(vovworld)- ນະຄອນຫລວງ ຮ່າໂນ້ຍ ມີປູຊະນີຍະສະຖານກວ່າ 5000 ແຫ່ງ, ໝູ່ບ້ານຫັດຖະກຳປະມານ 1300 ແຫ່ງ ພ້ອມກັບມໍລະດົກວັດທະນະທຳບໍ່ມີຮູບຮ່າງຫລາຍແຫ່ງ, ທັງໝົດເຫລົ່ານັ້ນໄດ້ຮັບຖືວ່າແມ່ນຊັບພະຍາກອນອັນລຳ້ຄ່າດຶງດູດນັກທ່ອງທ່ຽວ. ບັນຫາທີ່ຂະແຫນງທ່ອງທ່ຽວ ຮ່າໂນ້ຍ ພວມຖືເປັນສຳຄັນ ນັ້ນແມ່ນສ້າງບັນດາຈຸດທີ່ພົ້ນເດັ່ນ ແລະ ຍູ້ແຮງການຮ່ວມສຳພັນລະຫວ່າງເຂດເພື່ອເພີ່ມປະສິດທິຜົນເສດຖະກິດໃນການພັດທະນາການທ່ອງທ່ຽວ. ນີ້ໄດ້ຮັບຖືວ່າແມ່ນແຜນນະໂຍບາຍອັນຖືກຕ້ອງ ແລະ ສຳຄັນເພື່ອໃຫ້ຂະແຫນງທ່ອງທ່ຽວຮ່າໂນ້ຍໝູນໃຊ້ທ່າໄດ້ປຽບໃນການພັດທະນາ.
ຫນອງຮ່ວານກຽມ
photo:internet
|
ໃນ 3 ເດືອນຕົ້ນປີ 2014, ຮ່າໂນ້ຍ ໄດ້ຕ້ອນຮັບນັກທ່ອງທ່ຽວສາກົນກວ່າ 700.000 ເທື່ອຄົນ, ເພີ່ມຂຶ້ນ 15% ແລະ ນັກທ່ອງທ່ຽວພາຍໃນປະເທດ 4,87 ລ້ານເທ່ືອຄົນ, ເພີ່ມຂຶ້ນກວ່າ 8% ເມື່ອທຽບໃສ່ໄລຍະດຽວກັນຂອງປີກາຍ. ບັນລຸໄດ້ໝາກຜົນຫລາຍພໍສົມຄວນ ດັ່ງກ່າວ ແມ່ນຍ້ອນມີຄວາມມານະພະຍາຍາມປັບປຸງສະພາບແວດລ້ອມ, ພາບພົດຂອງຂະແຫນງທ່ອງທ່ຽວ ຮ່າໂນ້ຍ, ພິເສດ ແມ່ນຍູ້ແຮງການຮ່ວມສຳພັນທີ່ໄດ້, ການຮ່ວມມືລະຫວ່າງບັນດາວິສາຫະກິດນຳກັນ ເພື່ອເຊື່ອມຕໍ່ບັນດາສະຖານທີ່ທ່ອງທ່ຽວ. ທ່ານ ລືວດືກເກ, ຜູ້ອຳນວຍການບໍລິສັດທ່ອງທ່ຽວ ຮ່າໂນ້ຍ ໃຫ້ຮູ້ວ່າ: ແຜນນະໂຍບາຍຂອງນະຄອນໃນໄລຍະຜ່ານມາ ໄດ້ຊ່ວຍໃຫ້ບັນດາວິສາຫະກິດຍູ້ແຮງການຮ່ວມສຳພັນ ໄດ້ ແລະ ພວມປະກອບສ່ວນສ້າງບາດກ້າວຫັນປ່ຽນໃນຂົງເຂດເສດຖະກິດທ່ອງທ່ຽວ.
“ໃນຂະນະມີຫລາຍຂົງເຂດເສດຖະກິດອື່ນພວມປະສົບກັບຄວາມຫຍຸ້ງຍາກ, ແຕ່ຂະແຫນງທ່ອງທ່ຽວ ຍັງຄົງຮັກສາລະດັບການພັດທະນາ ແລະ ລະດັບຈະເລີນເຕີບໂຕ, ນີ້ແມ່ນຄວາມມານະພະຍາຍາມຂອງບັນດາບໍລິສັດທ່ອງທ່ຽວ. ຂ້າພະເຈົ້າຄິດວ່າ: ນີ້ແມ່ນກາລະໂອກາດເພ່ືອໃຫ້ລັດ ຢືນຢັນຄວາມເອົາໃຈໃສ່ຫນູນຊ່ວຍເພື່ອໃຫ້ຂະແຫນງທ່ອງທ່ຽວພັດທະນາ.”
ລະຄອນຕຸກກະຕານ້ຳ
|
ໃນໄລຍະຜ່ານມາ, ນອກຈາກຍົກລະດັບສະຖານທີ່ທ່ອງທ່ຽວ, ນະຄອນ ຮ່າໂນ້ຍ ກໍໄດ້ສ້າງຜະລິດຕະພັນທ່ອງທ່ຽວຫລາຍຢ່າງຕື່ມອີກ ເພື່ອດຶງດູດແຂກມາຢ້ຽມຢາມ,ຊອກຮູ້ນະຄອນຫລວງຮ່າໂນ້ຍ. ບັນດາສະຖານທີ່ທ່ອງທ່ຽວຢູ່ໃຈກາງນະຄອນຫລວງ ຮ່າໂນ້ຍ ທີ່ດຶງດູດນັກທ່ອງທ່ຽວມາຢ້ຽມຊົມຫລາຍກວ່າໝູ່ ນັ້ນແມ່ນ: ໂຮງລະຄອນຕຸກກະຕານຳ້ ທັງລອງ, ໂຮງລະຄອນຕຸກກະຕານຳ້ ສູນກາງ, ວິຫານ ງອກເຊີນ, ຫນອງຮ່ວານກຽມ, ຄຸກຫວາຫລໍ່, ວັດມຽວ ກວກຕືຢາມ. ນອກນັ້ນ ຢູ່ຊານກຳແພງ, ຮ່າໂນ້ຍ ພວມສ້າງແຜນກຳນົດພັດທະນາເຂດ ບາຫວີ່ ຊວຍຮາຍ ໃຫ້ກາຍເປັນເຂດທ່ອງທ່ຽວຂະຫນາດໃຫຍ່, ພັດທະນາທອ່ງທ່ຽວວົງຄະນາຍາດຢູ່ 7 ຕາແສງພູດອຍ ຢູ່ເມືອງ ບາຫວີ່. ເລື່ອງສ້າງການຮ່ວມສຳພັນລະຫວ່າງບັນດາທ້ອງຖິ່ນ ແລະ ບໍລິສັດທ່ອງທ່ຽວ ພວມສ້າງກຳລັງແຮງ,ຊ່ວຍບັນດາວິສາຫະກິດຈັດຕັ້ງ, ບໍລິຫານ, ຜັນຂະຫຍາຍບັນດາລາຍການທ່ອງທ່ຽວ, ສາຍທ່ອງທ່ຽວຢ່າງຮຽບຮ້ອຍ, ມີປະສິດທິຜົນກວ່າ. ເອື້ອຍ ຫງວຽນທິຮວານ, ຜູ້ນຳທ່ຽວສັງກັດບໍລິສັດຫຸ້ນສ່ວນທ່ອງທ່ຽວນະຄອນຫລວງ ໃຫ້ຮູ້ວ່າ:
“ຍູ້ແຮງການຮ່ວມສຳພັນ ຈະສ້າງບັນດາຜະລິດຕະພັນກທ່ອງທ່ຽວອຸດົມສົມບູນ, ຫລາຍຮູບຫລາຍແບບກວ່າ. ຄຽງຄູ່ກັນນັ້ນ ການສົມທົບລະຫວ່າງບັນດາວິສາຫະກິດດຳເນີນທຸລະກິດທ່ອງທ່ຽວ ຈະຊ່ວຍແຂກທ່ອງທ່ຽວເລືອກເຟັ້ນບໍລິການທີ່ມີລາຄາເໝາະສົມທີ່ສຸດ ແລະ ຮັບປະກັນຄຸນນະພາບບໍລິການດີທີ່ສຸດ.”
ຊຸກຍູ້ການຮ່ວມສຳພັນ, ຈະສ້າງບັນດາຜະລິດຕະພັນທ່ອງທ່ຽວເປັນຫລາຍຮູບຫລາຍແບບ ເພື່ອດຶງດູດນັກທ່ອງທ່ຽວຢ້ຽມຢາມຮ່າໂນ້ຍໃນໄລຍະຍາວກວ່າ ພວມແມ່ນຄວາມສົນໃຈ, ແມ່ນຈຸດໝາຍມຸ່ງໄປເຖິງຂອງບັນດາຜູ້ດຳເນີນທຸລະກິດການທ່ອງທ່ຽວຢູ່ ຮ່າໂນ້ຍ. ຕາມທິດນີ້, ນະຄອນຮ່າໂນ້ຍ ພວມສົ່ງເສີມສ້າງສູນ ແນະນຳໝູ່ບ້ານຫັດຖະກຳຮ່າໂນ້ຍ ດ້ວຍ 3 ລາຍການຄື: ແນະນຳບັນດາໝູ່ບ້ານຫັດຖະກຳທີ່ພົ້ນເດັ່ນ, ຂັ້ນຕອນຜະລິດ ແລະ ຈັດຕັ້ງບັນດາບໍລິການລະຫລິ້ນບັນເທິງ ເພື່ອດຶງດູດນັກທ່ອງທ່ຽວ. ສູນແຫ່ງນີ້ ມີເນື້ອທີ່ກໍ່ສ້າງ 40-50 ເຮັກຕາ, ຊື່ງຄາດວ່າ ຈະຖືກຕັ້ງຢູ່ບໍລິເວນເມືອງ ດົງແອງ ຫລື ແຄມແມ່ນຳ້ແດງ. ທ່ານ ໂຕວັນດົ້ງ, ຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ ຮ່າໂນ້ຍ ຢືນຢັນວ່າ: ປີ 2014, ຮ່າໂນ້ຍ ຈະມີການປ່ຽນແປງຫລາຍຢ່າງເພື່ອໃຫ້ສົມເປັນສະຖານທີ່ທ່ອງທ່ຽວດູດດື່ມ.
“ຮ່າໂນ້ຍ ພວມຜັນຂະຫຍາຍບັນດາໂຄງການພັດທະນາທ່ອງທ່ຽວຢ່າງຂ້ຽວຂາດ, ເປັນຕົ້ນແມ່ນບັນດາຜະລິດຕະພັນທ່ອງທ່ຽວຕິດພັນກັບມໍລະດົກ,ໃນນັ້ນ ຖືເປັນສຳຄັນບັນຫາບູລະນະປະຕິສັງຂອນ. ເມື່ອນັກທ່ອງທ່ຽວເຂົ້າຢ້ຽມຊົມ, ທັງແນະນຳໃຫ້ນັກທ່ອງທ່ຽວ, ທັງມີເອກະສານແນະນຳທີ່ເໝາະສົມແປ່ເປັນພາສາຕ່າງປະເທດເພື່ອໃຫ້ນັກທ່ອງທ່ຽວສາມາດຄົ້ນຄວ້າຢ່າງເລິກເຊິ່ງ, ລະອຽດກວ່າ.”
ດ້ວຍບັນດາຄວາມສາມາດບ່ົມຊ້ອນທີ່ມີຢູ່ແລ້ວ, ນະຄອນ ຮ່າໂນ້ຍ ມີຫລາຍກາລະໂອກາດເພື່ອພັດທະນາຂະແຫນງທ່ອງທ່ຽວໃຫ້ກາຍເປັນຂະແຫນງປາຍແຫລມ. ປີ 2014, ຮ່າໂນ້ຍ ສູ້ຊົນຕ້ອນຮັບນັກທ່ອງທ່ຽວສາກົນ 3 ລ້ານເທື່ອຄົນ ແລະ ນັກທ່ອງທ່ຽວພາຍໃນປະເທດ 16 ລ້ານເທື່ອຄົນ, ເພີ່ມຂຶ້ນ 20% ເມື່ອທຽບໃສ່ປີ 2013. ນະຄອນຮ່າໂນ້ຍ ວາງຈຸດໝາຍ ສືບຕໍ່ສ້າງຮ່າໂນ້ຍໃຫ້ກາຍເປັນສູນທ່ອງທ່ຽວໃຫຍ່, ດູດດື່ມຂອງທັງປະເທດ ແລະ ພາກພື້ນ.