(vovworld) - ປີ 2013 ໄດ້ມາຮອດແລ້ວ. ໃນຄວາມເບິກບານມ່ວນຊື່ນຕ້ອນຮັບປີໃຫມ່ 2013 ພ້ອມກັບບັນດາເຜົ່າ, ປະເທດຕ່າງໆໃນໂລກ, ປະຊາຊົນ ຫວຽດນາມ ມີຄວາມເຊື່ອໝັ້ນຕົນເອງໃນການສ້າງບັນດາຄາດໝາຍພັດທະນາ, ນັ້ນແມ່ນຮັກສາເສດຖະກິດມະຫາພາກເປັນປົກກະຕິ, ຮັກສາທ່າເຕີບໂຕ, ຮັບປະກັນຊີວິດສັງຄົມ, ສືບຕໍ່ເຊື່ອມໂຍງຢ່າງເລິກເຊິ່ງ ແລະ ກວ້າງຂວາງຢູ່ພາກພື້ນ ແລະ ໃນໂລກ.
ສຳລັບແຕ່ລະປະເທດ, ເສດຖະກິດມີບົດບາດສຳຄັນຍິ່ງໃນການພັດທະນາປະເທດຊາດ. ໃນວາລະປະຊຸມຜັນຂະຫຍາຍມະຕິຂອງສະພາແຫ່ງຊາດກ່ຽວກັບຄາດໝາຍພັດທະນາເສດຖະກິດປີ 2013 ຊື່ງດຳເນີນໄປໃນຊຸມມື້ທ້າຍເດືອນ 12 ຜ່ານມາ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ໄດ້ຊີ້ແຈງວ່າ: ໃນປີ 2013 ຫວຽດນາມ ຈະສືບຕໍ່ບຸລິມະສິດສຸມໃສ່ເພີ່ມທະວີການຮັກສາເສດຖະກິດມະຫາພາກເປັນປົກກະຕິ, ຮັກສາໄພເງິນເຟີ້ໃຫ້ຢູ່ໃນລະດັບຕຳ່ກວ່າ ແລະ ຮັກສາການເຕີບໂຕໃຫ້ຢູ່ໃນລະດັບສູງກວ່າປີ 2012. ຄາດໝາຍນີ້ແມ່ນເລີ່ມມາຈາກບັນດາພື້ນຖານຕົ້ນຕໍຂອງການພັດທະນາເສດຖະກິດສັງຄົມຂອງຫວຽດນາມ ໃນຊຸມປີຜ່ານມາ, ຊຶ່ງຕາມນັ້ນ ຄວາມມີສະຖຽນລະພາບດ້ານການເມືອງ, ສັງຄົມ ໄດ້ຊ່ວຍໃຫ້ ຫວຽດນາມ ດຶງດູດເງິນລົງທຶນຂອງຕ່າງປະເທດກວ່າ 12 ຕື້ USD ແລະ ບັນດາຂົງເຂດການເມືອງ, ເສດຖະກິດ, ວັດທະນະທຳສັງຄົມ ລ້ວນແຕ່ມີການຫັນປ່ຽນຢ່າງຕັ້ງຫນ້າ. ຄາດໝາຍນີ້ ກໍແມ່ນການສືບຕໍ່ຜັນຂະຫຍາຍການປະຕິບັດບັນດາຫນ້າທີ່ກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່ຕິດພັນກັບການປ່ຽນໃຫມ່ຮູຸບແບບການເຕີບໂຕ, ຊຶ່ງບັນດາຂະແຫນງການ, ຂັ້ນຕ່າງໆຂອງຫວຽດນາມ ໄດ້ຜັນຂະຫຍາຍຢ່າງແຂງແຮງ. ເພື່ອປະຕິບັດຫນ້າທີ່ນີ້ໃຫ້ໄດ້, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ຊີ້ແຈງວ່າ ຕ້ອງສຸມໃສ່ບໍລິຫານນະໂຍບາຍເງິນຕາຢ່າງລະມັດລະວັງ, ມີປະສິດທິຜົນ, ນຳໃຊ້ນະໂຍບາຍເງິນຕາຢ່າງມີໄຫວພິບ, ປະສິດທິຜົນຕິດພັນກັບນະໂຍບາຍງົບປະມານຕາມຈຸດໝາຍຄວບຄຸມໄພເງິນເຟີ້, ເພີ່ມທະວີການຮັກສາເສດຖະກິດມະຫາພາກເປັນປົກກະຕິ ແລະ ຮັບປະກັນການເຕີບໂຕຢ່າງເໝາະສົມ. ການສ້າງໂຄງປະກອບລັດວິສາຫະກິດຄືນໃຫມ່ ແມ່ນກຳລັງຫນູນສຳຄັນເພື່ອຊຸກຍູ້ການເຕີບໂຕດ້ານເສດຖະກິດຫວຽດນາມໃນປີ 2013. ກ່ອນເຂົ້າສູ່ປີໃຫມ່, ບັນດານັກລົງທຶນຕ່າງປະເທດສະແດງຄວາມເຫັນດີເຫັນພ້ອມກັບຄາດໝາຍພັດທະນາຂອງຫວຽດນາມ. ທ່ານ Moronori Tsuno ຫົວຫນ້າອົງການຮ່ວມມືສາກົນຍີ່ປຸ່ນ (Jica) ປະຈຳ ຫວຽດນາມ ຖືວ່າ:
“ໃນປີຈະມາເຖິງ, ຕາມພວກຂ້າພະເຈົ້າແລ້ວ, ເພື່ອຮັກສາພື້ນຖານເສດຖະກິດມະຫາພາກຂອງ ຫວຽດນາມໃຫ້ເປັນປົກກະຕິກໍຄືຮັກສາສະພາບການດຳເນີນທຸລະກິດຂອງບັນດາວິສາຫະກິດໃຫ້ເປັນປົກກະຕິ, ກ່ອນອື່ນໝົດ ຫວຽດນາມ ຄວນປະຕິຮູບລະບົບທະນາຄານກໍຄືສະພາບການດຳເນີນທຸລະກິດຂອງບັນດາລັດວິສາຫະກິດ. ນີ້ກໍແມ່ນທິດທາງອັນຖືກຕ້ອງເພື່ອປະກອບສ່ວນຮັກສາພື້ນຖານເສດຖະກິດມະຫາພາກເປັນປົກກະຕິຂອງຫວຽດນາມ ໃນຊຸູມປີຈະມາເຖິງ. ປີ 2013, ແມ່ນປີທີ່ເສດຖະກິດປະສົບກັບຄວາມຫຍຸ້ງຍາກ, ເຖິງແນວໃດກໍ ຂ້າພະເຈົ້າກໍປາດຖະຫນາ ແລະ ສົ່ງຄຳອວຍພອນອັນດີງາມທີ່ສຸດໃຫ້ແກ່ການພັດທະນາຂອງບັນດາວິສາຫະກິດ ຫວຽດນາມ ໃນໄລຍະຈະມາເຖິງ.”
ພາບປະກອບ:internet
|
ຄຽງຄູ່ກັບການຢືດໝັ້ນປະຕິບັດບັນດາມາດຕະການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ບັນຫາຮັບປະກັນຊີວິດສັງຄົມໃຫ້ແກ່ປະຊາຊົນ ສືບຕໍ່ແມ່ນຫນ້າທີ່ຈຸດສຸມຂອງ ຫວຽດນາມ ໃນປີ 2013. ລັດຖະບານ ຫວຽດນາມ ຫາກໍ່ຮຽກຮ້ອງບັນດາກະຊວງ, ຂະແຫນງການ, ທ້ອງຖິ່ນຕ່າງໆຈົ່ງເອົາໃຈໃສ່ປະຕິບັດວຽກງານຮັບປະກັນຊີວິດສັງຄົມ, ສະຫວັດດີການ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີກວ່າເກົ່າ, ໃນນັ້ນ ເອົາໃຈໃສ່ເປັນພິເສດເຖິງບັນດາມາດຕະການສອນວິຊາຊີບ, ສ້າງວຽກເຮັດງານທຳ, ເພີ່ມລາຍຮັບໃຫ້ແກ່ຄົນງານ, ຫລຸດຜ່ອນຄວາມທຸກຍາກຕາມທິດວ່ອງໄວ ແລະ ໝັ້ນຄົງ, ປະຕິບັດນະໂຍບາຍບຸລິມະສິດຕໍ່ຜູ້ມີຄຸນງາມຄວາມດີ, ເປົ້າໝາຍນະໂຍບາຍ, ຄອບຄົວທຸກຍາກ, ໃນນັ້ນ ຮັບປະກັນພື້ນຖານການສຶກສາທີ່ີມີຄຸນນະພາບສູງໃຫ້ໝົດທຸກຄົນ. ໃນການກຳນົດທິດພັດທະນາການສຶກສາຮອດປີ 2013, ທ່ານ ຫງວຽນວີງຫຽນ ລັດຖະມົນຕີະຊວງສຶກສາ ແລະ ບຳລຸງສ້າງ ຫວຽດນາມ ເນັ້ນຫນັກວ່າ:
“ພວກຂ້າພະເຈົ້າມຸ່ງໄປເຖິງເປົ້າໝາຍຮັບປະກັນພື້ນຖານການສຶກສາມີຄຸນນະພາບສູງໃຫ້ແກ່ໝົດທຸກຄົນ. ພິເສດ ແມ່ນຫນູນຊ່ວຍລູກຫລານຢູ່ເຂດຊາວຊົນເຜົ່າສ່ວນຫນ້ອຍ, ລູກຫລານບັນດາຄອບຄົວຢູ່ເຂດຫ່າງໄກສອກຫລີກ, ຄອບຄົວປະສົບກັບຄວາມຫຍຸ້ງຍາກ, ບັນດາເປົ້າໝາຍດອ້ຍໂອກາດໃນສັງຄົມເພ່ືອໃຫ້ມີພື້ນຖານການສຶກສາມີຄຸນນະພາບສູງ. ພ້ອມກັນນັ້ນ ຫນູູນຊ່ວຍເຂດຫ່າງໄກສອກຫລີກ, ທາງດ້ານເສດຖະກິດສັງຄົມປະສົບກັບຄວາມຫຍຸ້ງຍາກ ຈະມີໂຮງຮຽນທີ່ມີຄຸນນະພາບສູງເພື່ອຕອບສະຫນອງຄວາມມຸ່ງມາດປາດຖະຫນາຂອງບັນດາຄອບຄົວທີ່ມີເງື່ອນໄຂລົງທຶນ ເສດຖະກິດ, ການເງິນເພື່ອໃຫ້ລູກຫລານໄປໂຮງຮຽນ.”
ເພື່ອປະກອບສ່ວນຮັກສະຖຽນລະພາບດ້ານການເມືອງ ແລະ ຊຸກຍູ້ຫນ້າທີ່ພັດທະນາເສດຖະກິດສັງຄົມພາຍໃນປະເທດ, ການເຄື່ອນໄຫວການຕ່າງປະເທດຕາມທິດຊຸກຍູ້ການເຊື່ອມໂຍງຈະໄດ້ຮັບການເພີ່ມທະວີ ໃນປີ 2013. ທ່ານ ຮ່ວາງແອນຕວນ ຫົວຫນ້າສະຖາບັນຍຸດທະສາດການຕ່າງປະເທດຫວຽດນາມ ໃຫ້ຮູ້ວ່າ:
“ບັນດາການເຄື່ອນໄຫວການຕ່າງປະເທດ ໃນປີ 2013 ຍັງຄົງສືບຕໍ່ມຸ່ງໄປເຖິງສ້າງການພົວພັນທີ່ໄວ້ເນື້ອເຊ່ືອໃຈ, ການພົວພັນຄູ່ຮ່ວມມືຢ່າງແຫນ້ນແຟ້ນ ລະຫວ່າງ ຫວຽດນາມ ແລະ ບັນດາຄູ່ຮ່ວມມືໃຫຍ່ ແລະ ສຳຄັນໃນພາກພື້ນ ແລະ ໃນໂລກ, ສືບຕໍ່ເສີມຂະຫຍາຍບົດບາດ, ອິດທິພົນຂອງຫວຽດນາມ ໃນພາກພື້ນ ແລະ ໃນໂລກ. ປີ 2013, ມີຈຸດພິເສດ ນັ້ນແມ່ນເປັນຄັ້ງທຳອິດ ມີຊາວຫວຽດນາມ ຜູ້ຫນຶ່ງໄດ້ດຳລົງຕຳແຫນ່ງເປັນເລຂາທິການໃຫຍ່ ອາຊຽນ. ນີ້ກໍແມ່ນເງື່ອນໄຂເພື່ອໃຫ້ ຫວຽດນາມ ສາມາດເສີມະຫຍາຍພາບພົດຂອງ ຫວຽດນາມ, ເສີມຂະຫຍາຍກຳລັງແຮງດ້ານການຕ່າງປະເທດທູດຢູ່ພາຍນອກ. ການທູດ ຫວຽດນາມ ໃນປີ 2013 ຄວນມານະພະຍາຍາມກວ່າອີກ, ພິເສດ ແມ່ນໃນບັນຫາການທູດເສດຖະກິດ.”
ໃນສະພາບການພື້ນຖານເສດຖະກິດໂລກບໍ່ທັນຟື້ນຕົວຢ່າງສົມບູນນັ້ນ, ພ້ອມກັບປະເທດຕ່າງໆໃນໂລກ, ຫວຽດນາມ ກ້າວເຂົ້າສູ່ປີ 2013 ດ້ວຍກຳລັງແຮງພາຍໃນ. ບົນພື້ນຖານບັນດາຜົນງານດ້ານເສດຖະກິດສັງຄົມໃນປີ 2013, ຫວຽດນາມ ຈະກ້າວເຂົ້າສູ່ປີໃຫມ່ 2013 ດ້ວຍບັນດາບາດກ້າວທີ່ໝັ້ນຄົງ ແລະ ປົກກະຕິ.