(vovworld)-ໃນສະພາບເຊື່ອມໂຍງເຂົ້າກັບເສດຖະກິດໂລກ, ມີເຄື່ອງໝາຍສິນຄ້າຫລາຍປະເພດຂອງຫວຽດນາມ ໄດ້ ແລະ ພວມໄດ້ຮັບການສ້າງຂຶ້ນ, ຢັ້ງຢືນບົດບາດທີ່ຕັ້ງໃນເວທີສາກົນ. ເຖິງຢ່າງໃດກໍຕາມ, ໃນສະພາບຄວາມຫຍຸ້ງຍາກລວມຂອງພື້ນຖານເສດຖະກິດ ດ້ວຍລະດັບແກ້ງແຍ້ງນັບມື້ນັບແຮງຄືປະຈຸບັນ, ບັນດາວິສາຫະກິດຫວຽດນາມ ພວມຍູ້ແຮງການພັດທະນາເຄື່ອງໝາຍການຄ້າແຫ່ງຊາດ. ນີ້ກໍ່ແມ່ນເນື້ອໃນບົດຂຽນຂອງນັກຂ່າວ ໂຕຕວນ ທີ່ມີຫົວຂໍ້ວ່າ: ເຄື່ອງໝາຍການຄ້າ ແລະ ທ່າແກ້ງແຍ້ງຂອງວິສາຫະກິດ.
ໃນຕະຫລາດສາກົນ, ຫວຽດນາມ ພວມແມ່ນຫນຶ່ງໃນບັນດາປະເທດສົ່ງອອກຢ່າງແຮງ ດ້ວຍບັນດາຜະລິດຕະພັນກະເສດ, ອາຫານປຸງແຕ່ງ, ເກີບຫນັງ, ໂສ້ງເສື້ອ, ເຄື່ອງສິລະປະຫັດຖະກຳ, ສິນໃນນ້ຳ… ແລະ ຄຸນນະພາບຂອງບັນດາປະເພດສິນຄ້ານັບມື້ນັບເພີ່ມຂຶ້ນ. ເຖິງຢ່າງໃດກໍຕາມ, ມີ 90% ຈຳນວນສິນຄ້າຂອງຫວຽດນາມ ທີ່ສົ່ງອອກຕະຫລາດໂລກຕ້ອງຜ່ານຂອດກາງ ພາຍໃຕ້ຮູບການເປັນວັດຖຸດີບ ຫລືເຄື່ອງສຳຮອງຂອງບັນດາເຄື່ອງໝາຍການຄ້າທີ່ມີຊື່ສຽງຂອງຕ່າງປະເທດ. ສະນັ້ນ ຜູ້ອຸປະໂພກບໍລິໂພກຕ່າງປະເທດ ບໍ່ທັນຮູ້ຈັກເຖິງສິນຄ້າທີ່ມີເຄື່ອງໝາຍຂອງຫວຽດນາມ. ນີ້ແມ່ນຄວາມເສຍຫາຍສຳລັບສິນຄ້າຫວຽດນາມທີ່ສົ່ງໄປຂາຍຢູ່ຕ່າງປະເທດ. ໃນສະພາບເຊື່ອມໂຍງກັບເສດຖະກິດໂລກ ດ້ວຍເງື່ອນໄຂແກ້ງແຍ້ງຢ່າງຂ້ຽວຂາດຄືປະຈຸບັນ, ການເພີ່ມທະວີການສ້າງເຄື່ອງໝາຍການຄ້າແມ່ນສິ່ງທີ່ຈຳເປັນທີ່ສຸດສຳລັບ ບັນດາວິສາຫະກິດຫວຽດນາມ. ທ່ານ ເຈີນຮູຍລຽມ, ນັກວິຊາການຫ້ອງການການຄ້າ ແລະ ອຸດສາຫະກຳຫວຽດນາມ(VCCI) ຖືວ່າ:
“ໄລຍະປະຈຸບັນ ພວມແມ່ນວິວັດການເຊື່ອມໂຍງ ບັນດາວິສາຫະກິດພວມປະສົບກັບຄວາມຫຍຸ້ງຍາກຫລາຍຢ່າງ, ແຕ່ນີ້ກໍແມ່ນກາລະໂອກາດທີ່ດີເພື່ອໃຫ້ບັນດາວິສາຫະກິດສ້າງໂຄງປະກອບຄືນໃຫມ່ ແລະ ສຳພັດກັບບັນດາແຫລ່ງຂໍ້ມູນຂ່າວສານ, ບັນດາທັກສະ, ຄວາມຮູ້ເພື່ອສ້າງເຄ່ືອງໝາຍການຄ້າໃຫ້ແກ່ວິສາຫະກິດຂອງຕົນ.”
ພາບປະກອບ:internet
|
ຄວາມຈິງປະຈຸບັນ, ບັນດາວິສາຫະກິດຫວຽດນາມ ມີຫລາຍກາລະໂອກາດເພື່ອສຳພັດກັບບັນດາກຸ່ມບໍລິສັດເສດຖະກິດໃຫຍ່ຂອງໂລກ ເຂົາເຈົ້າມີທັກສະ, ບົດຮຽນໃນການສ້າງເຄື່ອງໝາຍການຄ້າ ແລະ ຜ່ານນັ້ນ ມີເງື່ອນໄຂຖອດຖອນບົດຮຽນ ເພື່ອສ້າງເຄື່ອງໝາຍການຄ້າໃຫ້ແກ່ຕົນ. ພ້ອມກັນນັ້ນ ຫວຽດນາມ ພວມກຳນົດວ່າຕ້ອງສ້າງເຄື່ອງໝາຍການຄ້າໃຫ້ແກ່ແຕ່ລະຂະແຫນງອາຊີບ, ບັນດາຜະລິດຕະພັນທີ່ມີຄວາມສາມາດບົ່ມຊ້ອນໃຫຍ່ຄື: ຂະແຫນງປຸງແຕ່ງອາຫານ, ເອເລັກໂຕນິກ, ຕຳ່ແຜ່ນຕັດຫຍີບ, ສິນໃນນ້ຳ, ຊື່ງແມ່ນບັນດາຂະແຫນງອຸດສາຫະກຳທີ່ບັນລຸໄດ້ຜົນງານຈຳນວນຫນຶ່ງໃນການດຶງດູດທຶນ FDI, ມີບົດບາດໃຫຍ່ຫລວງໃນການສົ່ງອອກ. ຄວາມຈິງຢູ່ ຫວຽດນາມ ມີບາງບໍລິສັດ, ວິສາຫະກິດ ບັນລຸໄດ້ຜົນງານຫລາຍຢ່າງໃນການສ້າງເຄ່ືອງໝາຍການຄ້າ, ພົ້ນເດັ່ນຄື: ກາເຟຈູງງວຽນ, ເບຍສົດຮ່າໂນ້ຍ, ແພໄຫມ ທາຍຕວນ… ນອກນັ້ນ ມີວິສາຫະກິດອື່ນຫລາຍແຫ່ງພວມຄ່ອຍໆສ້າງເຄື່ອງໝາຍການຄ້າໃຫ້ແກ່ຜະລິດຕະພັນຂອງຕົນຕາມທິດພັດທະນາແບບຍືນຍົງ. ບໍລິສັດເຄື່ອງປັ້ນດິນເຜົາ ມີງລອງ ແມ່ນຫນຶ່ງໃນຈຳນວນບໍລິສັດດັ່ງກ່າວ. ເຄື່ອງໝາຍເຄື່ອງປັ້ນດິນເຜົາ ມີງລອງ, ໃນຫລາຍປີມານີ້ໄດ້ຮັບຖືວ່າແມ່ນເຄື່ອງໝາຍການຄ້າອັນດັບໜຶ່ງຂອງເຄື່ອງປັ້ນດິນເຜົາທີ່ນຳໃຊ້ໃນຄອບຄົວ ຂອງຂະແຫນງເຄື່ອງປັ້ນດິນເຜົາຫວຽດນາມ. ບັນດາຜະລິດຕະພັນເຄື່ອງປັ້ນດິນເຜົາ ມີງລອງ ບໍ່ພຽງແຕ່ໄດ້ນຳໄປຂາຍຢູ່ພາຍໃນປະເທດເທົ່ານັ້ນ ຫາກຍັງສົ່ງໄປຂາຍຢູ່ຕະຫລາດຕ່າງປະເທດອີກດ້ວຍ. ທ່ານ ເລງອກມີງ, ຜູ້ອຳນວຍການໃຫຍ່ບໍລິສັດເຄື່ອງປັ້ນດິນເຜົາ ມີງລອງ 1 ໃຫ້ຮູ້ວ່າ:
“ເລີ່ມຈາກການສ້າງເຄື່ອງໝາຍວັດທະນະທຳໃຫ້ແກ່ຜະລິດຕະພັນ, ຕໍ່ມາ ພວກຂ້າພະເຈົ້າຈະສ້າງຄວາມແຕກຕ່າງກັນໃຫ້ແກ່ຜະລິດຕະພັນຂອງຕົນ. ຍາມໃດພວກຂ້າພະເຈົ້າກໍປ່ຽນໃຫມ່ຜະລິດຕະພັນ ແລະ ສ້າງພາບພົດບໍລິສັດຂອງຕົນໃຫ້ເປັນລະບົບ ແລະ ສົມກັບເຄື່ອງໝາຍການຄ້າໃຫຍ່.”
ເພື່ອສຳພັດກັບຕະຫລາດຕ່າງປະເທດ, ບັນດາຂະແຫນງອາຊີບຂອງຫວຽດນາມ ພວມປ່ຽນແປງວິທີດຳເນີນທຸລະກິດ, ຕົວຢ່າງຄື: ຂະແຫນງເອເລັກໂຕນິກ ຫັນຈາກການຜະລິດອຸປະກອນ, ຕິດຕັ້ງເປັນການຄົ້ນຄ້ວາ, ອອກແບບ ແລະ ປະດິດສ້າງຜະລິດຕະພັນດ້ວຍເຄື່ອງໝານການຄ້າຫວຽດນາມ, ຢັ້ງຢືນຜະລິດຕະພັນຂອງຫວຽດນາມຢູ່ຕະຫລາດໂລກ. ຄຽງຄູ່ກັບບັນດາປັດໄຈກ່ຽວກັບການຜະລິດດຳເນີນທຸລະກິດ, ບັນຫາໄດ້ຮັບຖືວ່າແມ່ນຍຸດທະສາດເພື່ອພັດທະນາເຄື່ອງໝາຍການຄ້າຢ່າງເລິກເຊິ່ງ, ກວ້າງຂວາງ ນັ້ນແມ່ນສະແຫວງຫາພາບພົດວັດທະນະທຳວິສາຫະກິດ, ສົ່ງເສີມການຮ່ວມມື, ປ່ຽນໃຫມ່ຫົວຄິດປະດິດສ້າງ ເພື່ອຍົກສູງປະສິດທິຜົນການດຳເນີນທຸລະກິດ, ນອກນັ້ນແຫລ່ງຊັບພະຍາກອນມະນຸດກໍໄດ້ຮັບຄວາມເອົາໃຈໃສ່. ທ່ານ ຫວູດີງແອງ, ຜູ້ຊ່ຽວຊານດ້ານເສດຖະກິດຖືວ່າ:
“ເພ່ືອສ້າງເຄື່ອງໝາຍການຄ້າ, ຮັກສາເຄື່ອງໝາຍການຄ້າ ແລະ ພັດທະນາເຄື່ອງໝາຍການຄ້ານັ້ນ ບໍ່ພຽງແຕ່ຕ້ອງມີຄວາມມານະພະຍາຍາມຂອງວິສາຫະກິດ, ຂອງເຈົ້າຂອງວິສາຫະກິດນັ້ນ ຫາກສິ່ງສຳຄັນແມ່ນຕ້ອງຮັກສາຄຸນນະພາບຜະລິດຕະພັນ ກໍຄືກຳລັງແກ້ງແຍ້ງຂອງສິນຄ້າອີກດ້ວຍ ເພື່ອເຮັດແນວໃດຮັກສາທ່າແຮງຂອງເຄື່ອງໝາຍການຄ້າໃຫ້ໄດ້. ນອກນັ້ນ ຕ້ອງມີການປະສານສົມທົບກັນບັນດາອົງການກ່ຽວຂ້ອງເພື່ອຊ່ວຍບັນດາວິສາຫະກິດຮັກສາ, ພັດທະນາເຄື່ອງໝາຍການຄ້າຂອງຕົນ.”
ໃນວິວັດການສ້າງເຄື່ອງໝາຍການຄ້າ, ບັນດາວິສາຫະກິດຄວນເພີ່ມທະວີດ້ານການເງິນ, ທັກສະດຳເນີນທຸລະກິດສາກົນ. ສິ່ງດັ່ງກ່າວຮຽກຮ້ອງຕ້ອງມີຄວາມຫນູນຊ່ວຍຢ່າງຕັ້ງຫນ້າຈາກບັນດາອົງການກ່ຽວຂ້ອງຂອງລັດກໍຄືບັນດາສະຫະສະມາຄົມຂະແຫນງສິນຄ້າໃນທົ່ວປະເທດ, ໃນການສະຫນອງຂໍ້ມູນຂ່າວສານ, ເຊື່ອມຈອດການດຳເນີນທຸລະກິດ, ສຳພັດກັບຕະຫລາດ, ຊ່ວຍວິສາຫະກິດສ້າງເຄື່ອງໝາຍການຄ້າ. ເມື່ອກຳນົດໄດ້ເຄື່ອງໝາຍການຄ້າແລ້ວ, ບັນດາວິສາຫະກິດຫວຽດນາມ ຈະສ້າງທ່າແກ້ງແຍ້ງໃນຕະຫລາດ ແລະ ບືນຕົວຂຶ້ນກາຍເປັນເຄື່ອງໝາຍການຄ້າລະດັບສາກົນ.