(vovworld)- ປາທູນາ ແມ່ນຫນຶ່ງໃນບັນດາປະເພດສິນຄ້າສົ່ງອອກທີ່ມີແງ່ຫວັງຂອງຫວຽດນາມ ແລະ ໄດ້ຮັບການຕີລາຄາສູງກ່ຽວກັບຄຸນນະພາບຈາກລູກຄ້າ. ເຖິງຢ່າງໃດກໍຕາມ, ປະຈຸບັນ ການຫາປາທູນາຂອງຊາວປະມົງ ຍັງຄົງອີງໃສ່ປະສົບການ, ບໍ່ທັນໄດ້ຮັບການລົງທຶນອຸປະກອນຫລາຍ. ໃນຄວາມມານະພະຍາຍາມຟື້ນຕົວເສດຖະກິດທະເລ ຊື່ງແມ່ນທ່າແຮງຂອງພາກກາງ, ຊາວປະມົງບັນດາແຂວງ ຄື ບີງດີ້ງ, ຟູອຽນ, ແຄງຮ່ວາ ພວມຈັດຕັ້ງການຜະລິດຄືນໃຫມ່, ໝູນໃຊ້ເຕັກໂນໂລຊີຫາປາຂອງຍີ່ປຸ່ນ, ເປີດທິດພັດທະນາການສົ່ງອອກປາທູນາ. ບົດຂຽນຂອງ ຫາຍເຊີນ, ນັກຂ່າວວິທະຍຸກະຈາຍສຽງຫວຽດນາມທີ່ມີຫົວຂໍ້ວ່າ: ອາຊີບຫາປາທູນາຢູ່ຫວຽດນາມ
ປາທູນາ
ພາບ:http://vietstock.vn
|
ປະຈຸບັນ ທົ່ວປະເທດມີກຳປັ່ນຫາປາທູນາປະມານ 3.600 ລຳໂດຍສຸມໃສ່ຕົ້ນຕໍຢູ່ 3 ແຂວງແຄມທະເລທາງທິດໃຕ້ພາກກາງຫວຽດນາມ ນັ້ນແມ່ນ ບີງດີ້ງ, ຟຸອຽນ ແລະ ແຄງຮ່ວາ. ໃນສອງສາມປີມານີ້, ປະລິມານການຂຸດຄົ້ນປາທູນາມີຄວາມເປັນປົກກະຕິ, ບັນລຸປະມານ 16.000 ໂຕນ/ປີ, ມູນຄ່າການສົ່ງອອກປາທູນາ ເພີ່ມຂຶ້ນເກືອບ 600 ລ້ານ USDໃນປີ ກາຍ. ປະຈຸບັນ, ປາທູນາຂອງຫວຽດນາມ ໄດ້ສົ່ງອອກໄປຍັງເກືອບ 100 ປະເທດ ແລະ ເຂດແຄ້ວນ, ຕະຫລາດຕົ້ນຕໍແມ່ນສະຫະພາບເອີລົບ, ອາເມລິກາ… ແຕ່ລະປີ, ຍີ່ປຸ່ນ ບໍລິໂພກປາທູນາປະມານ 600.000 ໂຕນ. ນີ້ແມ່ນກາລະໂອກາດທີ່ດີເພື່ອສົ່ງອອກປາທູນາ ຫວຽດນາມ ໄປຂາຍຢູ່ບັນດາຕະຫລາດໃຫຍ່.
ໃນຊຸມມື້ນີ້ ບັນຍາກາດຢູ່ທ່າກຳປັ່ນຫລາຍແຫ່ງຂອງບັນດາແຂວງພາກກາງຍິ່ງຟົດຟື້ນຍ້ອນເຮືອ ກຳປັ່ນເຂົ້າທຽບທ່າເປັນຈຳນວນຫລວງຫລາຍ. ໄລຍະນີ້, ບັນດາເຂດຫາປາເກົ່າ ປະກົດມີປາທູນາຫລວງຫລາຍ, ສະນັ້ນ ເຮືອກຳປັ່ນຫາປາທູນາຂຸດຄົ້ນປະລິມານປາຫລາຍສົມຄວນ. ກຳປັ່ນລຳໃດກໍຫາປາທູນາໄດ້ແຕ່ 2 ໂຕນຂຶ້ນໄປ. ອ້າຍຟ້າມວັນຮົ່ງ, ຊາວປະມົງຢູ່ຕາແສງ 6, ນະຄອນ ຕູຍຮ່ວາ, ແຂວງ ຟູອຽນ ໃຫ້ຮູ້ວ່າ: ການຫາປາທູນາໄດ້ຮັບຜົນດີ, ລາຄາເກັບຊື້ສູງ ສະນັ້ນ ພໍ່ແມ່ປະຊາຊົນສືບຕໍ່ອອກຝັ່ງຫາປາ.
“ໃນການອອກຝັ່ງຫາປາຜ່ານມາ ສະເພາະ ພໍ່ແມ່ປະຊາຊົນແຂວງ ຟູອຽນ ບັນລຸໄດ້ 100% ແລະ ລາຍຮັບເກັບມາໄດ້ປະມານ 100 ລ້ານດົງ. ໃນການຫາປາຄັ້ງນີ້ ຂ້າພະເຈົ້າຕຶກປາໄດ້ 38 ໂຕ, ດ້ວຍນ້ຳຫນັກປະມານ 1,9 ໂຕນ, ລາຍຮັບເກັບມາໄດ້ກວ່າ 80 ລ້ານດົງ. ຄັ້ງຈະມາເຖິງ, ຂ້າພະເຈົ້າຈະປະຕິບັດທົດລອງຕາມຮູບແບບຂອງຍີ່ປຸ່ນ ເພື່ອໃຫ້ປາບັນລຸຄຸນນະພາບສູງກວ່າ.”
ປຸງແຕ່ງປາທູນາ
ພາບ:baokhanhoa.com
|
ໃນໄລຍະມໍ່ໆມານີ້ ຊາວປະມົງ ບັນດາແຂວງແຄມທະເລພາກກາງຫວຽດນາມ ພວມໝູນໃຊ້ ເຕັກໂນໂລຊີຂອງ ຍີ່ປຸ່ນ ໃນການຫາປາທູນາ. ກອງກຳປັ່ນຫາປາທູນາຂອງຊາວປະມົງ ຕາແສງ ຕາມກວານບັກ, ເມືອງ ຮ່ວາຍເຍີນ ແຂວງ ບີງດີ້ງ ແມ່ນນຳຫນ້າກ່ຽວກັບວິທີຫາປາໃຫມ່ ໄດ້ສ້າງກຳລັງຫນູນໃຫ້ແກ່ຊາວປະມົງພາກກາງ ປ່ຽນແປງວິທີຫາປາເກົ່າ. ໃນການເດີນທະເລຫາປາ, ຊາວປະມົງໄດ້ຮັບການຊ່ວຍເຫລືອຈາກອຳນາດການປົກຄອງ, ວິສາຫະກິດ ແລະ ຄູ່ຮ່ວມມືຍີ່ປຸ່ນ ຕິດຕັ້ງບັນດາພາຫະນະອຸປະກອນຫາປາທັນສະໄຫມ. ໃນຊຸມມື້ໃກ້ບຸນປີໃຫມ່ປະຈຳຊາດຜ່ານມາ, ມີປາທູນາເກືອບ 10 ໂຕ ໄດ້ຂົນສົ່ງທາງອາກາດໄປຂາຍຢູ່ຕະຫລາດ Osaka ຂອງຍີ່ປຸ່ນ. ພາຍຫລັງສົ່ງອອກປາທູນາເປັນ 2 ຄັ້ງ, ມີປາທູນາເກືອບ 20 ໂຕຂອງຊາວປະມົງ ບີ່ງດີ້ງ ກໍໄດ້ຈຳຫນ່າຍຢູ່ຕະຫລາດນີ້. ໂຄງການຮ່ວມມືລະຫວ່າງ ແຂວງ ບີງດີ້ງ ແລະ ຄູ່ຮ່ວມມື ນັ້ນແມ່ນບໍລິສັດ Kato Offce ຂອງຍີ່ປຸ່ນ ເບື້ອງຕົ້ນໄດ້ນຳມາເຊິ່ງສັນຍານດີສົມຄວນ, ເປີດທິດໃຫມ່ໃຫ້ແກ່ການສົ່ງອອກປາທູນາຫວຽດນາມ ເຂົ້າຕະຫລາດ ຍີ່ປຸ່ນ. ທ່ານນາງ ກາວທິກີມລານ, ຜູ້ອຳນວຍການໃຫຍ່ ບໍລິສັດຫຸ້ນສ່ວນສິນໃນນ້ຳ ບີງດີ້ງ(Bidifsco) ໃຫ້ຮູ້ວ່າ: ແຫລ່ງປາທູນາໄດ້ຮັບການຂຸດຄົ້ນຕາມຮູບແບບໃຫມ່ ໄດ້ຊ່ວຍໃຫ້ວິສາຫະກິດມີຄວາມສາມາດເພື່ອສົ່ງຜະລິດຕະພັນໄປຍັງບັນດາຕະຫລາດໃຫຍ່ໄດ້.
“ແຂວງໄດ້ຊີ້ນຳວິສາຫະກິດກໍຄືເມືອງ ຮ່ວາຍເຍີນ ສອນອາຊີບຫາປາໃຫ້ຊາວປະມົງຄືນໃຫມ່, ມີຄວາມຊຳນານງານກວ່າ, ນັບທັງທິດສະດີ ແລະ ການປະຕິບັດໂດຍກົງ, ຈະສຳຫລວດກວດຄືນເຕັກໂນໂລຊີຂອງຍີ່ປຸ່ນ, ດັດປັບ, ເພີ່ມເຕີມອຸປະກອນຢູ່ກຳປັ່ນໃຫ້ພຽງພໍ ເໝາະສົມກັບເງື່ອນໄຂຫາປາຢູ່ແຂວງ ບີງດີ້ງ.”
ຄຽງຄູ່ກັບການສົ່ງອອກປາທູນາໄປຍັງ ຍີ່ປຸ່ນ, ແຂວງ ບີງດີ້ງ ພວມເປີດກວ້າງການຈຳຫນ່າຍປາທູນາສົດຢູ່ບັນດາຮ້ານຄ້າຂອງ ຍີ່ປຸ່ນ ປະຈຳຫວຽດນາມ ແລະ ສົ່ງໄປຍັງຕະຫລາດລັດເຊຍ ແລະ ເອີລົບ. ປະຈຸບັນ, ວິສາຫະກິດຍີ່ປຸ່ນ ຈຳນວນຫນຶ່ງ ໄດ້ຕັ້ງບັນຫາຢາກລົງທຶນໂຮງງານປຸງແຕ່ງສິນໃນນ້ຳສົ່ງອອກດ້ວຍຂອບຂະຫນາດໃຫຍ່ຢູ່ແຂວງ ບີງດີ້ງ. ແຂວງ ບີງດີ້ງ ແລະ ບັນດາແຂວງທາງພາກກາງຫວຽດນາມ ມີທ່າແຮງກ່ຽວກັບການຫາປາທູນາຢູ່ພາກກາງ ກໍພວມດຶງດູດວິສາຫະກິດພາຍໃນ ແລະ ຕ່າງປະເທດ ລົງທຶນເຂົ້າເຂດອຸດສາຫະກຳປຸງແຕ່າງສິນໃນນ້ຳ. ນີ້ຈະແມ່ນທິດກ້າວເດີນຕັ້ງຫນ້າ ເປີດແງ່ຫວັງນຳການສົ່ງອອກປາທູນາ ຫວຽດນາມ ອອກສູ່ຫລາຍປະເທດໃນໂລກ.