ອຳນາດການປົກຄອງປະກອບສ່ວນສ້າງເຄື່ອງໝາຍການຄ້າ PCI 2015 ຢືນອັນດັບທີ 2 ຂອງດົ່ງທາບ

Thanh Tung - Le Phuong -

ວັນອັງຄານ ທີ 17 ພຶດສະພາ ຄ.ສ. 2016 | 12:31:34

(vovworld) - ໃນຕາຕະລາງຈັດອັນດັບດັດຊະນີກຳລັງຄວາມສາມາດແກ່ງແຍ້ງຂັ້ນແຂວງ (PCI) 2015, ແຂວງດົ່ງທາບ ຢືນອັນດັບທີ 2 ໄວ້ໄດ້ ແລະ ໄດ້ນຳໜ້າຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ດ້ວຍ 66,39 ຄະແນນ. ນີ້ກໍແມ່ນປີທີ 8 ຢ່າງລຽນຕິດທີ່ທ້ອງຖິ່ນນີ້ນອນໃນກຸ່ມ 5 ແຂວງ, ນະຄອນທີ່ມີດັດຊະນີ PCI ນຳໜ້າໃນທົ່ວປະເທດ. ນີ້ແມ່ນຄວາມເບີກບ່ານມ່ວນຊື່ນຍ້ອນ “ເຄື່ອງໝາຍການຄ້າດົ່ງທາບ - PCI” ຄ່ອຍໆໄດ້ຮັບການຢັ້ງຢືນ. ນີ້ກໍແມ່ນໝາກຜົນຂອງຄວາມເຫັນດີເຫັນພ້ອມລະຫວ່າງອຳນາດການປົກຄອງ ແລະ ວິສາຫະກິດໃນການປະກອບສ່ວນສ້າງບາດກ້າວບຸກທະລຸຂອງດົ່ງທາບ. ບົດຂຽນຂອງ ແທງຕຸ່ງ, ນັກຂ່າວ VOV.

PCI ແມ່ນຊຸດຕົວເລກດັດຂະນີທີ່ໄດ້ນຳໃຊ້ຢ່າງກວ້າງຂວາງຢູ່ຫວຽດນາມ ເພື່ອຕີລາຄາລະດັບຄວາມສະດວກຂອງລະບຽບການບໍລະຫານຢູ່ບັນດາອົງການລັດຂັ້ນແຂວງແຕກຕ່າງກັນ ແລະ ລະດັບໜູນຊ່ວຍຂອງອຳນາດການປົກຄອງຕາມການຕີລາຄາຂອງບັນດາວິສາຫະກິດເອກະຊົນ ພວມເຄື່ອນໄຫວຢູ່ທ້ອນຖິ່ນນັ້ນ. ໃນຈຳນວນ 10 ຕົວເລກດັດຊະນີພາກສ່ວນຕີລາຄາ PCI 2015, ແຂວງດົ່ງທາບ ມີ 2/10 ຕົວເລກດັດຊະນີພາກສ່ວນຢືນແຖວໜ້າຂອງທົ່ວປະເທດ, ນັ້ນແມ່ນຄວາມຂະຫຍັນຂັນເຄື່ອນຂອງອຳນາດການປົກຄອງ ແລະ ເວລາເຮັດລະບຽບການ. ຕາມບັນດານັກລົງທຶນໃນບໍລິິເວນແຂວງຫຼາຍຄົນແລ້ວ, ທ່າແຮງຂອງທ້ອງຖິ່ນນັ້ນແມ່ນ ຄວາມຂະຫຍັນຂັນເຄື່ອນ, ການຕັດສິນໃຈຂອງການນຳແຂວງ ແລະ ຮ່ວມເດີນທາງພ້ອມກັບວິສາຫະກິດ. ພິເສດ, ບ່ອນໃດປະສົບກັບຄວາມຫຍຸ້ງຍາກ, ວິສາຫະກິດມີຂໍ້ຕິດຂັດ, ທາງແຂວງລ້ວນແຕ່ມາຊອກຮູ້ ແລະ ແກ້ໄຂຢ່າງທັນການ. ທ່ານ Jo Hyung Tae, ຜູ້ອຳນວຍການບໍລິສັດ In Jae ດົ່ງທາບ ຈຳກັດ, ດ້ວຍເງິນລົງທຶນ 100% ຂອງສ.ເກົາຫຼີ ໃຫ້ຮູ້ວ່າ, ບໍລິສັດຂອງທ່ານຫາກໍໄດ້ຮັບໃບຢັ້ງຢືນການລົງທຶນຂອງແຂວງ ພາຍຫຼັງເຮັດສຳເລັດລະບຽບການຈົດທະບຽນໃນເວລາອັນສັ້ນໆ. ກໍຄືນັກລົງທຶນຫຼາຍຄົນທີ່ພວມມີໂຄງການຜະລິດຢູ່ດົ່ງທາບ, ທ່ານ Jo Hyung Tae ກໍ່ສະແດງຄວາມປະເອີບໃຈ ແລະ ຕີລາຄາສູງໝາກຜົນ PCI 2015 ເຊິ່ງດົ່ງທາບ ບັນລຸໄດ້.

“ຂ້າພະເຈົ້າຕີລາຄາສູງສະພາບແວດລ້ອມແຫ່ງການລົງທຶນຂອງແຂວງ ດົ່ງທາບ. ເມື່ອເຂົ້າມານີ້, ພວກຂ້້າພະເຈົ້າໄດ້ຮັບບຸລິມະສິດຈາກອຳນາດການປົກຄອງຫຼາຍທີ່ສຸດ. ຂ້າພະເຈົ້າເຫັນວ່າ, ຊາວ ດົ່ງທາບ ມີຄວາມໃກ້ຊິດສະໜິດສະໜົມ. ໃນໄລຍະຜ່ານມາ, ພວກຂ້າພະເຈົ້າກໍ່ໄດ້ຮັບການໜູນຊ່ວຍຈາກບັນດາພະແນກ, ຂະແໜງການຫຼາຍຢ່າງ. ໃນໄລຍະຈະມາເຖິງ, ບໍລິສັດຈະເປີດກວ້າງການຜະລິດ ແລະ ຮັບສະໝັກກຳມະກອນຕື່ມອີກ ເພື່ອສ້າງວຽກເຮັດງານທຳໃຫ້ຄົນງານເປັນຈຳນວນຫຼວງຫຼາຍໃຫ້ແຂວງເວົ້າລວມ”.

ອຳນາດການປົກຄອງປະກອບສ່ວນສ້າງເຄື່ອງໝາຍການຄ້າ PCI 2015 ຢືນອັນດັບທີ 2 ຂອງດົ່ງທາບ - ảnh 1

ທ່ານ ເລມິງຮວານ, ເລຂາຄະນະພັກແຂວງ ດົ່ງທາບ
(ພາບ: dantri)

ປະຈຸບັນ, ເປົ້າໝາຍໃຫຍ່ກວ່າໝູ່ເຊິ່ງແຂວງ ດົ່ງທາບ ພວມຕັດສິນໃຈປະຕິບັດ, ນັ້ນແມ່ນ ສ້າງພາບພົດຂອງທ້ອງຖິ່ນ ເພື່ອແນໃສ່ສ້າງກຳລັງໜູນພັດທະນາໃໝ່, ນຳແຂວງດົ່ງທາບ ໃຫ້ກາຍເປັນຈຸດນັດພົບທີ່ດູດດື່ມສຳລັບບັນດານັກລົງທຶນ, ເປັນເຂດດິນທີ່ສ້າງຄວາມປະທັບໃຈສຳລັບບັນດາວິສາຫະກິດທັງຢູ່ພາຍໃນ ແລະ ຕ່າງປະເທດ. ເຄື່ອງໝາຍການຄ້າ ດົ່ງທາບ ແມ່ນຂໍ້ກຸນແຈເປີດກາລະໂອກາດດຶງດູດແຫຼ່ງຊັບພະຍາກອນ, ເງິນລົງທຶນເພື່ອພັດທະນາບັນດາຂະແໜງເສດຖະກິດ, ທ່ອງທ່ຽວ, ວັດທະນະທຳ, ສັງຄົມ. ເມື່ອສ້າງເຄື່ອງໝາຍການຄ້າ ແລະ ພາບພົດໄດ້ແລ້ວ ຈະຊ່ວຍເພີ່ມກຳລັງການດູດດື່ມຕໍ່ວິສາຫະກິດ ກໍຄືດຶງດູດເອົາແຫຼ່ງເງິນລົງທຶນໃດ້ຫຼາຍກວ່າ; ໂຄສະນາການທ່ອງທ່ຽວແບບງ່າຍດາຍ, ສ້າງຄວາມສະດວກໃນການສົ່ງເສີມການພົວພັນກັບຕ່າງປະເທດ ແລະ ສ້າງຄວາມໄວ້ເນື້ອເຊື່ອໃຈກ່ຽວກັບບ້ານເກີດເມືອງນອນໃຫ້ປະຊາຊົນແຕ່ລະຄົນ. ເລື່ອງ ດົ່ງທາບ ສືບຕໍ່ຮັກສາທີ່ຕັ້ງອັນດັບທີ 2 ໃນທົ່ວປະເທດ ແລະ ຢືນແຖວໜ້າເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ໄດ້ສ້າງກຳລັງໜູນໃໝ່ ເພື່ອໃຫ້ແຂວງສືບຕໍ່ປ່ຽນໃໝ່ ແລະ ພັດທະນາ. ທ່ານ ເລມິງຮວານ, ເລຂາຄະນະພັກແຂວງ ດົ່ງທາບ ໃຫ້ຮູ້ວ່າ.

“ຢາກດຶງດູດນັກລົງທຶນ, ອຳນາດການປົກຄອງຕ້ອງມີການປະພຶດຕົວ ແລະ ໜູນຊ່ວຍໃຫ້ປະຊາຄົມວິສາຫະກິດຢູ່ທ້ອງຖິ່ນໃຫ້ເຕີບໃຫຍ່ເຂັ້ມແຂງ. ປະຊາຄົມວິສາຫະກິດພວມດຳເນີນທຸລະກິດຢູ່ທ້ອງຖິ່ນເອງ ຈະສ້າງການເຊື່ອມຕໍ່, ແຜ່ຂະຫຍາຍເພື່ອໃຫ້ບັນດານັກລົງທຶນອື່ນຮູ້ຈັກເຖິງ”.

ອຳນາດການປົກຄອງປະກອບສ່ວນສ້າງເຄື່ອງໝາຍການຄ້າ PCI 2015 ຢືນອັນດັບທີ 2 ຂອງດົ່ງທາບ - ảnh 2

ເມື່ອສ້າງເຄື່ອງໝາຍການຄ້າ ແລະ ພາບພົດໄດ້ແລ້ວ
ຈະຊ່ວຍເພີ່ມກຳລັງການດູດດື່ມຕໍ່ວິສາຫະກິດໃດ້ຫຼາຍກວ່າ
(ພາບປະກອບ: dantri)

ດ້ວຍການຢືນອັນດັບ 2 ໃນຈຳນວນ 63 ແຂວງ, ນະຄອນກ່ຽວກັບ PCI, ແຂວງ ດົ່ງທາບ ໄດ້ ແລະ ພວມສືບຕໍ່ຢັ້ງຢືນການສ້າງຕັ້ງອຳນາດການປົກຄອງທີ່ມີຄວາມໃກ້ຊິດກັບປະຊາຊົນ ແລະ ວິສາຫະກິດ. ທ່ານ ເຈົາຮົ່ງຟຸກ, ຮອງປະທານຄະນະກຳມະການປະຊາຊົນແຂວງ ດົ່ງທາບ ໃຫ້ຮູ້ວ່າ, ຍາມໃດທາງແຂວງກໍຖືວຽກງານການປະຕິຮູບ ແລະ ການຫັນບັນດາລະບຽບການບໍລິຫານເປັນງ່າຍດາຍ ແມ່ນເພື່ອຮັບໃຊ້ສັງຄົມ, ຮັບໃຊ້ປະຊາຊົນ ແລະ ວິສາຫະກິດ. ໃນໄລຍະຈະມາເຖິງ, ດົ່ງທາບ ຈະສຸມທຸກແຫຼ່ງກຳລັງເພື່ອຍູ້ແຮງການຫັນປ່ຽນໂຄງປະກອບເສດຖະກິດ; ສຸມໃສ່ກໍ່ສ້າງພື້ນຖານໂຄງລ່າງ ເພື່ອຕ້ອນຮັບບັນດານັກລົງທຶນທັງຢູ່ພາຍໃນ ແລະ ຕ່າງປະເທດ, ມຸ່ງໄປເຖິງການຂຸດຄົ້ນທ່າແຮງເສດຖະກິດດ່ານຊາຍແດນ, ບັນດາທ່າແຮງຂອງແຂວງ; ປະກອບສ່ວນພັດທະນາດ້ານການຄ້າ, ການບໍລິການ, ນຳພື້ນຖານເສດຖະກິດຂອງທ້ອງຖິ່ນໃຫ້ມີການພັດທະນາ. ທ່ານ ເຈົາຮົ່ງຟຸກ ຊີ້ແຈ້ງວ່າ.

“ພວກຂ້າພະເຈົ້າສືບຕໍ່ປັບປຸງໃຫ້ດີກວ່າອີກ. ບົນພື້ນຖານຕົວເລກດັດຊະນີ PCI, ພວມຂ້າພະເຈົ້າຈະກວດກາຄືນບັນດາຕົວເລກດັດຊະນີພາກສ່ວນ, ສະເໜີບັນດາມາດຕະການແກ້ໄຂເພື່ອປັບປຸງໃຫ້ດີກວ່າອີກ. ສິ່ງສຳຄັນທີ່ສຸດແມ່ນ, ຍາມໃດພວກຂ້າພະເຈົ້າກໍຖືເປັນສຳຄັນບັນດາແນວຄວາມຄິດໃນການລົງທຶນ, ຄຳເຫັນປະກອບຂອງວິສາຫະກິດ. ຜ່ານນັ້ນ, ສ້າງຄວາມໄວ້ເນື້ອເຊື່ອໃຈໃຫ້ວິສາຫະກິດ, ສ້າງຄວາມອຸ່ນອ່ຽນໃຈເມື່ອລົງທຶນຢູ່ທ້ອງຖິ່ນ”.

ດ້ວຍການກະທົບຕອບຈາກຝ່າຍປະຊາຄົມວິສາຫະກິດຢູ່ດົ່ງທາບ “ເຄື່ອງໝາຍການຄ້າດົ່ງທາບ - PCI” ບໍ່ພຽງແຕ່ມີລັກສະນະລະດົມກຳລັງໃຈສຳລັບຄຸນນະພາບການເຄື່ອນໄຫວຂອງອຳນາດການປົກຄອງເທົ່ານັ້ນ, ຫາກມີຄວາມໝາຍເລິກເຊິ່ງແມ່ນຍັງສະແດງໃຫ້ເຫັນຄວາມໄວ້ເນື້ອເຊື່ອໃຈຂອງບັນດາວິສາຫະກິດ, ຂອງປະຊາຊົນຕໍ່ກົງຈັກອຳນາດການປົກຄອງອີກດ້ວຍ. ຄວາມໄວ້ເນື້ອເຊື່ອໃຈນັ້ນເມື່ອກາຍເປັນ “ພາບພົດຂອງທ້ອງຖິ່ນ, ເຄື່ອງໝາຍການຄ້າຂອງທ້ອງຖິ່ນ” ແລ້ວຈະກາຍເປັນກຳລັງແຮງສັງລວມເພື່ອໃຫ້ປະຊາຊົນ, ວິສາຫະກິດ ແລະ ອຳນາດການປົກຄອງພ້ອມກັນຮ່ວມແຮງຮ່ວມໃຈສ້າງສາບ້ານເກີິດເມືອງນອນໃຫ້ພັດທະນາ.

Thanh Tung - Le Phuong