(vovworld)- ບົດລາຍງານຂອງລັດຖະບານກ່ຽວກັບສະພາບການເສດຖະກິດສັງຄົມປີ 2012 ແລະ 4 ເດືອນຕົ້ນປີ 2013 ທີ່ກອງປະຊຸມສະໄຫມສາມັນເທື່ອທີ 5 ສະພາແຫ່ງຊາດຫວຽດນາມຊຸດທີ 13 ໄດ້ຍົກຂໍ້ສັງເກດວ່າ: ພື້ນຖານເສດຖະກິດຂອງຫວຽດນາມ ໄດ້ຮັບການຮັກສາເປັນປົກກະຕິກວ່າ, ໄພເງິນເຟີ້ຖືກຄວບຄຸມ. ເຖິງຢ່າງໃດກໍຕາມ, ເພື່ອພັດທະນາແບບຍືນຍົງ ແລະ ແທດຈິງ, ຕ້ອງມີບາງມາດຕະການຢ່າງຄົບຊຸດ. ເພາະສະນັ້ນ ຄຽງຄູ່ກັບບັນດາມາດຕະການຫນູນຊ່ວຍວິສາຫະກິດ, ເລື່ອງສ້າງໂຄງປະກອບພື້ນຖານເສດຖະກິດຄືນໃຫມ່ກໍພວມແມ່ນການ ຮຽກຮ້ອງບັນດາວິສາຫະກິດຕ້ອງປ່ຽນໃຫມ່ດ້ວຍຕົວເອງ, ຍົກສູງກຳລັງຄວາມສາມາດແກ້ງແຍ້ງ. ນີ້ກໍແມ່ນເນື້ອໃນບົດຂຽນຂອງນັກຂ່າວ ໂຕຕວນທີ່ພາດຫົວເລື່ອງວ່າ: ແກ້ໄຂຄວາມຫຍຸ້ງຍາກ, ຍົກສູງກຳລັງຄວາມສາມາດແກ້ງແຍ້ງໃຫ້ແກ່ວິສາຫະກິດ.
ພາບປະກອບ: internet
|
ໃນສະພາບຄວາມຫຍຸ້ງຍາກລວມຂອງພື້ນຖານເສດຖະກິດປະຈຸບັນ, ຫນຶ່ງໃນບັນດາຜົນສຳເລັດຂອງລັດຖະບານ ແມ່ນຮັກສາເສດຖະກິດມະຫາພາກເປັນປົກກະຕິ ພ້ອມກັບການຜັນຂະຫຍາຍບັນດາມາດຕະການຫນູນຊ່ວຍວິສາຫະກິດຜ່ານຜ່າຄວາມຫຍຸ້ງຍາກ. ມະຕິເລກທີ 01,02 ຂອງລັດຖະບານກ່ຽວກັບການແກ້ໄຂຄວາມຫຍຸ້ງຍາກໃຫ້ແກ່ການຜະລິດ, ດຳເນີນທຸລະກິດ, ຫນູນຊ່ວຍຕະຫລາດ, ແກ້ໄຂຫນີ້ເສຍ ໄດ້ ແລະ ພວມຜັນຂະຫຍາຍຢ່າງມີປະສິດທິຜົນ ອັນໄດ້ກະຕຸກຊຸກຍູ້ໃຫ້ແກ່ຕະຫລາດ. ສິ່ງດັ່ງກ່າວໄດ້ພິສູດໃຫ້ເຫັນໃນ 4 ເດືອນຕົ້ນປີ 2013, ໄພເງິນເຟີ້ສືບຕໍ່ໄດ້ຮັບການຄວບຄຸມ, ລະດັບການຈະເລີນເຕີບໂຕໃນໄຕມາດ 1 ສູງກວ່າເມື່ອທຽບໃສ່ໄລຍະດຽວກັນຂອງປີກາຍ, ລະດັບສະສົມເງິນຕາຕ່າງປະເທດເພີ່ມຂຶ້ນສູງ, ອັດຕາແລກປ່ຽນເງິນຕາຕ່າງປະເທດມີຄວາມເປັນປົກກະຕິ, ການສົ່ງອອກສິນຄ້າບັນລຸລະດັບເຕີບໂຕສູງພໍສົມຄວນ. ເຖິງຢ່າງໃດກໍຕາມ, ຄຽງຄູ່ກັບບັນດາມາດຕະການໄລຍະສັ້ນ, ລັດຖະບານພວມສືບຕໍ່ຜັນຂະຫຍາຍບັນດາມາດຕະການຢ່າງແຂງແຮງເພື່ອສ້າງການຫັນປ່ຽນໃຫ້ແກ່ພື້ນຖານເສດຖະກິດ. ທ່ານ ກາວຊີກຽມ, ຜູ້ຊ່ຽວຊານດ້ານເສດຖະກິດ ໄດ້ໃຫ້ຂໍ້ສັງເກດວ່າ:
“ທຸກມາດຕະການແກ້ໄຂຄວາມຫຍຸ້ງຍາກນັບທັງຫນູນຊ່ວຍຕະຫລາດໄດ້ເລີ່ມຕົ້ນຜັນຂະຫຍາຍ ແລະ ມີບາງຂົງເຂດໄດ້ມີການຫັນປ່ຽນ. ບັນຫາສຳຄັນກວ່າໝູ່ແມ່ນຕ້ອງແກ້ໄຂຈຳນວນສິນຄ້າຄ້າງສາງ, ເພີ່ມກຳລັງຊື້ ແລະ ຄວາມຕ້ອງການ. ບັນດາມາດຕະການແກ້ໄຂສະພາບຫນີ້ເສຍ, ອະສັງຫາລິມະຊັບໄດ້ປະກອບສວ່ນສ້າງການຫັນປ່ຽນໃຫ້ແກ່ພື້ນຖານເສດຖະກິດ.”
ໃນວິວັດການຜັນຂະຫຍາຍບັນດາມາດຕະການດັ່ງກ່າວນັ້ນ ບັນດາວິສາຫະກິດຕ້ອງພັດທະນາດ້ວຍຕົວເອງເພື່ອຍົກສູງມູນຄ່າເພີ່ມ ແລະ ຄວາມສາມາດແກ້ງແຍ້ງ, ເປັນຕົ້ນແມ່ນຄວາມສາມາດສ້າງກຳໄລ. ນີ້ແມ່ນບັນຫາທີ່ມີລັກສະນະເປັນຕາຍໃຫ້ແກ່ວິສາຫະກິດ, ເປັນຕົ້ນໃນສະພາບເຊ່ືອມໂຍງເຂົ້າກັບເສດຖະກິດໂລກປະຈຸບັນ.
ໃນສະພາບປະຈຸບັນ, ບັນດາວິສາຫະກິດປ່ຽນໃຫມ່ດ້ວຍເລື່ອງຈັດຕັ້ງການຜະລິດດຳເນີນທຸລະກິດຄືນໃຫມ່, ຍູ້ແຮງການລົງທຶນວິທະຍາສາດເຕັກໂນໂລຊີ, ຍູ້ແຮງວຽກງານຄຸ້ມຄອງ, ເຮັດໃຫ້ກົງຈັກກະທັດລັດ, ມີກົນໄກກວດກາການຜະລິດດຳເນີນທຸລະກິດຢ່າງມີປະສິດທິຜົນ. ດ້ວຍທິດກ້າວເດີນດັ່ງກ່າວໄດ້ສ້າງສັນຍານດີຫລາຍຢ່າງ, ນັ້ນແມ່ນນັບມື້ນັບມີຫລາຍເຄື່ອງໝາຍການຄ້າທີ່ມີຊື່ສຽງ,ໃນນັ້ນ ມີບໍລິສັດການຄ້າ ຫວຽດນາມ - ອາເມລິກາ ຈຳກັດ ສະຫນອງສະເພາະອຸປະກອນບຳບັດນ້ຳ ແລະ ສິ່ງແວດລ້ອມ. ໄລຍະປີ 2011- 2012, ຍ້ອນຄວາມຫຍຸ້ງຍາກລວມຂອງພື້ນຖານເສດຖະກິດ, ບໍລິສັດຖືກປະສົບກັບຄວາມແກ້ງແຍ້ງຈາກບໍລິສັດໃນຂະແຫນງນັບຮ້ອຍແຫ່ງ ສະນັ້ນ ສະພາບຫນີ້ຄ້າງຊຳລະຂອງບໍລິສັດຖືກແກ່ຍາວ ເຮັດໃຫ້ລະດັບຈະເລີນເຕີບໂຕຂອງບໍລິສັດຖືກຢຸດສະຫງັກ. ແຕ່ເຖິງຢ່າງໃດກໍຕາມ, ບໍລິສັດຍັງຄົງເປັນເຈົ້າການໃນການປ່ຽນໃຫມ່, ຍົກສູງປະສິດທິຜົນດ້ານເສດຖະກິດ ແລະ ສະແຫວງຫາກາລະໂອກາດຈາກບັນດາຄູ່ຮ່ວມມືຕ່າງປະເທດ ເພື່ອເພີ່ມກຳລັງຄວາມສາມາດແກ້ງແຍ້ງຂອງຕົນ. ທ່ານ ເຫືອຟູຢວານ, ປະທານສະພາບໍລິຫານບໍລິສັດ ເຕີນຫວຽດ ອາເມລິກາ ໃຫ້ຮູ້ວ່າ:
“ວິສາຫະກິດພວກຂ້າພະເຈົ້າໄດ້ພະຍາຍາມລົງທຶນປັບປຸງດ້ານເຕັກນິກເພື່ອຜະລິດອອກບັນດາຜະລິດຕະພັນມີຄຸນນະພາບດີກວ່າ ແລະ ລາຄາສຳເລັດຮູບຕຳ່ກວ່າ. ນອກນັ້ນ ບໍລິສັດຍັງຍູ້ແຮງການເກັບກຳດ້ານເຕັກນິກຈາກຕ່າງປະເທດ, ຜັນຂະຫຍາຍບັນດາອຸປະກອນແບບຢ່າງເຮັດແນວໃດໃຫ້ເໝາະສົມກັບເງື່ອນໄຂຢູ່ຫວຽດນາມ ເພ່ືອຫລຸດຜ່ອນລາຄາສຳເລັດຮູບ. ມີບັນຫາຫນຶ່ງອີກ ນັ້ນແມ່ນບໍລິສັດສ້າງການພົວພັນກັບຄູ່ຮ່ວມມືຕ່າງປະເທດທີ່ຢາກລົງທຶນຍາວນານຢູ່ຫວຽດນາມ ເພື່ອມີການຮ່ວມສຳພັນພັດທະນາແບບຍືນຍົງກວ່າ.”
ໃນຊຸມເດືອນຍັງເຫລືອຂອງປີ 2013, ລັດຖະບານຈະສືບຕໍ່ປະຕິບັດບັນດາມາດຕະການຢ່າງໄຫວພິບ
ພາບ:internet
|
ຄຽງຄູ່ການພັດທະນາດ້ວຍຕົວເອງ, ບັນດາວິສາຫະກິດ ຍັງຢາກໄດ້ຮັບການປະສານສົມທົບຢ່າງທັນການຈາກລັດ. ເລື່ອງຍົກສູງມູນຄ່າເພີ່ມ ແລະ ຄວາມສາມາດແກ້ງແຍ້ງຂອງວິສາຫະກິດ ພຽງແຕ່ສາມາດປະຕິບັດໄດ້ເມື່ອບັນດາວິສາຫະກິດມີຄວາມມານະພະຍາຍາມຈຳເປັນພ້ອມກັບການຫນູນຊ່ວຍຂອງລັດຜ່ານການປ່ຽນໃຫມ່ຈີນຕະນາການຄຸ້ມຄອງ ແລະ ສ້າງນະໂຍບາຍໃຫ້ສົມບູນແບບ. ທ່ານ ເລງອກຮືງ, ສະມາຊິກສະມາຄົມນັກທຸລະກິດ ຫວຽດນາມ ຖືວ່າ:
“ລັດ ຕ້ອງເດັດດ່ຽວປະຕິບັດບັນດາແຜນນະໂຍບາຍທີ່ໄດ້ວາງອອກ, ໃນນັ້ນ ມີການສ້າງໂຄງປະກອບລັດວິສາຫະກິດຄືນໃຫມ່, ສ້າງໂຄງປະກອບທະນາຄານການຄ້າຄືນໃຫມ່, ສ້າງໂຄງປະກອບການລົງທຶນຂອງລັດຄືນໃຫມ່. 3 ຂົງເຂດນີ້ ລັດວາງອອກຕ້ອງປະຕິບັດຢ່າງຂ້ຽວຂາດ, ແຕ່ໄລຍະຜ່ານມາຍັງຄົງຜັນຂະຫຍາຍຢ່າງຊັກຊ້າ.”
ໃນບົດລາຍງານຂອງລັດຖະບານຕໍ່ສະພາແຫ່ງຊາດໃຫ້ຮູ້ວ່າ: ໃນຊຸມເດືອນຍັງເຫລືອຂອງປີ 2013, ລັດຖະບານຈະສືບຕໍ່ປະຕິບັດບັນດາມາດຕະການຢ່າງໄຫວພິບຄື: ນະໂຍບາຍງົບປະມານ, ເງິນຕາ, ຮັບປະກັນການບໍລິຫານອັດຕາດອກເບ້ຍໃຫ້ເໝາະສົມກັບການຜັນແປຂອງໄພເງິນເຟີ້, ປະຕິບັດບັນດາມາດຕະການຫນູນຊ່ວຍກ່ຽວກັບອາກອນຢ່າງມີປະສິດທິຜົນ ເພື່ອຊ່ວຍວິສາຫະກິດຟື້ນຕົວການຜະລິດດຳເນີນທຸລະກິດ, ປະກອບສ່ວນຍົກສູງກຳລັງຄວາມສາມາດແກ້ງແຍ້ງໃຫ້ແກ່ບັນດາວິສາຫະກິດ. ນີ້ກໍແມ່ນຈຸດໝາຍສ້າງໂຄງປະກອບພື້ນຖານເສດຖະກິດຄືນໃຫມ່ມູ້ງໄປເຖິງການພັດທະນາແບບຍືນຍົງ.