ບຸນປີໃຫມ່ປະຈຳຊາດ ປີມະໂຣງ 2012 ໃກ້ຈະມາຮອດແລ້ວ, ເພື່ອປະກອບສ່ວນເຂົ້າໃນການຮັກສາລາຄາສິນຄ້າໃນທ້ອງຕະຫລາດໃຫ້ເປັນປົກກະຕິ, ຕອບສະຫນອງໄດ້ຕາມຄວາມຕ້ອງການສິນຄ້າຂອງປະຊາຊົນໃນໂອກາດບຸນເຕັດ, ຂະແຫນງອຸດສາຫະກຳ ການຄ້າ ແລະ ວິສາຫະກິດຢູ່ໃນນະຄອນຮ່າໂນ້ຍຫລາຍແຫ່ງ ໄດ້ ແລະ ພວມຜັນຂະຫຍາຍຫລາຍມາດຕະການເພື່ອຮັບປະກັນສະຫນອງສິນຄ້າໃຫ້ແກ່ປະຊາຊົນຢ່າງພຽງພໍ ເພື່ອໃຫ້ປະຊາຊົນໄດ້ຕ້ອນຮັບບຸນປີໃຫມ່ປະຈຳຊາດດ້ວຍຄວາມອົບອຸ່ນ ພ້ອມທັງສູ້ຊົນຮັກສາ ດັດຊະນີລາຄາໃຊ້ສອຍ CPI ໃນເດືອນ 1/2012 ໃຫ້ເພີ່ມຂຶ້ນໃນລະດັບຕຳ່ສຸດ.
ຕາມພະແນກອຸດສາຫະກຳ ການຄ້າ ນະຄອນ ຮ່າໂນ້ຍແລ້ວ, CPI ໃນເດືອນຕ້ອນຮັບບຸນເຕັດ (1/2012) ຈະເພີ່ມຂຶ້ນສູງກວ່າເມື່ອທຽບໃສທຸກເດືອນໃນປີ. ຄາດວ່າ ຍອດລະດັບຈໍລະຈອນສິນຄ້າຂາຍຍ່ອຍຢູ່ ຮ່າໂນ້ຍ ໃນເດືອນ 1/2012 ຈະເພີ່ມຂຶ້ນແຕ່ 20 -22%, ເມື່ອທຽບໃສ່ຊຸມເດືອນໃນປີແມ່ນປະມານ 24.000 ຕຶ້ດົງ/ເດືອນ. ພິເສດແມ່ນປີນີ້ ມີວິສາຫະກິດຫລາຍແຫ່ງໄດ້ເຂົ້າຮ່ວມໂຄງການຮັກສາລາຄາສິນຄ້າເປັນປົກກະຕິ. ນະຄອນ ຮ່າໂນ້ຍ ກໍຈັດຕັ້ງ 34 ຕະຫລາດນັດຫວຽດ, ໃນນັ້ນ ບັນດາວິສາຫະກິດກໍໄດ້ໃຫ້ຄຳໝັ້ນໝາຍວ່າ ຈະຂາຍພຽງສິນຄ້າໂດຍຫວຽດນາມຜະລິດເອງເທົ່ານັ້ນ. ພະແນກອຸດສາຫະກຳ ການຄ້າ ຮ່າໂນ້ຍ ໃຫ້ຮູ້ວ່າ: ທຸກວຽກງານໄດ້ກະກຽມສຳເລັດກ່ອນເດືອນ ຕ້ອນຮັບບຸນເຕັດແລ້ວ. ທ່ານ ຫງວຽນວັນດົ່ງ ຮອງຫົວຫນ້າພະແນກອຸດສາຫະກຳ ການຄ້າ ນະຄອນຮ່າໂນ້ຍ ໃຫ້ຮູ້ວ່າ:
“ຂະແຫນງອຸດສາຫະກຳການຄ້າໄດ້ ກະກຽມປະລິມານສິນຄ້າ ຮັບໃຊ້ຄວາມຕ້ອງການຂອງປະຊາຊົນໃນໂອກາດບຸນເຕັດນັບແຕ່ກ່ອນແລ້ວ. ພວກຂ້າພະເຈົ້າໄດ້ຈັດຕັ້ງການຂຸດຄົ້ນສິນຄ້າໃນທົ່ວປະເທດ ພິເສດແມ່ນເຂດເສດຖະກິດຈຸດສຸມຂອງພາກເຫນືອ ແລະ ຮ່ວມສຳພັນກັບບັນດາແຂວງທາງພາກເໜືອເພື່ອຮັບປະກັນສິນຄ້າຮັບໃຊ້ຄວາມຕ້ອງການຂອງປະຊາຊົນ.“
ປະເພດສິນຄ້າໄດ້ຮັກສາລາຄາເປັນປົກກະຕິ
ຕາມພະແນກອຸດສາຫະກຳ ການຄ້າ ຮ່າໂນ້ຍແລ້ວ, ທາງນະຄອນ ໄດ້ມອບຫນ້າທີ່, ມັດຈຳເງິນກ່ອນ ແລະ ວິສາຫະກິດ ຕ້ອງຮັບປະກັນການສະສົມປະລິມານສິນຄ້າໃຫ້ຫຼາຍທົບສອງເທົ່າເມື່ອທຽບໃສ່ປະລິມານສິນຄ້າທີ່ໄດ້ວາງອອກ. ວັນທີ 9/1 ຜ່ານມາ, ນະຄອນ ຮ່າໂນ້ຍ ໄດ້ເປີດບັນດາຮ້ານຊັບພະສິນຄ້າເຄື່ອນທີ່ໃນພາບດຽວ ຢູ່ 9 ເມືອງຊານນະຄອນ. ນີ້ແມ່ນການເຄື່ອນໄຫວປະຕິບັດລາຍການສົ່ງສິນຄ້າລົງໄປຂາຍຢູ່ເຂດຊົນນະບົດ, ບັນດາເຂດອຸດສາຫະກຳເພື່ອຮັບໃຊ້ຊາວກະສິກອນ ແລະ ກຳມະກອນ, ຜູ້ມີລາຍຮັບຕຳ່ໃນໂອກາດບຸນເຕັດ, ປະກອບສ່ວນຮັບປະກັນຊີວິດສັງຄົມ. ມາຮອດປະຈຸບັນ, ບັນດາຮ້ານຊັບພະສິນຄ້າໃຫຍ່ຄື: Metro, BicC, Coopmart ໄດ້ສະສົມທຸກປະເພດສິນຄ້າທີ່ຈຳເປັນດ້ວຍຍອດຈຳນວນເງິນຂຶ້ນເຖິງ 1.900 ຕຶ້ດົ່ງ. ບໍລິສັດໃຫຍ່ການຄ້າຮ່າໂນ້ຍ Hapro ແມ່ນຫນຶ່ງໃນ 15 ວິສາຫະກິດທີ່ເຂົ້າຮ່ວມການສະສົມສິນຄ້າໄດ້ກະກຽມແຫລ່ງສິນຄ້າສະສົມຢ່າງພຽງພໍ ປະກອບ ສ່ວນຮັກສາລາຄາໃນບໍລິເວນຮ່າໂນ້ຍໃຫ້ເປັນປົກກະຕິ. ນັບແຕ່ຊຸມເດືອນທ້າຍປີ, Hapro ໄດ້ເພີ່ມທະວີການສະສົມປະລິມານສິນຄ້າແລ້ວເພື່ອໃຫ້ປະຊາຊົນຢູ່ເຂດຫ່າງໄກຈາກໃຈກາງນະຄອນກໍ່ໄດ້ຊົມໃຊ້ລາຍການການຮັກສາລາຄາສິນຄ້າເປັນປົກກະຕິ. ຢູ່ຮ້ານຊັບພະສິນຄ້າ Hapromart ດົງແອງ, ປະຊາຊົນມາຊຶ້ສິນຄ້າກໍດີໃຈຫລາຍ ເພາະວ່າສິນຄ້າມີຫລາຍປະເພດ, ລາຄາກໍເໝາະສົມ. ເອື້ອຍເວີນແດງ ເຊິ່ງແມ່ນລູກຄ້າຜູ້ຫນຶ່ງໄດ້ແບ່ງປັນວ່າ:
“ຂ້າພະເຈົ້າເຫັນວ່າ ຢູ່ທີ່ນີ້ມີ ສິນຄ້າຫລາຍປະເພດທີ່ແຕກຕ່າງກັນ ລາຄາກໍເໝາະສົມ. ເມື່ອທຽບໃສ່ຮ້ານຂາຍເຄື່ອງອື່ນຢູ່ໃນທ້ອງຕະຫລາດ, ລາຄາຢູ່ທີ່ນີ້ແມ່ນເໝາະສົມພໍສົມຄວນ ແລະ ພໍດີກັບຄວາມສາມາດຂອງປະຊາຊົນ.“
ຕາມທ່ານ ຫວູມີນຕວັນ, ຜູ້ອຳນວຍການບໍລິສັດຫຸ້ນສ່ວນການຄ້າ Hapro ລອງບຽນແລ້ວ, ໂດຍເປັນເຈົ້າການໃນການເຂົ້າຮ່ວມບັນດາລາຍການຮັກສາລາຄາສິນຄ້າເປັນປົກກະຕິໃນໂອກາດບຸນ, Hapro ຖືວ່າ: ນີ້ແມ່ນທິດທາງອັນຕັ້ງຫນ້າ ເພື່ອເປີດກວ້າງຕະຫລາດ ແລະ ພັດທະນາເຄື່ອງໝາຍການຄ້າຂອງຕົນ. ທ່ານ ຫວູມີນຕວັນ ໃຫ້ຮູ້ວ່າ:
“ດ້ວຍລະບົບຂາຍຍ່ອຍ Hapromart ຂອງບໍລິສັດໃຫຍ່, ໃນການພັດທະນາຂອງຕົນ ທາງບໍລິສັດໃຫຍ່ໄດ້ກຳນົດທິດເປີດກວ້າງຕະຫລາດຂາຍຍ່ອຍ ພິເສດ ຕະຫລາດຢູ່ເຂດຊົນນະບົດ, ນັ້ນແມ່ນຕະຫລາດອັນກ້ວາງໃຫຍ່ຂອງນະຄອນຫລວງຮ່າໂນ້ຍ. ທາງບໍລິສັດໃຫຍ່ພວກຂ້າພະເຈົ້າມີຄວາມສາມາດສັງລວມກ່ຽວກັບການກຳນົດທິດການອຸປະໂພກບໍລິໂພກ, ມີຄວາມສາມາດໃນການເຈລະຈາ ກັບບໍລິສັດສະຫນອງສິນຄ້າ ເພື່ອມີນະໂຍບາຍບຸລິມະສິດ, ລາຄາເໝາະສົມ ຮັບໃຊ້ປະຊາຊົນ ດ້ວຍລາຄາເໝາະສົມ, ແຕ່ຮັບປະກັນດ້ານຄຸນນະພາບ.“
ອາດເຫັນໄດ້ຢ່າງຈະແຈ້ງວ່າ ນະຄອນ ຮ່າໂນ້ຍໄດ້ຖືວຽກງານຮັກສາລາຄາສິນຄ້າໃນທ້ອງຕະຫລາດເປັນປົກກະຕິ ແມ່ນຫນ້າທີ່ຈຸດສຸມນັບແຕ່ນີ້ຈົນໝົດໄຕມາດ ທີ1 ຂອງປີ 2012, ໃນນັ້ນ ສຸມໃສ່ໄລຍະກ່ອນບຸນເຕັດ, ໃນເວລາຕ້ອນຮັບບຸນເຕັດ ແລະ ຫລັງບຸນເຕັດ. ນະຄອນ ຮ່າໂນ້ຍ ກໍຈະປະຕິບັດວຽກງານຮັກສາລາຄາສິນຄ້າເປັນປົກກະຕິ ຕິດພັນກັບບັນດາໂຄງການຂອງລັດຖະບານ ເພື່ອຮັດກຸມລາຍຈ່າຍຂອງລັດ, ປະຕິບັດການປະຢັດ, ຕ້ານການຟຸມເຟືອຍ ແລະ ຮັບປະກັນຊີວິດສັງຄົມ./.
ໂຕຕວັນ