ເຂົ້າເປັນສະມາຊິກ WTO: ການປ່ຽນແປງຄວາມຊິນເຄີຍຂອງ ຜູ້ອຸປະໂພກບໍລິໂພກຫວຽດນາມ.

ວັນພະຫັດ ທີ 22 ມີນາ ຄ.ສ. 2012 | 7:40:13

ຜູ້ອຸປະໂພກບໍລິໂພກພວມເລືອກເຟັ້ນສິນຄ້າຢູ່ຊັບພະສິນຄ້າແຫ່ງຫນຶ່ງ
ພາບປະກອບ:vietbao.vn

(vovworld)- ນອກຈາກບັນດາຜົນສຳເລັດຂອງພື້ນຖານເສດຖະກິດພາຍຫລັງ 5 ປີທີ່ເຂົ້າເປັນສະມາຊິກຂອງອົງການການຄ້າໂລກ(WTO) ຄື: ເປີດກວ້າງຕະຫລາດສົ່ງອອກ, ລະດັບຄ່າຄອງຊີບຂອງປະຊາຊົນໄດ້ຮັບການປົວແປງ, ເລື່ອງເຂົ້າເປັນສະມາຊິກຂອງ WTO ໄດ້ເຮັດໃຫ້ທ່າອ່ຽງໃຊ້ສອຍຂອງປະຊາຊົນມີການປ່ຽນແປງຢ່າງຕັ້ງຫນ້າ, ເປັນຕົ້ນແມ່ນຄວາມຕ້ອງການຊື້ສິນຄ້າທີ່ມີຄຸນນະພາບປະເພດຕ່າງໆ, ຮັບປະກັນຫລັກອະນາໄມຄວາມປອດໄພດ້ານສະບຽງອາຫານຢູ່ບັນດາສູນການຄ້າ, ຮ້ານຊັບພະສິນຄ້າ.

ຕາມການສັງເກດຂອງຜູ້ຊ່ຽວຊານຫລາຍທ່ານແລ້ວ, ພາຍຫລັງ 5 ປີທີ່ເຂົ້າເປັນສະມາຊິກຂອງ WTO, ພື້ນຖານເສດຖະກິດຂອງຫວຽດນາມ ໄດ້ພັດທະນາຢ່າງແຮງໃນທຸກຂົງເຂດ ແລະ ພິເສດແມ່ນບັນດາບໍລິການແຈກຢາຍ, ການຂາຍຍ່ອຍພັດທະນາຢ່າງແຮງໃນຂະນະທີ່ບັນດາກຸ່ມບໍລິສັດແຈກຢາຍຂອງຫລາຍປະເທດພວມມີການແກ້ງແຍ້ງຢ່າງແຮງ. ບັນດາວິສາຫະກິດຢູ່ພາຍໃນປະເທດກໍມີຄວາມຕັ້ງຫນ້າເປີດກວ້າງລະບົບຂາຍຍ່ອຍ, ເພີ່ມຄຸນນະພາບບໍລິການດ້ວຍຫລາຍ ຮູບການທີ່ອຸດົມສົມບູນ. ຈຳນວນຮ້ານຊັບພະສິນຄ້າທີ່ໄດ້ຮັບການສ້າງຕັ້ງໃຫມ່ພາຍຫລັງ 5 ປີທີ່ເຂົ້າເປັນສະມາຊິກຂອງ WTO ແມ່ນເພີ່ມຂຶ້ນ 20% ເມື່ອທຽບໃສ່ກັບ 5 ປີກ່ອນນີ້, ຈຳນວນສູນການຄ້າໄດ້ຮັບການສ້າງຕັ້ງໃຫມ່ກໍເພີ່ມຂຶ້ນ 72%. ພ້ອມກັນນັ້ນ, ຮ້ານຂາຍເຄື່ອງນັບຮ້ອຍຮ້ານໄດ້ຮັບການສ້າງຕັ້ງຂຶ້ນຕາມຮູບແບບທັນສະໄໝ ເຮັດໃຫ້ໂສມຫນ້າຂອງຂະແຫນງຂາຍຍ່ອຍປ່ຽນແປງໄປນຳ, ຄວາມຊິນເຄີຍ ແລະ ຈິດຕະສາດຂອງຜູ້ອຸປະໂພກບໍລິໂພກຫວຽດນາມກໍຖືກຫັນປ່ຽນຕາມທິດສີວິໄລ, ທັນສະໄໝ. ຕາມສະຫະສະມາຄົມບັນດາບໍລິສັດຂາຍຍ່ອຍຫວຽດນາມ ແລ້ວ, ເລື່ອງຫວຽດນາມ ເຂົ້າເປັນສະມາຊິກຂອງ WTO ໄດ້ເຮັດໃຫ້ຄວາມຊິນເຄີຍ ແລະ ຈິດຕະສາດໃນການໃຊ້ສອຍຖືກປ່ຽນແປງໄປນຳຄື: ຈາກການຊື້ເຄື່ອງຂອງໃນແຕ່ລະມື້ຢູ່ບັນດາຕະຫລາດທຳມະດາຫັນມາຊື້ສິນຄ້າດ້ວຍຈຳນວນຫລາຍໃຫ້ແກ່ທັງອາທິດຢູ່ບັນດາຮ້ານຊັບພະສິນຄ້າ, ສູນການຄ້າ ແລະ ຜ່ານເຄື່ອຂາຍອິນເຕີແນດ. ສິ່ງດັ່ງກ່າວກໍເຮັດໃຫ້ມູນຄ່າການຊື້ເຄື່ອງຂອງ, ການນຳໃຊ້ສິນຄ້ານັບມື້ນັບຫລາຍ, ຜ່ານບັນດາການບໍລິການດູແລສຸຂະພາບ, ນັບທັງບໍລິການເສີມສວຍໃຫ້ແກ່ທັງຍິງ ແລະ ຊາຍ, ບໍລິການທ່ອງທ່ຽວ, ປະກັນໄພ, ການສຶກສາ... ເອື້ອຍ ຫງວຽນທິແທນຮ່າ ຢູ່ ຖະຫນົນ ຫລໍ່ດຸກ ຮ່າໂນ້ຍ ໃຫ້ຮູ້ວ່າ: ກ່ອນນີ້ ເອື້ອຍພຽງແຕ່ຊື້ສິນຄ້າຢູ່ບັນດາຕະຫລາດທຳມະນາເທົ່ານັ້ນ ແຕ່ມາບັດນີ້ມີຄວາມຊິນເຄີຍໄປຊື້ເຄື່ອງຂອງຢູ່ຮ້ານຊັບພະສິນຄ້າເປັນປະຈຳແລ້ວ.

“ຢູ່ຮ້ານຊັບພະສິນຄ້າມີສິນຄ້າທຸກປະເພດ ແລະ ຄຸນນະພາບກໍດີກວ່າ, ລາຄາກໍເປັນປົກກະຕິ, ສະນັ້ນ ຈຳນວນປະຊາຊົນມາຊື້ເຄື່ອງຂອງຢູ່ຮ້ານຊັບພະສິນຄ້ານັບມືື້ນັບຫລາຍ. ລາຄາສິນຄ້າບາງປະເພດຢູ່ໃນຮ້ານຊັບພະສິນຄ້າສູງກວ່າຢູ່ຕະຫລາດທຳມະດາ, ແຕ່ຂ້າພະເຈົ້າມີຄວາມເຊື່ອໝັ້ນຕໍ່ຄຸນນະພາບ. ນອກນັ້ນ, ຍັງມີສິນຄ້າຫລາຍປະເພດເພື່ອໃຫ້ຂ້າພະເຈົ້າເລືອກເຟັ້ນອີກ”

ເຂົ້າເປັນສະມາຊິກ WTO: ການປ່ຽນແປງຄວາມຊິນເຄີຍຂອງ ຜູ້ອຸປະໂພກບໍລິໂພກຫວຽດນາມ. - ảnh 2

ເມື່ອເຂົ້າເປັນສະມາຊິກ WTO, ປະຊາຊົນຫວຽດນາມປ່ຽນແປງຄວາມຊີນເຄີຍ
ໃນການໃຊ້ສອຍ.
ພາບປະກອບ:internet

ປະຈຸບັນ, ຫວຽດນາມ ມີຕະຫລາດທຳມະດາກວ່າ 8.500 ແຫ່ງ, ຮ້ານຊັບພະສິນຄ້າກວ່າ 600 ແຫ່ງ, ສູນການຄ້າແລະ ຮ້ານຂາຍເຄື່ອງປະມານນັບ 100 ແຫ່ງ. ການພັດທະນານັບທັງຈຳນວນ ແລະ ຄຸນນະພາບຂອງບັນດາສູນການຄ້າໄດ້ດຶງດູດ ຜູ້ອະປະໂພກບໍລິໂພກມາຊື້ເປັນຈຳນວນຫລວງຫລາຍ. ຜູ້ອຸປະໂພກບໍລິໂພກສ່ວນຫລາຍຖືວ່າ: ຄວາມອຸດົມສົມບູນກ່ຽວກັບປະເພດສິນຄ້າ, ລາຄາເປັນປົກກະຕິ, ຄຸນນະພາບດີ ແມ່ນບັນດາປັດໄຈດູດດື່ມ ຜູ້ອຸປະໂພກບໍລິໂພກ. ເອື້ອຍ ຫງວຽນຊວັນຕວຽດ ຢູ່ເມືອງ ຮ່ວາງມາຍ ຮ່າໂນ້ຍ ໃຫ້ຮູ້ວ່າ:

“ເມື່ອຊື້ເຄ່ືອງຂອງຢູ່ຮ້ານຊັບພະສິນຄ້າ ຫລືຢູ່ສູນການຄ້າ, ຂ້າພະເຈົ້າເຫັນວ່າ ສິນຄ້າຮັບປະກັນກວ່າ. ຢູ່ໃນຮ້ານຊັບພະສິນຄ້າ, ລາຄາສິນຄ້າຖືກຕິດປະກາດ, ພວກເຮົາບໍ່ຕ້ອງຕໍ່ລາຄາອີກ. ນອກນັ້ນ ໃນຮ້ານຊັບພະສິນຄ້າພວກເຮົາຍັງໄດ້ຮັບການແນະນຳ,ໃຫ້ຄຳປຶກສາ ແລະ ການຊ່ວຍເຫລືອຈາກພະລາກອນ. ສິນຄ້າກໍມີຫລາຍປະເພດເພື່ອໃຫ້ຜູ້ຊົມໃຊ້ເລືອກເຟັ້ນຢ່າງສະດວກສະບາຍຕາມໃຈມັກ.”

ທ່ານນາງ ດີງທິໝີ໋ລວານ ຮອງປະທານປະຈຳ ທັງເປັນເລຂາທິການໃຫຍ່ສະຫະສະມາຄົມບັນດາບໍລິສັດຂາຍຍ່ອຍຫວຽດນາມ ຖືວ່າ: ໄປຄຽງຄູ່ກັບການປ່ຽນແປງຄວາມຊິນເຄີຍໃນການໃຊ້ສອຍແລ້ວ ແມ່ນການປ່ຽນແປງທ່າອ່ຽງພັດທະນາຂອງຕະຫລາດຂາຍຍ່ອຍຢູ່ຫວຽດນາມ. ທ່າອ່ຽງ ແລະ ການກະທຳອັນຕັ້ງຫນ້າໃນໄລຍະມໍ່ໆມານີ້ຂອງບັນດາວິສາຫະກິດຂາຍຍ່ອຍພາຍໃນປະເທດ ແມ່ນພ້ອມກັນຮ່ວມສຳພັນ ແລະ ສ້າງຍຸດທະສາດຍາວນານ, ເພີ່ມທະວີລັກສະນະວິຊາການ, ໃນນັ້ນ ເອົາໃຈໃສ່ເປັນພິເສດເຖິງການບຳລຸງສ້າງແຫລ່ງຊັບພະຍາກອນມະນຸດ ແລະ ການຄຸ້ມຄອງທີ່ທັນສະໄຫມ. ທ່ານນາງ ດີງທິໝີ໋ລວານ ເວົ້າວ່າ:

“ ຈຸດເລີ່ມຕົ້ນຂອງຂະແຫນງຂາຍຍ່ອຍຫວຽດນາມແມ່ນຕ່ຳຫຼາຍ, ກ່ອນນີ້ ພວກເຮົາຂາຍສິນຄ້າ ຍ່ອຍ 100% ຕາມຮູບການເດີມ. ປະຈຸບັນ ທ່າອ່ຽງພັດທະນາຢ່າງແຮງຂອງຕະຫລາດຂາຍຍ່ອຍຫວຽດນາມ ນັ້ນແມ່ນການພັດທະນາບັນດາຮູບການຂາຍຍ່ອຍທີ່ທັນສະໄໝ, ຊຶ່ງທ່າອ່ຽງຕໍ່ຫນ້າກຳລັງດັນຈາກການແກ້ງແຍ້ງເປີດປະຕູສູ່ຕະຫລາດ ຂອງເລື່ອງເຂົ້າເປັນສະມາຊິກຂອງ WTO ແລະ ເປັນຕົ້ນແມ່ນການເຕີບໂຕຂອງບັນດາວິສາຫະກິດຂາຍຍ່ອຍຕາມຮູບການທັນສະໄຫມ, ບັນດາວິສາຫະກິດມີຮູບການດຳເນີນທຸລະກິດເພື່ອຕອບສະຫນອງຄວາມຮຽກຮ້ອງຕ້ອງການຂອງຜູ້ອຸປະໂພກບໍລິໂພກ ຫລຸດຜ່ອນຄວາມຫລ້າຫລັງ, ປະຈຸບັນ ຕະຫລາດຂາຍ ຍ່ອຍໄດ້ມີບາດກ້າວຫັນປ່ຽນຫຼາຍພໍສົມຄວນ.”

ອັດຕາສ່ວນຄອງຕະຫຼາດຂອງບັນດາຮູບແບບຂາຍຍ່ອຍທີ່ທັນສະໄຫມຂອງຫວຽດນາມ ປະຈຸບັນ ກວມປະມານ 20%, ເພີ່ມຂຶ້ນທົບສອງເທົ່າເມື່ອທຽບໃສ່ໄລຍະກ່ອນທີ່ຫວຽດນາມຈະເຂົ້າເປັນສະມາຊິກຂອງ WTO ແລະ ມີທ່າອ່ຽງຈະສືບຕໍ່ເພີ່ມຂຶ້ນ. ມີວິສາຫະກິດຈຳນວນຫນຶ່ງແຈກຢາຍທຶນພາຍໃນປະເທດ ໄດ້ ແລະ ພວມຂະຫຍາຍບັນດາພື້ນຖານຂາຍຍ່ອຍຕາມຮູບແບບລະບົບເຄືອຂ່າຍ ແລະ ຄ່ອຍໆເຄື່ອນໄຫວມີລັກສະນະວິຊາການກວ່າ. ເຖິງຢ່າງໃດກໍຕາມ, ເພື່ອພັດທະນາຂະແຫນງຂາຍຍ່ອຍກວ່າອີກ, ຫວຽດນາມຄວນມີບັນດາກຸ່ມບໍລິສັດຂາຍຍ່ອຍທີ່ມີແຫລ່ງ ທຶນພາຍໃນປະເທດເຄື່ອນໄຫວຢ່າງຊຳນານງານກວ່າ, ມີກຳລັງແຮງ ແລະ ເງື່ອນໄຂຢ່າງພຽງພໍເພື່ອຮ່ວມມືກັບບັນດາກຸ່ມບໍລິສັດແຈກຢາຍຕ່າງປະເທດທີ່ເຂົ້າຫວຽດນາມລົງທຶນກໍ່ສ້າງຮາກຖານຂາຍຍ່ອຍຕາມວິວັດການເປີດປະຕູການບໍລິການແຈກຢາຍ.

ຫວີງຟອງ