(vovworld)- ກົນຈັກແມ່ນຂະແຫນງອຸດສາຫະກຳພື້ນຖານໃນວິວັດການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ. ເພາະສະນັ້ນ ລັດຖະບານ ໄດ້ເອົາໃຈໃສ່ເປັນພິເສດເຖິງການພັດທະນາຂະແຫນງກົນຈັກ, ເປັນຕົ້ນແມ່ນເພີ່ມອັດຕາສ່ວນຊົມໃຊ້ກົນຈັກຜະລິດພາຍໃນປະເທດ, ສ້າງເງື່ອນໄຂພັດທະນາຂະແຫນງກົນຈັກພາຍໃນປະເທດ. ພາຍຫລັງ 10 ປີ ແຫ່ງການປະຕິບັດຍຸດທະສາດພັດທະນາ, ຂະແຫນງກົນຈັກຂອງຫວຽດນາມ ບັນລຸໄດ້ບັນດາການຫັນປ່ຽນທີ່ສຳຄັນ.
ພາບປະກອບ
|
ໃນບັນດາຜົນງານຂອງຂະແຫນງ, ພົ້ນເດັ່ນແມ່ນກົນຈັກປະດິດສ້າງ, ການສົ່ງອອກເພີ່ມຂຶ້ນຢ່າງລຽນຕິດ; ກຳລັງແກ້ງແຍ້ງຂອງບັນດາຜະລິດຕະພັນກົນຈັກຢູ່ຕະຫລາດພາຍໃນປະເທດ ແລະ ຕະຫລາດສົ່ງອອກໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ. ປີ 2013, ມູນຄ່າການຜະລິດອຸດສາຫະກຳຂອງຂະແຫນງບັນລຸກວ່າ 251.000 ຕື້ດົງ, ເພີ່ມຂຶ້ນທົບ 7 ເທົ່າ ເມື່ອທຽບໃສ່ປີ 2000. ກ່ຽວກັບການສົ່ງອອກ, ປີ 2013, ການສົ່ງອອກກົນຈັກບັນລຸກວ່າ 13 ຕື້ USD, ກາຍເປັນຫນຶ່ງໃນບັນດາຂະແຫນງສົ່ງອອກສຳຄັນຂອງປະເທດຊາດ. ບັນດາຂົງເຂດອະລຽດຂອງຂະແຫນງກົນຈັກຄື: ການຜະລິດ, ຕິດຕັ້ງລົດໂອໂຕ; ຜະລິດລົດຈັກ; ຜະລິດກົນຈັກອຸປະກອນໃຫ້ແກ່ບັນດາໂຮງງານໄຟຟ້າໃຊ້ພະລັງຄວາມຮ້ອນ; ອຸດສາຫະກຳຫນູນຊ່ວຍ…ລ້ວນແຕ່ມີບັນດາບາດກ້າວພັດທະນາ ແລະ ບັນລຸໝາກຜົນຕັ້ງຫນ້າ. ບາງວິສາຫະກິດໄດ້ມີສະຕິບືນຕົວຂຶ້ນ ຮັບເໝົາ EPC ກິດຈະກຳອຸດສາຫະກຳລວມມູນຄ່າເກືອບ 1 ຕື້ USD ຫລື ຮ່ວມທຸລະກິດນຳກັນເພື່ອຜະລິດອຸປະກອນກົນຈັກຮັບໃຊ້ກິດຈະກຳຊົນລະປະທານໃຫ້ແກ່ບັນດາເຂື່ອນໄຟຟ້ານຳ້ຕົກຂະຫນາດໃຫຍ່. ຫວ່າງແລ້ວນີ້, ກຸ່ມບໍລິສັດນ້ຳມັນອາຍແກສແຫ່ງຊາດ ໄດ້ນຳຮ້ານເຈາະນ້ຳມັນ ເຂົ້າເຄື່ອນໄຫວ ໂດຍບໍລິສັດຫຸ້ນສ່ວນປະດິດສ້າງຮ້ານເຈາະນ້ຳມັນອາຍແກສຜະລິດ, ນີ້ໄດ້ຮັບຖືວ່າ ແມ່ນບາດກ້າວບຸກທະລຸຂອງຂະແຫນງກົນຈັກຫວຽດນາມ.
ເຖິງຢ່າງໃດກໍຕາມ, ຄຽງຄູ່ກັບການຫັນປ່ຽນ, ອັດຕາສ່ວນນຳເຂົ້າເກີນດຸ່ນຂອງຂະແຫນງກົນຈັກ ຍັງສູງກວ່າການສົ່ງອອກ, ມູນຄ່າການນຳເຂົ້າຍັງສູງທົບ 2 ເທົ່າເມື່ອທຽບໃສ່ມູນຄ່າການສົ່ງອອກ. ອັດຕາສ່ວນຊົມໃຊ້ກົນຈັກຜະລິດພາຍໃນປະເທດຂອງ ຂະແຫນງມາຮອດປະຈຸບັນ ພຽງແຕ່ບັນລຸ 32%, ໃນຂະນະນັ້ນ ຄາດໝາຍທີ່ວາງອອກແມ່ນ 45 - 50%. ສາຍເຫດຕົ້ນຕໍຖືກກຳນົດວ່າ ຍ້ອນອຸດສາຫະກຳສຳຮອງບໍ່ທັນພັດທະນາ, ມີເຈົ້າຂອງລົງທຶນຫລາຍຄົນພຽງແຕ່ເອົາໃຈໃສ່ເຖິງການດຶງດູດບັນດານັກລົງທຶນຕ່າງປະເທດເຂົ້າແກ້ງແຍ້ງ, ໃນຂະນະບັນດາວິສາຫະກິດພາຍໃນປະເທດປະສົບກັບຄວາມຫຍຸ້ງຍາກໃນການສຳພັດກັບແຫລ່ງທຶນກູ້ຢືມ, ບໍ່ທັນມີການຮ່ວມສຳພັນ ສະນັ້ນ ກຳລັງແກ້ງແຍ້ງຍັງອ່ອນດ້ອຍ. ທ່ານ ຟານຕືຢາງ, ຜູ້ອຳນວຍການບໍລິສັດຫຸ້ນສ່ວນປະດິດສ້າງຮ້ານເຈາະນຳ້ມັນອາຍແກສຖືວ່າ:
“ນະໂຍບາຍກ່ຽວກັບມະຫາພາກຂອງບັນດາກະຊວງ, ຂະແຫນງການປະຈຸບັນແມ່ນພຽງພໍ, ແຕ່ບໍ່ທັນຄົບຊຸດ. ຈຸດໝາຍຍາວນານຂອງຂະແຫນງກົນຈັກມູ່ງໄປສູ່ຕະຫລາດສາກົນໃນໄລຍະສັ້ນສຸດ, ພວກຂ້າພະເຈົ້າຄວນມີການຫນູນຊ່ວຍມີລັກສະນະຍຸດທະສາດຈາກລັດຖະບານ, ກະຊວງ, ຂະແຫນງການພິເສດແມ່ນຂະແຫນງນ້ຳມັນອາຍແກສຫວຽດນາມ ຈະພິຈາລະນາບັນດາຂໍ້ຕົກລົງພຽງນຳໃຊ້ບັນດາຮ້ານເຈາະນ້ຳມັນປະດິດສ້າງພາຍໃນປະເທດ ເພື່ອເຂົ້າຮ່ວມໂຄງການຮ້ານເຈາະນ້ຳມັນຢູ່ ຫວຽດນາມ.”
ໃນໄລຍະຈະມາເຖິງ, ກະຊວງອຸດສາຫະກຳ ແລະ ການຄ້າຫວຽດນາມ ສະເຫນີ ຕໍ່ລັດຖະບານ ຍູ້ແຮງການຄົ້ນຄ້ວາບັນດາກົນໄກ, ນະໂຍບາຍ ເພື່ອສ້າງເງື່ອນໄຂໃຫ້ແກ່ຂະແຫນງກົນຈັກ ສືບຕໍ່ພັດທະນາ, ໃນນັ້ນ ເອົາໃຈໃສ່ເຖິງການເພີ່ມອັດຕາສ່ວນຊົມໃຊ້ກົນຈັກຜະລິດພາຍໃນປະເທດ ເພື່ອສ້າງເງື່ອນໄຂພັດທະນາຂະແຫນງກົນຈັກພາຍໃນປະເທດ. ພ້ອມກັນນັ້ນ ແມ່ນນະໂຍບາຍສົ່ງເສີມບັນດາວິສາຫະກິດກົນຈັກຮ່ວມສຳພັນ, ຮ່ວມມືລົງທຶນ, ປ່ຽນໃຫມ່ເຕັກໂນໂລຊີ ເພື່ອມີບັນດາຜະລິດຕະພັນທີ່ມີລັກສະນະແກ້ງແຍ້ງສູງ. ທ່ານ ຫງວຽນຈີຊາງ, ຫົວຫນ້າສະຖາບັນຄົ້ນຄ້ວາກົນຈັກຖືວ່າ:
“ລັດຖະບານຖືຂະແຫນງກົນຈັກເປັນສຳຄັນ ແລະ ຈາກນັ້ນ ຍົກອອກບັນດາກົນໄກປົກປ້ອງ. ໃນກົດໝາຍປະມູນ ຖ້າພວກເຮົາມີກົນໄກແນ່ນອນໃຫ້ແກ່ບັນດາຜະລິດຕະພັນປະດິດສ້າງພາຍໃນປະເທດ ຫລື ເມື່ອພວກເຮົາລົງທຶນ, ລັດຖະບານລົງທຶນໃຫ້ແກ່ບັນດາໂຄງການ ພວກເຮົາສາມາດຜະລິດໄດ້. ພວກເຮົາບໍ່ລະເມີດກົດໝາຍປະມູນຫລືລະເມີດບັນດາຂໍ້ມາດຕາຂອງສັນຍາການຄ້າໂລກ(WTO). ສະນັ້ນ ລັດຕ້ອງເຫັນໄດ້ຍຸດທະສາດພັດທະນາຢ່າງຄົບຊຸດຂອງທຸກຂະແຫນງ ແລະ ກົນຈັກ. ຖ້າຫາກລັດເຮັດໄດ້ສິ່ງນີ້ ໃນໄລຍະຍາວພວກເຮົາຈະມີຜົນປະໂຫຍດ.”
ວັນທີ 18/6/2014 ຜ່ານມາ, ທ່ານນາຍົກລັດຖະມົນຕີ ໄດ້ປະກາດໃຊ້ຄຳສັ່ງເລກທີ 16 ກ່ຽວກັບການແກ້ໄຂຄວາມຫຍຸ້ງຍາກ ແລະ ຍູ້ແຮງການປະຕິບັດຍຸດທະສາດພັດທະນາຂະແຫນງກົນຈັກ ຫວຽດນາມ. ຕາມນັ້ນແລ້ວ, ທ່ານນາຍົກລັດຖະມົນຕີ ຮຽກຮ້ອງບັນດາວິສາຫະກິດກົນຈັກ ສຸມໃສ່ສຳເລັດການລົງທຶນບັນດາໂຄງການຜະລິດຕະພັນກົນຈັກຈຸດສຸມ ໄດ້ຮັບການອະນຸມັດ; ເພີ່ມທະວີການລົງທຶນເຂົ້າບັນດາໂຄງການອຸດສາຫະກຳຫນູນຊ່ວຍ ເພື່ອຍົກສູງອັດຕາສ່ວນຊົມໃຊ້ກົນຈັກຜະລິດພາຍໃນປະເທດ, ເພີ່ມທະວີການປັບປຸງວຽກງານຄຸ້ມຄອງລາຍຈ່າຍ, ຫລຸດຜ່ອນລາຄາຜະລິດຕະພັນ, ຍົກສູງຄຸນນະພາບ, ກຳລັງແກ້ງແຍ້ງຂອງຜະລິດຕະພັນ. ທ່ານນາຍົກລັດຖະມົນຕີ ສະເຫນີຂະແຫນງກົນຈັກຕ້ອງຮ່ວມສຳພັນ, ຮ່ວມມືລົງທຶນ, ປ່ຽນໃຫມ່ເຕັກໂນໂລຊີ, ອຸປະກອນທີ່ກ້າວຫນ້າເພື່ອຜະລິດ ຜະລິດຕະພັນມີຄຸນນະພາບສູງ,ດ້ວຍລາຄາເໝາະສົມ ຕອບສະຫນອງໃຫ້ແກ່ຄວາມຕ້ອງການພາຍໃນປະເທດ ແລະ ການສ່ົງອອກ.