(vovworld)- ຫວຽດນາມ ພວມຢືນຕໍ່ຫນ້າເຂົ້າຮ່ວມບັນດາສັນຍາການຄ້າເສລີກັບຫລາຍປະເທດຄູ່ຮ່ວມມືໃຫຍ່ໃນໂລກ, ກ່ອນອື່ນໝົດແມ່ນສັນຍາສຄູ່ຮ່ວມມືຂ້າມປາຊີຟີກ(TPP) ພວມເຂົ້າສູ່ໄລຍະສຸດທ້າຍ, ສັນຍາການຄ້າເສລີ ຫວຽດນາມ- ສະຫະພາບເອີລົບ(ອີຢູ) .. ຊື່ງຄາດວ່າຈະສິ້ນສຸດການເຈລະຈາໃນທ້າຍປີນີ້. ນີ້ແມ່ນກາລະໂອກາດໃຫຍ່ເພື່ອໃຫ້ຫວຽດນາມເປີດກວ້າງ, ຫັນຕະຫລາດຂາອອກຂາເຂົ້າເປັນຫລາຍຮູບຫລາຍແບບ, ຫລຸດຜ່ອນຄວາມສ່ຽງຍ້ອນອີງໃສ່ຕະຫລາດຈຳນວນຫນຶ່ງ.
ສັນຍາຄູ່ຮ່ວມມືຂ້າມປາຊີຟີກ(TPP) ມາຮອດປະຈຸບັນ ໄດ້ຜ່ານຮອບເຈລະຈາ 20 ຄັ້ງແລ້ວ ແລະ ຕັ້ງຄວາມຫວັງວ່າ ຈະສິ້ນສຸດໃນທ້າຍປີນີ້. ຕາມຄຳໝັ້ນສັນຍາໃນສັນຍາດັ່ງກ່າວແລ້ວ, ບັນດາປະເທດສະມາຊິກ ຈະຕ້ອງລົບລ້າງ 100% ພາສີນຳເຂົ້າ, ໃນນັ້ນ ປະມານ 90% ຖືກລົບລ້າງເມື່ອສັນຍາດັ່ງກ່າວມີຜົນສັກສິດ. ສະເພາະ ບັນດາປະເທດເຂົ້າຮ່ວມສັນຍາ TPP ໄດ້ກວມເອົາເຖິງ 40% ຍອດ GDP ແລະ 30% ຍອດວົງເງິນຂາອອກຂາເຂົ້າທົ່ວໂລກ. ຖ້າຫາກໄດ້ລົງນາມໃນສັນຍາດັ່ງກ່າວ, ສິນຄ້າຂອງຫວຽດນາມ ຈະມີກາລະໂອກາດຫລາຍຢ່າງເພື່ອແຊກຊືມເຂົ້າບັນດາຕະຫລາດໃຫຍ່ຄື: ອາເມລິກາ, ການາດາ, ເມຊີໂກ, ຍີ່ປຸ່ນ…
ພາບປະກອບ:internet
|
ຕຳ່ແຜ່ນຕັດຫຍິບແມ່ນຫນຶ່ງໃນບັນດາຂະແຫນງໄດ້ຮັບການຄາດຄະເນວ່າມີທ່າໄດ້ປຽບຫລາຍຢ່າງ ເມື່ອສັນຍາຄູ່ຮ່ວມມືຂ້າມປາຊີຟີກໄດ້ຮັບການລົງນາມ. ມີ ພາສີ ເກືອບ 1.000 ປະເພດ ສຳລັບເຄື່ອງຕຳ່ແຜ່ນຕັດຫຍິບທີ່ສົ່ງອອກໄປຍັງຕະຫລາດອາເມລິກາ ຈະຖືກຫລຸດລົງໃນລະດັບ 0%, ແທນທີ່ 18% ຄືປະຈຸບັນ. ລະດັບການເຕີບໂຕການສົ່ງອອກເຄື່ອງຕຳ່ແຜ່ນຕັດຫຍິບອາດຈະຮັກສາແຕ່ 15%- 20%/ປີ ແລະ ຮອດປີ 2025, ຂອບຂະຫນາດການສົ່ງອອກເຄື່ອງຕຳ່ແຜ່ນຕັດຫຍິບຫວຽດນາມ ອາດຈະບັນລຸກວ່າ 50 ຕື້ USD. ເຖິງຢ່າງໃດກໍຕາມ, ເພື່ອເຂົ້າຮ່ວມຂົງເຂດນີ້, ເຄື່ອງຕຳ່ແຜ່ນຕັດຫຍິບຫວຽດນາມ ຕ້ອງຕອບສະຫນອງບັນດາເງື່ອນໄຂຄື: ຕົ້ນກຳເນີດຂອງສິນຄ້າ, ການນຳໃຊ້ວັດຖຸດິບທີ່ຜະລິດພາຍໃນກຸ່ມບັນດາປະເທດເຂົ້າຮ່ວມສັນຍາ TPP. ຕາມທ່ານນາງ ດັ້ງເຟືອງຢູງ, ເລຂາທິການໃຫຍ່ສະຫະສະມາຄົມຕຳ່ແຜ່ນຕັດຫຍິບຫວຽດນາມແລ້ວ, ຕໍ່ຫນ້າກາລະໂອກາດເປີດກວ້າງ, ຫັນຕະຫລາດເປັນຫລາຍຮູບຫລາຍແບບ, ບັນດາວິສາຫະກິດຂະແຫນງຕຳ່ແຜ່ນຕັດຫຍິບ ຕ້ອງມີການປ່ຽນໃຫມ່, ລົງທຶນຜະລິດວັດຖຸດິບ, ສ້າງວິວັດການຜະລິດຄົບວົງຈອນ, ເພີ່ມອັດຕານຳໃຊ້ສິນຄ້າຜະລິດພາຍໃນປະເທດ ແລະ ເພີ່ມມູນຄ່າຜະລິດຕະພັນໃຫມ່ ຈຶ່ງສາມາດຍາດແຍ່ງທ່າໄດ້ປຽບຈາກສັນຍາ TPP ໄດ້.
“ສິ່ງທ້າທາຍຂອງຂະແຫນງຕຳ່ແຜ່ນຕັດຫຍິບຫວຽດນາມ ແມ່ນຕ້ອງເຮັດແນວໃດມີຜະລິດຕະພັນໄດ້ຮັບການຜະລິດຈາກຝ້າຍຂອງຫວຽດນາມ. ສຳລັບບັນດາປະເທດເຂົ້າຮ່ວມສັນຍາ TPP ເງື່ອໄຂນີ້ກໍປະສົບກັບຄວາມຫຍຸ້ງຍາກ, ສະນັ້ນ ພວກເຮົາພຽງແຕ່ເພີ່ມທະວີການຜະລິດແຫລ່ງວັດຖຸດິບຢູ່ ຫວຽດນາມ. ສະຫະສະມາຄົມ ກໍພວມກະກຽມບຳລຸງສ້າງ, ຫັນປ່ຽນວິທິການຜະລິດແບບຮັບຈ້າງເປັນທັນສະໄຫມ, ເຮັດໄດ້ຄືແນວນັ້ນ ຈະເພີ່ມມູນຄ່າເພີ່ມຂອງຜະລິດຕະພັນໄດ້.”
ຄຽງຄູ່ກັບສັນຍາ TPP, ໃນປີນີ້ ຫວຽດນາມ ຍັງເຂົ້າຮ່ວມການເຈລະຈາສັນຍາການຄ້າອື່ນຈຳນວນຫນຶ່ງຄື: ສັນຍາການຄ້າເສລີ (FTA) ຫວຽດນາມ -ອີຢູ, ຫວຽດນາມ-ສເກົາຫລີ, ຫວຽດນາມ ແລະ ພັນທະພາບພາສີ ລັດເຊຍ - ເບລາຣຸດ - ກາຊັກສະຖານ. ດ້ວຍການໃຫ້ບຸລິມະສິດຫລາຍຢ່າງກ່ຽວກັບພາສີ, ຜ່ານບັນດາສັນຍາການຄ້ານີ້, ຫວຽດນາມ ຈະມາກາລະໂອກາດຫລາຍຢ່າງເພື່ອຫັນຕະຫລາດນຳເຂົ້າສົ່ງອອກສິນຄ້າເປັນຫລາຍຮູບຫລາຍແບບ, ພິເສດແມ່ນຜະລິດຕະພັນກະເສດ. ດ້ວຍການເຂົ້າຮ່ວມບັນດາສັນຍານີ້ ຫວຽດນາມ ຈະມີຕະຫລາດທີ່ມີຄວາມສາມາດບົ່ມຊ້ອນອື່ນຫລາຍແຫ່ງ. ເຖິງຢ່າງໃດກໍຕາມ, ຕາມທ່ານ ເຈີນຫຶວຮີ່ງ, ປະທານສູນຕຸລາການສາກົນ ຫວຽດນາມແລ້ວ, ເພື່ອຕອບສະຫນອງຄຳຮຽກຮ້ອງຕ້ອງການຂອງບັນດາສັນຍາດັ່ງກ່າວ, ຫວຽດນາມ ຕ້ອງຍົກສູງກຳລັງຄວາມສາມາດແກ້ງແຍ້ງເພື່ອເຂົ້າຮ່ວມລະບົບມູນຄ່າທົ່ວໂລກ, ເປັນເຈົ້າການເຂົ້າຮ່ວມບັນດາສັນຍາດັ່ງກ່າວ ແລະ ເຊື່ອມໂຍງເຂົ້າກັບພາກພື້ນ ແລະ ສາກົນ ຢ່າງເລິກເຊິ່ງ.
“ບັນດາວິສາຫະກິດຫວຽດນາມ ຕ້ອງຍົກສູງ, ປ່ຽນໃຫມ່, ຮັບຮູ້ບັນດາການແກ້ງແຍ້ງ ຫາກບໍ່ຕ້ອງເຂົ້າຮ່ວມລະບົບມູນຄ່າເທົ່ານັ້ນ. ບັນດາວິສາຫະກິດຫວຽດນາມຕ້ອງບືນຕົວຂຶ້ນໃນລະບົບມູນຄ່າທົ່ວໂລກ. ນີ້ແມ່ນກາລະໂອກາດ ແລະ ກໍແມ່ນສິ່ງທ້າທາຍເພື່ອໃຫ້ວິສາຫະກິດປ່ຽນໃຫມ່, ນຳໃຊ້ບັນດາສັນຍາໃກ້ຈະລົງນາມເພື່ອຍົກສູງມູນຄ່າຂອງຕົນ.”
ດ້ວຍການເຂົ້າຮ່ວມບັນດາສັນຍາດັ່ງກ່າວ, ການນຳເຂົ້າຂອງຫວຽດນາມ ຈະໄດ້ຮັບຜົນປະໂຫຍດ. ບັນດາບຸລິມະສິດດ້ານພາສີ, ອຸປະກອນ, ກົນຈັກ, ເຕັກໂນໂລຊີຮັບໃຊ້ການຜະລິດ, ວັດຖຸດິບສົ້ນເຂົ້າ ແລະ ເຄື່ອງໃຊ້ສອຍຈາກບັນດາປະເທດຄູ່ຮ່ວມມືທີ່ເຂົ້າຮ່ວມສັນຍາການຄ້າ, ພິເສດ ຈາກບັນດາປະເທດມີພື້ນຖານວິທະຍາສາດເຕັກໂນໂລຊີທີ່ກ້າວຫນ້າ, ສິນຄ້າທີ່ຫວຽດນາມນຳເຂົ້າຈາກຕ່າງປະເທດ ຈະມີລາຄາເໝາະສົມກວ່າ. ຕໍ່ຫນ້າກາລະໂອກາດໃຫຍ່ຈາກບັນດາສັນຍາການຄ້າ, ຫວຽດນາມ ພວມຕັ້ງຫນ້າເຈລະຈາເພື່ອບັນລຸບັນດາຂໍ້ຕົກລົງທີ່ມີປະໂຫຍດໃຫ້ແກ່ການເປີດກວ້າງຕະຫລາດສົ່ງອອກແລະນຳເຂົ້າ. ເພື່ອຮັບເອົາກາລະໂອກາດນີ້, ທ່ານ ຫວູູຮູຍຮ່ວາງ, ລັດຖະມົນຕີກະຊວງອຸດສາຫະກຳ ການຄ້າຫວຽດນາມ ຢືນຢັນວ່າ:
“ແຜນນະໂຍບາຍຂອງລັດຖະບານ ແມ່ນເປີດກວ້າງຕະຫລາດສົ່ງອອກ ແລະ ນຳເຂົ້າໃຫມ່ຕື່ມອີກ ເພື່ອຫລີກລ້ຽງການອີງໃສ່ຄູ່ຮ່ວມມືໃດຫນຶ່ງ. ເລື່ອງຫວຽດນາມ ເຂົ້າຮ່ວມການເຈລະຈາສັນຍາ, ຜົນປະໂຫຍດຕົ້ນຕໍແມ່ນເປີດຕະຫລາດສິນຄ້າ, ສ້າງເງື່ອນໄຂໃຫ້ແກ່ບັນດາປະເພດສິນຄ້າມີທ່າໄດ້ປຽບຂອງພວກເຮົາຄື: ເຄື່ອງຕຳ່ແຜ່ນຕັດຫຍິບ, ເກີບຫນັງ, ຜະລິດຕະພັນກະເສດ..ແຊກຊືມດ້ວຍຂອບຂະຫນາດໃຫຍ່ກວ່າ. ລັດຖະບານ ຈະສ້າງທຸກເງື່ອນໄຂສະດວກກ່ຽວກັບກົນໄກນະໂຍບາຍໃຫ້ແກ່ການຜະລິດກະສິກຳ, ເພີ່ມມູນຄ່າເພີ່ມ, ເພີ່ມຄວາມສາມາດການສົ່ງອອກ ເພື່ອໃຫ້ຜ່ານນັ້ນ ການສົ່ງອອກນັບມື້ນັບເປັນປົກກະຕິ ແລະ ໝັ້ນຄົງກວ່າ.”
ເພື່ອລົງນາມບັນດາສັນຍາ ຄື: TPP ຫລື FTA ລະຫວ່າງ ຫວຽດນາມ -ອີຢູ ແລະ ພັນທະພາບພາສີ ລັດເຊຍ - ເບລາຣຸດ - ກາຊັກສະຖານ, ຫວຽດນາມ ພວມສ້າງໂຄງການສົ່ງເສີມພາສີລະອຽດ ຕາມແຕ່ລະໝວດສິນຄ້າ, ສ້າງແຜນກຳນົດເຂດຜະລິດວັດຖຸດິບ, ພັດທະນາອຸດສາຫະກຳສຳຮອງ. ເພື່ອຮັບເອົາກາລະໂອກາດດີດັ່ງກ່າວ, ລັດຖະບານ ຈະປະກາດໃຊ້ບັນດານະໂຍບາຍຫນູນຊ່ວຍບັນດາວິສາຫະກິດຕຳ່ແຜ່ນຕັດຫຍິບ, ເກີບຫນັງ, ກະສິກຳ ໂດຍໄວ, ຂຸດຄົ້ນ ບັນດາທ່າໄດ້ປຽບ ແລະ ຄວາມສາມາດບົ່ມຊ້ອນຢ່າງມີປະສິດທິຜົນ ເພື່ອເພີ່ມມູນຄ່າເພີ່ມຜະລິດຕະພັນ, ຍົກສູງຄວາມສາມາດແກ້ງແຍ້ງ.