(vovworld) - ບຸລິມະສິດແກ່ການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຮັກສາການເຕີບໂຕໃຫ້ຢູ່ໃນລະດັບເໝາະສົມ ນັ້ນແມ່ນບັນດາຈຸດໝາຍຊຶ່ງພັກ ແລະ ລັດຫວຽດນາມ ວາງອອກໃນປີ 2012. ເພື່ອປະຕິບັດຈຸດໝາຍດັ່ງກ່າວໃຫ້ໄດ້, ຄຽງຄູ່ກັບບັນດາມາດຕະການຮີບດ່ວນ, ລັດຖະບານໄດ້ປະຕິບັດການສ້າງພື້ນຖານເສດຖະກິດຄືນໃຫມ່ໃນ 3 ຂົງເຂດພື້ນຖານ ນັ້ນແມ່ນ: ສ້າງໂຄງປະກອບການລົງທຶນຂອງລັດຄືນໃຫມ່; ສ້າງໂຄງປະກອບລັດວິສາຫະກິດຄືນໃຫມ່ ແລະ ສ້າງໂຄງປະກອບຕະຫລາດການເງິນຄືນໃຫມ່, ຊຶ່ງຈຸດສຸມແມ່ນບັນດາທະນາຄານ. ມາຮອດປະຈຸບັນ, ຮູບແບບການເຕີບໂຕສົມທົບກັບການສ້າງໂຄງປະກອບພື້ນຖານເສດຖະກິດຄືນໃຫມ່ໄດ້ນຳມາເຊິ່ງຄຸນປະໂຫຍດ ແລະ ໃນເບື້ອງຕົ້ນສາມາດຄວບຄຸມໄພເງິນເຟີ້ໄດ້.
ພາບປະກອບ:baomoi.com |
ໃນປີ 2012, ໃນສະພາບທີ່ພື້ນຖານເສດຖະກິດໂລກພວມຊຸດໂຊມ, ລັດຖະບານ ຫວຽດນາມ ຍັງຄົງຢືດໝັ້ນຈຸດໝາຍສ້າງໂຄງປະກອບພື້ນຖານເສດຖະກິດຄືນໃຫມ່ ສົມທົບກັບການປ່ຽນໃຫມ່ຮູບການເຕີບໂຕແບບຍືນຍົງ ດ້ວຍການຜັນຂະຫຍາຍບັນດາມາດຕະການສ້າງລະບົບນະໂຍບາຍຢ່າງຮອບດ້ານ ເພື່ອຮັກສາເສດຖະກິດມະຫາພາກເປັນປົກກະຕິ, ສືບຕໍ່ປະຕິບັດນະໂຍບາຍງົບປະມານ, ເງິນຕາຢ່າງແຫນ້ນແຟ້ນຕິດພັນກັບການສ້າງໂຄງປະກອບເສດຖະກິດ ແລະ ຄວາມດຸນດ່ຽງໃຫ້ພື້ນຖານເສດຖະກິດ. ທ່ານນາຍົກລັດຖະມົນຕີ ໄດ້ອະນຸມັດແຜນຮ່າງສ້າງໂຄງປະກອບລັດວິສາຫະກິດຄືນໃຫມ່, ສ້າງໂຄງປະກອບຕະຫລາດການເງິນ, ທະນາຄານ ແລະ ການລົງທຶນຕາມເນື້ອໃນຈິດໃຈຂອງມະຕິສູນກາງພັກຄັ້ງທີ 3 ຊຸດທີ 11. ຈຸດໝາຍສັງລວມຂອງການສ້າງພື້ນຖານເສດຖະກິດຄືນໃຫມ່ ແມ່ນແນໃສ່ລະດົມທຸກແຫລ່ງກຳລັງຂອງພື້ນຖານເສດຖະກິດ ແລະ ບັນດາແຫລ່ງກຳລັງລົງທຶນ. ຕ້ອງໄດ້ນຳໃຊ້, ຈັດແບ່ງຢ່າງເໝາະສົມ ແລະ ມີປະສິດທິຜົນກວ່າ, ຕາມທ່າອ່ຽງຍາວນານ ແລະ ກວ້າງຂວາງກວ່າ. ດຣ ຫວູດີ່ງແອງ, ຜູ້ຊ່ຽວຊານດ້ານເສດຖະກິດຖືວ່າ:
“ຫວຽດນາມ ຄວນກຳນົດວ່າ ໃນສະພາບແຫລ່ງກຳລັງຍັງຈຳກັດຢູ່ນັ້ນ ຕ້ອງສຸມໃສ່ເຂົ້າບັນດາໂຄງການມີປະສິດທິຜົນທີ່ສຸດ ແລະ ບັນດາໂຄງການນັ້ນບໍ່ພຽງແຕ່ຮັບໃຊ້ໃຫ້ແກ່ພື້ນຖານໂຄງລ່າງເທົ່ານັ້ນ ຫາກຍັງນຳມາເຊິ່ງປະສິດທິຜົນດ້ານເສດຖະກິດເພື່ອ ສາມາດຊຳລະບ້ວງຫນີ້ສິນຢ່າງພຽງພໍ ແນໃສ່ຫລຸດຜ່ອນບ້ວງຫນີ້ສິນຂອງລັດໄດ້ສ່ວນໃດຫນຶ່ງ.”
ກ່ອນອື່ນໝົດ, ເລື່ອງຜັນຂະຫຍາຍການປະຕິບັດການສ້າງໂຄງປະກອບບັນດາກຸ່ມບໍລິສັດເສດຖະກິດ, ບໍລິສັດໃຫຍ່ແຫ່ງລັດຄືນໃຫມ່ ໄດ້ຮັບການກຳນົດແມ່ນສຸມໃສ່ ໃນຂະແຫນງດຳເນີນທຸລະກິດຕົ້ນຕໍ, ມີຂອບຂະຫນາດເໝາະສົມກັບຕະຫລາດ, ກຳລັງຄວາມສາມາດການບໍລິຫານ ແລະ ຄວາມສາມາດດ້ານການເງິນ. ເລື່ອງປະຕິຮູບບັນດາລັດວິສາຫະກິດ ແມ່ນສຸມໃສ່ສ້າງລະບອບບໍລິຫານລັດສຳລັບວິສາຫະກິດ ແລະ ການຄຸ້ມຄອງຂອງກຳມະສິດທີ່ມີຕໍ່ລັດວິສາຫະກິດ. ກຳນົດຢ່າງຈະແຈ້ງ, ສິດອຳນາດ, ຄວາມຮັບຜິດຊອບຂອງເປົ້າໝາຍ, ເປັນຕົ້ນແມ່ນພະນັກງານບໍລິຫານຂະແຫນງ ແລະ ສະພາບໍລິຫານວິສາຫະກິດ. ການສ້າງກຸ່ມບໍລິສັດແຫ່ງລັດໄດ້ຮັບການປະຕິບັດຕາມທິດຫັນກົງຈັກຄຸ້ມຄອງ ຈາກບຸກຄະລາກອນຕະຫລອດຮອດຂໍ້ກຳນົດໃຫ້ຊຳນານງານ, ວາງອອກບັນດາຄາດໝາຍກ່ຽວກັບຜົນປະໂຫຍດ ແລະ ຄວາມໂປ່ງໃສໃນວຽກງານ ແລະ ການລາຍງານ.
ເພື່ອປະຕິບັດການສ້າງໂຄງປະກອບພື້ນຖານເສດຖະກິດຄືນໃຫມ່, ລັດຖະບານ ກໍໄດ້ດຳເນີນການປະຕິຮູບຂົງເຂດການເງິນ, ໃນນັ້ນສຸມໃສ່ຟື້ນຕົວລະບົບທະນາຄານ. ວິວັດທະນາການນັ້ນ ໄດ້ເລີ່ມປະຕິບັດຈາກນະໂຍບາຍຫລຸດຜ່ອນອັດຕາດອກເບ້ຍສິນເຊື່ອສອດຄ່ອງກັບລະດັບຫລຸດລົງຂອງໄພເງິນເຟີ້, ບໍລິຫານອັດຕາແລກປ່ຽນເງິນຕາຕ່າງປະເທດຕາມສັນຍານຂອງຕະຫລາດ, ຮັບປະກັນຄ່າຂອງສະກຸນເງິນດົ່ງ, ສ້າງກົນໄກຄຸ້ມຄອງຕະຫລາດຄຳໃຫ້ສົມບູນແບບ, ປັບປຸງການດຸນດຽງຊຳລະສາກົນ ແລະ ເພີ່ມການສະສົມເງິນຕາຕ່າງປະເທດ.
ດ້ວຍບັນດາມາດຕະການທັງມີລັກສະນະຮີບດ່ວນ, ທັງມີລັກສະນະຍາວນານ, ຮູບແບບການເຕີບໂຕສົມທົບກັບການສ້າງໂຄງປະກອບພື້ນຖານເສດຖະກິດຄືນໃຫມ່ແມ່ນເສີມຂະຫຍາຍຄຸນປະໂຫຍດໃນເບື້ອງຕົ້ນ. ຕາມການສິຖິຕິຫລ້າສຸດ, ເສດຖະກິດຂອງຫວຽດນາມ ໃນ 11 ເດືອນຂອງປີ 2012 ໄດ້ມີການຫັນປ່ຽນຢ່າງຕັ້ງຫນ້າ ແລະ ຖືກທິດ. ບັນດາມາດຕະການຄວບຄຸມໄພເງິນເຟີ້, ການຮັກສາເສດຖະກິດມະຫາພາກໃຫ້ເປັນປົກກະຕິໄດ້ຮັບການເສີມຂະຫຍາຍປະສິດທິຜົນ ແລະ ບັນລຸໝາກຜົນດີ. ໃນນັ້ນ ດັດຊະນີລາຄາໃຊ້ສອຍ CPI ໃນເດືອນ 11 ເພີ່ມຂຶ້ນພຽງ 0,47% ເມື່ອທຽບໃສ່ເດືອນກອ່ນ. ຄາດຄະເນວ່າ ຖ້າຫາກບໍ່ມີການຜັນແປໃນເດືອນທ້າຍປີ, ຄາດໝາຍຄວບຄຸມໄພເງິນເຟີ້ຕ່ຳກວ່າຫນຶ່ງຕົວເລກໃນປີນີ້ ແມ່ນສາມາດບັນລຸໄດ້. ຄຽງຄູ່ກັບບັນດາຜົນງານກ່ຽວກັບການຄວບຄຸມໄພເງິນເຟີ້, ຫລາຍຂົງເຂດເສດຖະກິດອື່ນກໍບັນລຸຄາດໝາຍວາງອອກ. ປີ 2012, ເຖິງວ່າຕ້ອງປະເຊີນຫນ້າກັບຄວາມຫຍຸ້ງຍາກຫລາຍຢ່າງ, ເປັນຕົ້ນຖືກຜົນສະທ້ອນຈາກການຊຸດໂຊມເສດຖະກິດໂລກ, ແຕ່ລະດັບຈະເລີນເຕີບໂຕ GDP ທັງປີຂອງຫວຽດນາມ ຄາດວ່າບັນລຸ 5,2%. ທີ່ການປະຊຸມປະຈຳເດີອນ 11 ຂອງລັດຖະບານ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢູ໋ງ ຊີ້ແຈງວ່າ:
“ເຖິງວ່າບັນລຸໄດ້ໝາກຜົນເປັນຫນ້າຊື່ນຊົມ, ແຕ່ພວກເຮົາບໍ່ຄວນຟ້າວປະເອີບໃຈ ກ່ອນອື່ນໝົດ ຕ້ອງສືບຕໍ່ຄວບຄຸມໄພເງິນເຟີ້ໃຫ້ໄດ້. ຂ້າພະເຈົ້າສະເຫນີ: ສືບຕໍ່ຄວບຄຸມລາຄາສິນຄ້າໃຫ້ເປັນປົກກະຕິ. ສືບຕໍ່ກວດກາບັນດາທະນາຄານ, ເພີ່ມສິນເຊື່ອໃຫ້ເໝາະສົມເພື່ອແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ ທັງຄິດໄລ່ອັດຕາດອກເບ້ຍ ແຕ່ຕ້ອງຄິດໄລ່ເຖິງຄວາມຕ້ອງການໃຫ້ເໝາະສົມ ແລະ ຄວບຄຸມໄພເງິນເຟີ້ໃຫ້ແຫນ້ນແຟ້ນໃນໄລຍະຈະມາເຖິງ.”
ບົນພື້ນຖານກຳນົດຮູບແບບການເຕີບໂຕໃຫ້ເໝາະສົມກັບສະພາບຕົວຈິງ, ລັດຖະບານ ຫວຽດນາມ ໄດ້ສ້າງກົນໄກສົມທົບໃນການບໍລິຫານເສດຖະກິດມະຫາພາກໄລຍະ 2012 - 2020. ໃນນັ້ນ ກຳນົດເພີ່ມທະວີການຮັກສາເສດຖະກິດມະຫາພາກເປັນປົກກະຕິ, ສູ້ຊົນຫລຸດຜ່ອນໄພເງິນເຟິ້ຢູ່ໃນລະດັບຕ່ຳກວ່າ ແລະ ບັນລຸລະດັບຈະເລີນເຕີບໂຕໃຫ້ສູງກວ່າປີ 2012. ສືບຕໍ່ປະຕິບັດການສ້າງໂຄງປະກອບພື້ນຖານເສດຖະກິດຕິດພັນກັບການຫັນປ່ຽນຮູບແບບການເຕີບໂຕ. ຮັບປະກັນຊີວິດສັງຄົມ ແລະ ສະຫວັດດີການສັງຄົມ ພ້ອມທັງຍົກສູງປະສິດທິຜົນຂອງວຽກງານການຕ່າງປະເທດ ແລະ ເຊື່ອມໂຍງເຂົ້າກັບສາກົນ, ສ້າງພື້ນຖານເພື່ອພັດທະນາເສດຖະກິດໃຫ້ໝັ້ນຄົງຫນັກແຫນ້ນໃນຊຸມປີຕໍ່ໄປ.