(vovworld)-ເຂດໄຕບັກ(ໝາຍເຖິງທາງທິດຕາເວັນຕົກສ່ຽງເຫນືອຂອງຫວຽດນາມ) ແມ່ນເຂດດິນແດນມີຄວາມສາມາດບົ່ມຊ້ອນຫລາຍຢ່າງເພື່ອພັດທະນາການທ່ອງທ່ຽວ ດ້ວຍບັນດາທ່າແຮງຄື: ມີປະຫວັດສາດມາແຕ່ດົນນານ, ມີວັດທະນະທຳຫລາຍຮູບຫລາຍແບບ, ມີສີສັນທີ່ເປັນເອກະລັກສະເພາະຂອງບັນດາເຜົ່າ, ມີທິວທັດທຳມະຊາດທີ່ສວຍງາມ. ສະນັ້ນ ການຮ່ວມສຳພັນລາຍການທ່ອງທ່ຽວແມ່ນທິດກ້າວເດີນທີ່ສຳຄັນເພື່ອຂຸດຄົ້ນບັນດາຄວາມສາມາດບົ່ມຊ້ອນຂອງແຕ່ລະເຂດ, ແຕ່ລະທ້ອງຖິ່ນ, ແຕ່ລະບ້ານ, ເຮັດໃຫ້ບັນດາຄຸນຄ່າທຳມະຊາດ, ວັດທະນະທຳບໍ່ມີຮູບຮ່າງ ແລະ ມີຮູບຮ່າງກາຍເປັນກຳລັງແຮງສັງລວມ, ມູ່ງໄປເຖິງການພັດທະນາຂະແຫນງທ່ອງທ່ຽວແບບຍືນຍົງ ແລະ ຍາວນານ.
ນາຂັ້ນໄດຢູ່ເຂດໄຕບັກ
ພາບ:internet
|
ທ່າອ່ຽງພົ້ນເດັ່ນໃນຊຸມປີຜ່ານມາ ນັ້ນແມ່ນນັກທ່ອງທ່ຽວມາຈາກ ເອີລົບ ນິຍົມຮູບການທ່ອງທ່ຽວຄົ້ນຫາບັນດາເຂດດິນທີ່ຮົກເຮື້ອເປົ່າຫວ່າງ. ສິ່ງດັ່ງກ່າວແມ່ນຄວາມສະດວກທີ່ສຸດສຳລັບບັນດາແຂວງຢູ່ເຂດ ໄຕບັກ, ຄື: ລາວກາຍ, ອຽນບາຍ, ເຊີນລາ, ຮ່ວາບີງ, ຟູທໍ້, ຮ່າຢາງ,ລາຍເຈົາ, ດ້ຽນບຽນ. ບັນດາແຂວງຢູ່ເຂດໄຕບັກ ພວມສ້າງບັນດາຮູບແບບຮ່ວມສຳພັນລາຍການທ່ອງທ່ຽວ ເພື່ອສ້າງຄວາມດຶງດູດນັກທ່ອງທ່ຽວ. ບາງຮູບແບບຮ່ວມສຳພັນທີ່ໄດ້ນຳມາເຊິ່ງໝາກຜົນໃນເບື້ອງຕົ້ນ, ສ້າງເງື່ອນໄຂໃຫ້ແກ່ຂະແຫນງທ່ອງທ່ຽວໄຕບັກພັດທະນາຢ່າງເລິກເຊິ່ງກວ້າງຂວາງ, ບົນພື້ນຖານເສີມຂະຫຍາຍຄວາມສາມາດບົ່ມຊ້ອນ, ທ່າແຮງຂອງແຕ່ລະທ້ອງຖິ່ນຄື: ຮູບແບບຮ່ວມສຳພັນລະຫວ່າງ 3 ແຂວງ ລາຍກາຍ - ອຽນບາຍ - ຟູທໍ້ ໃນລາຍການທ່ອງທ່ຽວກັບຄືສູ່ກົກເຄົ້າເຫງົ້າກໍ; ຮູບແບບຮ່ວມສຳພັນລະຫວ່າງ 3 ແຂວງ ເຂດໄຕບັກ ເພື່ອພັດທະນາການທ່ອງທ່ຽວ ດ້ວຍໂຄງການເສັ້ນທາງຢູ່ເຂດໄຕບັກ, ສ້າງລາຍການທ່ອງທ່ຽວບັນດາໝູ່ບ້ານທຸກຍາກກວ່າໝູ່ໃນທົ່ວປະເທດ, ປະກອບສ່ວນລົບລ້າງຄວາມອຶດຫິວຫລຸດຜ່ອນຄວາມທຸກຍາກໃຫ້ແກ່ປະຊາຊົນຜ່ານການເຮັດບໍລິການທ່ອງທ່ຽວ. ທ່ານ ເຈີນຫືວເຊີນ, ຫົວຫນ້າພະແນກວັດທະນະທຳ, ກິລາ ແລະ ທ່ອງທ່ຽວ ແຂວງ ລາວກາຍ ຖືວ່າ:
“ຈຸດພົ້ນເດັ່ນທີ່ສຸດຂອງ 8 ແຂວງ ເຂດໄຕບັກ ໃນການດຶງດູດນັກທ່ອງທ່ຽວສາກົນ ນັ້ນແມ່ນທິວທັດທຳມະຊາດສວຍງາມ ແລະ ຄວາມສາມາດບົ່ມຊ້ອນພັດທະນາການທ່ອງທ່ຽວຊີວະພາບ. ມີຫລາຍຄົນຢາກຢ້ຽມຊົມທິວທັດທຳມະຊາດສວຍງາມຂອງປ່າດົງດິບ, ແມ່ນ້ຳລຳເຊ, ຫ້ວຍນຳ້, ຊີວະນາໆພັນ. ຢູ່ທີ່ນີ້ ຍັງມີລະບົບຕະຫລາດນັດຢູ່ເຂດພູສູງທີ່ລືຊື່, ລະບົບປ່າສະຫງວນແຫ່ງຊາດ, ຄວາມງາມເຂດພູພຽງຫິນດົງວັນ, ທົ່ງນາຂັ້ນໄດ, ເສັ້ນທາງຂ້າມປ່າ ຫລືໄປທ່ອງທ່ຽວລຽບຕາມແມ່ນ້ຳລາ ຈາກເມ່ືອງໄລແຂວງ ດ້ຽນບຽນ ເຖິງ ເຊີນລາ, ຜ່ານລາຍເຈົາ, ລົງຮອດ ຮ່ວາບີງ, ຕາມແມ່ນ້ຳດາ. ນີ້ແມ່ນລາຍການທ່ອງທ່ຽວລຽບຕາມແມ່ນ້ຳສວຍງາມທີ່ສຸດ, ເຊິ່ງໄດ້ດຶງດູດ ນັກທ່ອງທ່ຽວທັງຢູ່ພາຍໃນແລະຕ່າງປະເທດ.”
ໄປຄຽງຄູ່ກັບການສ້າງຮູບແບບຮ່ວມສຳພັນລາຍການທ່ອງທ່ຽວ, ແຕ່ລະແຂວງ ຢູ່ເຂດໄຕບັກ ຍັງສ້າງຜະລິດຕະພັນທ່ອງທ່ຽວທີ່ເປັນເອກະລັກສະເພາະ, ເຂັ້ມຂົ້ນໄປດ້ວຍສີສັນຂອງທ້ອງຖິ່ນຕົນອີກດ້ວຍ. ອີງຕາມທ່າໄດ້ປຽບທີ່ມີຢູ່ແລ້ວ, ແຕ່ລະແຂວງ ໄດ້ສຸມໃສ່ເສີມຂະຫຍາຍຮູບການທ່ອງທ່ຽວທີ່ມີຄວາມສາມາດບົ່ມຊ້ອນຂອງຕົນ. ຖ້າຫາກ ແຂວງ ລາວກາຍ ລົງທຶນສ້າງຜະລິດຕະພັນທ່ອງທ່ຽວພັກຜ່ອນບຳລຸງສຸຂະພາບຢູ່ ຊາປາ, ແຂວງ ຮ່າຢາງ ໄດ້ເລືອກເຟັ້ນເຂດພູພຽງຫິນ ດົງວັນ ເປັນສະຖານທີທ່ອງທ່ຽວຕົ້ນຕໍໃນລາຍການທ່ອງທ່ຽວພະຈົນໄພ ຫລື ຢູ່ ອຽນບາຍເລືອກເຟັ້ນສະຖານທີທ່ອງທ່ຽວແມ່ນໝູ່ກາງຈາຍ ແລະ ຖ້ຳບາ; ສ່ວນຢູ່ແຂວງ ດ້ຽນບຽນ ມີເຂດປູຊະນີຍະສະຖານ ດ້ຽນບຽນຝູ ເພື່ອຮັບໃຊ້ນັກທ່ອງທ່ຽວມາຢ້ຽມຊົມ, ຊອກຮູ້ກ່ຽວກັບປະຫວັດສາດ; ແຂວງ ລາຍເຈົາ ພັດທະນາຜະລິດຕະພັນທ່ອງທ່ຽວວົງຄະນາຍາດຢູ່ບັນດາໝູ່ບ້ານ; ແຂວງ ຟູທໍ້ ມີວິຫານຮຸ່ງ ເປັນສະຖານທີ່ທ່ອງທ່ຽວຈິດວິນຍານ, ການເຫລື້ອມໃສ.. ທ່ານ ຟ້າມຊວນໂກຍ, ຮອງປະທານຄະນະກຳມະການປະຊາຊົນແຂວງ ດ້ຽນບຽນ ໃຫ້ຮູ້ວ່າ:
“ເຂດປູຊະນີຍະສະຖານປະຫວັດສາດ ດ້ຽນບຽນຝູ ໄດ້ເສີມຂະຫຍາຍ ແລະ ປະກອບສ່ວນໂດຍກົງເຂົ້າໃນການພັດທະນາເສດຖະກິດ ສັງຄົມຂອງແຂວງ. ພວກຂ້າພະເຈົ້າຍັງມີການທ່ອງທ່ຽວຊີວະພາບ, ທ່ອງທ່ຽວວັດທະນະທຳບໍ່ມີຮູບຮ່າງ. ນອກນັ້ນຍັງມີບັນດາຜະລິດຕະພັນພິເສດຄື: ເຂົ້າສານ ດ້ຽນບຽນ ມີລົດຊາດສະເພາະຂອງດ້ຽນບຽນ”
ໃນລາຍການ“ຮ່ວມສຳພັນເພື່ອພັດທະນາການທ່ອງທ່ຽວເຂດ ໄຕບັກ, ບັນດາທ້ອງຖິ່ນລ້ວນແຕ່ຮັບຮູ້ວ່າ: ສຳລັບເຂດທີ່ມີບັນດາປັດໄຈຄ້າຍຄືກັນຄື: ທົ່ງນາຂັ້ນໄດ, ວັດທະນະທຳເຜົ່າຜູ້ໄທ, ມົ້ງ, ຢາວ.. ຕ້ອງຊອກໄດ້ຈຸດທີ່ແຕກຕ່າງກັນເພື່ອສ້າງບັນດາຜະລິດຕະພັນທ່ອງທ່ຽວດຶງດູດນັກທ່ອງທ່ຽວ.
ຄຽງຄູ່ກັບການພັດທະນາຕາມແຕ່ລະຄຸ້ມບ້ານໃນເຂດໄຕບັກ, ບັນດາທ້ອງຖິ່ນໃນເຂດ ຍັງເປີດກວ້າງການຮ່ວມສຳພັນລາຍການທ່ອງທ່ຽວກັບບັນດາແຂວງ ໃກ້ຄຽງ. ທ່ານ ຫວູເທບີງ, ປະທານສະຫະສະມາຄົມທ່ອງທ່ຽວ ຫວຽດນາມ ຖືວ່າ:
“ການຮ່ວມສຳພັນລະຫວ່າງບັນດາວິສາຫະກິດເຮັດບໍລິການທ່ອງທ່ຽວໃນເຂດແລະນອກເຂດໄຕບັກ ນັ້ນແມ່ນບັນຫາສຳຄັນ.ເພາະວ່າ ບັນດາວິສາຫະກິດຢູ່ນອກເຂດໄຕບັກແມ່ນຫົວຫນ່ວຍ ທີ່ດຶງດູດນັກທ່ອງທ່ຽວມາຢ້ຽມຢາມເຂດໄຕບັກ. ສະນັ້ນ 2ຝ່າຍຕ້ອງຮ່ວມມືນຳກັນເພື່ອເຊື່ອມຕໍ່ລາຍການທ່ອງທ່ຽວກັບບັນດາບໍລິສັດທ່ອງທ່ຽວຢູ່ແຂວງອື່ນ ພ້ອມທັງສະຫນອງຂໍ້ມູນ, ບົດຮຽນ, ຄວາມຮູ້ ແລະ ແຫລ່ງທຶນໃຫ້ເຂົາເຈົ້າເພື່ອສາມາດດຶງດູດນັກທ່ອງທ່ຽວໄດ້ຫລາຍກວ່າ. ການຮ່ວມສຳພັນນີ້ແມ່ນສຳຄັນທີ່ສຸດ ເພື່ອຊ່ວຍໃຫ້ຂະແຫນງທ່ອງທ່ຽວເຂດໄຕບັກພັດທະນາ.”
ບັນດາແຂວງ ໄຕບັກ ວາງຄາດໝາຍຮອດປີ 2015 ຈະຕ້ອນຮັບນັກທ່ອງທ່ຽວກວ່າ 10,5 ລ້ານເທື່ອຄົນ, ໃນນັ້ນ ນັກທ່ອງທ່ຽວສາກົນ 1,5 ລ້ານເທື່ອຄົນ, ລາຍຮັບຈາກການທ່ອງທ່ຽວບັນລຸປະມານ 11.000 ຕື້ດົງ; ສູ້ຊົນຮອດປີ 2020 ຕ້ອນຮັບນັກທ່ອງທ່ຽວສາກົນ 2,3 ລ້ານເທື່ອຄົນ. ດ້ວຍຄວາມສາມາດບົ່ມຊ້ອນ, ທ່າໄດ້ປຽບກ່ຽວກັບຊັບພະຍາກອນທ່ອງທ່ຽວທຳມະຊາດທີ່ຍັງບໍ່ທັນໄດ້ຮັບການຂຸດຄົ້ນນັ້ນ ຈະສ້າງບາດກ້າວບຸກທະລຸໃຫ້ແກ່ຂະແຫນງທ່ອງທ່ຽວ ໄຕບັກ. ປະຈຸບັນ, ບັນດາທ້ອງຖິ່ນ ພວມແກ້ໄຂຄວາມຫຍຸ້ງຍາກ, ຮົ້ວກີດຂວາງເທື່ອລະກ້າວ ແລະ ສ້າງກົນໄກ, ນະໂຍບາຍສົ່ງເສີມ, ເພື່ອເປັນກຳລັງຫນູນດຶງດູດບັນດານັກລົງທຶນ ແລະ ປະຊາຄົມວິສາຫະກິດຊອກຫາມາດຕະການບຸກທະລຸໃນການລົງທຶນ ແລະ ຮ່ວມສຳພັນຊຸກຍູ້ການທ່ອງທ່ຽວເຂດໄຕບັກໃຫ້ພັດທະນາ.