(vovworld)- ປີ 2013 ແມ່ນປີທີ່ພື້ນຖານເສດຖະກິດຫວຽດນາມ ປະສົບກັບສິ່ງທ້າທາຍຫຼາຍຢ່າງ ບັນດາບັນຫາຄື: ໜີ້ເສຍ, ໜີ້ຄ້າງຊຳລະ…ຂອງຕະຫຼາດອະສັງຫາລິມະສັບ, ສະພາບວິສາຫະກິດປະສົບກັບຄວາມຫຍຸ້ງຍາກ….ສືບຕໍ່ສົ່ງຜົນສະທ້ອນເຖິງພື້ນຖານເສດຖະກິດຂອງປະເທດຊາດ. ໃນສະພາບການດັ່ງກ່າວ, ບັນດານະໂຍບາຍ, ລັດຖະນະໂຍບາຍບໍລິຫານພື້ນຖານເສດຖະກິດມະຫາພາກຢ່າງທັນການ, ມີໄຫວພິບຂອງລັດຖະບານ ໄດ້ປະກອບສ່ວນເຂົ້າໃນຜົນງານແຫ່ງການຜ່ານຜ່າຄວາມຫຍຸ້ງຍາກຂອງພື້ນຖານເສດຖະກິດຫວຽດນາມ ໃນ 1 ປີຜ່ານມາ.
(ພາບປະກອບ)
ພາຍຫຼັງໄລຍະຍາວທີ່ພື້ນຖານເສດຖະກິດຫວຽດນາມ ຕົກເຂົ້າສູ່ສະພາບວິກິດການ ເຮັດໃຫ້ວິສາຫະກິດຫຼາຍແຫ່ງຕ້ອງບຸບເລີກ, ປີນີ້, ຄວາມມານະພະຍາຍາມຂອງລັດຖະບານ ແລະ ປະຊາຄົມວິສາຫະກິດໄດ້ຮັບຜົນງານແລ້ວ. ເສດຖະກິດມະຫາພາກມີການຫັນປ່ຽນອັນຕັ້ງໜ້າ. ໃນບັນດາດັດຊະນີເສດຖະກິດ, ໜ້າເອົາໃຈໃສ່ທີ່ສຸດແມ່ນລະດັບເຕີບໂຕຍອດຜະລິດຕະພັນພາຍໃນ (ຈີດີພີ) ບັນລຸປະມານ 5,4%. ບັນລຸໄດ້ໝາກຜົນນີ້ແມ່ນຍ້ອນລັດຖະບານຫວຽດນາມ ເດັດດ່ຽວວາງຈຸດໝາຍອັນດັບໜຶ່ງແມ່ນຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້ ແລະ ຮັບປະກັນຊີວິດສັງຄົມ. ທ່ານເຈິ່ນຢູລິກ, ຜູ້ຊ່ຽວຊານເສດຖະກິດຕີລາຄາວ່າ:
“ດ້ວຍນະໂຍບາຍສະເໝີຕົ້ນສະເໝີປາຍ ແລະ ພວມປະຕິບັດນັ້ນແມ່ນສຸມໃສ່ຮັບປະກັນຮັກສາເສດຖະກິດມະຫາພາກເປັນປົກກະຕິໃນບັນດາຄາດໝາຍໃຫ່ຍ ແລະ ປະຕິບັດນະໂຍບາຍໜູນຊ່ວຍຕະຫຼາດຈຳນວນໜຶ່ງ, ຂ້າພະເຈົ້າຖືວ່າ, ປີ 2013, ລະດັບເຕີບໂຕເສດຖະກິດຂອງທັງປີຢູ່ໃນລະດັບແຕ່ 5,3-5,4%. ລະດັບເຕີບໂຕນີ້ບໍ່ທັນບັນລຸໄດ້ຄືດັ່ງຄວາມມຸ່ງຫວັງກໍ່ຕາມແຕ່ມັນໄດ້ສ້າງຄວາມເຊື່ອໝັ້ນວ່າຕະຫຼາດຈະເປັນປົກກະຕິ“.
(ພາບ: TTXVN)
ປີ 2013, ບັນດາຂົງເຂດຜະລິດອຸດສາຫະກຳ, ກະສິກຳ, ປ່າໄມ້, ສິນໃນນ້ຳກໍ່ໄດ້ຮັບການປັບປຸງເທື່ອລະກ້າວ. ອັດຕາແລກປ່ຽນເງິນດົ່ງຫວຽດນາມ ກັບເງິນຕາຕ່າງປະເທດຈຳນວນໜຶ່ງເປັນປົກກະຕິໂດຍພື້ນຖານ, ການສະສົມເງິນຕາຕ່າງປະເທດຝາກມາເພີ່ມຂຶ້ນ. ສະພາບການຂຶ້ນກັບເງິນໂດລາສະຫະລັດ ແລະ ຄຳໄດ້ຫລຸດລົງຫຼາຍພໍສົມຄວນ, ຄວາມເຊື່ອໝັ້ນ ຕໍ່ເງິນດົ່ງຫວຽດນາມ ເພີ່ມຂຶ້ນກໍ່ແມ່ນປັດໄຈທີ່ຕັ້ງໜ້າ. ພິເສດ, ຈຸດໝາຍຄວບຄຸມໄພເງິນເຟີ້ໃຫ້ຢູ່ໃນລະດັບ 1 ຕົວເລກໃນປີນີ້ເກືອບຄືວ່າຈະບັນລຸໄດ້ດ້ວຍດັດຊະນີເພີ່ມລາຄາ (CPI) ທັງປີແມ່ນ 7%. ທ່ານເຈິ່ນກວາງທັງ, ຜູ້ຊ່ຽວຊານດ້ານເສດຖະກິດໃຫ້ຮູ້ວ່າ:
“ດ້ວຍການດັດສົມຂອງລັດ, ພວກເຮົາເຊື່ອໝັ້ນສ່ວນໃດສ່ວນໜຶ່ງເຂົ້າໃນການສະກັດກັ້ນໄພເງິນເຟີ້ດ້ວຍເງື່ອນໄຂມີຂັນຕອນການເພິ່ມລາຄາໄຟຟ້າ, ລາຄານ້ຳມັນເຊື້ອໄຟ…ພວກເຮົາມີຂັ້ນຕອນປະຕິບັດຢ່າງເໝາະສົມ ແລະ ຈະຄວບຄຸມສະພາບໄພເງິນເຟີ້ໄດ້“.
ໃນປີຜ່ານມາ, ໂອກາດຟື້ນຕົວ ແລະ ເປີດກ້ວາງການຜະລິດສຳລັບວິສາຫະກິດໄດ້ຈະແຈ້ງກ່ວາ. ເລື່ອງລັດຖະບານຮັບຮອງເອົາ ແລະ ຜັນຂະຫຍາຍບັນດາມະຕິ ແລະ ແຜນຮ່າງສ້າງໂຄງປະກອບພື້ນຖານເສດຖະກິດຄືນໃໝ່ ດ້ວຍຄວາມານະພະຍາຍາມຫລຸດຜ່ອນອັດຕາດອກເບັ້ຍ, ຄວາມຫຍຸ້ງຍາກດ້ານການເງິນ ແລະ, ລະບຽບກົດໝາຍໃຫ້ວິສາຫະກິດ ພ້ອມກັບການສ້າງໂຄງປະກອບບັນດາລັດວິສາຫະກິດ ກໍ່ຄືທົ່ວພື້ນຖານເສດຖະກິດ ໄດ້ປະກອບສ່ວນຫຼາຍພໍສົມຄວນເຂົ້າໃນການຮັກສາເສດຖະກິດມະຫາພາກເປັນປົກກະຕິ. ທ່ານເຈິ່ນຫວຽດແອງ, ຜູ້ອຳນວຍການໃຫ່ຍບໍລິສັດຂາອອກຂາເຂົ້ານາມທາຍເຊີນ ໃຫ້ຂໍ້ສັງເກດວ່າ:
“ເມື່ອທຽບກັບປີ 2012, ປີ 2013, ເສດຖະກິມີການພັດທະນາ, ນັບແຕ່ຕົ້ນເເດືອນ 6 ໄດ້ມີຄວາມເປັນປົກກະຕິແລ້ວ. ພິເສດ, ອັດຕາດອກເບັ້ຍທະນາຄານສະຫງວນໃຫ້ວິສາຫະກິດແມ່ນຕ່ຳທີ່ສຸດ, ຊື່ງແມ່ນອັດຕາດອກເບັ້ຍຕ່ຳທີ່ສຸດນັບແຕ່ກ່ອນມາ. ຂ້າພະເຈົ້າຫວັງວ່າ, ດ້ວຍລະດັບການພັດທະນາຄືແນວນີ້, ພື້ນຖານເສດຖະກິດຫວຽດນາມ ຈະເຕີບໂຕກ່ວາອີກ“.
ການສົ່ງອອກໃນປີ 2013 ກໍ່ບັນລຸໄດ້ຜົນງານທີ່ພົ້ນເດັ່ນຄາດວ່າວົງເງິນສົ່ງອອກຈະບັນລຸກ່ວາ 133 ຕື້ໂດລາສະຫະລັດ. ໃນຂະນະນັ້ນ, ການດຶງດູດເງິນລົງທຶນຂອງຕ່າງປະເທດ (FDI) ກໍ່ເພີ່ມຂຶ້ນຢ່າງແຮງເມື່ອທຽບກັບປີ 2012, ພ້ອມກັນນັ້ນ, ທຶນປ່ອຍເງິນກໍ່ເພີ່ມຂຶ້ນເມື່ອທຽບກັບໄລຍະກ່ອນ. ຫຼາຍໂຄງການ FDI ທີ່ມີມູນຄ່ານັບຕື້ໂດລາສະຫະລັດ ໄດ້ຮັບການຜັນຂະຫຍາຍໃນຊຸມເດືອນທ້າຍປີ. ສິ່ງດັ່ງກ່າວສະແດງໃຫ້ເຫັນວ່າ ຫວຽດນາມ ສືບຕໍ່ແມ່ນຈຸດນັດພົບທີ່ດຶງດູດບັນດານັກລົງທຶນໂດຍກົງຂອງຕ່າງປະເທດ. ປີນີ້, ຫວຽດນາມ ບັນລຸໄດ້ຄາດໝາຍດືງດູດ 16,3 ຕື້ໂດລາສະຫະລັດເມື່ອທຽບກັບລະດັບຄາດຄະເນແມ່ນແຕ່ 13-14 ຕື້ໂດລາສະຫະລັດ ຂອງແຜນການໄດ້ວາງອອກ. ທ່ານເຈິ່ນຢູລິກ, ຜູ້ຊ່ຽວຊານດ້ານເສດຖະກິດຢືນຢັນວ່າ:
“ຂ້າພະເຈົ້າຖືວ່າ, ເສດຖະກິດຈະຄ່ອຍໆຫລຸດພົ້ນອອກຈາກໄລຍະຊັກຊ້າ, ເສດຖະກິດມະຫາພາກສືບຕໍ່ເປັນປົກກະຕິ ແລະ ວິສາຫະກິດພາຍໃນປະເທດອາດຈະຟື້ນຕົວດີຂຶ້ນ. ເຖິງວ່າ, ຕະຫຼາດອະສັງຫາລິມະສັບຍັງປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມແຕ່ຈະຄ່ອຍໆດີຂຶ້ນ. ໜີ້ເສຍຈະຄ່ອຍໆຫລຸດລົງ, ອັດຕາດອກເບັ້ຍກໍ່ຈະຫລຸດລົງ, ໄພເງິນເຟີ້ຈະຮັກສາໃນລະດັບປົກກະຕິ, ນັ້ນແມ່ນບັນດາເງື່ອນໄຂທີ່ຈະໜູນຊ່ວຍໃຫ້ຕະຫຼາດ ແລະ ວິສາຫະກິດ“.
ການຟື້ນຕົວ ແລະ ເປັນປົກກະຕິຂອງພື້ນຖານເສດຖະກິດມະຫາພາກໃນປີ 2013 ແມ່ນປັດໄຈສຳຄັນເພື່ອໃຫ້ພື້ນຖານເສດຖະກິດຫວຽດນາມ ສືບຕໍ່ພັດທະນາໃນປີຕໍ່ໄປ./.