(vovworld) - ໃນ 6 ເດືອນຕົ້ນປີ 2012, ເຖິງວ່າຍັງປະສົບກັບຄວາມຫຍຸ້ງຍາກຫລາຍຢ່າງກໍຕາມ, ແຕ່ຕາມການໃຫ້ສັງເກດຂອງນາຍົກລັດຖະມົນຕີຫວຽດນາມ ແລ້ວ, ເສດຖະກິດ ສັງຄົມຫວຽດນາມ ພວມໄປຖືກທິດ ແລະ ມີການຫັນປ່ຽນຢ່າງຕັ້ງຫນ້າ, ພິເສດ ແມ່ນບັນດມາດຕະການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິພວມສືບຕໍ່ໄດ້ຮັບການເສີມຂະຫຍາຍຢ່າງມີປະສິດທິຜົນ.
GDP ຂອງ ຫວຽດນາມ ໃນ 6 ເດືອນຕົ້ນປີເພີ່ມຂຶ້ນ 4,38%
ພາບ: internet
|
ຕົວເລກຂອງກົມໃຫຍ່ສະຖິຕິ ຫວຽດນາມ ທີ່ຫາກໍປະກາດໄດ້ສະແດງໃຫ້ເຫັນວ່າ: ຍອດຜະລິດຕະພັນພາຍໃນປະເທດ (GDP) ໃນ 6 ເດືອນຕົ້ນປີເພີ່ມຂຶ້ນ 4,38%, ເຖິງວ່າຢູ່ໃນລະດັບຕຳ່ກໍຕາມ, ແຕ່ຍັງຄົງສູງກວ່າເມື່ອທຽບໃສ່ຕົວເລກ ເຊິ່ງລັດຖະບານໄດ້ຄາດຄະເນໄວ້ກ່ອນ. ເຖິງຢ່າງໃດກໍຕາມ, ໃນສະພາບການທີ່ມີຫລາຍຂະແຫນງ, ຂົງເຂດຍັງປະສົບກັບຄວາມຫຍຸ້ງຍາກໃນການຜະລິດດຳເນີນທຸລະກິດ, ການຈຳຫນ່າຍຜະລິດຕະພັນ ແລະ ມີວິສາຫະກິດເກືອບ 53.000 ແຫ່ງຖືກລົ້ມລະລາຍ ຫລືຕ້ອງຢຸດຕິການຜະລິດດຳເນີນທຸລະກິດນັ້ນ, ດັດຊະນີການເຕີບໂຕດັ່ງກ່າວແມ່ນສິ່ງທີ່ເປັນຫນ້າຮັບຮູ້. ນັບແຕ່ໄຕມາດທີ 2, ພື້ນຖານເສດຖະກິດໄດ້ມີການຫັນປ່ຽນອັນຕັ້ງຫນ້າ, ເປັນຕົ້ນແມ່ນເຂດອຸດສາຫະກຳ ແລະ ກໍ່ສ້າງ. ໃນສະພາບການສາກົນຍັງປະສົບກັບຄວາມຫຍຸ້ງຍາກນັ້ນ, ທົ່ວປະເທດຍັງຄົງດຶງດູດ 452 ໂຄງການລົງທຶນໂດຍກົງຂອງຕ່າງປະເທດດ້ວຍມູນຄ່າປະມານ 4,76 ຕື້ USD, ພິເສດ, ວົງເງິນສົ່ງອອກໃນ 6 ເດືອນຕົ້ນປີບັນລຸກວ່າ 53 ຕື້ USD, ເພີ່ມຂຶ້ນ 22,2% ເມື່ອທຽບໃສ່ໄລຍະດຽວກັນຂອງປີກາຍ. ນີ້ກໍແມ່ນຈຸດເດັ່ນຂອງພື້ນຖານເສດຖະກິດໃນຊຸມເດືອນຕົ້ນປີ. ຍັງມີສິ່ງທີ່ເປັນຫນ້າສົນໃຈໃນ 6 ເດືອນຕົ້ນປີ ນັ້ນແມ່ນດັດຊະນີລາຄາໃຊ້ສອຍເພີ່ມຂຶ້ນຢ່າງຊັກຊ້າ, ມີທ່າອ່ຽງຄ່ອຍໆຫລຸດລົງ ແລະ ຫລຸດລົງ 0,26%ໃນ 6 ເດືອນ. ນີ້ບໍ່ແມ່ນສັນຍານເງິນຝືດເທົ່ານັ້ນ ຫາກແມ່ນສັນຍານຕັ້ງຫນ້າສະແດງໃຫ້ເຫັນໝາກຜົນເບື້ອງຕົ້ນໃນຈຸດໝາຍຄວບຄຸມໄພເງິນເຟີ້ຂອງລັດຖະບານ. ທ່ານ Do Thuc, ຫົວຫນ້າກົມໃຫຍ່ສະຖິຕິ ຫວຽດນາມ ໄຈ້ແຍກວ່າ:
“ຖ້າຫາກເວົ້າເຖິງເງິນຝືດ ແມ່ນຕ້ອງເວົ້າເຖິງໃນຫລາຍເດືອນ, ຫລາຍໄລຍະ ແລະ ລຽນຕິດ, ແຕ່ນີ້ພຽງໃນເວລາ 6 ເດືອນ, ກ່ອນນີ້ຍາມໃດກໍຢູ່ໃນລະດັບສູງ, ປະຈຸບັນໄດ້ຫລຸດຜ່ອນພຽງນ້ອຍຫນຶ່ງ ນີ້ແມ່ນຈຸດທີ່ຕັ້ງຫນ້າໃນພື້ນຖານເສດຖະກິດ. ແຕ່ພວກເຮົາຕ້ອງເຮັດແນວໃດເພື່ອໃຫ້ເໝາະສົມກວ່າ, ລະດັບເພີ່ມຂຶ້ນຂອງລາຄາເຮັດແນວໃດໃຫ້ກົມກຽວ ແລະ ຮັບປະກັນລັກສະນະປົກກະຕິ.”
ອາດເຫັນໄດ້ຢ່າງຈະແຈ້ງຫນ້າທີ່ບຸລິມະສິດຕົ້ນຕໍໃນການບໍລິຫານເສດຖະກິດໃນໄລຍະຈະມາເຖິງ ແມ່ນສືບຕໍ່ປະຕິບັດມະຕິຂອງລັດຖະບານກ່ຽວກັບບາງມາດຕະການແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ, ການຫນູນຊ່ວຍຕະຫລາດຢ່າງມີປະສິດທິຜົນ, ໃນນັ້ນ ບັນຫາຮີບດ່ວນຕ້ອງແກ້ໄຂສະພາບສິນຄ້າຄ້າງສາງເປັນຈຳນວນຫລວງຫຼາຍ. ໄປຄຽງຄູ່ກັນນັ້ນ, ທະນາຄານແຫ່ງລັດໄດ້ຍົກອອກຫລາຍມາດຕະການເພື່ອຫລຸດຜ່ອນອັດຕາດອກເບ້ຍ, ປະຕິບັດບັນດາມາດຕະການໃນນະໂຍບາຍເງິນຕາຢ່າງມີໄຫວພິບ, ທັງຮັບປະກັນການຄວບຄຸມຢ່າງແຫນ້ນແຟ້ນ ທັງເຮັດແນວໃດເພືອໃຫ້ເຫລືອຫນິ້ສິນເຊື່ອສາມາດເພີ່ມຂຶ້ນໃນຊຸມເດືອນທ້າຍປີ ພ້ອມທັງບໍ່ປະໃຫ້ລາຄາສິນຄ້າເພີ່ມຂຶ້ນ.
ພາບປະກອບ: internet
|
ເມື່ອຕີລາຄາກ່ຽວກັບສະພາບການເສດຖະກິດສັງຄົມໃນ 6 ເດືອນຕົ້ນປີ, ທ່ານນາຍົກລັດຖະມົນຕີ Nguyen Tan Dung ຖືວ່າ: ດ້ວຍບັນດາຄວາມມານະພະຍາຍາມລວມ, ເສດຖະກິດສັງຄົມຂອງປະເທດຊາດໄດ້ມີການຫັນປ່ຽນຢ່າງຖືກທິດ, ຖືກກັບຈຸດໝາຍທີ່ວາງອອກ ແລະ ໝາກຜົນບັນລຸໄດ້ແມ່ນຮອບດ້ານພໍສົມຄວນ. ເຖິງວ່າ ຫນຶ່ງໃນບັນດາຫນ້າທີ່ຈຸດສຸມຂອງລັດຖະບານໃນໄລຍະຈະມາເຖິງ ນັ້ນແມ່ນແກ້ໄຂບັນດາຂໍ້ຈຳກັດທີ່ຍັງຄົງຄ້າງ, ເພື່ອຍົກສູງປະສິດທິຜົນການເຄື່ອນໄຫວຂອງລັດວິສາຫະກິດ, ປະກອບສ່ວນຮັກສາເສດຖະກິດມະຫາພາກເປັນປົກກະຕິ ແລະ ມີການເຕີບໂຕແບບຍືນຍົງ. ທ່ານນາຍົກລັດຖະມົນຕີ Nguyen Tan Dung ເນັ້ນຫນັກວ່າ:
“ຂ້າພະເຈົ້າສະເຫນີໃຫ້ບັນດາລັດຖະມົນຕີ ຕ້ອງຮີບເຮັ່ງຄິດໄລ່ການສ້າງໂຄງ ປະກອບລັດວິສາຫະກິດຄືນໃຫມ່. ຜ່ານພຶດຕິກຳຕົວຈິງ ຄວນພິຈາລະນາຂອບຂະຫນາດ, ຂອບເຂດການຜະລິດດຳເນີນທຸລະກິດ, ຈັດຕັ້ງການຜະລິດດຳເນີນທຸລະກິດ, ຊັບຊ້ອນການຜະລິດຄືນໃຫມ່, ສຸມໃສ່ເຂົ້າອາຊີບຕົ້ນຕໍ. ທີສອງແມ່ນຕ້ອງປ່ຽນໃຫມ່ການຄຸ້ມຄອງບໍລິຫານ, ກົດລະບຽບພາຍໃນ ເພື່ອຮັບປະກັນປະສິດທິຜົນ. ທີສາມ ແມ່ນເອົາໃຈໃສ່ເຖິງວຽກງານປັບປຸງການຈັດຕັ້ງ, ສ່ວນລັດຖະບານຕ້ອງຊີ້ແຈງການແບ່ງງານ, ແບ່ງຂັ້ນ ກ່ຽວກັບການປະຕິບັດຫນ້າທີ່, ກຳມະສິດຂອງວິສາຫະກິດ.”
ລັດຖະບານກໍຕັດສິນໃຈ ບໍ່ປ່ຽນແປງຈຸດໝາຍຮັກສາເສດຖະກິດມະຫາພາກເປັນປົກກະຕິ ແລະ ຄວບຄຸມໄພເງິນເຟີ້, ສູ້ຊົນບັນລຸ 14/15 ຕົວເລກຄາດໝາຍທີ່ວາງອອກໃນປີ. ເພື່ອບັນລຸໄດ້ຈຸດໝາຍດັ່ງກ່າວ, ໃນໄລຍະຈະມາເຖິງ, ລັດຖະບານສຸມໃສ່ບໍລິຫານ 6 ໝວດມາດຕະການ,ນັ້ນແມ່ນສືບຕໍ່ປະຕິບັດນະໂຍບາຍເງິນຕາຢ່າງແຫນ້ນແຟ້ນ, ລອບຄອບຖີ່ຖ້ວນ, ສົມທົບກັນຢ່າງແຫນ້ນແຟ້ນລະຫວ່າງນະໂຍບາຍງົບປະມານກັບນະໂຍບາຍເງິນຕາ, ລະຫວ່າງການຮັກສາອັດຕາແລກປ່ຽນເງິນຕາຕ່າງປະເທດ ແລະ ບໍລິຫານອັດຕາດອກເບ້ຍໃຫ້ເໝາະສົມ, ສືບຕໍ່ບັນດາມາດຕະການຫນູນຊ່ວຍການຜະລິດໃນຂົງເຂດກະສິກຳ, ອຸດສາຫະກຳ ແລະ ບໍລິການ ທັງເສີມຂະຫຍາຍທ່າໄດ້ປຽບ ທັງຫັນປ່ຽນອົງປະກອບ, ຫລຸດຜ່ອນລາຍຈ່າຍການຜະລິດ, ຍົກສູງສະມັດຕະພາບ, ປະສິດທິຜົນ. ຕາມເນຶ້ອໃນຈິດໃຈດັ່ງກ່າວ, ການກຳນົດທິດໃນ 6 ເດືອນ ທ້າຍປີ ແມ່ນຮັບປະກັນເງິນເຟີ້ໃຫ້ຢູ່ໃນລະດັບ 7-8%, ລະດັບຈະເລີນເຕີບໂຕບັນລຸລະດັບ 5,2 - 5,7 % ແລະ ສາມາດສູ້ຊົນໃຫ້ບັນລຸລະດັບສູງກວ່າຄາດໝາຍທີ່ໄດ້ວາງອອກ, ສ້າງພື້ນຖານປັບປຸງເສດຖະກິດມະຫາກ ພາກແບບຍືນຍົງ.