວິສາຫະກິດມີການປ່ຽນໃໝ່ຢ່າງມີຫົວຄິດປະດິດສ້າງ; ຮັບປະກັນສິດດຳເນີນທຸລະກິດ, ສິດສະເໝີພາບໃນການສຳຜັດກັບບັນດາແຫຼ່ງກຳລັງ ແລະ ກາລະໂອກາດດຳເນີນທຸລະກິດ; ຫຼຸດຜ່ອນລາຍຈ່າຍດຳເນີນທຸລະກິດໃຫ້ວິສາຫະກິດ; ປົກປ້ອງສິດ ແລະ ຜົນປະໂຫຍດອັນຊອບທຳຂອງວິສາຫະກິດ. ຈຸດທີ່ເປັນໜ້າສົນໃຈນັ້ນແມ່ນ, ເປັນຄັ້ງທຳອິດໃນມະຕິ, ລັດຖະບານໄດ້ຢັ້ງຢືນວ່າ ວິສາຫະກິດພາກເອກະຊົນແມ່ນກຳລັງໜູນເພື່ອພັດທະນາເສດຖະກິດ. ມີຈຸດໃໝ່ໜຶ່ງອີກນັ້ນແມ່ນ ລັດຖະບານໄດ້ຮຽກຮ້ອງສ້າງແຜນການສຳຫຼວດກວດກາ ແລະ ກວດສອບວິສາຫະກິດຢ່າງເປີດເຜີຍ, ຫຼີິກລ້ຽງບໍ່ໃຫ້ຊ້ອນກັນ; ວຽກງານກວດກາມີແຕ່ປະຕິບັດປີລະເທື່ອໜຶ່ງເທົ່ານັ້ນ, ພິເສດແມ່ນການປະຕິຮູບດ້ານການບໍລິຫານໃນຂົງເຂດພາສີອາກອນ. ທ່ານນາງ ຫງວຽນທິກຸກ, ສະພາທີ່ປຶກສາດ້ານພາສີອາກອນ ຫວຽດນາມ ແບ່ງປັນວ່າ.
“ປະຈຸບັນ, ຂະແໜງພາສີອາກອນໄດ້ມີການປະຕິຮູບຫຼາຍທີ່ສຸດກ່ຽວກັບບັນດາຂັ້ນຕອນ, ໂດຍສະເພາະແມ່ນວຽກງານນຳໃຊ້ເຕັກໂນໂລຊີຂໍ້ມູນຂ່າວສານ, ຍ້ອນແນວນັ້ນຈຶ່ງຫຼຸດຜ່ອນການພົບປະໂດຍກົງລະຫວ່າງຜູ້ເສຍພາສີ ແລະ ອົງການພາສີອາກອນ. ເຖິງຢ່າງໃດກໍ່ຕາມ, ຂະແໜງພາສີອາກອນຕ້ອງມີບັນດາມາດຕະການເພື່ອປັບປຸງບັນດາຂັ້ນຕອນ ໂດຍສະເພາະແມ່ນວຽກງານກໍ່ສ້າງພະນັກງານພາສີອາກອນໃຫ້ມີຄວາມຊຳນານ ນັບທັງດ້ານວິຊາຊີບ ແລະ ວັດທະນະທຳໃນການປະພຶດ ແລະ ຈັນຍາບັນອາຊີບອີກ. ຂ້າພະເຈົ້າເຊື່ອໝັ້ນວ່າ, ດ້ວຍຄວາມມານະພະຍາຍາມນຳໃຊ້ເຕັກໂນໂລຊີຂໍ້ມູນຂ່າວສານເຂົ້າໃນການຄຸມຄອງພາສີອາກອນ, ບັນດາວິສາຫະກິດຈະສະໜັບສະໜູນການປ່ຽນແປງ, ການປະຕິຮູບນະໂຍບາຍຂອງລັດຖະບານ, ໃນນັ້ນມີຂະແໜງອາກອນ ແລະ ພາສີ”.
ເພື່ອແກ້ໄຂຄວາມຫຍຸ້ງຍາກໃຫ້ວິສາຫະກິດຢ່າງທັນການນັ້ນ, ລັດຖະບານໄດ້ຮຽກຮ້ອງໃຫ້ບັນດາກະຊວງ, ຂະແໜງການທີ່ກ່ຽວຂ້ອງຄົ້ນຄວ້າ, ສະເໜີຫຼຸດຜ່ອນອາກອນລາຍຮັບສ່ວນຕົວລົງ 50% ໃນບາງຂົງເຂດ; ພິຈາລະນາສະເໜີຕໍ່ສະພາແຫ່ງຊາດ ຮັບຮອງເອົາຮ່າງມະຕິແກ້ໄຂຄວາມຫຍຸ້ງຍາກກ່ຽວກັບດ້ານພາສີອາກອນໃຫ້ວິສາຫະກິດໃນປີ 2016; ແກ້ໄຂໜີ້ຍ້ອນເສຍພາສີອາກອນຊ້າໃຫ້ບັນດາວິສາຫະກິດທີ່ປະສົບກັບຄວາມຫຍຸ້ງຍາກຍ້ອນສາຍເຫດພາວະວິໄສ; ຄົ້ນຄວ້າ, ສະເໜີຫຼຸດຜ່ອນອັດຕາພາສີອາກອນ, ອາກອນລາຍຮັບວິສາຫະກິດໃຫ້ວິສາຫະກິດຂະໜາດກາງ ແລະ ນ້ອຍ. ຫຼຸດຜ່ອນ ແລະ ຫັນລະບຽບການບໍລິການເປັນມາດຖານ ໃນສະພາບເຊື່ອມໂຍງ.
ທີ່ການພົບປະກັບວິສາຫະກິດຫວ່າງມໍ່ໆມານີ້ຢູ່ນະຄອນໂຮ່ຈິມິນ, ທ່ານນາຍົກລັດຖະມົນຕີ ຫງວຽນຊວນຟຸກ ກໍຊີ້ແຈ້ງວ່າ: ວິສາຫະກິດທັງໝົດ ໂດຍບໍ່ຈຳແນກຂອບຂະໜາດ, ຮູບແບບ (ຍົກເວັ້ນບາງວິສາຫະກິດປ້ອງກັນຊາດ, ປ້ອງກັນຄວາມສະຫງົບ), ພາກສ່ວນເສດຖະກິດລ້ວນແຕ່ມີຄວາມສະເໝີພາບໃນການສຳຜັດກັບແຫຼ່ງກຳລັງຄື ແຫຼ່ງທຶນ, ຊັບພະຍາກອນ, ທີ່ດິນ, ລັດຈະປົກປ້ອງສິດຜົນປະໂຫຍດອັບຊອບທຳຮັບປະກັນສິດດຳເນີນທຸລະກິດຂອງວິສາຫະກິດ ຕາມຂໍ້ກຳນົດຂອງກົດໝາຍ, ວິສາຫະກິດໄດ້ເຄື່ອນໄຫວດຳເນີນທຸລະກິດດ້ວຍທຸກຮູບການ, ຂົງເຂດເຊິ່ງກົດໝາຍບໍ່ຫ້າມ. ລັດກໍ່ຮັບປະກັນສະຖຽນລະພາບຍາວນານຂອງນະໂຍບາຍ ເພື່ອໃຫ້ວິສາຫະກິດມີຄວາມອຸ່ນອ່ຽງໃຈລົງທຶນ. ແບ່ງປັນກ່ຽວກັບທັດສະນະນີ້, ທະນາຍຄວາມ ຟ້າມຫງອກຮຸ່ງ, ສະມາຊິກສະຫະສະມາຄົມວິສາຫະກິດຫວຽດນາມ ຖືວ່າ.
“ວິສາຫະກິດພາກເອກະຊົນໄດ້ເຮັດທຸກສິ່ງເຊິ່ງລັດບໍ່ຫ້າມ. ເມື່ອທຸກຄົນມີເງິນລົງທຶນດຳເນີນທຸລະກິດ, ເຖິງວ່າດຳເນີນທຸລະກິດຂະໜາດໜ້ອຍ ຫຼື ໃຫຍ່ກໍ່ແມ່ນເລື່ອງຂອງວິສາຫະກິດ, ສ່ວນເງິນຂອງລັດລົງທຶນເຂົ້າຂົງເຂດໃດ ເຊິ່ງລັດວິສາຫະກິດກຳນົດຕາມນະໂຍບາຍຂອງລັດເພື່ອປະຊາຊົນ. ລັດຕ້ອງການລົງທຶນ, ວິສາຫະກິດພາກເອກະຊົນພຽງໄດ້ປະຕິບັດສິ່ງທີ່ລັດອະນຸຍາດເທົ່ານັ້ນ. ມີ 2 ເສັ້ນທາງທີ່ແຕກຕ່າງກັນນັ້ນແມ່ນ: ວິສາຫະກິດພາກເອກະຊົນມີສິດດຳເນີນທຸລະກິດສິ່ງທີ່ລັດບໍ່ຫ້າມ, ສ່ວນລັດວິສາຫະກິດ ພຽງມີສິດເຮັດສິ່ງໃດທີ່ລັດອະນຸຍາດເທົ່ານັ້ນ. ສິ່ງນີ້ກໍ່ບໍ່ຂັດແຍ່ງກັນໃນພື້ນຖານເສດຖະກິດການຕະຫຼາດ”.
ລັດຖະບານຈະສືບຕໍ່ສ້າງບັນດານະໂຍບາຍ ເພື່ອຫຼຸດຜ່ອນລາຍຈ່າຍໃຫ້ວິສາຫະກິດຢ່າງແຮງ. ລັດຖະບານກໍມີລາຍການບຸລິມະສິດໃຫ້ວິສາຫະກິດຂະໜາດກາງ ແລະ ນ້ອຍເຂົ້າຮ່ວມລະບົບຜະລິດ; ສ້າງກົນໄກພັດທະນາຊ່ອງແຈກຢ່າຍ; ສ້າງກົນໄກສົ່ງເສີມການພັດທະນາບັນດາກຸ່ມອຸດສາຫະກຳທີ່ມີພື້ນຖານຢ່າງພຽງພໍໃຫ້ແກ່ວິສາຫະກິດຂະໜາດກາງ ແລະ ນ້ອຍ; ຍູ້ແຮງການປະຕິຮູບລະບຽບການບໍລິຫານ, ນຳໃຊ້ເຕັກໂນໂລຊີຂໍ້ມູນຂ່າວສານເຂົ້າໃນການສະໜອງການບໍລິການພາກລັດ. ບັນດາເອກະສານນິຕິກຳຢ່າງຄົບຖ້ວນນີ້ ຈະສ້າງເງື່ອນໄຂສູງສຸດໃຫ້ວິສາຫະກິດຫວຽດນາມ ພັດທະນາ.