(vovworld)- ປະຈຸບັນ ນະຄອນໂຮ່ຈິມິນ ແມ່ນຕະຫລາດຈຳຫນ່າຍສິນຄ້າຫລາຍກວ່າໝູ່ ແລະ ມີຄວາມສາມາດຊຸກຍູ້ການພັດທະນາຕະຫລາດສິນຄ້າຂອງທັງປະເທດ. ໃນໄລຍະມໍ່ໆມານີ້, ນະຄອນໂຮ່ຈິມິນ ໄດ້ຍູ້ແຮງໂຄງການຮ່ວມສຳພັນລະຫວ່າງຜູ້ຜະລິດ ແລະ ບໍລິສັດຈຳຫນ່າຍສິນຄ້າ ເພື່ອສ້າງລະບົບດຳເນີນທຸລະກິດມີປະສິດທິຜົນ ແລະ ຕອບສະໜອງບັ້ນຂົນຂວາຍ “ຊາວ ຫວຽດນາມ ບຸລິມະສິດຊົມໃຊ້ສິນຄ້າ ຫວຽດນາມ.” ບົດຂຽນຂອງນັກຂ່າວ ໂຕຕວນ ທີ່ມີຫົວຂໍ້ວ່າ“ຮ່ວມສຳພັນລະຫວ່າງບັນດາຜູ້ຜະລິດ ແລະ ບໍລິສັດຈຳຫນ່າຍສິນຄ້າເພ່ືອພັດທະນາຕະຫລາດພາຍໃນ” ຈະສ່ອງແສງເຖິງບັນຫາດັ່ງກ່າວ..
ໃນຫລາຍປີມານີ້, ລາຍການເຮັດໃຫ້ຕະຫລາດຢູ່ນະຄອນ ໂຮ່ຈິມິນ ເປັນປົກກະຕິ ແມ່ນຫນຶ່ງໃນບັນດາເຄື່ອງມືບໍລິຫານຕະຫລາດຢ່າງມີປະສິດທິຜົນ, ປະກອບສ່ວນຄວບຄຸມໄພເງິນເຟີ້, ຮັກສາການຮັບປະກັນຊີວິດສັງຄົມເປັນປົກກະຕິ. ເຖິງຢ່າງໃດກໍຕາມ, ບາງຈຸດເວລາໃນປີ, ລາຄາສິນຄ້າຢູ່ນະຄອນ ໂຮ່ຈິມິນ ຍັງຄົງມີການເຫນັງຕິງ, ເປັນຕົ້ນໃນໄລຍະກ່ອນ ແລະ ຫລັງບຸນເຕັດ. ສະນັ້ນເພື່ອເຮັດໃຫ້ລາຄາໃນທ້ອງຕະຫລາດເປັນປົກກະຕິ, ພະແນກອຸດສາຫະກຳ ແລະ ການຄ້ານະຄອນໂຮ່ຈິມິນ ໄດ້ສ້າງລາຍການຮ່ວມສຳພັນລະຫວ່າງຜູ້ຜະລິດ ແລະ ບໍລິສັດຈຳຫນ່າຍສິນຄ້າ ເພື່ອຍູ້ແຮງການພົວພັນຮ່ວມມືພັດທະນາເສດຖະກິດ ລະຫວ່າງ ນະຄອນໂຮ່ຈິມິນ ກັບບັນດາແຂວງ ທີ່ຂຶ້ນກັບເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ. ເຂົ້າຮ່ວມລາຍການຮ່ວມສຳພັນດັ່ງກ່າວ ມີ 14 ພະແນກອຸດສາຫະກຳ ການຄ້າ ແລະ ວິສາຫະກິດ ເກືອບ 100 ແຫ່ງທີ່ຂຶ້ນກັບບັນດາແຂວງທາງທິດຕາເວັນອອກ, ທາງທິດຕາເວັນຕົກພາກໃຕ້ ຫວຽດນາມ. ສະເພາະ ນະຄອນໂຮ່ຈິມິນ ມີສູນການຄ້າ 6 ແຫ່ງ, ຮ້ານຊັບພະສິນຄ້າ 12 ແຫ່ງ, ຮ້ານຄ້າໃຫຍ່ 5 ຮ້ານ, ຕະຫລາດ 17 ແຫ່ງ, ໃນນັ້ນ ຕະຫລາດເຕົ້າໂຮມ ແລະ ຈຳຫນ່າຍສິນຄ້າ 3 ແຫ່ງ. ຈຸດໝາຍຕົ້ນຕໍຂອງລາຍການ ແມ່ນເພື່ອຮ່ວມສຳພັນລະຫວ່າງການລົງທຶນ, ການຜະລິດ, ຈຳຫນ່າຍສິນຄ້າ, ຮັບປະກັນລາຄາສິນຄ້າ, ຜະລິດຕະພັນເປັນປົກກະຕິ. ທ່ານ ຫງວຽນວັນທ້ວນ, ຮອງຜູ້ອຳນວຍການບໍລິສັດຫຸ້ນສ່ວນສິນໃນນ້ຳນະຄອນໂຮ່ຈິມມິນ ໃຫ້ຮູ້ວ່າ:
“ນີ້ແມ່ນຂົວເຊື່ອມຕໍ່ດີທີ່ສຸດສຳລັບບັນດາວິສາຫະກິດຜະລິດ ແລະ ບັນດາບໍລິສັດຈຳຫນ່າຍສິນຄ້າ, ເພາະກ່ອນນີ້ ເພື່ອເຊື່ອມຕໍ່ຕາຫນ່າງຮ້ານຊັບພະສິນຄ້າແມ່ນຍາກຫລາຍ. ສະນັ້ນ ຜ່ານການຮ່ວມສຳພັນນີ້, ບັນດາຜູ້ຜະລິດສິນຄ້າມີຜະລິດຕະພັນສາມາດແລກປ່ຽນໂດຍກົງກັບວິສາຫະກິດ ບົນພື້ນຖານນັ້ນ ສ້າງຄວາມຜູກພັນໃນການຈຳຫນ່າຍ.”
ຮ້ານຊັບພະສິນຄ້າຢູ່ນະຄອນ ໂຮ່ຈິມິນ
ພາບ:internet
|
ປະຈຸບັນ ບັນດາວິສາຫະກິດຈຳຫນ່າຍສິນຄ້າຢູ່ນະຄອນ ໂຮ່ຈິມິນ ຄື: Vinatex, Saigon Coop, Big C, ບໍລິສັດໃຫຍ່ການຄ້າໄຊງ່ອນ, Vissan ໄດ້ຂະຫຍາຍລະບົບຈຳຫນ່າຍສິນຄ້າຢູ່ບັນດາແຂວງເຂດທົ່ງພຽງແມ່ນນ້ຳຂອງທາງພາກໃຕ້ ຫວຽດນາມ ເພື່ອເພີ່ມຕາຫນ່າງຈຳຫນ່າຍສິນຄ້າ ທັງແກ້ໄຂວຽກເຮັດງານທຳ ແລະ ເຂົ້າຮ່ວມຮັກສາລາຄາໃນທ້ອງຕະຫລາດຢູ່ບັນດາແຂວງນີ້ໃຫ້ເປັນປົກກະຕິ. ທ່ານນາງ ຟ້າມທິຮ່ວຽນແອງ, ຜູ້ອຳນວຍການ Big C ຮ່ວາງວັນທູ້, ນະຄອນ ໂຮ່ຈິມິນ ໃຫ້ຮູ້ວ່າ:
“ການຮ່ວມສຳພັນດັ່ງກ່າວ ໄດ້ນຳມາເຊິ່ງຜົນປະໂຫຍດໃຫ້ແກ່ Big C, ເພາະວ່າ ການເກັບຊື້ສິນຄ້າບໍ່ຕ້ອງຜ່ານຂອດກາງ ແລະ ຄຽງຂ້າງນັ້ນ Big C ສາມາດເປັນເຈົ້າການໃນການຄວບຄຸມຕົ້ນກຳເນີດກໍຄືຄຸນນະພາບຂອງສິນຄ້າ. ສ່ວນຜູ້ຜະລິດ, ສິນຄ້າໄດ້ຮັບການຈຳຫນ່າຍ ສະນັ້ນເຂົາເຈົ້າມີຄວາມອຸ່ນອ່ຽນໃຈໃນການຜະລິດ.”
ເລື່ອງສ້າງການຮ່ວມສຳພັນລະຫວ່າງບໍລິສັດຈຳຫນ່າຍສິນຄ້າ ແລະ ຜູ້ຜະລິດ, ນອກຈາກນຳມາເຊິ່ງຜົນປະໂຫຍດໃຫ້ແກ່ທັງສອງຝ່າຍ, ຜູ້ອຸປະໂພກບໍລິໂພກ ກໍໄດ້ຮັບຜົນປະໂຫຍດ, ສະນັ້ນ ເຂົາເຈົ້າຊື້ສິນຄ້າຂອງ ຫວຽດນາມ ປ່ຽນແທນໃຫ້ແກ່ການຊື້ສິນຄ້ານຳເຂົ້າຈາກຕ່າງປະເທດ. ໃນປີ 2012, ມີວິສາຫະກິດຢູ່ນະຄອນ ໂຮ່ຈິມິນ ຫລາຍແຫ່ງ ໄດ້ລົງໄປຍັງບັນດາແຂວງ, ນະຄອນໃນເຂດ ບໍ່ພຽງແຕ່ຊອກຫາບ່ອນຈຳຫນ່າຍສິນຄ້າເທົ່ານັ້ນ ຫາກຕັ້ງຫນ້ານຳສິນຄ້າ ຫວຽດນາມ ລົງໄປຂາຍຢູ່ເຂດຊົນນະບົດ. ໃນຂົງເຂດຂາຍຍ່ອຍ, ເລື່ອງສົ່ງສິນຄ້າ ຫວຽດນາມ ກໍ່ຄືເພີ່ມອັດຕາສ່ວນສິນຄ້າພາຍໃນປະເທດຢູ່ບັນດາຮ້ານຊັບພະສິນຄ້າໄດ້ກາຍເປັນທ່າອ່ຽງຂອງບັນດາວິສາຫະກິດດຳເນີນທຸລະກິດຢູ່ບໍລິເວນນະຄອນ. ນອກນັ້ນ ບັນດາຮ້ານຊັບພະສິນຄ້າພາຍໃນປະເທດຄື: Coop Mart, Maximark, Citimart ແລະ ຢູ່ຮ້ານຊັບພະສິນຄ້າທີ່ມີເງິນລົງທຶນຂອງຕ່າງປະເທດຄື: Lotte mart, Giant, Big C, Metro.. ສິນຄ້າຂອງຫວຽດນາມກໍກວມອັດຕາສ່ວນເຖິງ 90%, ບາງຮ້ານແມ່ນ 96%. ນີ້ແມ່ນທິດກ້າວເດີນທີ່ຈຳເປັນເພື່ອໃຫ້ສິນຄ້າ ຫວຽດນາມ ມີກາລະໂອກາດແກ້ງແຍ້ງກັບບັນດາຜະລິດຕະພັນສິນຄ້ານຳເຂົ້າຈາກຕ່າງປະເທດ, ປະກອບສ່ວນຊຸກຍູ້ພື້ນຖານເສດຖະກິດພັດທະນາຕາມທິດຍືນຍົງ.