(vovworld)- ມາຮອດປະຈຸບັນ, ຫວຽດນາມ ຍັງຄົງແມ່ນຫນື່ງໃນບັນດາປະເທດນຳຫນ້າໂລກ ກ່ຽວກັບການສົ່ງອອກປາຈາ. ເຖິງຢ່າງໃດກໍຕາມ, ບັນດາການຜັນແປຂອງຕະຫລາດໂລກໃນໄລຍະຜ່ານມາ, ພ້ອມກັບຄວາມຫຍຸ້ງຍາກພາຍໃນປະເທດ ໄດ້ເຮັດໃຫ້ຂະແຫນງປາຈາ ພັດທະນາບໍ່ປົກກະຕິ. ເພື່ອຕອບສະຫນອງຄວາມຮຽກຮ້ອງຕ້ອງການພັດທະນາ, ຂະແຫນງປາຈາ ຫວຽດນາມ ພວມວາງຫນ້າທີ່ເພີ່ມທະວີວຽກງານຄຸ້ມຄອງ ແລະ ປັບປຸງໃນທຸກຂັ້ນຕອນ ເພື່ອຮັບປະກັນຜົນປະໂຫຍດຂອງຜູ້ລ້ຽງປາ ແລະ ວິສາຫະກິດ, ພ້ອມທັງເອົາໃຈໃສ່ເຖິງຄຸນນະພາບຜະລິດຕະພັນ ເພື່ອຕອບສະຫນອງຄວາມຮຽກຮ້ອງຕ້ອງການຢ່າງເຂັ້ມງວດຂອງຕະຫລາດ. ບົດຂຽນຂອງນັກຂ່າວ ແທງຕຸງ ທີ່ມີຫົວຂໍ້ວ່າ: ສ້າງໂຄງປະກອບຂະແຫນງຜະລິດປາຈາຄືນໃຫມ່
ປີ 2013, ການສົ່ງອອກປາຈາຂອງຫວຽດນາມ ບັນລຸ 1,8 ຕື້ USD
photo:internet
|
ປາຈາ ແມ່ນຫນື່ງໃນບັນດາປະເພດສິນຄ້າສົ່ງອອກ ມີຄວາມສາມາດບົ່ມຊ້ອນຫລາຍຢ່າງຂອງຫວຽດນາມ. ປີ 2013, ການສົ່ງອອກປາຈາຂອງຫວຽດນາມ ບັນລຸ 1,8 ຕື້ USD ແລະ ໄລ່ມາຮອດທ້າຍເດືອນ 4 ຜ່ານມາ, ມູນຄ່າສົ່ງອອກປາຈາ ກໍບັນລຸ 546 ລ້ານ USD. ປະຈຸບັນ, ປາຈາ ຂອງຫວຽດນາມ ຖືກສ່ົງໄປຂາຍຢູ່ 149 ປະເທດ ແລະ ເຂດແຄ້ວນໃນໂລກ ແລະ ກວມເອົາປະມານ 26% ໃນຍອດຈຳນວນມູນຄ່າສົ່ງອອກສິນໃນນ້ຳ. ເຖິງຢ່າງໃດກໍຕາມ, ມາຮອດປະຈຸບັນ, ການຜະລິດ ແລະ ຈຳຫນ່າຍປາຈາ ຂອງຫວຽດນາມ ຍັງປະສົບກັບຄວາມຫຍຸ້ງຍາກ, ຍ້ອນຕະຫລາດນຳເຂົ້າເດີມຂອງຫວຽດນາມ ມີທ່າອ່ຽງເຕີບໂຕຊັກຊ້າ. ນອກນັ້ນ ບັນດາການແກ້ງແຍ້ງດ້ານການຄ້າຢູ່ບັນດາຕະຫລາດໃຫຍ່ຄື: ອາເມລິກາ, ອີຢູ ໄດ້ກໍ່ຄວາມເສຍຫາຍບໍ່ແມ່ນຫນ້ອຍເຖິງບັນດາວິສາຫະກິດສົ່ງອອກປາຈາຂອງຫວຽດນາມ. ເພື່ອຮັກສາທີ່ຕັ້ງ ແລະ ພັດທະນາຕະຫລາດ, ຂະແຫນງປາຈາ ພວມວາງອອກຍຸດທະສາດພັດທະນາໃນໄລຍະຍາວ ແລະ ມີລັກສະນະໝັ້ນຄົງ. ມາດຕະການສຳຄັນແມ່ນເພີ່ມທະວີຄຸນະພາບການສົ່ງອອກ, ເອົາໃຈໃສ່ເປັນພິເສດເຖິງການໂຄສະນາຜະລິດຕະພັນປາຈາ, ຊ່ວຍຕະຫລາດຈຳຫນ່າຍເຂົ້າໃຈແຈ້ງກວ່າ ກ່ຽວກັບຕົ້ນກຳເນີດ ແລະ ຂັ້ນຕອນການຜະລິດປຸງແຕ່ງ ຕາມມາດຖານຫລັກອະນາໄມດ້ານສະບຽງອາຫານ ຕິດພັນກັບການປົກປັກຮັກສາສິ່ງແວດລ້ອມ. ຢູ່ ພາຍໃນປະເທດ, ຂະແຫນງປາຈາ ຫວຽດນາມ ປະຕິບັດບັນດາມາດຕະການປະຕິຮູບວິວັດການຜະລິດ, ລ້ຽງ ແລະ ປຸງແຕ່ງ ເພື່ອປະຕິບັດຕາມວິທີການຫັນເປັນຫລາຍຮູບຫລາຍແບບ, ຍົກສູງຄຸນນະພາບບັນດາຜະລິດຕະພັນປາຈາ ເພື່ອຕອບສະຫນອງມາດຖານ ແລະ ຄວາມຮຽກຮ້ອງຕ້ອງການຂອງຕະຫລາດ. ຫນື່ງໃນບັນດາມາດຕະການບຸລິມະສິດ ແມ່ນຍູ້ແຮງການຮ່ວມສຳພັນລະຫວ່າງເຂດ, ລະຫວ່າງວິສາຫະກິດ ແລະ ຜູ້ລ້ຽງປາຈາ, ເພື່ອເພີ່ມທະວີວຽກງານກວດກາເນື້ອທີ່ລ້ຽງປາ, ຜ່ານນັ້ນ ກວດກາປະລິມານປາຈາໄດ້, ຮັບປະກັນບັນດາຂໍ້ກຳນົດ, ມາດຕະຖານດ້ານເຕັກນິກກ່ຽວກັບການລ້ຽງປູກສິນໃນນ້ຳ. ທ່ານ ຫວໍຮູ່ງຢູງ, ຮອງປະທານ, ທັງເປັນເລຂາທິການໃຫຍ່ ສະຫະມາຄົມປາຈາ ຫວຽດນາມ ໃຫ້ຮູ້ວ່າ:
“ລັດຖະບານ ມີດຳລັດເລກທີ 36 ກ່ຽວກັບຍູ້ແຮງການປະຕິບັດມາດຖານ VIET GAP (ປະຕິບັດການຜະລິດກະສິກຳຢູ່ຫວຽດນາມ ເປັນຢ່າງດີ ) ແລະ GLOBO GAP (ປະຕິບັດກະສິກຳທົ່ວໂລກເປັນຢ່າງດີ). ໄລຍະຈະມາເຖິງ ຈະສ້າງບັນດາມາດຖານນີ້ ເພື່ອປັບປຸງເຂດລ້ຽງປາ. ດຳລັດສະບັບນີ້ ຍັງກຳນົດບັນດາເງື່ອນໄຂກ່ຽວຂ້ອງເຖິງການສ້າງມາດຖານຄຸນນະພາບ ໃຫ້ເໝາະສົມກັບບັນດາເງື່ອນໄຂຂອງປະເທດນຳເຂົ້າປາຈາ.”
ຫວ່າງແລ້ວນີ້, ທີ່ການປະຊຸມລະຫວ່າງຄະນະເສດຖະກິດສູນກາງ ແລະ ຄະນະຊີ້ນຳເຂດຕາເວັນຕົກພາກໃຕ້ ກໍໄດ້ເນັ້ນຫນັກເຖິງເລື່ອງຍູ້ແຮງການສ້າງໂຄງປະກອບຂະແຫນງປາຈາຄືນໃຫມ່. ທີ່ກອງປະຊຸມ, ທ່ານ ເລຫວີງເຕີນ, ຮອງຫົວຫນ້າ ຄະນະເສດຖະກິດສູນກາງ ໄດ້ເນັ້ນຫນັກເຖິງບັນດາວິທີສ້າງຄວາມດຸ່ນດຽງ ລະຫວ່າງຄວາມຕ້ອງການພັດທະນາກັບຕະຫລາດຈຳຫນ່າຍ, ໃນນັ້ນ ຖືຄຸນນະພາບຜະລິດຕະພັນເປັນສຳຄັນ ແລະ ຍູ້ແຮງການຮ່ວມສຳພັນ, ຈັດຕັ້ງການຜະລິດຕາມລະບົບຄືນໃຫມ່. ທ່ານ ເລຫວີງເຕີນ ຖືວ່າ:
“ປະຈຸບັນ ການວາງແຜນກຳນົດ ຕ້ອງປະຕິບັດຕາມກົດເກນການຕະຫລາດ. ໃນນັ້ນ ຕ້ອງເອົາໃຈໃສ່ເຖິງເງື່ອນໄຂດິນຟ້າ,ທີ່ດິນ, ນ້ຳ…. ກົນໄກຕະຫລາດພຽງຮັບຮູ້ ບັນດາວິສາຫະກິດດຳເນີນທຸລະກິດທີ່ມີປະສິດທິຜົນ ແລະ ປະຕິບັດຕາມບັນດາຂໍ້ກຳນົດເປັນຢ່າງດີເທົ່ານັ້ນ. ສະນັ້ນຄວນມີນະໂຍບາຍສຳລັບບັນດາວິສາຫະກິດຢາກເປີດກວ້າງຕະຫລາດ ແຕ່ບໍ່ມີທຶນຮອນເພື່ອລົງທຶນ.”
ທ່ານນາຍົກລັດຖະມົນຕີ ຫາກໍເຊັນອະນຸມັດບັນຊີລາຍຊື່ໂຄງການ“ສ້າງລະບົບສະຫນອງປາຈາ, ປາບາຊາ ແບບຍືນຍົງ ຢູ່ ຫວຽດນາມ ໂດຍສະຫະພາບເອີລົບ(ອີຢູ) ອຸປະຖຳ ໃນຂອບເຂດໂຄງການ Switch - Asia ຂອງ ອີຢູ. ໂຄງການຈະຊ່ວຍຍົກສູງລັກສະນະແກ້ງແຍ້ງຂອງປາຈາ ຫວຽດນາມ ຢູ່ ຕະຫລາດໂລກ ແລະ ຜ່ານໂຄງການ, ອີຢູ ຈະຫນູນຊ່ວຍໂດຍກົງລະບົບສະຫນອງປາຈາທັງໝົດນັບແຕ່ສະຫນອງແນວພັນ, ຜະລິດຫົວອາຫານ, ການລ້ຽງ ແລະ ປຸງແຕ່ງຂອງຫວຽດນາມ, ບັນດາປະເທດນຳເຂົ້າ ແລະ ສຸດທ້າຍແມ່ນຜູ້ໃຊ້ສອຍ, ໃນນັ້ນມີ ອີຢູ, ເຊິ່ງປະຈຸບັນພວມແມ່ນຕະຫລາດໃຫຍ່ສຸດ ສຳລັບການສົ່ງອອກປາຈາຂອງຫວຽດນາມ. ໂຄງການດັ່ງກ່າວແມ່ນປະຕິບັດໃນໄລຍະ 4 ປີ ແຕ່ປີ 2013- 2017, ສຸມໃສ່ຍົກສູງກຳລັງຄວາມສາມາດ, ຊຸກຍູ້ການຜະລິດມີຄວາມຮັບຜິດຊອບ ເພື່ອຍົກສູງຄຸນນະພາບ, ຫຼຸດຜ່ອນການກະທົບເຖິງສິ່ງແວດລ້ອມ ແລະ ຫລຸດຜ່ອນລາຍຈ່າຍຜະລິດ. ໃນນັ້ນ ກຳນົດປາຈາແມ່ນ ຂະແຫນງເສດຖະກິດທີ່ມີເງື່ອນໄຂ, ພັດທະນາຕາມໝວດຂະແຫນງ ແລະ ຄຸ້ມຄອງຕາມລະບົບຂະແຫນງສິນຄ້າ ນັບແຕ່ບ່ອນລ້ຽງຕະຫລອດຮອດການປຸງແຕ່ງ, ສົ່ງອອກ, ຈຳຫນ່າຍ ຜ່ານບັນດາຂໍ້ກຳນົດກ່ຽວກັບຄຸນນະພາບຜະລິດຕະພັນ. ນີ້ແມ່ນເງື່ອນໄຂເພື່ອໃຫ້ຂະແຫນງປາຈາ ຫວຽດນາມ ມຸ່ງໄປເຖິງການຜະລິດແບບຍືນຍົງ, ນຳມາເຊິ່ງລາຍຮັບໃຫ້ແກ່ຄົນງານດ້ວຍປະສິດທິຜົນດ້ານເສດຖະກິດສູງ.