(vovworld)-ນັບແຕ່ຕົ້ນປີມາຮອດປະຈຸບັນ, ການສົ່ງອອກຜະລິດຕະພັນກະເສດຂອງຫວຽດນາມ ບັນລຸກວ່າ 17,400 ຕື້ USD, ເພີ່ມຂຶ້ນເກືອບ 12% ເມ່ືອທຽບໃສ່ໄລຍະດຽວກັນຂອງປີກາຍ. ຄາດຄະເນວ່າ ໄລຍະຈະມາເຖິງ, ເມື່ອບັນດາສັນຍາຄູ່ຮ່ວມມືຂ້າມ ປາຊີຟີກ (TPP), ສັນຍາການຄ້າເສລີກັບສະຫະພາບເອີລົບ (ອີຢູ) ສຳເລັດໃນທ້າຍປີນີ້, ການສົ່ງອອກຜະລິດຕະພັນກະເສດຂອງຫວຽດນາມ ຈະມີກາລະໂອກາດເປີດກວ້າງຕະຫລາດ, ຫລຸດຜ່ອນການອີງໃສ່ຕະຫລາດຈຳນວນຫນຶ່ງ, ຮັບປະກັນໃຫ້ການສົ່ງອອກເປັນປົກກະຕິ ແລະ ໝັ້ນຄົງ. ບົດຂຽນຂອງນັກຂ່າວ ມີງລອງ ທີ່ພາດຫົວເລື່ອງວ່າ: ເປີດກວ້າງຕະຫລາດສົ່ງອອກຜະລິດຕະພັນກະເສດ.
ປີ 2013, ການສົ່ງອອກໝາກມັງກອນແກ້ວສົດ ບັນລຸ 326.000 ໂຕນ
photo:internet
|
ການສົ່ງອອກ ກາເຟ, ໝາກມ່ວງຫິມະພານ, ໝາກພິກໄທ, ສິນໃນນຳ້, ໄມ້ ແລະ ຜະລິດຕະພັນປຸງແຕ່ງຈາກໄມ້ ສືບຕໍ່ແມ່ນໝວດສິນຄ້າທີ່ບັນລຸລະດັບເຕີບໂຕນັບທັງດ້ານປະລິມານກໍຄືມູນຄ່າ. ໃນຂະນະນັ້ນ, ມີຜະລິດຕະພັນກະເສດອື່ນຫລາຍປະເພດຄື: ຜັກ, ໝາກໄມ້ຂອງຫວຽດນາມ ໄດ້ແຊກຊືມເຂົ້າບັນດາຕະຫລາດທີ່ຕ້ອງການຄຸນນະພາບສູງຄື: ສະຫະພາບເອີລົບ, ອາເມລິກາ, ຍີ່ປຸ່ນ, ສເກົາຫລີ.. ສະເພາະໝາກສົ້ມໂອ, ໝາກມັງກອນແກ້ວ ໄດ້ສົ່ງໄປຂາຍຢູ່ 40 ປະເທດ ແລະ ເຂດແຄ້ວນໃນໂລກ, ດ້ວຍປະລິມານການສົ່ງອອກໝາກມັງກອນແກ້ວສົດໃນປີ 2013 ບັນລຸ 326.000 ໂຕນ ແລະ ມູນຄ່າການສົ່ງອອກກວ່າ 200 ລ້ານ USD. ໃນ 7 ເດືອນຜ່ານມາ, ການສົ່ງອອກໝາກມັງກອນແກ້ວ ສືບຕໍ່ເພີ່ມຂຶ້ນ 16% ເມື່ອທຽບໃສ່ໄລຍະດຽວກັນຂອງປີກາຍ. ທ່ານ ຫງວຽນຊວນຮົ່ງ, ຮອງຫົວຫນ້າຄະນະຊີ້ນຳການພັດທະນາຕະຫລາດສົ່ງອອກຜັກ,ໝາກໄມ້, ສັງກັດກະຊວງກະສິກຳ ແລະ ພັດທະນາຊົນນະບົດຫວຽດນາມ ຖືວ່າ: ເພື່ອຮັບກາລະໂອກາດເປີດກວ້າງຕະຫລາດສົ່ງອອກ, ບັນດາວິສາຫະກິດຄວນປ່ຽນແປງວິທີສຳພັດ, ການຮັກສາ ແລະ ພັດທະນາບັນດາຕະຫລາດເດີມ ຜ່ານການຍົກສູງຄຸນນະພາບ ແລະ ຄຸນຄ່າບັນດາປະເພດຜະລິດຕະພັນກະເສດ ຊື່ງຫວຽດນາມ ມີທ່າໄດ້ປຽບ. ດ້ານອື່ນ, ຕ້ອງເພີ່ມທະວີການລົງທຶນ ເຕັກໂນໂລຊີປຸງແຕ່ງຫລັງການເກັບກ່ຽວ ສຳລັບບັນດາປະເພດຜະລິດຕະພັນກະເສດ.
“ວິສາຫະກິດຄວນເພີ່ມທະວີການລົງທຶນປະກອບເຕັກໂນໂລຊີປຸງແຕ່ງບັນດາປະເພດຜະລິດຕະພັນກະເສດພາຍໃນປະເທດ. ຕົວຢ່າງ ພວກເຮົາສາມາດກໍ່ສ້າງບັນດາໂຮງງານຜະລິດນຳ້ມັນ Ethanol ໂດຍນຳໃຊ້ມັນຕົ້ນຜະລິດພາຍໃນປະເທດ ຫລືນຳໃຊ້ຂີ້ເລື່ອຍເພື່ອປຸງແຕ່ງບັນດາຜະລິດຕະພັນໄມ້ແທນໃຫ້ການນຳເຂົ້າປະເພດສິນຄ້ານີ້ຈາກຕ່າງປະເທດ.”
ຍ້ອນ ຍູ້ແຮງການນຳໃຊ້ເຕັກໂນໂລຊີປຸງແຕ່ງ ແລະ ເພີ່ມທະວີວຽກງານສົ່ງເສີມການຄ້າ, ໄລຍະຜ່ານມາ ມີຜະລິດຕະພັນກະເສດຫລາຍປະເພດຂອງຫວຽດນາມ ໄດ້ຮັບຜົນສຳເລັດໃນການຊອກຫາຕະຫລາດໃຫມ່, ດ້ວຍການໝູນໃຊ້ເຕັກໂນໂລຊີໃຫມ່ ໄດ້ເປີດທິດສົ່ງອອກໃຫ້ແກ່ໝາກໄມ້ຂອງຫວຽດນາມ. ໃນຂະນະນັ້ນ, ບັນດາຕະຫລາດຫາກໍ່ພົ້ນເດັ່ນຢູ່ພາກພື້ນຕາເວັນອອກກາງ, ອາຟຼິກາ ພວມ ຕ້ອງການນຳເຂົ້າຜະລິດຕະພັນກະເສດຂອງຫວຽດນາມ ຫລາຍສົມຄວນ, ອັນໄດ້ສ້າງກາລະໂອກາດໃຫ້ແກ່ບັນດາວິສາຫະກິດສົ່ງອອກຂອງຫວຽດນາມ. ດຣ ດັ້ງກີມເຊີນ, ຫົວຫນ້າສະຖາບັນນະໂຍບາຍ ແລະ ຍຸດທະສາດພັດທະນາກະສິກຳຊົນນະບົດຖືວ່າ: ບັນດາວິສາຫະກິດ ຫວຽດນາມ ຄວນເປັນເຈົ້າການກວ່າອີກໃນການຂຸດຄົ້ນບັນດາຕະຫລາດໃຫມ່ເພື່ອຫລີກລ້ຽງຄວາມສ່ຽງເມື່ອອີງໃສ່ຕະຫລາດຈຳນວນຫນຶ່ງ. ດຣ ດັ້ງກີມເຊີນ ໄຈ້ແຍກວ່າ:
“ຢາກຮັບປະກັນຕະຫລາດໄດ້ ກ່ອນອື່ນໝົດ ຕ້ອງກຳແຫນ້ນໂຄງປະກອບຂອງຕະຫລາດ. ຕ້ອງເຂົ້າໃຈກຳລັງຊື້, ສະຖານທີ່ຈຳຫນ່າຍຂອງຕະຫລາດ, ລະບົບມູນຄ່າໃດທີ່ສາມາດດຶງດູດຜູ້ໃຊ້ສອຍຜະລິດຕະພັນຂອງຕົນໄດ້ຫລາຍກວ່າ.”
ທ່ານ ຮ່າກົງຕວນ, ລັດຖະມົນຕີຊ່ວຍວ່າການກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໃຫ້ຮູ້ວ່າ: ປະຈຸບັນ ກະຊວງພວມຊີ້ນຳບັນດາອົງການກ່ຽວຂ້ອງ ກວດກາຄືນບັນດາຕະຫລາດ ແລະ ສົມທົບບັນດາກະຊວງ,ຂະແຫນງການກ່ຽວຂ້ອງ, ກັບສະຫະສະມາຄົມ, ວິສາຫະກິດ ເພື່ອແກ້ໄຂຄວາມຫຍຸ້ງຍາກ, ຂໍ້ຕິດຂັດໃຫ້ວິສາຫະກິດ. ຄຽງຄູ່ກັນນັ້ນ, ກະຊວງຈະຫນູນຊ່ວຍ, ສ້າງຄວາມສະດວກໃຫ້ບັນດາວິສາຫະກິດຍູ້ແຮງການຜະລິດ, ດ້ວຍການກວດຄືນ ແລະ ສະຫນອງຂໍ້ມູນຂ່າວສານກ່ຽວກັບຕະຫລາດຢ່າງທັນການ ແນໃສ່ດັດປັບໃຫ້ເໝາະສົມກັບຂອບຂະຫນາດການຜະລິດ.
“ໄລຍະຈະມາເຖິງ, ກະຊວງກະສິກຳ ແລະ ພັດທະນາຊົນນະບົດ ຈະສຸມໃສ່ວຽກງານຄຸ້ມຄອງລັດ, ສືບຕໍ່ແກ້ໄຂຄວາມຫຍຸ້ງຍາກໃຫ້ວິສາຫະກິດ, ຍູ້ແຮງການສ້າງໂຄງປະກອບວິສາຫະກິດສົ່ງອອກຜະລິດຕະພັນກະເສດຄືນໃຫມ່ເພື່ອຮັບມືກັບບັນດາການຜັນແປຂອງຕະຫລາດ, ຮັກສາຕະຫລາດ ແລະ ການຈະເລີນເຕີບໂຕ GDP ຂອງຂະແຫນງໃນປີນີ້ໃຫ້ຢູ່ໃນລະດັບ 3%.”
ໃນຊຸມປີຜ່ານມາ, ວົງເງິນສົ່ງອອກບັນດາປະເພດຜະລິດຕະພັນກະເສດ, ເຄື່ອງປາຂອງດົງ, ສິນໃນນ້ຳ ກວມອັດຕາສວ່ນເກືອບ 20% ຍອດວົງເງິນການສົ່ງອອກສິນຄ້າຂອງທັງປະເທດ. ເພື່ອເປີດກວ້າງຕະຫລາດ, ໄລຍະຈະມາເຖິງ ກະຊວງກະສິກຳ ແລະ ພັດທະນາຊົນນະບົດ ຈະສຸມໃສ່ຍົກສູງຄຸນນະພາບຜະລິດຕະພັນ ພ້ອມກັບການຊັບຊ້ອນບັນດາວິສາຫະກິດຄືນໃຫມ່ ຕາມລະບົບມູນຄ່າທົ່ວໂລກ ເພື່ອເພີ່ມທະວີລັກສະນະແກ້ງແຍ້ງຂອງຜະລິດຕະພັນກະເສດຂອງຫວຽດນາມ. ເພື່ອປະຕິບັດຫນ້າທີ່ນີ້, ເລື່ອງສ້າງໂຄງປະກອບຂະແຫນງຄືນໃຫມ່ໄດ້ຮັບຖືວ່າ ແມ່ນຂອດບຸກທະລຸ ເພື່ອຮັກສາລະດັບຈະເລີນເຕີບໂຕ. ດ້ານອື່ນ, ກະຊວງກະສິກຳ ແລະ ພັດທະນາຊົນນະບົດ ກໍເອົາໃຈໃສ່ຍົກສູງຄຸນນະພາບຄວາມປອດໄພຫລັກອະນາໄມດ້ານອາຫານ ແລະ ຄຸ້ມຄອງອຸປະກອນກະສິກຳ ເພື່ອສ້າງເຄື່ອງໝາຍການຄ້າ ແລະ ຢັ້ງຢືນທີ່ຕັ້ງໃນເວທີສາກົນ.