(vovworld)- ວາລະເຈລະຈາຂັ້ນຫົວຫນ້າຄະນະເຈລະຈາສັນຍາຄູ່ຮ່ວມມືຂ້າມປາຊີຟີກ (TPP) ຫາກໍດຳເນີນໄປຢູ່ຮ່າໂນ້ຍ. ເລື່ອງເຂົ້າຮ່ວມສັນຍານີ້ ຈະນຳພື້ນຖານເສດຖະກິດຫວຽດນາມ ເຊື່ອມໂຍງຢ່າງເລິກເຊິ່ງ, ກວ້າງຂວາງກວ່າ, ເປີດທ່າແຮງໄດ້ຫລາຍກວ່າໃຫ້ແກ່ການລົງທຶນ, ສົ່ງອອກ, ແຕ່ຫວຽດນາມ ກໍຕ້ອງປະສົບກັບສິ່ງທ້າທາຍໃຫມ່ຫລາຍຢ່າງກວ່າ.
ພາບປະກອບ:internet
|
ເຂົ້າຮ່ວມວາລະເຈລະຈາຢູ່ຮ່າໂນ້ຍ, ນອກຈາກ ຄະນະຜູ້ແທນຫວຽດນາມ ມີຜູ້ຕາງຫນ້າຂອງ 11 ປະເທດອື່ນຄື: ອົດສະຕາລີ, ບຣູໄນ, ການາດາ, ຈີເລ, ຍີ່ປຸ່ນ, ມາເລເຊຍ, ເມຊີໂກ, ນິວເຊີແລນ, ເປຣູ, ສິງກະໂປ ແລະ ອາເມລິກາ. ທີ່ວາລະເຈລະຈາ, ບັນດາຄະນະຜູ້ແທນເຂົ້າຮ່ວມໄດ້ສຸມໃສ່ປຶກສາຫາລືບັນດາບັນຫາຍັງຄົງຄ້າງໃນບັນດາຂົງເຂດຄື: ສຳພັດກັບຕະຫລາດສິນຄ້າ ແລະ ບໍລິການ, ຊັບສິນທາງປັນຍາ, ການລົງທຶນ, ສິ່ງແວດລ້ອມ, ລັດວິສາຫະກິດ, ສະພາບແວດລ້ອມດ້ານນິຕິກຳ ແລະ ການແລກປ່ຽນສອງຝ່າຍ. ສຳລັບຫວຽດນາມ, ຊື່ງແມ່ນປະເທດພວມພັດທະນາເຂົ້າຮ່ວມ TPP, ສັນຍານີ້ຈະສ້າງກາລະໂອກາດໃຫຍ່ໃຫ້ແກ່ການຜະລິດ, ດຳເນີນທຸລະກິດ, ການຄ້າ, ການລົງທຶນ, ພິເສດແມ່ນຍູ້ແຮງການສົ່ງອອກ.
ເມື່ອສັນຍາຄູ່ຮ່ວມມືຂ້າມປາຊີຟີກ (TPP) ມີຜົນສັກສິດ, ມີເຖິງ 90% ປະເພດພາສີນຳເຂົ້າບັນດາຕະຫລາດໃຫຍ່ຄື: ອາເມລິກາ, ອົດສະຕາລີ, ຍີ່ປຸ່ນ ແລະ ການາດາຖືກຫລຸດລົງເຫລືອພຽງ 0%. ສິ່ງດັ່ງກ່າວຈະຊ່ວຍວິສາຫະກິດຫວຽດນາມ ຍູ້ແຮງການສົ່ງອອກ. ຄາດຄະເນວ່າ, ດ້ວຍວົງເງິນຂາອອກຂາເຂົ້າຂອງບັນດາປະເທດໃນ TPP ຂຶ້ນເຖິງ 230 ຕື້ ໂດລາສະຫະລັດ, ເລື່ອງເຂົ້າຮ່ວມສັນຍານີ້ ຈະຊ່ວຍໃຫ້ສິນຄ້າຫວຽດນາມເຕີບໂຕແຕ່ 20-30%. ເຖິງຢ່າງໃດກໍຕາມ, ໂດຍໄດ້ຮັບບຸລິມະສິດດ້ານພາສີ, ສິນຄ້າສົ່ງອອກຂອງຫວຽດນາມ ຕ້ອງຕອບສະຫນອງຄວາມຮຽກຮ້ອງຕ້ອງການກ່ຽວກັບຫລັກການຕົ້ນກຳເນີດສິນຄ້າຈາກພາຍໃນປະເທດ ຫລື ໃນບັນດາປະເທດເຂົ້າຮ່ວມ TPP. ໃນຂະນະນັ້ນ, ສະເພາະ ເຄື່ອງຕ່ຳແຜ່ນຕັດຫຍິບ ປະຈຸບັນ ມີເຖິງ 50% ແຫລ່ງວັດຖຸດິບຍັງຄົງນຳເຂົ້າຈາກບັນດາປະເທດນອກກຸ່ມ TPP. ດ້ານອື່ນ, ພ້ອມກັບການຫລຸດຜ່ອນພາສີ, ຕະຫລາດພາຍໃນກໍ່ຕ້ອງເປີດປະຕູນຳເຂົ້າສິນຄ້າຢ່າງກວ້າງຂວາງກວ່າ. ທ່ານ ຫງວຽນດືກທ້ວນ, ຮອງປະທານສະພາບໍລິຫານວິສາຫະກິດຫວຽດນາມ ຖືວ່າ:
“ສັນຍາ TPP ມີຫລາຍຂົງເຂດໃຫມ່ ຊື່ງແຕ່ດົນນານມາແລ້ວ ພວກເຮົາບໍ່ທັນມີໂອກາດເຂົ້າຮ່ວມການເຈລະຈາປານໃດ. ອົງການວາງແຜນນະໂຍບາຍ ຄວນຊອກຮູ້ເພື່ອສ້າງສະພາບແວດລ້ອມດ້ານນິຕິກຳ ຊ່ວຍວິສາຫະກິດຫວຽດນາມຮັບມືກັບສະພາບແວດລ້ອມໃນ TPP. ລັດຖະບານຄວນຊ່ວຍກຳນົດທິດລົງທຶນອຸດສາຫະກຳສຳຮອງໃຫ້ຂະແໜງຕ່ຳແຜ່ນຕັດຫຍິບ, ສ່ວນວິສາຫະກິດເອງຕ້ອງຍົກສູງກຳລັງຄວາມສາມາດແກ້ງແຍ້ງເພື່ອສາມາດຍົກຂຶ້ນສູ່ລະດັບສູງໃຫມ່.”
ຄຽງຄູ່ກັບການແກ້ໄຂບັນຫາທີ່ເປັນມູນເຊື້ອຄື: ຫັນການຄ້າສິນຄ້າ, ບໍລິການ ແລະ ການລົງທຶນເປັນເສລີ, ສັນຍານີ້ ກໍເຕື້ອງເຖິງທຸກຂົງເຂດໃຫມ່, ສຳຄັນຄື: ຊັບສິນທາງປັນຍາ, ນະໂຍບາຍແກ້ງແຍ້ງ, ລັດວິສາຫະກິດ, ການຊື້ຊັບສິນຂອງລັດຖະບານ, ແຮງງານ ແລະ ສິ່ງແວດລ້ອມ. ດ້ວຍບັນດາມາດຖານສູງ, ຄຳໝັ້ນສັນຍາເລິກເຊິ່ງກວ້າງຂວາງ, ເງື່ອນໄຂປະຕິບັດຢ່າງເຂັ້ມງວດນັ້ນເຮັດໃຫ້ພື້ນຖານເສດຖະກິດຫວຽດນາມ ຕ້ອງຍູ້ໄວການສ້າງໂຄງປະກອບຄືນໃຫມ່. ດຣ ຫວໍຈີແທ່ງ, ຮອງຫົວຫນ້າສະຖາບັນຄົ້ນຄ້ວາການບໍລິຫານເສດຖະກິດສູນກາງຖືວ່າ: ສັນຍານີ້ໄດ້ເປັນກຳລັງດັນເພື່ອປະຕິຮູບລະບອບນະໂຍບາຍ.
“ບັນດາຜົນປະໂຫຍດຊື່ງພວກເຮົາສາມາດບັນລຸໄດ້ຈາກ TPP ຍັງອີງໃສ່ເລື່ອງ ຫວຽດນາມ ຈະປະຕິຮູບໄດ້ຄືແນວໃດ. ການປະຕິຮູບນັ້ນ ຕ້ອງຕິດພັນກັບບັນດາລາຍການຈຸດສຸມກ່ຽວກັບການສ້າງໂຄງປະກອບຄືນໃຫມ່ ນັ້ນແມ່ນການລົງທຶນຂອງລັດ, ລັດວິສາຫະກິດ ແລະ ບັນດາອົງການສິນເຊື່ອ, ການປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ການຈັດແບ່ງແຫລ່ງກຳລັງຄືນໃຫມ່ໃຫ້ມີປະສິດທິຜົນກວ່າເພື່ອສ້າງບັນດາລະບອບນະໂຍບາຍເສດຖະກິດການຕະຫລາດໃຫ້ສົມບູນແບບ.”
ສັນຍາ TPP ມູ່ງໄປເຖິງສະພາບແວດລ້ອມສະເຫມີພາບ, ບໍ່ຈຳແນກປະເທດພັດທະນາ ຫລື ພວມພັດທະນາ. ນີ້ແມ່ນກາລະໂອກາດໃຫຍ່ໃຫ້ແກ່ການພັດທະນາ, ແຕ່ກໍຮຽກຮ້ອງບັນດາວິສາຫະກິດຫວຽດນາມ ຕ້ອງບືນຕົວຂຶ້ນເພື່ອມີກຳລັງຄວາມສາມາດ ຢ່າງພຽງພໍແນໃສ່ ແກ້ງແຍ້ງກັບວິສາຫະກິດຕ່າງໆຂອງບັນດາປະເທດອຸດສາຫະກຳພັດທະນາຄື: ອາເມລິກາ, ການາດາ ຫລື ອົດສະຕາລີ… ສະນັ້ນ ຢາກຍາດແຍ່ງກາລະໂອກາດ ແລະ ໄດ້ຊົມໃຊ້ຜົນປະໂຫຍດຈາກສັນຍາ TPP, ບັນຫາສຳຄັນທີ່ວາງອອກສຳລັບຫວຽດນາມ ນັ້ນແມ່ນຕ້ອງປະຕິຮູບພາຍໃນປະເທດຢ່າງແຂງແຮງ. ທ່ານ ເຈີນຢູລີກ, ຜູ້ຊ່ຽວຊານດ້ານເສດຖະກິດ ຖືວ່າ:
“ລັດຖະບານ ພວມມານະພະຍາຍາມສ້າງໂຄງປະກອບລັດວິສາຫະກິດ, ທະນາຄານ, ການລົງທຶນ, ການຊື້ຊັບສິນຂອງລັດຄືນໃຫມ່.. ເພື່ອເຊື່ອມໂຍງ ແລະ ພັດທະນາກະແສການລົງທຶນໃຫມ່, ຮັບມືກັບເງື່ອນໄຂສະພາບແວດລ້ອມຂອງ TPP. ສຳລັບວິສາຫະກິດ, ຮອດຈຸດເວລາແລ້ວທີ່ຕ້ອງເລີ່ມຕົ້ນໄລຍະໃຫມ່ ໂດຍອີງໃສ່ການພັດທະນາແບບຍືນຍົງ. ສະນັ້ນ ບັນດາວິສາຫະກິດຄວນເອົາໃຈໃສ່ເຖິງການສ້າງໂຄງປະກອບການເຄື່ອນໄຫວ, ກຳລັງຄວາມສາມາດບໍລິຫານຄືນໃຫມ່. ພິເສດ ເອົາໃຈໃສ່ເຖິງຄຸນນະພາບແຫລ່ງຊັບພະຍາກອນມະນຸດ, ຍົກສູງປະສິດທິຜົນການເຄື່ອນໄຫວຮ່ວມສຳພັນ, ປັບປຸງບົດບາດຂອງສະຫະສະມາຄົມເພື່ອເປັນຂົວເຊື່ອມຕໍ່ວິສາຫະກິດກັບຕະຫລາດ.”
ເພື່ອເຂົ້າຮ່ວມສັນຍາເສດຖະກິດທີ່ກວ້າງຂວາງ ແລະ ຂະຫຍັນຂັນເຄື່ອນອັນດັບຫນຶ່ງຂອງໂລກຄື TPP, ຫວຽດນາມ ຈະຕ້ອງແກ້ໄຂຫລາຍບັນຫາ. ນີ້ກໍແມ່ນຈຸດເວລາສຳຄັນເພື່ອໃຫ້ຫວຽດນາມ ດຳເນີນບັນດາການປະຕິຮູບຢ່າງແຮງກວ່າ, ຍາດແຍ່ງກາລະໂອກາດກະຕຸກຊຸກຍູ້, ນຳພື້ນຖານເສດຖະກິດຫວຽດນາມພັດທະນາໃນໄລຍະຈະມາເຖິງ.