ຫວຽດນາມ ພາຍຫລັງ 5 ປີທີ່ ເຂົ້າເປັນສະມາຊິກຂອງອົງການການຄ້າໂລກ WTO

ວັນພຸດ ທີ 14 ມີນາ ຄ.ສ. 2012 | 10:55:34

ການສຳມະນາພາຍຫລັງ 5 ປີທີ່ຫວຽດນາມເຂົ້າເປັນສະມາຊິກ WTO
ພາບ: ຈາກ Internet

(vovworld) - ພາຍຫລັງ 5 ປີທີ່ຫວຽດນາມເຂົ້າເປັນສະມາຊິກອົງການການຄ້າໂລກ WTO, ຕະຫລາດສົ່ງອອກຂອງ ຫວຽດນາມໄດ້ເປີດກວ້າງອອກສູ່ 149 ພື້ນຖານເສດຖະກິດສະມາຊິກ ດ້ວຍວົງເງິນສົ່ງອອກເຕີບໂຕຢ່າງລຽນຕິດ. ເຖິງຢ່າງໃດກໍຕາມ, ຄຽງຂ້າງບັນດາຜົນງານທີ່ບັນລຸໄດ້ນັ້ນ ຍັງຄົງມີສິ່ງທ້າທາຍບໍ່ແມ່ນຫນ້ອຍທີ່ພວມວາງອອກໃຫ້ແກ່ຫວຽດນາມໃນວິວັດການເຂົ້າເປັນສະມາຊິກຂອງ WTO. ທີ່ກອງປະຊຸມສຳມະນາ “5 ປີທີ່ເຂົ້າເປັນສະມາຊິກຂອງ WTO”, ຫວຽດນາມ ໄດ້ ແລະ ຈະມີທີ່ຕັ້ງແນວໃດໃນວິວັດການເຊື່ອມໂຍງ” ຊຶ່ງຫາກໍຈັດຂຶ້ນໃນອາທິດຜ່ານມາຢູ່ ຮ່າໂນ້ຍ, ມີຜູ້ຊ່ຽວຊານດ້ານເສດຖະກິດ, ນັກວາງແຜນນະໂຍບາຍຫລາຍທ່ານຖືວ່າ ພື້ນຖານເສດຖະກິດຫວຽດນາມ ໄດ້ ແລະ ຄວນມີການຫັນປ່ຽນຢ່າງແຂງແຮງກ່ຽວກັບລະບອບເພື່ອເຊ່ືອມໂຍງ ກັບພາກພື້ນ ແລະໂລກຢ່າງເລິກເຊິ່ງ ແລະ ກ້ວາງຂວາງ.

ທ່ານເລືອງວັນຕື້ ອະດີດລັດຖະມົນຕີກະຊວງການຄ້າ, ອະດີດຫົວຫນ້າຄະນະເຈລະຈາເຂົ້າເປັນສະມາຊິກ WTO ຂອງລັດຖະບານຫວຽດນາມຖືວ່າ ເລື່ອງເຂົ້າເປັນສະມາຊິກ WTO ໄດ້ສ້າງເປັນລະບົບກົດໝາຍໃຫມ່ ເພື່ອຮັບໃຊ້ໃຫ້ແກ່ແຜນນະໂຍບາຍສ້າງພື້ນຖານເສດຖະກິດການຕະຫລາດຢ່າງສົມບູນແບບ. ການປ່ຽນແປງຢ່າງເຫັນໄດ້ຊັດນັ້ນແມ່ນ ປະຊາຊົນ ແລະ ວິສາຫະກິດມີຈີນຕະນາການໃຫມ່, ບໍ່ສະເພາະໃນຕະຫລາດພາຍໃນປະເທດເທົ່ານັ້ນ ຫາກຍັງໃນທົ່ວໂລກອີກດ້ວຍ. ຈຸດພົ້ນເດັ່ນທີສອງນັ້ນແມ່ນ ການສົ່ງອອກຂອງຫວຽດນາມ ບັນລຸລະດັບເຕີບໂຕຢ່າງລ່ຽນຕິດ, ພາຍຫລັງ 5 ປີເຂົ້າເປັນສະມາຊິກຂອງ WTO ນັ້ນ ວົງເງິນສົ່ງອອກເພີ່ມຂຶ້ນເກືອບ 98%, ປີ 2011 ບັນລຸເກືອບ 97 ຕື້ USD. ການບໍລິການຈຳຫນ່າຍ, ຂາຍຍ່ອຍກໍພັດທະນາຢ່າງແຮງ, ເລື່ອງສ້າງຕັ້ງບັນດາຊັບພະສິນຄ້າ, ສູນການຄ້າ ແລະ ຮ້ານຂາຍເຄື່ອງນັບຮ້ອຍແຫ່ງໄດ້ເຮັດໃຫ້ໂສມຫນ້າດ້ານການຄ້າຂາຍຍ່ອຍມີການປ່ຽນແປງໄປນຳ, ເຮັດໃຫ້ຄວາມຊີນເຄີຍຊື້ເຄື່ອງຂອງ ຂອງຜູ້ອຸປະໂພກບໍລິໂພກປ່ຽນແປງຕາມທິດສີວິໄລ, ທັນສະໄໝ ແລະ ປະກອບສ່ວນພໍສົມຄວນເຂົ້າໃນການພັດທະນາເສດຖະກິດ ສັງຄົມ. ທ່ານເລືອງວັນຕື້ ໃຫ້ຮູ້ວ່າ:

“ໄລຍະເລີ່ມຕົ້ນການເຈລະຈາເພື່ອເຂົ້າເປັນສະມາຊິກ WTO ລາຍຮັບສະເລ່ຍໃສ່ຫົວຄົນຂອງຫວຽດນາມແມ່ນ 400 USD/ຄົນ/ປີ ແລະ ເມື່ອສີ້ນສຸດການເຈລະຈາໃນໄລຍະຫນຶ່ງ ລາຍຮັບສະເລ່ຍໃສ່ຫົວຄົນໄດ້ຮັບການຍົກສູງຂຶ້ນເທົ່າທຽມກັບບັນດາປະເທດພັດທະນາ ໃນລະດັບປານກາງ1000 USD/ຄົນ/ປີ. ແຕ່ບໍ່ແມ່ນຍ້ອນການເປີດປະຕູຕະຫລາດຈຶ່ງເຮັດໃຫ້ລາຍຮັບເພີ່ມຂຶ້ນ ຫາກແມ່ນຄວາມມານະພະຍາຍາມຂອງທົ່ວປວງຊົນ ພິເສດແມ່ນບັນດາວິສາຫະກິດໄດ້ນຳໃຊ້ການເປີດກວ້າງຕະຫລາດເພື່ອເພີ່ມການລົງທຶນພັດທະນາ. ເມື່ອສິ້ນສຸດການເຈລະຈາເຂົ້າເປັນສະມາຊິກ WTO, ການດຶງດູດເງິນລົງທຶນຈາກຕ່າງປະເທດກໍເພີ່ມຂຶ້ນກະໂດດຂັ້ນ, ຂຶ້ນເຖິງກວ່າ 60 ຕື້ USD ແລະ ເປັນການປະກອບສ່ວນສຳຄັນໃຫ້ແກ່ພື້ນຖານເສດຖະກິດ.”

ຜູ້ຊ່ຽວຊານດ້ານເສດຖະກິດຫລາຍທ່ານຖືວ່າ ຄຽງຂ້າງບັນດາຜົນງານທີ່ບັນລຸໄດ້ພາຍຫລັງ 5 ປີເຂົ້າເປັນສະມາຊິກຂອງ WTO ພື້ນຖານເສດຖະກິດຫວຽດນາມ ຍັງປະສົບກັບສິ່ງທ້າທາຍບໍ່ແມ່ນຫນ້ອຍຈາກກຳລັງດັນຂອງການແກ້ງແຍ້ງເພີ່ມຂຶ້ນ, ນັບທັງຕະຫລາດພາຍໃນ ຍ້ອນວ່າ ຫວຽດນາມຕ້ອງເປີດກວ້າງຕະຫລາດໃຫ້ແກ່ບັນດາວິສາຫະກິດຕ່າງປະເທດເທື່ອລະກ້າວ. ທ່ານເລືອງວັນຕື້ ຖືວ່າ ບັນດາວິສາຫະກິດຫວຽດນາມ ຍັງບໍ່ທັນນຳໃຊ້ບັນດາທ່າໄດ້ປຽບຂອງຕະຫລາດບັນດາປະເທດສະມາຊິກ WTO ເປັນຢ່າງດີ. ເພື່ອໃຫ້ບັນດາວິສາຫະກິດຫວຽດນາມ ນັບມື້ນັບເຕີບໃຫຍ່ໃນ WTO, ຕາມທ່ານນາງ ຟ້າມທິຈິລານ, ຜູ້ຊ່ຽວຊານເສດຖະກິດແລ້ວ ສິ່ງທີ່ຈຳເປັນທີ່ສຸດຍັງຄົງແມ່ນການຍົກສູງກຳລັງແຮງພາຍໃນ ພ້ອມກັນນັ້ນ ບັນດາວິສາຫະກິດຕ້ອງແກ້ໄຂຂໍ້ຕິດຂັດສາມຢ່າງກ່ຽວກັບລະບຽບການ, ພັດທະນາ ແຫລ່ງຊັບພະຍາກອນມະນຸດ ແລະ ພື້ນຖານໂຄງລ່າງ ເພື່ອຍົກສູງກຳລັງແກ້ງແຍ້ງ ພາຍໃນ. ນີ້ກໍແມ່ນບັນດາບົດຮຽນໃຫ້ແກ່ບັນດາການເຈລະຈາສັນຍາການຄ້າອື່ນ, ຕົວຢ່າງຄື ສັນຍາການຄ້າພົວພັນຮ່ວມມືເສດຖະກິດເຂດປາຊີຟີກໃນໄລຍະຈະມາເຖິງ.

ແລະກໍໃນກອງປະຊຸມສຳມະນາ, ທ່ານນາງ ດີງທີ້ໝີ໋ລວານ, ຮອງປະທານປະຈຳ ທັງເປັນເລຂາທິການໃຫຍ່ສະຫະພັນບັນດາບໍລິສັດຂາຍຍ່ອຍຫວຽດນາມ ໃຫ້ຮູ້ວ່າ: ຂະແຫນງຂາຍຍ່ອຍຂອງຫວຽດນາມ ໄດ້ຮັບການສ້າງຕັ້ງ ແລະ ພັດທະນາຢ່າງກະໂດດຂັ້ນພາຍຫລັງ 5 ປີທີ່ເຂົ້າເປັນສະມາຊິກຂອງ WTO. ປະຊາຄົມວິສາຫະກິດຂາຍຍ່ອຍຂອງຫວຽດນາມ ພວມເປັນເຈົ້າການໃນສະພາບການໃຫມ່ເທື່ອລະກ້າວ, ຍົກສູງກຳລັງຄວາມສາມາດດ້ານການແກ້ງແຍ້ງ. ເມື່ອເຂົ້າເປັນສະມາຊິກຂອງ WTO, ຕະຫລາດຂາຍຍ່ອຍຫວຽດນາມ ຍັງຄົງສືບຕໍ່ເປັນເຈົ້າການ ແລະ ພັດທະນາອັດຕາປະກອບສ່ວນເຂົ້າໃນ GDP ຂອງຂະແຫນງຂາຍຍ່ອຍປີ 2005 ແມ່ນ 13,32%,ຮອດປີ 2010 ໄດ້ເພີ່ມຂຶ້ນ 14,43%. ໃນຍອດຈຳນວນລະດັບຂາຍຍ່ອຍສິນຄ້າ ແລະ ບໍລິການຂອງຫວຽດນາມ, ການຂາຍຍ່ອຍຍາມໃດກໍຮັກສາອັດຕາສູງດ້ວຍກວ່າ 79% ເມື່ອທຽບກັບຂະແຫນງອື່ນຄື: ບໍລິການສະຖານທີ່ພັກເຊົາ, ການກິນດື່ມ ແລະ ການບໍລິການການທ່ອງທ່ຽວ. ການຂາຍຍ່ອຍທັນສະໄໝສືບຕໍ່ພັດທະນາຢ່າງແຮງຢູ່ຫວຽດນາມ ດ້ວຍຮ້ານຊັບພະສິນຄ້າ ເກືອບ 640 ແຫ່ງ ແລະ 100 ສູນຄ້າ. ຮອດທ້າຍປີ 2010, ຫວຽດນາມ ມີຕະຫລາດເກືອບ 8.600 ແຫ່ງ.

ຫວຽດນາມ ພາຍຫລັງ 5 ປີທີ່ ເຂົ້າເປັນສະມາຊິກຂອງອົງການການຄ້າໂລກ WTO - ảnh 2

ຂະແຫນງຂາຍຍ່ອຍສິນຄ້າຂອງຫວຽດນາມ
ພັດທະນາ ຢ່າງກະໂດດຂັ້ນພາບປະກອບ: ຈາກ internet

ເຖິງຢ່າງໃດກໍຕາມ, ຕະຫລາດຍັງມີຂໍ້ຈຳກັດຫຼາຍດ້ານຄື: ຂອບຂະຫນາດຕະຫລາດນ້ອຍ ແລະ ກຳລັງຊື້ບໍ່ຫລາຍ, ກະແຈກກະຈາຍບໍ່ມີປະສິດທິຜົນ. ວິສາຫະກິດຂາຍຍ່ອຍຍັງອ່ອນດ້ອຍໃນຫລາຍດ້ານ, ໃນນັ້ນ ມີ 4ຈຸດອ່ອນຕົ້ນຕໍຄື ດ້ານວິຊາການ, ຍຸດທະສາດຍາວນານ, ກຳລັງຄວາມສາມາດ້ານການເງິນ. ເພື່ອໃຫ້ຕະຫລາດຂາຍຍ່ອຍຂອງຫວຽດນາມໄດ້ຮັບການປັບປຸງ ແລະ ຕອບສະຫນອງບັນດາຄວາມຮຽກຮ້ອງຕ້ອງການຢ່າງເຄັ່ງຄັດຂອງຕະຫລາດໂລກ, ທ່ານນາງ ດີງທີ້ໝີ໋ລວານ ຖືວ່າ:

“ລັກສະນະວິຊາການຂອງພວກເຮົາຕ້ອງຍົກສູງໃຫ້ຫລາຍກວ່າອີກ ເພື່ອສາມາດຕອບສະຫນອງບັນດາຄວາມຮຽກຮ້ອງຕ້ອງການ, ດ້ວຍບັນດາການປ່ຽນແປງຢ່າງໃຫມ່ອ່ຽມຂອງຕະຫລາດຂາຍຍ່ອຍຢູ່ຫວຽດນາມ ກໍຄືທ່າອ່ຽງຂາຍຍ່ອຍຂອງໂລກ ພວກເຮົາຕ້ອງຮ່ຳຮຽນເອົາບົດຮຽນຫລາຍຢ່າງເພື່ອຕອບສະຫນອງຄວາມຮຽກຮ້ອງຕ້ອງການຂອງຜູ້ບໍລິໂພກທີ່ນັບມື້ນັບສູງກວ່າ ສະນັ້ນບັນດານັກຂ່າຍຍ່ອຍຕ້ອງຮ່ຳຮຽນຍົກສູງລັກສະນະວິຊາການຂອງຕົນ, ໃນນັ້ນ ມີຄວາມຊຳນານງານໃນການຂາຍຍ່ອຍເພື່ອຮັບໃຊ້ຜູ້ອຸປະໂພກບໍລິໂພກໃຫ້ດີກວ່າເກົ່າ.”

ຕາມບັນດາຜູ້ຊ່ຽວຊານດ້ານເສດຖະກິດແລ້ວ ບົດຮຽນໃຫຍ່ສຸດທີ່ຖອດຖອນມາໄດ້ພາຍຫລັງ 5 ປີທີ່ເຂົ້າເປັນສະມາຊິກຂອງ WTO ສຳລັບພື້ນຖານເສດຖະກິດນັ້ນແມ່ນຕ້ອງເຮັດແນວໃດຍົກສູງກຳລັງຄວາມສາມາດແກ້ງແຍ້ງຂອງລັດ, ວິສາຫະກິດ ແລະ ຜະລິດຕະພັນດ້ວຍບັນດາມາດຕະການຢ່າງແທດຈິງ, ຍາດແຍ່ງເຕັກໂນໂລຊີທີ່ກ້າວຫນ້າເພື່ອຍົກສູງປະສິດທິຜົນເທື່ອລະກ້າວ. ຄຽງຂ້າງນັ້ນ ຕ້ອງເອົາໃຈໃສ່ເຖິງການພັດທະນາແຫລ່ງຊັບພະຍາກອນມະນຸດ ຕອບສະຫນອງຄວາມຮຽກຮ້ອງຕ້ອງການໃນການເຊື່ອມໂຍງ.

ນັກຂ່າວ: ຫວີງຟອງ