(vovworld) - ນັບແຕ່ປີ 1997 ເປັນຕົ້ນມາ, ຫວຽດນາມ ຖືກຈັດເຂົ້າໃນຈຳນວນ 4 ປະເທດສົ່ງອອກກາເຟອັນດັບຕົ້ນຂອງໂລກ, ແຕ່ພາຍຫລັງ 15 ປີ ຫວຽດນາມ ຈຶ່ງສາມາດລື່ນກາຍ ບຣາຊີນ ກາຍເປັນປະເທດສົ່ງອອກກາເຟອັນດັບຫນຶ່ງຂອງໂລກໄດ້.
 |
ໃນໄລຍະ 10 ປີມານີ້, ກາເຟຍາມໃດກໍແມ່ນຜະລິດຕະພັນກະເສດປະເພດຫນຶ່ງທີ່ມີມູນຄ່າການສົ່ງອອກຫລາຍອັນດັບ 2 ຖັດຈາກເຂົ້າສານ. ການສົ່ງອອກກາເຟຂອງ ຫວຽດນາມ ໃນໄລຍະຕົ້ນປີນີ້ເພີ່ມຂຶ້ນຢ່າງລ່ຽນຕິດ ບັນລຸເກືອບ 270 ລ້ານ USD ໃນເດືອນ 8 (ເດືອນ 7 ບັນລຸກວ່າ 250 ລ້ານ USD) ນັ້ນແມ່ນສັນຍານດີພໍສົມຄວນ.ນັບແຕ່ຕົ້ນປີ, ການສົ່ງອອກກາເຟຂອງ ຫວຽດນາມ ບັນລຸເກືອບ 1,3 ລ້ານໂຕນ ລວມມີມູນຄ່າ ກວ່າ 2,7 ຕື້ USD. ໃນຂະນະນັ້ນ, ຕາມຕົວເລກຂອງອົງການກາເຟສາກົນ (ICO) ແລ້ວ, ພຽງໃນ 6 ເດືອນຕົ້ນປີ 2012, ຫວຽດນາມ ໄດ້ສົ່ງອອກກາເຟລວມມູນຄ່າ 2,5 ຕື້ USD, ເພີ່ມຂຶ້ນ 25% ເມື່ອທຽບໃສ່ໄລຍະດຽວກັນຂອງປີກາຍ ແລະ ຫລາຍກວ່າ 13% ເມື່ອທຽບໃສ່ ບຣາຊີນ, ຊຶ່ງແມ່ນປະເທດນຳຫນ້າໂລກກ່ຽວກັບການສົ່ງອອກກາເຟໃນຕະຫລອດໄລຍະ 10 ປີຜ່ານມາ, ສະນັ້ນ ຫວຽດນາມ ລື່ນກາຍ ບຣາຊີນ ເພື່ອກາຍເປັນປະເທດສົ່ງອອກກາເຟຫລາຍກວ່າໝູ່ຢູ່ໃນໂລກ.
ຕາມຕົວເລກຂອງສະຫະສະມາຄົມກາເຟກາກາວ ຫວຽດນາມ (Vicofa) ແລ້ວ, ໃນໄລຍະ 3 ປີ ແຕ່ປີ 2009 ຮອດປີ 2011, ປະລິມານສົ່ງອອກກາເຟ Arabica ທີ່ມີມູນຄ່າສູງຂອງຫວຽດນາມ ໄປຍັງບັນດາຕະຫລາດໃນໂລກໄດ້ເພີ່ມຂຶ້ນພໍສົມຄວນ, ຈາກ 24.000 ໂຕນໃນປີ 2009 ຂຶ້ນເຖິງ 41.000ໂຕນໃນປີ 2010 ແລະ 50.000 ໂຕນໃນປີ 2011. ໄປຄຽງຄູ່ກັນນັ້ນ, ມູນຄ່າການສົ່ງອອກໄດ້ເພີ່ມຂຶ້ນທົບສອງເທົ່າ, ຈາກ 2.313 USD/ໂຕນໃນປີ 2009 ຂຶ້ນເຖິງ 4.261 USD/ໂຕນ ໃນປີ 2011. ພ້ອມກັນນັ້ນ ລາຄາລະຫວ່າງກາເຟປະເພດ Arabica ແລະ Robusta ນັບມື້ນັບຫ່າງກັນຫລາຍ. ເລື່ອງຍູ້ແຮງການສົ່ງອອກກາເຟປະເພດ Arabica ໄດ້ ແລະ ພວມເຮັດໃຫ້ມູນຄ່າການສົ່ງອອກກາເຟຂອງ ຫວຽດນາມ ເພີ່ມຂຶ້ນໃນໄລຍະຈະມາເຖິງ. ປະຈຸບັນ ກາເຟ ຂອງຫວຽດນາມ ໄດ້ສົ່ງໄປຂາຍຢູ່ 80 ປະເທດ ແລະ ເຂດແຄ້ວນ. ບັນດາຕະຫລາດນຳເຂົ້າກາເຟ ຫວຽດນາມ ຕົ້ນຕໍ ແມ່ນ: ອາເມລິກາ, ຍີ່ປຸ່ນ ແລະ ເອີລົບ, ເປັນຕົ້ນແມ່ນ ເຢຍລະມັນ, ອີຕາລີ, ແບນຊີກ... ຜະລິດຕະພັນກາເຟ ຊາ ຂອງຫວຽດນາມ ນັບມື້ນັບໄດ້ຮັບການຕີລາຄາສູງກ່ຽວກັບດ້ານຄຸນນະພາບຈາກບັນດາບໍລິສັດນຳເຂົ້າຢູ່ໃນໂລກ ນັບທັງຕະຫລາດມີຄວາມຕ້ອງການຄຸນນະພາບສູງຄື ອາເມລິກາ, ເຢຍລະມັນ, ຍີ່ປຸ່ນ ແລະ ແບກຊີກ. ນີ້ແມ່ນສັນຍານເປັນຫນ້າຊື່ນຊົມ, ເຖິງຢ່າງໃດກໍຕາມ ຈຸດໝາຍຊື່ງຂະແຫນງສົ່ງອອກກາເຟຫວຽດນາມ ພວມມຸ່ງໄປເຖິງບໍ່ພຽງແຕ່ແມ່ນການຍົກສູງມູນຄ່າການສົ່ງອອກກາເຟເທົ່ານັ້ນ ຫາກຍັງຍູ້ແຮງການຮ່ວມມືລະຫວ່າງບັນດາວິສາຫະກິດເພື່ອພັດທະນາແບບຍືນຍົງ. ທ່ານ ຫງວຽນກົງແທ່ງ, ຮອງຜູ້້ອຳນວຍການໃຫຍ່ບໍລິສັດກາເຟ ຫວຽດນາມ ໃຫ້ຮູ້ວ່າ:
“ ຂະແຫນງກາເຟ ຫວຽດນາມ ໄດ້ສ້າງສະຫະສະມາຄົມກາເຟກາກາວແລ້ວ, ແລະ ຫວ່າງແລ້ວນີ້ໄດ້ສ້າງຕັ້ງສະໂມສອນບັນດາບໍລິສັດສົ່ງອອກກາເຟອັນດັບຕົ້ນຂອງ ຫວຽດນາມ ລວມມີວິສາຫະກິດສົ່ງອອກກາເຟລາຍໃຫຍ່ 20 ແຫ່ງ ກວມກວ່າ 90% ຕະຫລາດສົ່ງອອກກາເຟຂອງທັງປະເທດ. ເວົ້າລວມແລ້ວ, ຢາກແກ້ງແຍ້ງກັບພື້ນຖານເສດຖະກິດການຕະຫລາດຄືປະຈຸບັນ ບັນດາບໍລິສັດສ່ົງອອກກາເຟຂອງຫວຽດນາມ ຕ້ອງມີຄວາມສາມັກຄີນຳກັນກວ່າ.”
ຫວຽດນາມ ກາຍເປັນປະເທດສົ່ງອອກກາເຟອັນດັບຫນຶ່ງຂອງໂລກ
ພາບ: internet |
ເພື່ອຕອບສະຫນອງຄວາມຕ້ອງການ, ຄວາມນິຍົມຂອງຜູ້ອຸປະໂພກໃນໂລກເທື່ອລະກ້າວ, ໃນໄລຍະ ສະຫະສະມາຄົມກາເຟກາກາວ ຫວຽດນາມ ພວມສຸມໃສ່ປະກອບເຕັກໂນໂລຊີປັບປຸງການປຸງແຕ່ງກາເຟ ເພື່ອເພີ່ມມູນຄ່າການຜະລິດ, ສົ່ງອອກກາເຟຕາມທິດຍືນຍົງ, ໃນນັ້ນ ເພີ່ມອັດຕາສ່ວນນຳໃຊ້ການຜະລິດກະສິກຳທີ່ດີ(ມາດຕະຖານ GAP) ແລະ ສູ້ຊົນເພີ່ມເນື້ອທີ່ປູກກາເຟ ໂດຍມີຫນັງສືຢັ້ງຢືນຕົ້ນກຳເນີດ ຕ້ອງກວມກວ່າເຄິ່ງຫນຶ່ງຍອດຈຳນວນເນື້ອທີ່ດິນປູກກາເຟ. ຄຽງຄູ່ກັນນັ້ນ, ຕ້ອງຍົກອັດຕາສ່ວນກາເຟປຸງແຕ່ງ, ກາເຟສຳເລັດຮູບ , ກາເຟບົດ ກວ່າ 20% ໂດຍນຳໃຊ້ຂັ້ນຕອນ GAP ໃນການຜະລິດກາເຟ, ນຳໃຊ້ມາດຕະຖານໃນການຜະລິດ, ຄຸນນະພາບກາເຟກໍຄືສ້າງເຄື່ອງໝາຍກາເຟ ແລະ ອິດທິພົນໃຫ້ແກ່ກາເຟ ຫວຽດນາມ ເພື່ອແກ້ໄຂສົ້ນອອກເປັນຢ່າງດີ. ທ່ານ ໂດ໋ຮ່ານາມ, ຮອງປະທານສະຫະສະມາຄົມກາເຟກາກາວ ຫວຽດນາມ (VICOFA) ຖືວ່າ:
“ລັດຖະບານ ຄວນສ້າງນະໂຍບາຍໃຫ້ບຸລິມະສິດກວ່າທີ່ມີຕໍ່ຂະແຫນງກາເຟກໍຄືເຂົ້າຮ່ວມບັນດາການເຄື່ອນໄຫວຂອງຂະແຫນງກາເຟ. ບັນດາການເຄື່ອນໄຫວນີ້ຕ້ອງປະກອບສ່ວນສ້າງອິດທິພົນກໍຄືໂຄສະນາພາບພົດຂອງປະເທດຊາດ.”
ໂດຍກຳນົດຄວາມສາມາດບົ່ມຊ້ອນຂອງກາເຟ Arabica ສຳລັບຕະຫລາດໂລກ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໄດ້ວາງຈຸດໝາຍຮອດປີ 2020, ທັງປະເທດຈະປູກກາເຟ ຊາ ໃນເນື້ອທີ່ 40.000 ເຮັກຕາ, ກວມ 8% ຍອດເນື້ອທີ່ປູກກາເຟໃນທົ່ວປະເທດ. ເພື່ອຄຸ້ມຄອງຄຸນນະພາບກາເຟຢ່າງແຫນ້ນແຟ້ນ ຈາກຂອດປູກຝັງຕະຫລອດຮອດການປຸງແຕ່ງ, ມີຜູ້ຊ່ຽວຊານຫລາຍທ່ານຖືວ່າ: ບັນດາຂະແຫນງທີ່ກ່ຽວຂ້ອງຄວນມີນະໂຍບາຍເພື່ອຊ່ວຍເຫລືອຄອບຄົວຊາວກະສິກອນຜະລິດກາເຟ, ຈັດຕັ້ງການປຸງແຕ່ງເປັນຈຸດສຸມ, ສ້າງບັນດາຜະລິດຕະພັນສົ່ງອອກຢ່າງສະເໝີ, ມີມູນຄ່າສູງ. ຂະແຫນງກາເຟໄດ້ປະກອບສ່ວນພໍສົມຄວນໃນອັດຕາສ່ວນຂອງພື້ນຖານເສດຖະກິດກະສິກຳ, ກວມປະມານ 3% GDP, ສ້າງວຽກເຮັດງານທຳໃຫ້ແກ່ຄົນງານກວ່າ 2,5 ລ້ານຄົນ. ເລື່ອງ ຫວຽດນາມ ກາຍເປັນປະເທດສົ່ງອອກກາເຟຫລາຍກວ່າໝູ່ຢູ່ໃນໂລກໄດ້ສ້າງບາດລ້ຽວໃຫມ່ເພື່ອພັດທະນາເຄື່ອງໝາຍກາເຟ ຫວຽດນາມ. ແຕ່ເຖິງຢ່າງໃດກໍຕາມ, ຈຸດໝາຍສຳຄັນກວ່າສຳລັບຂະແຫນງສົ່ງອອກກາເຟ ຫວຽດນາມ ແມ່ນເຮັດແນວໃດຮັກສາທີ່ຕັ້ງນຳຫນ້າ ແລະ ພັດທະນາແບບຍືນຍົງໃນອະນາຄົດໄດ້.
ໂຕຕວນ