(vovworld)- ພື້ນຖານເສດຖະກິດ ຫວຽດນາມ ມີການຫັນປ່ຽນຢ່າງຕັ້ງຫນ້າໃນ 6 ເດືອນຕົ້ນປີ 2015. ໃນນັ້ນ, GDP ເພີ່ມຂຶ້ນເກືອບ 6% ເມື່ອທຽບໃສ່ໄລຍະດຽວກັນຂອງປີກາຍ ແລະ ແມ່ນລະດັບເພີ່ມຂຶ້ນສູງສຸດນັບແຕ່ປີ 2011 ມາຮອດປະຈຸບັນ. ຕາມການຄາດຄະເນຊຸມເດືອນທ້າຍປີແລ້ວ, ຫວຽດນາມ ຈະປະເຊີນຫນ້າກັບສິ່ງທ້າທາຍຫລາຍຢ່າງ, ແຕ່ດ້ວຍບັນດາໝາກຜົນທີ່ບັນລຸໄດ້ນັ້ນ ຈະສົ່ງເສີມບັນດາວິສາຫະກິດ, ນັກລົງທຶນຕ່າງປະເທດ ສູ້ຊົນເພື່ອດຳເນີນທຸລະກິດປີ 2015ສຳເລັດຜົນ.
ພາບປະກອບ:internet
|
3 ຂົງເຂດທີ່ປະກອບສ່ວນໃຫ້ການເຕີບໂຕຂອງພື້ນຖານເສດຖະກິດໃນ 6 ເດືອນຜ່ານມາ ລ້ວນແຕ່ເພີ່ມຂຶ້ນເມື່ອທຽບໃສ່ໄລຍະດຽວກັນຂອງປີກາຍ, ໃນນັ້ນ ຂົງເຂດອຸດສາຫະກຳ ແລະ ກໍ່ສ້າງແມ່ນບັນລຸລະດັບເຕີບໂຕສູງ ດ້ວຍລະດັບ ກວ່າ 9%, ການບໍລິການເພີ່ມຂຶ້ນ ກວ່າ 5% ກະສິກຳ, ປ່າໄມ້ ແລະ ສິນໃນນ້ຳ ເພີ່ມຂຶ້ນເກືອບ 2,4%. ດັດຊະນີການຜະລິດອຸດສາຫະກຳໃນທົ່ວປະເທດເພີ່ມຂຶ້ນ 9,6% ເມື່ອທຽບໃສ່ໄລຍະດຽວກັນຂອງປີກາຍ, ສູງກວ່າຫລາຍເມື່ອທຽບໃສ່ລະດັບເພີ່ມຂຶ້ນຂອງໄລຍະດຽວກັນໃນ 2 ປີມານີ້. ການເຄື່ອນໄຫວພັດທະນາວິສາຫະກິດໃນ 6 ເດືອນຕົ້ນປີກໍມີສັນຍານຕັ້ງຫນ້າ, ດ້ວຍຈຳນວນວິສາຫະກິດ 45.000 ແຫ່ງຈົດທະບຽນສ້າງຕັ້ງ, ໃຫມ່ (ເພີ່ມຂຶ້ນນັບທັງຈຳນວນ ແລະ ທຶນຈົດທະບຽນເມື່ອທຽບໃສ່ໄລຍະດຽວກັນຂອງປີກາຍ), ປະກອບສ່ວນກວ່າ 60%ໃຫ້ແກ່ GDP. ນີ້ແມ່ນສັນຍານດີຂອງພື້ນຖານເສດຖະກິດ, ສະແດງໃຫ້ເຫັນກາລະໂອກາດການລົງທຶນ, ດຳເນີນທຸລະກິດຂອງວິສາຫະກິດພວມມີການຫັນປ່ຽນຕາມທິດຕັ້ງຫນ້າ. ທ່ານ ຫວູຕຽນໂລກ, ປະທານຫ້ອງການການຄ້າ ແລະ ອຸດສາຫະກຳ ຫວຽດນາມ ໃຫ້ຮູ້ວ່າ:
“ເຖິງວ່າ ບັນດາວິສາຫະກິດຍັງຄົງປະສົບກັບຄວາມຫຍຸ້ງຍາກຫລາຍຢ່າງ ແຕ່ດ້ວຍຄວາມມານະພະຍາຍາມໃນການປະຕິຮູບຢ່າງແຮງຂອງລັດຖະບານຫວຽດນາມ ແລະ ການເປີດປະຕູຕະຫລາດໃນຂອບເຂດບັນດາສັນຍາການຄ້າເສລີ ໄດ້ ແລະ ຈະໄດ້ຮັບການລົງນາມ ພ້ອມກັບວິສາຫະກິດຫລາຍແຫ່ງໄດ້ມີແຜນການເພື່ອເປີດກວ້າງການເຄື່ອນໄຫວທຳການຜະລິດດຳເນີນທຸລະກິດ, ສະນັ້ນ ຂ້າພະເຈົ້າຄິດວ່າ ສິ່ງດັ່ງກ່າວຈະຊ່ວຍໃຫ້ວິສາຫະກິດບັນລຸໝາກຜົນການດຳເນີນທຸລະກິດດີສົມຄວນ.”
ໄລ່ຮອດເດືອນ 6/2015, ດັດຊະນີລາຄາໃຊ້ສອຍສະເລ່ຍເພີ່ມຂຶ້ນ 0,86% ເມື່ອທຽບໃສ່ໄລຍະດຽວກັນຂອງປີກາຍ. ນີ້ແມ່ນລະດັບເພີ່ມຂຶ້ນຕ່ຳໃນໄລຍະ 10 ປີມານີ້, ປະກອບສ່ວນເຂົ້າໃນຈຸດໝາຍຄວບຄຸມໄພເງິນເຟີ້ຂອງລັດຖະບານ, ຈາກນັ້ນ ສ້າງເງື່ອນໄຂເພື່ອປະຕິບັດການປະຕິຮູບກ່ຽວກັບລາຄາຜະລິດຕະພັນ, ບໍລິການຕາມກົນໄກຕະຫລາດ, ພ້ອມທັງຫລຸດລາຍຈ່າຍສົ້ນເຂົ້າຂອງບັນດາວິສາຫະກິດ, ຊຸກຍູ້ການຜະລິດ, ດຳເນີນທຸລະກິດ. ນັບແຕ່ນີ້ຮອດທ້າຍປີ, ຄາດຄະເນວ່າ ພື້ນຖານເສດຖະກິດ ຫວຽດນາມ ສືບຕໍ່ປະສົບກັບຄວາມຫຍຸ້ງຍາກ, ຮຽກຮ້ອງລັດຖະບານ, ບັນດາວິສາຫະກິດຕ້ອງມີການປ່ຽນແປງ, ມານະພະຍາຍາມກວ່າອີກ ເພື່ອບັນລຸບັນດາຄາດໝາຍທີ່ໄດ້ວາງອອກ. ພິເສດ ໃນຂົງເຂດກະສິກຳຊື່ງໄດ້ຮັບການຄາດຄະເນວ່າຈະປະສົບກັບຄວາມຫຍຸ້ງຍາກຍ້ອນໄພແຫ້ງແລ້ງ, ໄພທຳມະຊາດສົ່ງຜົນສະທ້ອນເຖິງສະມັດຕະພາບກໍຄືການສົ່ງອອກ. ດຣ ເຈີນດີງທຽນ, ຫົວຫນ້າສະຖາບັນເສດຖະກິດ ຫວຽດນາມ ຖືວ່າ:
“ຄວາມສ່ຽງໃຫຍ່ສຸດແມ່ນໄພທຳມະຊາດ ໄດ້ສົ່ງຜົນສະທ້ອນເຖິງຂົງເຂດກະສິກຳ, ສະຖຽນລະພາບທາງສັງຄົມ. ການຂາດແຄນແຫລ່ງນ້ຳບໍ່ພຽງແຕ່ສຳລັບກະສິກຳເທົ່ານັ້ນ ຫາກນັບທັງອຸດສາຫະກຳ, ບໍລິການອີກດ້ວຍ. ປີນີ້ ປະກົດການ Elnino ແລະ ອາດກາດແດດຮ້ອນຜິດປົກກະຕິ ຈະສົ່ງຜົນສະທ້ອນໂດຍກົງເຖິງຂະແຫນງກະສິກຳ, ນີ້ແມ່ນຄວາມຫຍຸ້ງຍາກທີ່ສຸດໃນປະຈຸບັນ.”
ການເຕີບໂຕ GDP ຂອງຫວຽດນາມ ໃນປີ 2015 ສູ້ຊົນບັນລຸ ແຕ່ 6,2% ຂຶ້ນໄປ ເພື່ອສຳເລັດຄາດໝາຍຊື່ງສະພາແຫ່ງຊາດໄດ້ວາງອອກ. ກະຊວງແຜນການ ແລະ ການລົງທຶນ ໄດ້ສ້າງ 3 ແຜນການໃຫ້ການເຕີບໂຕດ້ານເສດຖະກິດ. ຕາມນັ້ນແລ້ວ, ຖ້າຫາກ ກະສິກຳສືບຕໍ່ປະສົບກັບຄວາມຫຍຸ້ງຍາກຍ້ອນໄພແຫ້ງແລ້ງ, ສະພາບການຂຸດຄົ້ນນ້ຳມັນດີບສືບຕໍ່ຮັກສາລະດັບຄື 6 ເດືອນຜ່ານມາ, ການເຕີບໂຕຍາກທີ່ບັນລຸຄາດໝາຍ 6,2% ຊື່ງສະພາແຫ່ງຊາດໄດ້ວາງອອກ. ແຜນການທີ 2 ແມ່ນຖ້າຫາກອຸດສາຫະກຳ ຍັງຄົງປະສົບກັບຄວາມຫຍຸ້ງຍາກ, ແຕ່ຫວຽດນາມມີນະໂຍບາຍຍູ້ແຮງອຸດສາຫະກຳຂຸດຄົ້ນໂລຫະ, ຍູ້ແຮງຕະຫລາດສົ່ງອອກ ຈະສາມາດບັນລຸໄດ້ຄາດໝາຍ 6,2% ຢູ່. ແຜນການທີ 3 ແມ່ນການເຕີບໂຕລື່ນກາຍຄາດໝາຍທີ່ສະພາແຫ່ງຊາດວາງອອກ, ຮຽກຮ້ອງຕ້ອງມີຄວາມມານະພະຍາຍາມ, ຄວາມມີໄຫວພິບຂອງບັນດາກະຊວງ, ຂະແຫນງການ, ພິເສດແມ່ນນະໂຍບາຍເງິນຕາ, ງົບປະມານ ແລະ ບັນດາມາດຕະການສະກັດກັ້ນການນຳເຂົ້າສິນຄ້າເຖື່ອນ, ສິນຄ້າປອມ, ລອກແບບສິນຄ້າ. ທ່ານ ຫງວຽນບີກເລີມ, ຫົວຫນ້າກົມໃຫຍ່ສະຖິຕິ ໃຫ້ຂໍ້ສັງເກດວ່າ:
“ແຜນການທີສອງ ອາດຈະປະຕິບັດໄດ້, ເພາະວ່າ ຫວ່າງແລ້ວນີ້ ກະຊວງອຸດສາຫະກຳ ແລະ ການຄ້າ ໄດ້ລົງນາມ ສັນຍາການຄ້າເສລີ ກັບ ສເກົາຫລີ , ໃນນັ້ນ ຫວຽດນາມ ຈະສົ່ງສິນໃນນ້ຳໄປຍັງ ສເກົາຫລີ ຫລາຍກວ່າ ເມື່ອທຽບໃສ່ຊຸມປີກ່ອນນີ້. ທີສອງ ຫວັງວ່າ ທ້າຍປີນີ້ ໃນໂອກາດວັນບຸນຄຼິດສະມາດ, ຕະຫລາດ ເອີລົບ ຈະນຳເຂົ້າຜະລິດຕະພັນກະເສດຂອງຫວຽດນາມ, ພິເສດແມ່ນສິນໃນນ້ຳ ເພື່ອກະກຽມໃຫ້ໂອກາດບຸນເຕັດ ການສົ່ງອອກຂອງຫວຽດນາມ ຈະເຕີບໂຕ. ແຕ່ນີ້ ຮອດທ້າຍປີ, ລັດຖະບານຫວຽດນາມ ສຸມໃສ່ຊີ້ນຳ ເພື່ອເຮັດແນວໃດສ້າງເງື່ອນໄຂທີ່ດີໃຫ້ຂະແຫນງກະສິກຳ ແລະ ມີບັນດາມາດຕະການເພື່ອເພີ່ມທະວີການສົ່ງອອກ, ຫລຸດຜ່ອນການນຳເຂົ້າ, ເວລານັ້ນ ພື້ນຖານເສດຖະກິດຂອງຫວຽດນາມ ຈະເຕີບໂຕດີສົມຄວນ.”
ເຖິງວ່າ ໃນໄລຍະສັ້ນ ອາດຈະມີຄວາມສະດວກ, ແຕ່ການເຕີບໂຕເສດຖະກິດຫວຽດນາມ ຍັງສືບຕໍ່ປະເຊີນຫນ້າກັບບັນດາຄວາມສ່ຽງໃນໄລຍະຍາວ. ສະນັ້ນ ເພື່ອຟື້ນຟູການເຕີບໂຕໃນປີນີ້ ແລະ ຊຸມປີຈະມາເຖິງ, ລັດຖະບານ ໄດ້ ແລະ ພວມມີບັນດານະໂຍບາຍໄຫວພິບກ່ຽວກັບເງິນຕາ, ການເງິນ. ພ້ອມທັງ ປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ສ້າງໂຄງປະກອບບັນດາລັດວິສາຫະກິດຄືນໃຫມ່. ພິເສດແມ່ນສ້າງໂຄງປະກອບລະບົບການເງິນ, ທະນາຄານ ແລະ ລົບລ້າງຮົ້ວກີດຂວາງສຳລັບເສດຖະກິດພາກເອກະຊົນພາຍໃນປະເທດ.