(vovworld)- ຊອກທິດກ້າວເດີນແບບຍືນຍົງໃຫ້ແກ່ການສົ່ງອອກຜະລິດຕະພັນກະເສດ ແມ່ນບັນຫາທີ່ບັນດາວິສາຫະກິດຫວຽດນາມ ວາງອອກ. ຕາມທິດນີ້, ບັນດາວິສາຫະກິດໄດ້ເອົາໃຈໃສ່ເປັນພິເສດໃນການເປີດກວ້າງຕະຫລາດ, ຍົກສູງຄຸນນະພາບຜະລິດຕະພັນ, ສ້າງໂຄງປະກອບບັນດາປະເພດສິນຄ້າສ່ົງອອກຄືນໃຫມ່ ເພື່ອຜ່ານຜ່າຄວາມຫຍຸ້ງຍາກໃນຕໍ່ຫນ້າ. ບົດຂຽນຂອງນັກຂ່າວ ຫວຽດຮ່າ.
ໃນໄລຍະຜ່ານມາ, ຜະລິດຕະພັນກະເສດສົ່ງອອກ ຂອງຫວຽດນາມ ສືບຕໍ່ສຸມໃສ່ຕະຫລາດນຳເຂົ້າຂອງຈີນ. ເພື່ອເປີດກວ້າງຕະຫລາດ ແລະ ຫລີກລ້ຽງຄວາມສ່ຽງເມື່ອສົ່ງອອກ, ມີວິສາຫະກິດຫລາຍແຫ່ງ ພວມຜັນຂະຫຍາຍການຊອກຫາ ແລະ ເປີດກວ້າງໄປຍັງບັນດາຕະຫລາດນຳເຂົ້າໃຫມ່ຄື: ຍີ່ປຸ່ນ, ສິງກະໂປ, ສເກົາຫລີ, ເອີລົບ, ອາເມລິກາ.. ປະຈຸບັນ, ຫວຽດນາມ ພວມເຈລະຈາສັນຍາການຄ້າເສລີ (FTA) ກັບອີຢູ, ຫວຽດນາມ ກໍ່ໄດ້ເຊັນສັນຍາກັບ 7 ປະເທດ ໃນຈຳນວນ 8 ປະເທດເຂົ້າຮ່ວມ FTA ຢູ່ ພາກພື້ນ ອາຊີ. ບັນດາການເຈລະຈານີ້ ໄດ້ເປີດກາລະໂອກາດໃຫ້ແກ່ຜະລິດຕະພັນກະເສດຂອງຫວຽດນາມເພື່ອຊອກຫາບໍລິສັດໃຫມ່ນຳເຂົ້າສິນຄ້າ ແທນທີ່ອີງໃສ່ຕະຫລາດດຽວ. ຄວາມຈິງ, ປະຈຸບັນມີຜະລິດຕະພັນກະເສດຫລາຍປະເພດຂອງ ຫວຽດນາມ ໄດ້ສົ່ງໄປຂາຍຢູ່ຕະຫລາດ ຍີ່ປຸນ, ອີຢູ… ຫວ່າງແລ້ວນີ້, ກະຊວງອຸດສາຫະກຳ ແລະ ການຄ້າ, ກະຊວງກະສິກຳ ແລະ ພັດທະນາຊົນນະບົດ ໄດ້ລົງນາມໃນບົດບັນທຶກຊ່ວຍຈຳຫລາຍສະບັບ ເພື່ອເພີ່ມທະວີການປະສານສົມທົບ, ວາງອອກບັນດາໝວດມາດຕະການສ້າງໂຄງປະກອບປະເພດສິນຄ້າສົ່ງອອກຄືນໃຫມ່, ເປີດກວ້າງຕະຫລາດ. ສະຫະສະມາຄົມຜັກ ແລະ ໝາກໄມ້ ຫວຽດນາມ ກໍໄດ້ຕັ້ງຫນ້າຊອກຫາກາລະໂອກາດສົ່ງອອກໄປຍັງບັນດາຕະຫລາດຕ້ອງການຜະລິດຕະພັນທີ່ມີຄຸນນະພາບສູງຄື: ອາເມລິກາ, ຍີ່ປຸ່່ນ, ສ.ເກົາຫລີ… ທ່ານ ດີງວັນເຮືອງ, ປະທານສະຫະສະມາຄົມ ຜັກ ແລະ ໝາກໄມ້ ຫວຽດນາມ ໃຫ້ຮູ້ວ່າ:
“ສິ່ງທີ່ສະດວກນັ້ນແມ່ນ ຕະຫລາດໃຫຍ່ຫລາຍແຫ່ງທີ່ຈຳຫນ່າຍຜັກ,ໝາກໄມ້ນຳເຂົ້ານັບມື້ນັບສົນໃຈເຖິງແຫລ່ງສະຫນອງຈາກຫວຽດນາມ. ປະຈຸບັນ ບັນດາວິສາຫະກິດແມ່ນສະມາຊິກສະຫະສະມາຄົມ ພວມຮ່ວມມືພັດທະນາຢູ່ ນີງບີງ, ຕວຽນກວາງ, ບັກຢາງ, ຮ່າຢາງ ແລະ ຊານນະຄອນ ຮ່າໂນ້ຍ ເພື່ອສະຫນອງແຫລ່ງສິນຄ້າມີຄຸນນະພາບຢ່າງພຽງພໍ. ບັນດາຄຳຮຽກຮ້ອງຕ້ອງການ ແລະ ຮົ້ວເຕັກນິກກ່ຽວກັບໂລກລະບາດ ແລະ ຄວາມປອດໄພຫລັກອະນາໄມດ້ານສະບຽງອາຫານຂອງບັນດາຕະຫລາດໃຫຍ່ຄື: ອາເມລິກາ, ອີຢູ, ຍີ່ປຸ່ນ ນັບມື້ນັບເຄັ່ງຄັດ, ບໍ່ມີຫລາຍວິສາຫະກິດຕອບສະຫນອງໄດ້. ນີ້ແມ່ນສິ່ງທ້າທາຍແຕ່ກໍແມ່ນກາລະໂອກາດໃນການເຊື່ອມໂຍງເຂົ້າກັບສາກົນ.”
ພາບປະກອບ
ເພື່ອຕອບສະຫນອງຄວາມຮຽກຮ້ອງຕ້ອງການມາດຕະຖານສູງຂອງຕະຫລາດ ວິສາຫະກິດຫວຽດນາມ ໄດ້ເປັນເຈົ້າການຍົກສູງຄຸນນະພາບຜະລິດຕະພັນ ແລະ ເພີ່ມທະວີການລົງທຶນປຸງແຕ່ງເພື່ອເພີ່ມມູນຄ່າ. ຕົວຢ່າງຄື: ເຂົ້າສານແມ່ນປະເພດສິນຄ້າສົ່ງອອກຕົ້ນຕໍຂອງຫວຽດນາມ ແຕ່ລາຄາຕຳ່ກວ່າເມື່ອທຽບໃສ່ເຂົ້າສານສົ່ງອອກຂອງບາງປະເທດ. ເພາະສະນັ້ນ ສະຫະສະມາຄົມທັນຍາຫານຫວຽດນາມ ພ້ອມກັບວິສາຫະກິດ ໄດ້ລົງທຶນຄົ້ນຄ້ວາ,ຊອກຫາບັນດາແນວພັນເຂົ້າຫອມມີຄຸນນະພາບສູງ ເພື່ອຜະລິດເຂົ້າສົ່ງອອກມີມູນຄ່າສູງກວ່າ ດ້ວຍລາຄາ 600-800 USD/ໂຕນ ແທນທີ່ 300-400 USD/ໂຕນຄືປະຈຸບັນ. ນອກນັ້ນ,ສະຫະສະມາຄົມ, ຂະແຫນງສິນຄ້າ ໄດ້ຫັນປ່ຽນໂຄງປະກອບຜະລິດຕະພັນປຸງແຕ່ງໃຫ້ເລິກເຊິ່ງເທື່ອລະກ້າວ, ຈຳກັດການຜະລິດ ແລະ ສົ່ງອອກຜະລິດຕະພັນດິບ. ປະຈຸບັນ ສະຫະສະມາຄົມໝາກມ່ວງຫິມະພານ ພວມສົ່ງເສີມບັນດາບໍລິສັດປຸງແຕ່ງບັນດາຜະລິດຕະພັນໃຫມ່, ເພື່ອເຮັດໃຫ້ມູນຄ່າການສົ່ງອອກຜະລິດຕະພັນໝາກມ່ວງຫິມະພານເພີ່ມຂຶ້ນແຕ່ 8% ຂຶ້ນເຖິງ 10% ໃນຍອດມູນຄ່າການສົ່ງອອກຂອງຂະແຫນງໝາກມ່ວງຫິມະພານໃນໄລຍະຈະມາເຖິງ. ທ່ານ ດັ້ງຮ່ວາງຢາງ, ເລຂາທິການໃຫຍ່ສະຫະສະມາຄົມໝາກມ່ວງຫິມະພານຫວຽດນາມ ໃຫ້ຮູ້ວ່າ:
“ກ່ຽວກັບການປຸງແຕ່ງສົ່ງອອກ ຈຸດເດັ່ນຂອງພວກເຮົາແມ່ນປຸງແຕ່ງໝາກມ່ວງຫິມະພານ. ພວກເຮົາມີການປັບປຸງຫລາຍຢ່າງ ແລະ ມີຫົວຄິດປະດິດສ້າງ, ມີເຄັດລັບໃນການປຸງແຕ່ງໝາກມ່ວງຫິມະພານ ແລະ ພິເສດ ກຳລັງແຮງງານມີຄວາມປະສົບການ. ຄວາມຈິງ ປະຈຸບັນ ບັນດາຜະລິດຕະພັນປຸງແຕ່ງມີມຸນຄ່າເພີ່ມສູງ ຍັງຈຳກັດຢູ່. ມີວິສາຫະກິດຫລາຍແຫ່ງເຂົ້າຮ່ວມການປຸງແຕ່ງ ແຕ່ຂອບຂະຫນາດການຜະລິດຍັງນ້ອຍ ແລະ ອີງໃສ່ທຶນກູ້ຢືມຈາກທະນາຄານ.”
ຕາມການຄາດຄະເນ, ແຕ່ນີ້ຮອດທ້າຍປີ ການສົ່ງອອກຜະລິດຕະພັນກະເສດຍັງປະສົບກັບຄວາມຫຍຸ້ງຍາກ, ສິ່ງທ້າທາຍຫລາຍຢ່າງ. ນອກຈາກການຊອກຫາ,ເປີດກວ້າງຕະຫລາດ, ເພີ່ມມູນຄ່າເພີ່ມຜະລິດຕະພັນ ເພື່ອນຳຜະລິດຕະພັນກະເສດຂອງຫວຽດນາມ ອອກສູ່ໂລກ, ເລື່ອງຍູ້ແຮງການສົ່ງອອກຜ່ານຊາຍແດນຍັງສວມບົດບາດສຳຄັນໃນການແກ້ໄຂບັນຫາຕະຫລາດຈຳຫນ່າຍ. ເພື່ອແກ້ໄຂບັນຫານີ້, ກະຊວງອຸດສາຫະກຳ ແລະ ການຄ້າ ຫວຽດນາມ ພວມມີບັນດາມາດຕະການຫນູນຊ່ວຍວິສາຫະກິດຫັນຕະຫລາດສົ່ງອອກເປັນຫລາຍຮູບຫລາຍແບບ, ພ້ອມທັງສົມທົບກັບກະຊວງກະສິກຳ ແລະ ພັດທະນາຊົນນະບົດ ສືບຕໍ່ປະຕິບັດການລົງທຶນເຕັກໂນໂລຊີປຸງແຕ່ງ ເພື່ອຍົກສູງມູນຄ່າຜະລິດຕະພັນກະສິກຳ. ທ່ານເຈີນແອງຕວນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ຢືນຢັນວ່າ:
“ຕ້ອງຫັນຕະຫລາດສົ່ງອອກເປັນຫລາຍຮູບຫລາຍແບບ ບົນພື້ນຖານຮັບປະກັນລັກສະນະຍືນຍົງຂອງບັນດາຕະຫລາດ. ໃນໄລຍະຈະມາເຖິງ, ກະຊວງອຸດສາຫະກຳ ແລະ ການຄ້າ ສືບຕໍ່ຫນູນຊ່ວຍວິສາຫະກິດສຳພັດກັບບັນດາຕະຫລາດໃຫມ່. ກະຊວງອຸດສາຫະກຳ ແລະ ການຄ້າ ຈະເປັນເຈົ້າການໃນການຄົ້ນຄ້ວາຕະຫລາດ ຊ່ວຍໃຫ້ວິສາຫະກິດສ້າງ ແລະ ຍົກອອກບັນດາຜະລິດຕະພັນສົ່ງອອກສອດຄ່ອງກັບຄວາມຕ້ອງການບໍລິໂພກ ແລະ ລັກສະນະຂອງຕະຫລາດ. ຈາກນັ້ນ ສ້າງໂຄງປະກອບໃນການຜະລິດຄືນໃຫມ່ເພື່ອຮັບປະກັນມູນຄ່າເພີ່ມກໍຄືມູນຄ່າໃນການສົ່ງອອກ.”
ໃນສະພາບການປະຈຸບັນ, ການເປັນເຈົ້າການຍົກສູງຄຸນນະພາບຜະລິດຕະພັນ ແລະ ມູນຄ່າເພີ່ມ, ບໍ່ພຽງແຕ່ນຳມາເຊິ່ງຜົນປະໂຫຍດໃຫ້ແກ່ວິສາຫະກິດເທົ່ານັ້ນ ຫາກຍັງປະກອບສ່ວນຢັ້ງຢືນເຄື່ອງໝາຍການຄ້າ, ທີ່ຕັ້ງບົດບາດຂອງຜະລິດຕະພັນກະເສດຫວຽດນາມ ໃນຕະຫລາດໂລກ.