(vovworld)- ປະຈຸບັນ ຫວຽດນາມ ແມ່ນປະເທດສົ່ງອອກບັນດາປະເພດຜະລິດຕະພັນກະເສດ, ສິນໃນນ້ຳ ແລະ ອຸດສາຫະກຳປຸງແຕ່ງ ນຳມາເຊິ່ງມູນຄ່າສູງ. ເຖິງຢ່າງໃດກໍຕາມ, ບັນດາປະເພດສິນຄ້າຂອງຫວຽດນາມ ສ່ວນຫລາຍແມ່ນສົ່ງອອກວັດຖຸດິບ, ສະນັ້ນ ບໍ່ທັນນຳມາເຊິ່ງມູນຄ່າເພີ່ມສູງ. ນີ້ກໍແມ່ນບັນຫາພວມໄດ້ຮັບຄວາມສົນໃຈຈາກລັດຖະບານຫວຽດນາມ ໃນການກຳນົດທິດຍຸດທະສາດສົ່ງອອກໃນໄລຍະຈະມາເຖິງ. ບົດຂຽນຂອງນັກຂ່າວ ຫາຍຮ່າ ທີ່ພາດຫົວຂໍ້ວ່າ: “ຫວຽດນາມ ຍູ້ແຮງການສົ່ງອອກມຸ່ງໄປເຖິງລະບົບມູນຄ່າເພີ່ມ”
ພາບປະກອບ
|
ມາຮອດປະຈຸບັນ, ຫວຽດນາມ ມີ ສິນຄ້າສົ່ງອອກ 24 ປະເພດ ບັນລຸວົງເງິນກວ່າ 1 ຕື້ USD. ຜະລິດຕະພັນກະເສດ, ສິນໃນນ້ຳສຳຄັນບາງປະເພດຄື: ເຂົ້າສານ, ກາເຟ, ຢາງພາລາ, ໝາກພິກໄທ, ເຄື່ອງຕ່ຳແຜ່ນຕັດຫຍິບ, ເກີບຫນັງ, ຄອມພິວເຕີ, ໂທລະສັບມືຖື.. ບັນລຸລະດັບການເຕີບໂຕສູງຢ່າງລຽນຕິດ, ປະກອບສ່ວນຫລາຍພໍສົມຄວນເຂົ້າໃນຍອດວົງເງິນສົ່ງອອກ. ເຖິງຢ່າງໃດກໍຕາມ, ຜະລິດຕະພັນກະເສດຫລາຍປະເພດສວ່ນຫລາຍແມ່ນສົ່ງອອກແບບວັດຖຸດິບ, ບໍ່ທັນໄດ້ຮັບການປຸງແຕ່ງເທື່ອ. ມີຫລາຍຂະແຫນງສິນຄ້າສົ່ງອອກຂາດວັດຖຸດິບ, ອຸດສາຫະກຳສຳຮອງ, ລາຍຈ່າຍການຜະລິດສູງ ສະນັ້ນ ຖືກຫລຸດຜ່ອນກຳລັງແກ້ງແຍ້ງ ເມື່ອເຊື່ອມໂຍງຢ່າງເລິກເຊິ່ງກວ້າງຂວາງເຂົ້າກັບຕະຫລາດໂລກ, ເປັນຕົ້ນຢູ່ບັນດາປະເທດຕ້ອງການສິນຄ້າທີ່ມີຄຸນນະພາບສູງ. ເພື່ອແກ້ໄຂຂໍ້ຈຳກັດນີ້, ບັນດາວິສາຫະກິດສົ່ງອອກຫວຽດນາມ ພວມມານະພະຍາຍາມສ້າງຍຸດທະສາດຕະຫລາດ, ສຸມໃສ່ເຂົ້າໃນບັນດາຕະຫລາດຈຸດສຸມ, ຍູ້ແຮງການລົງທຶນເຕັກໂນໂລຊີສູງ, ເຕັກໂນໂລຊີຜະລິດປຸງແຕ່ງທັນສະໄຫມ ເພ່ືອສ້າງບັນດາຜະລິດຕະພັນສົ່ງອອກມີມູນຄ່າເພີ່ມຂຶ້ນສູງ, ພັດທະນາແບບຍືນຍົງກວ່າ. ທ່ານ ໂດກີມລາງ, ຮອງຫົວຫນ້າກົມສົ່ງເສີມການຄ້າ, ສັງກັດກະຊວງອຸດສາຫະກຳການຄ້າ ຫວຽດນາມໃຫ້ຮູ້ວ່າ:
“ຄວນກຳນົດຂະແຫນງສິນຄ້າ ຄືນໃຫມ່ ແລະ ຂົງເຂດຄວນບຸລິມະສິດໃຫ້ແກ່ໄລຍະຈະມາເຖິງ, ສັ້ນສຸດແມ່ນຮອດປີ 2020. ພວກເຮົາຢາກເຂົ້າຕະຫລາດໃຫຍ່ໃນໂລກ ຊື່ງໃນຂົງເຂດການຜະລິດເຕັກໂນໂລຊີສູງ ຕ້ອງສືບຕໍ່ລົງທຶນຫລາຍກວ່າໃຫ້ແກ່ອຸດສາຫະກຳສຳຮອງ ແລະ ບຸລິມະສິດໃຫ້ກຸ່ມວິສາຫະກິດຂະຫນາດກາງ ແລະ ນ້ອຍ.”
ເພື່ອຍົກສູງມູນຄ່າເພີ່ມໃຫ້ແກ່ສິນຄ້າສົ່ງອອກ, ໄລຍະແຕ່ປີ 2011-2013, ລັດຖະບານ ໄດ້ຊີ້ນຳບັນດາທ້ອງຖິ່ນ, ຂະແຫນງການ ຕ້ອງກວດກາ, ວາງແຜນກຳນົດ ບັນດາຂະແຫນງອາຊີບສົ່ງອອກຄືນໃຫມ່, ໃນນັ້ນ ບຸລິມະສິດການລົງທຶນບັນດາຂະແຫນງອາຊີບມີຄວາມສາມາດບົ່ມຊ້ອນຫລາຍຢ່າງ, ສຸມໃສ່ສ້າງເຄື່ອງໝາຍການຄ້າຈຳນວນຫນຶ່ງທີ່ມີກຳລັງແກ້ງແຍ້ງພຽງພໍເພື່ອເຂົ້າຮ່ວມບັນດາຕະຫລາດໃຫຍ່, ຕະຫລາດທີ່ຕ້ອງການສິນຄ້າມີຄຸນນະພາບສູງ. ທ່ານນາງ ຫງວຽນທິຮົ່ງ, ຮອງປະທານຄະນະກຳມະການປະຊາຊົນນະຄອນ ໂຮ່ຈິມີນ, ຊື່ງແມ່ນສູນກາງໃຫຍ່ສຸດຂອງທົ່ວປະເທດກ່ຽວກັບການສົ່ງອອກໃຫ້ຮູ້ວ່າ:
“ນະຄອນໂຮ່ຈິມີນ ພວມສຸມໃສ່ເຂົ້າໃນການເພີ່ມມູນຄ່າເພີ່ມຂອງຜະລິດຕະພັນສົ່ງອອກແຕ່ລະປະເພດ, ຜ່ານການນຳໃຊ້ແຫລ່ງວັດຖຸດິບຂອງບັນດາແຂວງ ,ນະຄອນພາຍໃນປະເທດ. ນະຄອນ ໂຮ່ຈິມີນ ກໍມີແຜນນະໂຍບາຍດຶງດູດບັນດາວິສາຫະກິດລົງທຶນເຂົ້າໃນຂົງເຂດເຕັກໂນໂລຊີສູງ, ບົນພື້ນຖານນັ້ນ ສົ່ງເສີມສ້າງບັນດາຜະລິດຕະພັນມີມູນຄ່າເພີ່ມ, ເປັນຕົ້ນແມ່ນບັນດາຜະລິດຕະພັນເອກະລັກສະເພາະຂອງຫວຽດນາມ. ເຮັດຄືແນວນັ້ນ ທັງມີຄວາມສາມາດສຳພັດກັບຕະຫລາດຢ່າງວ່ອງໄວ ທັງເປີດກວ້າງອັດຕາສ່ວນຕະຫລາດສຳລັບບັນດາຕະຫລາດຫລັກແຫລ່ງ ແລະ ຕະຫລາດຕ້ອງການສິນຄ້າມີຄຸນນະພາບສູງ.”
ໄລຍະມໍ່ໆມານີ້ ຕະຫລາດສົ່ງອອກຜະລິດຕະພັນກະເສດ, ສິນໃນນ້ຳຂອງຫວຽດນາມ ມີສັນຍານດີພໍສົມຄວນ. ອາເມລິກາ, ຊື່ງແມ່ນຕະຫລາດນຳເຂົ້າຜະລິດຕະພັນກະເສດທີ່ນຳມາເຊິ່ງມູນຄ່າເພີ່ມສູງ ແລະ ແມ່ນຕະຫລາດທີ່ມີຄວາມຮຽກຮ້ອງຕ້ອງການສູງກ່ຽວກັບຫລັກອະນາໄມຄວາມປອດໄພດ້ານສະບຽງອາຫານ ຫາກໍເຫັນດີນຳເຂົ້າໝາກລຳໄຍ ແລະ ໝາກລີ່ນຈີ່ຈາກ ຫວຽດນາມ ແລະ ພວມພິຈາລະນາອອກຫນັງສືອະນຸຍາດໃຫ້ໝາກໄມ້ 2 ປະເພດຕື່ມອີກ ນັ້ນແມ່ນ ໝາກມ່ວງ ແລະ ….ເຂົ້າຕະຫລາດນີ້. ໃນສະພາບຫວຽດນາມ ພວມຊອກວິທີເປີດກວ້າງສົ້ນອອກໃຫ້ແກ່ບັນດາຜະລິດຕະພັນກະເສດ ຊື່ງເຄີຍແມ່ນທ່າແຮງຂອງຫວຽດນາມ, ເລື່ອງໝາກໄມ້ສົດຈຳນວນຫນຶ່ງຂອງຫວຽດນາມ ແຊກຊືມເຂົ້າຕະຫລາດ ດ້ວຍພົນລະເມືອງເກືອບ 320 ລ້ານຄົນ ຈະເປີດກາລະໂອກາດໃຫຍ່ໃຫ້ແກ່ຊາວກະສິກອນ ແລະ ວິສາຫະກິດຫວຽດນາມ. ເດືອນ 8 ຜ່ານມາ, ສັນຍາສົ່ງອອກປາທູນາ ສະບັບທຳອິດ ຕາມຮູບແບບຂຸດຄົ້ນ ແລະ ເກັບຊື້, ສົ່ງອອກປາທູນາ ທົດລອງ ໄປຍັງຕະຫລາດ ຍີ່ປຸ່ນ ກໍໄດ້ຮັບການປະຕິບັດ, ເປີດທິດໃຫມ່ໃຫ້ແກ່ການສົ່ງອອກປາທູນາໄປຍັງຕະຫລາດມີຄວາມສາມາດບົ່ມຊ້ອນນີ້.
ປີ 2014, ການສົ່ງອອກຂອງຫວຽດນາມ ໄດ້ ແລະ ພວມສ້າງບາດກ້າວຫັນປ່ຽນໃຫມ່. ພ້ອມກັບຈຳກັດການສົ່ງອອກວັດຖຸດິບ, ເພີ່ມມູນຄ່າເພີ່ມໃນວົງເງິນສົ່ງອອກ, ຫວຽດນາມ ກໍຕັ້ງຫນ້າເຈລະຈາບັນດາສັນຍາການຄ້າ ເປີດກາລະໂອກາດສົ່ງອອກໃຫມ່ໃຫ້ແກ່ບັນດາປະເພດສິນຄ້າ. ນີ້ແມ່ນບັນດາບາດກ້າວ ເຮັດໃຫ້ ວົງເງິນສົ່ງອອກຂອງຫວຽດນາມໃນໄລຍະຈະມາເຖິງຈະມີການປ່ຽນແປງ.