(vovworld) - ຕໍ່ຫນ້າສະພາບເສດຖະກິດພາຍໃນປະເທດ ແລະ ໃນໂລກສືບຕໍ່ປະສົບກັບຄວາມຫຍຸ້ງຍາກໃນປີ 2012 ພ້ອມກັບບັນດາມາດຕະການຮີບດ່ວນ ແລະ ຄົບຊຸດຂອງລັດຖະບານ, ນະຄອນ ຮ່າໂນ້ຍ ພວມຜັນຂະຫຍາຍຫລາຍມາດຕະການເພື່ອແກ້ໄຂຄວາມຫຍຸ້ງຍາກໃຫ້ແກ່ບັນດາວິສາຫະກິດ. ຫນຶ່ງໃນບັນດາ ມາດຕະການຕົ້ນຕໍ ນັ້ນແມ່ນ ຍູ້ແຮງການກະຕຸກຊຸກຍູ້ການໃຊ້ສອຍເພື່ອສ້າງເງື່ອນໄຂສະດວກໃຫ້ແກ່ບັນດາວິສາຫະກິດດຳເນີນທຸລະກິດເປັນປົກກະຕິ ແລະ ພັດທະນາການຜະລິດ.
ພາບປະກອບ:internet
|
ຕົວເລກສະຖິຕິສະແດງໃຫ້ເຫັນວ່າ: ລາຄາໃຊ້ສອຍ (CPI) ຢູ່ ຮ່າໂນ້ຍ ໃນເດືອນ 4 ຫລຸດລົງ 0,03% ເມື່ອທຽບໃສ່ເດືອນ 3 ແລະ ໄດ້ຮັບຮູ້ວ່າແມ່ນລະດັບຕຳ່ສຸດໃນຮອບເວລາ 10 ປີມານີ້. ໃນຈຳນວນ 11 ໝວດສິນຄ້າທີ່ຫຼຸດລາຄານັ້ນ, ມີ 3 ໝວດສິນຄ້າກວມອັດຕາສ່ວນໃຫຍ່ຄື: ການບໍລິການກິນດື່ມ, ວັດສະດຸກໍ່ສ້າງ ແລະ ບໍລິການໄປສະນີໂທລະຄົມ ລ້ວນແຕ່ຫລຸດລາຄາ ອັນໄດ້ເຮັດໃຫ້ດັດຊະນີລວມຫລຸດລົງຢ່າງແຮງເມື່ອທຽບກັບເດືອນ 3. ຕາມທຳມະດາແລ້ວ, ດັດຊະນີ CPI ຫລຸດລົງ ແມ່ນສັນຍານທີ່ຫນ້າຊື່ນຊົມ ແຕ່ເຖິງຢ່າງໃດກໍຕາມ, ສາຍເຫດຕົ້ນຕໍເຮັດໃຫ້ດັດຊະນີ CPI ຫລຸດລົງຢ່າງແຮງ ນັ້ນແມ່ນ, ໃນໄລຍະຜ່ານມາກຳລັງຊື້ສິນຄ້າຂອງປະຊາຊົນຫລຸດລົງຢ່າງແຮງ, ໃນສະພາບການຄືແນວນັ້ນ ຜູ້ຂາຍສິນຄ້າຕ້ອງຮັກສາຫລືຫລຸດລາຄາສິນຄ້າທຸກປະເພດເພື່ອຊອກຫາລູກຄ້າ.
ໃນຂະນະນັ້ນ ຈຳນວນວິສາຫະກິດເພີ່ມຂຶ້ນໃນໄຕມາດທີ 1 ປີນີ້ ຍັງຢູ່ໃນລະດັບຕຳ່ສຸດເມື່ອທຽບໃສ່ຊຸມປີກ່ອນນີ້, ໃນຂະນະນັ້ນຈຳນວນວິສາຫະກິດທີ່ຢຸດຕິການເຄື່ອນໄຫວໄດ້ເພີ່ມຂຶ້ນຢູ່ໃນລະດັບສູງພໍສົມຄວນ, ເປັນຕົ້ນແມ່ນວິສາຫະກິດຢຸດຕິການດຳເນີນທຸລະກິດຊ່ົວຄາວ. ສິ່ງດັ່ງກ່າວສະແດງໃຫ້ເຫັນວ່າ ປະຊາຄົມວິສາຫະກິດຢູ່ນະຄອນຫລວງພວມປະສົບກັບຄວາມຫຍຸ້ງຍາກຫລາຍຢ່າງ ຍ້ອນຖືກຜົນສະທ້ອນຈາກການຊຸດໂຊມຂອງພື້ນຖານເສດຖະກິດທົ່ວໂລກ ພ້ອມກັບບັນດາຄວາມຫຍຸ້ງຍາກທີ່ເກີດຂຶ້ນຈາກພື້ນຖານເສດຖະກິດພາຍໃນປະເທດ. ດອກເຕີ Nguyen Minh Phong ຜູ້ຊ່ຽວຊານສະຖາບັນຄົ້ນຄ້ວາເສດຖະກິດສັງຄົມ ຮ່າໂນ້ຍ ໃຫ້ຂໍ້ສັງເກດວ່າ:
“ຍ້ອນຄວາມຕ້ອງການທັງໝົດ. ພິເສດແມ່ນຄວາມຕ້ອງການຊຳລະ ແລະ ຕະຫລາດຊຳລະໃນຕະຫລາດມີການຊຸດໂຊມ ຊຶ່ງເຮັດໃຫ້ສິນຄ້າເຫລືອເຟືອ ພິເສດປະລິມານສິນຄ້າຄ້າງສາງ ກໍ່ຄືສິນຄ້າທີ່ຈຳເປັນຂອງປະຊາຊົນຍັງມີຫຼາຍຢູ່, ອັນໄດ້ເຮັດໃຫ້ຂາດຄວາມດຸນດຽງລະຫວ່າງຄວາມຕ້ອງການ ກັບ ການສະຫນອງ ”
ໃນສະພາບການປະຈຸບັນ, ບັນດາວິສາຫະກິດແມ່ນເປົ້າໝາຍຖືກກຳລັງດັນທີ່ສຸດເມື່ອຕ້ອງແກ້ໄຂບັນຫາສົ້ນເຂົ້າ
ສົ້ນອອກໃນການຜະລິດດຳເນີນທຸລະກິດ, ບັນດາລາຍຈ່າຍສົ້ນເຂົ້າລ້ວນແຕ່ເພີ່ມຂຶ້ນຄື: ນ້ຳມັນ, ອັດຕາດອກເບ້ຍທະນາຄານເຖິງວ່າໄດ້ຫລຸດລົງແຕ່ຍັງຢູ່ໃນລະດັບສູງຢູ່, ໃນຂະນະນັ້ນ ການຈຳໜ່າຍສິນຄ້າພັດຊັກຊ້າ, ແລະ ຈຳນວນສິນຄ້າຄ້າງສາງຍັງຫລາຍພໍສົມຄວນ. ຕໍ່ຫນ້າສະພາບການຄືດັ່ງກ່າວ, ມີວິສາຫະກິດຫລາຍແຫ່ງບໍ່ກ້າເພີ່ມລາຄາສິນຄ້າ ຫາກພຽງແຕ່ພະຍາຍາມຜະລິດໃນລະດັບຈຳກັດ. ພາຍຫລັງລັດຖະບານຕົກລົງຜັນຂະຫຍາຍໝວດມາດຕະການການເງິນລວມມູນຄ່າ 29.000 ຕື້ດົ່ງ ເພື່ອຫນູນຊ່ວຍວິສາຫະກິດ ແລະ ຕະຫລາດ, ນະຄອນ ຮ່າໂນ້ຍ ໄດ້ປະຕິບັດຫລາຍມາດຕະການເພື່ອຫນູນຊ່ວຍປະຊາຄົມວິສາຫະກິດຜ່ານຜ່າຄວາມຫຍຸ້ງຍາກໂດຍໄວ. ຫນຶ່ງໃນບັນດາມາດຕະການຕົ້ນຕໍຊຶ່ງນະຄອນຮ່າໂນ້ຍຖືເປັນສຳຄັນ ນັ້ນແມ່ນຍູ້ແຮງນະໂຍບາຍກະຕຸກຊຸກຍູ້ຄວາມຕ້ອງການໃຊ້ສອຍ ເພື່ອແນໃສ່ຊ່ວຍວິສາຫະກິດຫລຸດຜ່ອນສິນຄ້າຄ້າງສາງ, ຜ່ານນັ້ນເພີ່ມລາຍຮັບໃຫ້ແກ່ປະຊາຊົນ ແລະ ຫລຸດຜ່ອນລາຄາຜະລິດຕະພັນ. ທ່ານ Vu Vinh Phu ປະທານສະຫະສະມາຄົມຮ້ານສັບພະສິນຄ້າ ຮ່າໂນ້ຍ ຕີລາຄາວ່າ ນັບແຕ່ປີ 2010 ມາຮອດປະຈຸບັນ, ກຳລັງຊື້ໄດ້ຫລຸດລົງຢ່າງແຮງ ແລະ ປະຈຸບັນ ພວມຢູ່ໃນລະດັບຕຳ່ສຸດ ຍ້ອນໄພເງິນເຟີ້ແກ່ຍາວ. ທ່ານ Vu Vinh Phu ສະເຫນີວ່າ:
“ຕ້ອງຕໍ່ກຳນົດເວລາເກັບອາກອນ, ຍົກເວັ້ນອາກອນມູນຄ່າເພີ່ມສຳລັບການດຳເນີນທຸລະກິດແຕ່ 5 - 10%, ຫລຸດຜ່ອນລາຍຮັບວິສາຫະກິດ …. ປະຕິບັດບັນດາມາດຕະການຫນູນຊ່ວຍ ເພື່ອເຮັດແນວໃດໃຫ້ວິສາຫະກິດຄົງຕົວໄດ້ ພ້ອມກັນນັ້ນ ມີບັນດາມາດຕະການເພື່ອເພີ່ມກຳລັງຊື້ຂອງປະຊາຊົນ, ແກ້ໄຂວຽກເຮັດງານທຳ.”
ວິສາຫະກິດຜະລິດເກີບ
ພາບປະກອບ:internet
|
ມີຜູ້ຊ່ຽວຊານເສດຖະກິດຫລາຍທ່ານກໍມີຄວາມເຫັນດີເຫັນພ້ອມກັບທັດສະນະນີ້ ເພາະວ່າ ປະຈຸບັນຈຳເປັນຕ້ອງຫລຸດຜ່ອນອາກອນລາຍຮັບສ່ວນບຸກຄົນ, ເປີດກວ້າງ ການໃຫ້ກູ້ຢືມທຶນສຳລັບການໃຊ້ຈ່າຍ ແລະ ສຳຄັນແມ່ນບໍ່ປະໃຫ້ວິສາຫະກິດຫລາຍແຫ່ງຖືກລົ້ມລະລາຍ ເພື່ອໃຫ້ປະຊາຊົນມີລາຍຮັບ, ສ້າງກຳລັງຊື້. ພາຍຫລັງລັດຖະບານຕົກລົງຜັນຂະຫຍາຍໝວດມາດຕະການການເງິນດ້ວຍມູນຄ່າ 29.000 ຕື້ດົ່ງ ເພື່ອຫນູນຊ່ວຍວິສາຫະກິດ ແລະ ຕະຫລາດ, ນະຄອນ ຮ່າໂນ້ຍ ກໍພວມຮີບເຮັ່ງຜັນຂະຫຍາຍ 6 ໝວດມາດຕະການ ແຕ່ນີ້ຮອດທ້າຍປີ, ໃນນັ້ນ ຮຽນຮ້ອງໃຫ້ບັນດາອົງການສ່ວຍສາອາກອນ, ພາສີ ຜັນຂະຫຍາຍໝວດມາດຕະການບຸລິມະສິດຂອງລັດຖະບານກ່ຽວກັບພາສີ, ຄ່າໃຊ້ຈ່າຍຢ່າງທັນການ. ຄຽງຂ້າງນັ້ນ ຈະຫນູນຊ່ວຍວິສາຫະກິດຈຳຫນ່າຍຜະລິດຕະພັນ, ຫລຸດຜ່ອນສິນຄ້າຄ້າງສາງຜ່ານບັນດາໂຄງການສົ່ງເສີມການໃຊ້ສອຍ, ເພີ່ມງົບປະມານໃຫ້ແກ່ການເຄື່ອນໄຫວສົ່ງເສີມການຄ້າ, ເປີດກວ້າງຕະຫລາດສົ່ງອອກ, ພ້ອມທັງຍູ້ແຮງການປະຕິຮູບລະບຽບການບໍລິຫານ, ສ້າງສະພາບແວດລ້ອມຢ່າງສະດວກໃຫ້ແກ່ວິສາຫະກິດ.