(vovworld)- ໂດຍປະຕິບັດແຜນນະໂຍບາຍຂອງລັດຖະບານ ກ່ຽວກັບການສ້າງໂຄງປະກອບເສດຖະກິດຄືນໃຫມ່, ຫວ່າງແລ້ວນີ້ ກະຊວງກະສິກຳ ແລະ ພັດທະນາຊົນນະບົດ ໄດ້ຊີ້ນຳບັນດາຂະແຫນງຜະລິດກະສິກຳ ຮີບເຮັ່ງສ້າງໂຄງປະກອບສະເພາະໃຫ້ແຕ່ລະຂະແຫນງ. ແຜນຮ່າງສ້າງໂຄງປະກອບຄືນໃຫມ່ ແມ່ນສຸມໃສ່ເຂົ້າໃນ 3 ຂະແຫນງຫລັກແຫລ່ງໃນການພັດທະນາກະສິກຳ ນັ້ນແມ່ນ: ການປູກຝັງ, ລ້ຽງສັດ ແລະ ສິນໃນນ້ຳ.
ພາຍຫລັງ 1 ປີແຫ່ງການຜັນຂະຫຍາຍແຜນຮ່າງສ້າງໂຄງປະກອບກະສິກຳຄືນໃຫມ່ໂດຍລັດຖະບານວາງອອກ, ມາຮອດປະຈຸບັນ ມີຫລາຍທ້ອງຖິ່ນພາຍໃນປະເທດ ໄດ້ເລີ່ມຜັນຂະຫຍາຍການສ້າງໂຄງປະກອບກະສິກຳຄືນໃຫມ່ ຕາມທິດຍົກສູງມູນຄ່າເພີ່ມ ແລະ ພັດທະນາແບບຍືນຍົງ. ເພື່ອຫັນແຜນນະໂຍບາຍສ້າງໂຄງປະກອບກະສິກຳຄືນໃຫມ່, ກະຊວງກະສິກຳ ແລະ ພັດທະນາຊົນນະບົດ ຫາກໍ່ປະກາດລາຍການສ້າງໂຄງປະກອບ ການປູກຝັງ, ລ້ຽງສັດ ແລະ ສິນໃນນ້ຳຄືນໃຫມ່ ໂດຍພື້ນຖານເພື່ອໃຫ້ຂະແຫນງກະສິກຳ ແລະ ບັນດາທ້ອງຖິ່ນສ້າງແຜນການດຳເນີນງານລະອຽດ. ນີ້ໄດ້ຮັບຖືວ່າ ແມ່ນການກຳນົດທິດພັດທະນາກະສິກຳຫວຽດນາມ ໃນໄລຍະຈະມາເຖິງ. ທີ່ພິທີປະກາດໂຄງການ, ແຜນການດຳເນີນງານສ້າງໂຄງປະກອບ ການປູກຝັງ, ລ້ຽງສັດ ແລະ ສິນໃນນ້ຳຄືນໃຫມ່, ທ່ານ ກາວດຶກຟາດ, ລັດຖະມົນຕີ ກະຊວງກະສິກຳ ແລະ ພັດທະນາຊົນນະບົດ ຊີ້ແຈ້ງວ່າ:
“ແຜນຮ່າງສ້າງໂຄງປະກອບຄືນໃຫມ່ແມ່ນປ່ຽນແປງວິທີສຳພັດກັບການພັດທະນາຂະແຫນງກະສິກຳ ໂດຍອີງໃສ່ມາດຖານລະອຽດກ່ຽວກັບ 3 ເສົາຄ້ຳພັດທະນາແບບຍືນຍົງຄື: ເສດຖະກິດ, ສັງຄົມ, ສິ່ງແວດລ້ອມ. ຮ່າງແຜນນະໂຍບາຍພັດທະນາການຜະລິດກະສິກຳແມ່ນອີງຕາມສະພາບການຂອງຕະຫລາດ ແລະ ຄວາມຕ້ອງການໃຊ້ສອຍ, ໃນນັ້ນ ລັດຖະບານໄດ້ຫັນບົດບາດຈາກການສະຫນອງໂດຍກົງໄປສູ່ການສ້າງສະພາບແວດລ້ອມແຫ່ງການດຳເນີນທຸລະກິດຢ່າງປອດໃສ ເພື່ອໃຫ້ບັນດາພາກສ່ວນເສດຖະກິດເຄື່ອນໄຫວຢ່າງມີປະສິດທິຜົນໃນການຍົກສູງຄຸນນະພາບການລົງທຶນ ແລະ ບໍລິການໃນຂະແຫນງ. ແຜນຮ່າງກໍໄດ້ວາງອອກສາຍພົວພັນຢ່າງສະໜິດແຫນ້ນລະຫວ່າງ “ລັດ-ວິສາຫະກິດ-ຊາວກະສິກອນ.”
ຈຸດສຸມຂອງໂຄງການ, ແຜນການສ້າງໂຄງປະກອບຄືນໃຫມ່ໃນຂົງເຂດກະສິກຳ ທີ່ປະກາດຫວ່າງແລ້ວນີ້ ແມ່ນຈະສຸມໃສ່ເຂົ້າໃນການສ້າງໂຄງປະກອບ ການປູກຝັງ, ລ້ຽງສັດ ແລະ ສິນໃນນ້ຳຄືນໃຫມ່ ຕາມທິດລົງເລິກ, ມີການເຂົ້າຮ່ວມຢ່າງແຂງແຮງຂອງວິທະຍາສາດເຕັກໂນໂລຊີ. ຈຸດໝາຍວາງອອກ ນັ້ນແມ່ນ ພາຍຫລັງ 10 ປີ, ປະລິມານການຜະລິດກະສິກຳຂອງຫວຽດນາມ ເພີ່ມຂຶ້ນ 20%, ໝາຍຄວາມວ່າ ອັດຕາສ່ວນຄອບຄົວອຶດຫິວທຸກຍາກຈະຫລຸດລົງ 20%. ເນື້ອໃນຂອງໂຄງການສ້າງໂຄງປະກອບຄືນໃຫມ່ ກໍສຸມໃສ່ເຂົ້າໃນບັນດາຂະແຫນງ, ຜະລິດຕະພັນກະສິກຳ ທີ່ຫວຽດນາມ ພວມມີທ່າໄດ້ປຽບຄື: ເຂົ້າ, ກາເຟ, ປາຈາ, ກໍ່ຄືມີລະດັບການພັດທະນາສູງກວ່າ ແລະ ສ້າງບັນດາຜະລິດຕະພັນທີ່ມີເຄື່ອງໝາຍການຄ້າແຫ່ງຊາດ. ຕາມທິດນີ້, ແຜນນະໂຍບາຍຂອງຫວຽດນາມ ແມ່ນສົ່ງເສີມການລົງທຶນພາກເອກະຊົນ ແລະ ລົງທຶນລະຫວ່າງພາກລັດ ແລະ ເອກະຊົນ, ສົມທົບກັບບັນດາອົງການຈັດຕັ້ງສາກົນ ເພື່ອສ້າງບັນດາຂັ້ນຕອນເຕັກນິກ. ໃນນັ້ນ ວິສາຫະກິດພ້ອມກັບລັດ ຫນູນຊ່ວຍຊາວກະສິກອນຜະລິດຕາມຂັ້ນຕອນເຕັກນິກ, ເພື່ອສ້າງບັນດາຜະລິດຕະພັນຮັບປະກັນຄວາມປອດໄພ, ໃຫ້ສະມັດຕະພາບ ແລະ ມູນຄ່າສູງກວ່າ, ຈາກນັ້ນ ສ້າງທ່ວງທ່າເພື່ອໃຫ້ ກະສິກຳພັດທະນາແບບຍືນຍົງ. ເລື່ອງປັບປຸງນະໂຍບາຍກໍໄດ້ຮັບຖືເປັນສຳຄັນ. ທ່ານ ເຈີນບີງຈ້ອງ, ຮອງຫົວຫນ້າສະຖາບັນນະໂຍບາຍ ແລະ ຍຸດທະສາດ ສັງກັດກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຖືວ່າ:
ພາບປະກອບ:internet
|
“ຄວນກຳນົດທິດສ້າງໂຄງປະກອບຄືນໃຫມ່ໃຫ້ຈະແຈ້ງ, ພິເສດ ແມ່ນບັນດານະໂຍບາຍທີ່ຕອບສະຫນອງໃຫ້ແກ່ການສ້າງໂຄງປະກອບຄືນໃຫມ່ສຳລັບແຕ່ລະຂະແຫນງ,ແລະ ຄວນຊີ້ແຈ້ງບັນຫາປະຕິຮູບລະບອບ, ປະຕິຮູບນະໂຍບາຍໃນວິວັດການສ້າງໂຄງປະກອບຄືນໃຫມ່.”
ຕາມແຜນການສ້າງໂຄງປະກອບກະສິກຳຄືນໃຫມ່, ຂະແຫນງປູກຝັງ ຈະສົມທົບກັບບັນດາຂະແຫນງ ແລະ ທ້ອງຖິ່ນ ດຳເນີນການວາງແຜນກຳນົດບັນດາເຂດຜະລິດແນວພັນປູກເປັນຈຸດສຸມ, ສ້າງບັນດາເຂດປູກຕົ້ນໄມ້ເພື່ອປຸງແຕ່ງທີ່ມີຂອບຂະຫນາດໃຫຍ່, ບົນພື້ນຖານໂຮມເນື້ອທີ່ນາເປັນຂະຫນາດໃຫຍ່ ແລະ ກໍ່ສ້າງລະບົບຄົມມະນາຄົມ, ຊົນລະປະທານ, ຕາຫນ່າງໄຟຟ້າໃຫ້ສຳເລັດ, ເພື່ອສ້າງບັນດາເຂດຜະລິດສິນຄ້າເປັນຈຸດສຸມ, ສາມາດນຳໃຊ້ບັນດາມາດຕະການເຕັກໂນໂລຊີກ້າວຫນ້າ. ແຜນການສັງລວມນັ້ນ ຕ້ອງບຸລິມະສິດລົງທຶນໃຫ້ແກ່ບັນດາເຂດພາກທີ່ສ້າງບັນດາຜະລິດກະສິກຳ ແລະ ຜະລິດປຸງແຕ່ງຕົ້ນຕໍຄື: ກາເຟ, ໝາກພິກໄທ, ໝາກມ່ວງຫິມະພານ, ຊາ, ຕົ້ນໄມ້ກິນໝາກ ຢູ່ເຂດໄຕງວຽນ, ພາກກາງ, ເຂດພູດອຍທາງພາກເຫນືອ.
ໃນໂຄງການສ້າງໂຄງປະກອບກະສິກຳຄືນໃຫມ່, ຂະແຫນງລ້ຽງສັດ ຈະປະຕິບັດການກວດກາຄືນບັນດາເຂດລ້ຽງສັດຢູ່ບັນດາແຂວງ. ບັນດາຮາກຖານ, ຟາມລ້ຽງສັດຕ້ອງວາງແຜນກຳນົດຕິດພັນກັບບັນດາຮາກຖານຜະລິດປຸງແຕ່ງ, ຕະຫລາດຈຳຫນ່າຍ ແລະ ຕ້ອງສ້າງບັນດາເຂດລ້ຽງສັດປອດໄພ, ຮັບປະກັນວຽກງານປ້ອງກັນຕ້ານໂລກລະບາດ. ບັນດາຮູບແບບລ້ຽງສັດກໍຕ້ອງຕິດພັນກັບຕົ້ນກຳເນີດຂອງຜະລິດຕະພັນລ້ຽງສັດ.
ການສົ່ງອອກສິນໃນນ້ຳແມ່ນຫນຶ່ງໃນບັນດາຂົງເຂດມີຄວາມສາມາດບົ່ມຊ້ອນຫລາຍຢ່າງ ແລະ ທ່າແຮງຂອງຫວຽດນາມ, ເພາະສະນັ້ນ ໃນໂຄງການດຳເນີນງານສ້າງໂຄງປະກອບຂະແຫນງສິນໃນນ້ຳຄືນໃຫມ່ຄັ້ງນີ້ ບັນຫາໄດ້ຮັບຄວາມສົນໃຈທີ່ສຸດ ແມ່ນຂອດວາງແຜນກຳນົດ. ຕາມໂຄງການແລ້ວ, ຂະແຫນງສິນໃນນ້ຳ ຈະສ້າງນະໂຍບາຍກ່ຽວກັບການຄຸ້ມຄອງສິນໃນນຳ້ແຄມທະເລ, ນະໂຍບາຍດຶງດູດແຫລ່ງທຶນ ແລະ ກອງທຶນສ້າງແຫລ່ງຜົນປະໂຫຍດສິນໃນນ້ຳຄືນໃຫມ່ໃຫ້ສົມບູນແບບ, ພິເສດ ຈະສຳຫລວດກວດກາແຜນການລ້ຽງສິນໃນນ້ຳ. ພ້ອມກັນນັ້ນ ຂະແຫນງຈະດຳເນີນການປັບປຸງ, ສຳຫລວດກວດກາແຜນການຂຸດຄົ້ນສິນທະເລ. ໃນການລ້ຽງສິນໃນນ້ຳ ຈະຍູ້ແຮງການນຳໃຊ້ເຕັກໂນໂລຊີສູງ, ເຕັກໂນໂລຊີປຸງແຕ່ງສິນໃນນ້ຳຕາມມາດຕະຖານສາກົນ.
ມາຮອດປະຈຸບັນ ພາຍຫລັງ 1 ປີແຫ່ງການປະຕິບັດແຜນຮ່າງ ຂອງລັດຖະບານ ກ່ຽວກັບການສ້າງໂຄງປະກອບຂະແຫນງກະສິກຳຄືນໃຫມ່, ໄດ້ມີເກືອບ 50% ຈຳນວນແຂວງ, ນະຄອນ ຢູ່ ຫວຽດນາມ ມີແຜນການສ້າງໂຄງປະກອບຂະແຫນງກະສິກຳຢູ່ທ້ອງຖິ່ນຄືນໃຫມ່. ເລື່ອງກະຊວງກະສິກຳ ແລະ ພັດທະນາຊົນນະບົດ ປະກາດແຜນການສ້າງໂຄງປະກອບ ການປູກຝັງ, ລ້ຽງສັດ ແລະ ສິນໃນນ້ຳຄືນໃຫມ່ ແມ່ນບາດກ້າວຫັນໂຄງການສັງລວມສ້າງໂຄງປະກອບພື້ນຖານເສດຖະກິດເປັນລະອຽດ, ສ້າງປະຖົມປັດໄຈເພື່ອໃຫ້ພື້ນຖານກະສິກຳຫວຽດນາມ ພັດທະນາຢ່າງມີປະສິດທິຜົນ ແລະ ຍືນຍົງ.