(vovworld)- ປີ 2015 ຄາດຄະເນວ່າ ເສດຖະກິດຫວຽດນາມ ສືບຕໍ່ພັດທະນາເປັນປົກກະຕິ, ລະດັບຟື້ນຕົວສູງກວ່າປີ 2014 ເມື່ອຄາດໝາຍການຈະເລີນເຕີບໂຕ GDP ຄາດວ່າບັນລຸ ລະດັບ 6,2%, ສະພາບແວດລ້ອມແຫ່ງການດຳເນີນທຸລະກິດໃຫ້ແກ່ບັນດານັກລົງທຶນສະດວກກວ່າ.
ພາບປະກອບ:internet
|
ປີ 2015, ເສດຖະກິດຫວຽດນາມ ມີຄວາມສະດວກຫລາຍຢ່າງເພື່ອສືບຕໍ່ພັດທະນາ. ກ່ອນອື່ນ ຕ້ອງເວົ້າເຖິງຄວາມຕັດສິນໃຈຂອງລັດຖະບານໃນການສູ້ຊົນບັນລຸຄາດໝາຍການເຕີບໂຕ 6,2%. ລັດຖະບານ ກຳນົດຢ່າງຈະແຈ້ງບັນດາຫນ້າທີ່ຈຸດສຸມ, ລະອຽດແມ່ນ: ຕ້ອງຜັນຂະຫຍາຍບັນດາຂົງເຂດຂອງພື້ນຖານເສດຖະກິດຄືສຸມໃສ່ການຄຸ້ມຄອງ, ບໍລິຫານຮັບປະກັນເສດຖະກິດມະຫາພາກເປັນປົກກະຕິ, ປັບປຸງສະພາບແວດລ້ອມແຫ່ງການລົງທຶນ, ສ້າງຄວາມສະດວກໃຫ້ແກ່ການພັດທະນາການຜະລິດດຳເນີນທຸລະກິດ; ຍູ້ແຮງການປະຕິບັດບັນດາບາດກ້າວບຸກທະລຸຍຸດທະສາດ, ຍົກສູງສະມັດຕະພາບ, ປະສິດທິຜົນ ແລະ ກຳລັງແກ້ງແຍ້ງຂອງພື້ນຖານເສດຖະກິດ. ທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ກໍຢືນຢັນ: ການຫລຸດຜ່ອນອັດຕາຫນີ້ເສຍລົງຕ່ຳກວ່າລະດັບ 3% ໃນປີ 2015, ລະດັບປອດໄພຂອງລະບົບທະນາຄານແມ່ນມີຄວາມເປັນໄປ ເມື່ອທ້າຍປີ 2014 ຫນີ້ເສຍຄາດວ່າຍັງເຫລືອພຽງ 3,7 – 4,2% ເມື່ອທຽບໃສ່ລະດັບ 17% ໃນເດືອນ 9/2012. ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ:
“ລັດຖະບານຈະຊີ້ນຳຍູ້ແຮງການແກ້ໄຂຫນີ້ເສຍຢ່າງມີປະສິດທິຜົນຕິດພັນກັບການ ສ້າງໂຄງປະກອບບັນດາອົງການສິນເຊື່ອຄືນໃຫມ່. ສຸມໃສ່ປະຕິບັດບັນດາຫນ້າທີ່, ມາດຕະການຕົ້ນຕໍ, ໃນນັ້ນ ສືບຕໍ່ສ້າງກອບກົດໝາຍໃຫ້ສົມບູນແບບເພື່ອສ້າງເງື່ອນໄຂສະດວກໃຫ້ແກ່ການແກ້ໄຂຫນີ້ເສຍ, ເປັນຕົ້ນແມ່ນບັນດາຂໍ້ກຳນົດກ່ຽວກັບການຊື້, ຂາຍຫນີ້ເສຍ ແລະຊັບສິນຄ້ຳປະກັນ, ຄວາມຮັບຜິດຊອບຂອງຜູ້ກູ້ຢືມທຶນ ແລະ ສິດຂອງເຈົ້າຫນີ້. ສ້າງບົດບາດຫນ້າທີ່ສົມບູນແບບ, ເພີ່ມທະວີແຫລ່ງກຳລັງການເງິນ, ຍົກສູງກຳລັງຄວາມສາມາດເພື່ອເສີມຂະຫຍາຍບົດບາດຂອງບໍລິສັດຄຸ້ມຄອງຊັບສິນຂອງບັນດາອົງການສິນເຊື່ອ ໃນການແກ້ໄຂຫນີ້ເສຍ, ໃນນັ້ນ ມີເລື່ອງຊື້ຂາຍຫນີ້ຢ່າງເປີດເຜີຍ, ກະຈ່າງແຈ້ງຕາມກົນໄກຕະຫລາດ; ສົ່ງເສີມບັນດານັກລົງທຶນພາຍໃນ ແລະ ຕ່າງປະເທດຊື້ຂາຍຫນີ້ເສຍ ແລະ ຊັບສິນຄ້ຳປະກັນ;”
ໃນປີ 2015, ຄາດຄະເນວ່າຈຳນວນວິສາຫະກິດສ້າງຕັ້ງໃຫມ່ຈະເພີ່ມຂຶ້ນຄືນໃຫມ່, ກຳລັງຊື້ສິນຄ້າໃນຕະຫລາດກໍເພີ່ມຂຶ້ນ. ນີ້ແມ່ນສັນຍານຕັ້ງຫນ້າ. ບົນພື້ນຖານນັ້ນ, ຫວຽດນາມ ສືບຕໍ່ມີນະໂຍບາຍສ້າງຄວາມໄວ້ເນື້ອເຊື່ອໃຈໃຫ້ປະຊາຄົມວິສາຫະກິດ, ສ້າງເງື່ອນໄຂສະດວກທີ່ສຸດໃຫ້ແກ່ວິສາຫະກິດເຂົ້າຮ່ວມຕະຫລາດ. ທ່ານ ຮ່ວາງດັງກວາງ, ສະມາຊິກສະພາແຫ່ງຊາດແຂວງ ກວ໋າງບີງ, ກຳມະການກຳມາທິການເສດຖະກິດຂອງສະພາແຫ່ງຊາດຊຸດທີ 13 ຖືວ່າ:
“ກຳນົດຄາດໝາຍສຸມໃສ່ແກ້ໄຂຄວາມຫຍຸ້ງຍາກແກ່ການຜະລິດ, ດຳເນີນທຸລະກິດໃຫ້ວິສາຫະກິດແມ່ນຫົວເລື່ອງດຳເນີນງານຂອງປີ 2015. ໃນຕໍ່ຫນ້າ ລັດຖະບານຄວນສຳຫລວດກວດກາ, ຕີລາຄາການກະທົບຂອງລະບົບນະໂຍບາຍໃນການແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດຂະຫນາດກາງ ແລະ ນ້ອຍຄື ບັນດານະໂຍບາຍຍົກເວັ້ນ, ຫລຸດຜ່ອນ, ຕໍ່ກຳນົດເວລາເສຍພາສີອາກອນ, ອັດຕາດອກເບ້ຍກູ້ຢືມເພື່ອເພີ່ມເຕີມ, ປັບປຸງນະໂຍບາຍໃຫ້ເໝາະສົມໃນໄລຍະຕໍ່ໄປ. ພິເສດ ຄວນເພີ່ມລັກສະນະຄວາມເປັນໄປເພື່ອຮັບປະກັນບັນດາວິສາຫະກິດໄດ້ຮັບນະໂຍບາຍຫນູນຊ່ວຍ. ທີສອງ, ມີນະໂຍບາຍຍູ້ແຮງການກະຕຸກຊຸກຍູ້ການໃຊ້ສອຍ, ສົ່ງເສີມການລົງທຶນຂອງພາກເອກະຊົນຢ່າງແຮງ. ທີສາມ ລັດຖະບານ ຍູ້ໄວລະດັບຄວາມໄວການປ່ອຍເງິນໃຫ້ແກ່ບັນດາບ້ວງເງິນຫນູນຊ່ວຍໃຫ້ແກ່ວິສາຫະກິດ.”
ຄວາມມານະພະຍາຍາມບຸກທະລຸປະຕິຮູບລະບຽບການບໍລິຫານກໍແມ່ນກຳລັງຫນູນໃຫມ່ໃຫ້ແກ່ກິດຈະການປະຕິຮູບລະບອບນະໂຍບາຍ, ຍົກສູງກຳລັງຄວາມສາມາດແກ້ງແຍ້ງຂອງຫວຽດນາມ ໃນປີ 2015. ທ່ານ ຫວູຕຽນລົກ, ປະທານຫ້ອງການການຄ້າ ແລະ ອຸດສາຫະກຳຫວຽດນາມ ຖືວ່າ:
“ບັນດາອົງການເສດຖະກິດ, ການເງິນສາກົນຄື: World Bank, ທະນາຄານພັດທະນາ ອາຊີ (ADB), ກອງທຶນເງິນຕາສາກົນ ( IMF), ເວທີປາໄສເສດຖະກິດໂລກ ລ້ວນແຕ່ມີຂໍ້ສັງເກດລວມວ່າ ກິດຈະການປະຕິຮູບລະບອບນະໂຍບາຍເສດຖະກິດຢູ່ຫວຽດນາມ ແມ່ນໄປຖືກທິດ. ການສຳຫລວດຂອງຫ້ອງການການຄ້າ ແລະ ອຸດສາຫະກຳຫວຽດນາມ ແລະ ບົດລາຍງານຂອງບັນດາສະຫະສະມາຄົມວິສາຫະກິດພາຍໃນປະເທດ ໄດ້ສະແດງໃຫ້ເຫັນຄວາມເຊື່ອໝັ້ນຕໍ່ສະພາບແວດລ້ອມດຳເນີນທຸລະກິດແມ່ນເພີ່ມຂຶ້ນ, ວິສາຫະກິດສ່ວນຫລາຍໃຫ້ຮູ້ວ່າ: ເຂົາເຈົ້າຮັກສາ ແລະ ເປີດກວ້າງຂອບຂະຫນາດການດຳເນີນທຸລະກິດ.”
ພິເສດ ໃນປີ 2015 ແມ່ນຈຸດເວລາ ຫວຽດນາມ ຈະເຂົ້າຮ່ວມສັນຍາການຄ້າເສລີໃຫມ່ຈຳນວນຫນຶ່ງກັບບັນດາຄູ່ຮ່ວມມື. ນີ້ຈະແມ່ນບັນດາເງື່ອນໄຂ ແລະ ປັດໄຈໃຫມ່ເພື່ອເຊື່ອມໂຍງເຂົ້າກັບເສດຖະກິດໂລກຢ່າງເລິກເຊິ່ງ,ກວ້າງຂວາງກວ່າ, ແມ່ນກາລະໂອກາດໃຫມ່ສຳລັບວິສາຫະກິດຫວຽດນາມ, ເປັນຕົ້ນແມ່ນຄວາມສາມາດດຶງດູດບັນດາແຫລ່ງທຶນສາກົນກໍຄືເປີດກວ້າງຕະຫລາດສົ່ງອອກ. ສິ່ງດັ່ງກ່າວຈະສ້າງເງື່ອນໄຂຊຸກຍູ້ການເຕີບໂຕ. ເມື່ອຕີລາຄາກ່ຽວກັບກາລະໂອກາດນີ້, ທ່ານນາຍົກລັດຖະມົນຕີ ຫງວຽນເຕີນຢູງ ໃຫ້ຮູ້ວ່າ:
“ເບິ່ງລວມແລ້ວ, ດ້ວຍແງ່ຫວັງສຳເລັດ 14 ສັນຍາການຄ້າເສລີ FTA ໃນໄລຍະຈະມາເຖິງ, ສະພາບແວດລ້ອມດ້ານກົດໝາຍ, ດຳເນີນທຸລະກິດຫວຽດນາມ ຈະມີການປ່ຽນແປງຫລາຍຢ່າງ, ເປັນພື້ນຖານ, ສະດວກກວ່າ ແລະ ແກ້ງແຍ້ງກວ່າ. ຫວຽດນາມຈະກາຍເປັນປັດໄຈສຳຄັນໃນເຄືອຂ່າຍຮ່ວມສຳພັນເສດຖະກິດທີ່ກວ້າງຂວາງກັບ 55 ຄູ່ຮ່ວມມື, ໃນນັ້ນ ມີ 15 ປະເທດສະມາຊິກ G20. ສິ່ງດັ່ງກ່າວຈະເປີດກາລະໂອກາດຫລາຍຢ່າງໃຫ້ແກ່ບັນດາວິສາຫະກິດຕ່າງປະເທດ ມາລົງທຶນ, ດຳເນີນທຸລະກິດຢູ່ຫວຽດນາມ ສາມາດສົ່ງອອກສິນຄ້າ, ບໍລິການໄປຍັງບັນດາປະເທດຄູ່ຮ່ວມມືຂອງຫວຽດນາມ ດ້ວຍລະດັບອັດຕາພາສີຕ່ຳ ແລະ ບັນດາຮົ້ວກີດຂວາງເຕັກນີກຖືກຍົກເລີກ. ເວລານັ້ນ ຫວຽດນາມ ຈະເປັນປະຕູສຳຄັນເພື່ອໃຫ້ບັນດານັກລົງທຶນແຊກຊືມເຂົ້າຕະຫລາດບັນດາປະເທດອາຊຽນ ແລະ ເປີດກວ້າງອອກສຸ່ບັນດາປະເທດ ອີຢູ, ອາເມລິກາ.. ດ້ວຍກົນໄກບຸລິມະສິດຕາມບັນດາສັນຍາ FTA.”
ປີ 2015, ຫວຽດນາມ ສູ້ຊົນບັນລຸຄາດໝາຍການ ເຕີບໂຕ GDP 6,2%. ຄຽງຄູ່ກັບສິ່ງສະດວກນັ້ນ, ປີ 2015 ເສດຖະກິດຫວຽດນາມ ຍັງມີຂໍ້ຄົງຄ້າງຫລາຍຢ່າງຄວນເອົາໃຈໃສ່, ໃນນັ້ນ ມີບັນຫາຫນີ້ເສຍ, ສ້າງໂຄງປະກອບພື້ນຖານເສດຖະກິດຄືນໃຫມ່, ປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດ. ດ້ວຍບັນດາຄວາມສະດວກທີ່ມີຢູ່ແລ້ວ ພ້ອມກັບຄວາມຕັດສິນໃຈດຳເນີນງານຂອງລັດຖະບານ ແລະ ຄວາມເຫັນດີເຫັນພ້ອມຂອງປະຊາຊົນ, ເສດຖະກິດຫວຽດນາມ ມີບັນດາແງ່ຫວັງຕັ້ງຫນ້າ, ນຳມາເຊິ່ງກຳລັງຫນູນສຳຄັນໃຫ້ແກ່ການພັດທະນາຮອບດ້ານຂອງປະເທດຊາດ.